¹ Ta andaru ka isa minggu hio,katika andaru lagi sunsung kiat,wawei-wawei hio tulak gi ogang Yesus nelang nunda raragi-raragi sa haot na siap here. ² Balalu here kahalu watu hante haot ta guling tekei ogang. ³ Tapi,wayah here suluk,here bakoi kahalu bangkai Tuhan Yesus. ⁴ Katika here magun waoh gene hal hio,salenga-salenga naan rueh ulun sa makai lamma bakilau-kilauan mindri ta iring here. ⁵ Wawei-wawei hio takut tuu nelang manunduk rai here,tapi rueh ulun hio ngeau,"wuah inon kayo nupui ulun sa welum tekei penah ulun-ulun matei? ⁶ Yesus bakoi naan tangar iti,Aye haot buan.ingat bo gene inon sa haot na antuh e napot kayo katika Aye magun ta Galilea. ⁷ Aye ngeau bahwa Anak Murunsia harus na sarah napot tangan ulun-ulun ba dosa,na salibkan,nihi sagar buan waleng ta andrau ka telu." ⁸ Balalu,wawei-wawei hio ta ingat sagar paneran Yesus. ⁹ Udi here waleng tekei ogang Yesus,here nyurah kaluhan kajadian hio napot ka sebelas rasul namput here sa nutah Yesus sa lain e. ¹⁰ Wawei-wawei sa nyurah hal hio napot here rasul aye hio Maria Magdalena,Yohana,Maria ibu Yakobus,nihi papire wawei lain. ¹¹ Tapi,paneran wawei-wawei hio na tanguh oso ulah here rasul nihi here bakoi harap napot wawei-wawei hio. ¹² Tapi,Petrus mindri palus nempat gi ogang Yesus.Aye mambungkuk nelang nginni gi huang,tapi aye ekat kahalu kain linen pa mungkus bangkai.Udi hio,Petrus mudi nihi waoh tuu entu inon sa haot jari. "Yesus nyantarang Areb E napot sa nutah E ta lalan nuju Emaus ¹³ Tangar andrau hio lei,2 ulun sa nutah Yesus tulak gi isa kua desa bangaran Emaus sa kira-kira 60 stadia lawit e tekei kota Yerusalem. ¹⁴ karueh ulun hio nyurah gene kaluhan kajadian sa jari. ¹⁵ Katika here rahat ba surah-surah nihi ba tukar pikiran,Yesus kakareb hawi ngariet nelang takia hayak-hayak here. ¹⁶ Tapi,mate here tahalang hampe here bakoi kiuh kataru Aye. ¹⁷ Yesus ngeau napot here,"inon sa na surah kaon rueh nelang takia?"karueh ulun hio lei tunuk nihi rai here kainian mahanang atei tuu. ¹⁸ Isa tekei here sa bangaran Kleopas ngeau napot Aye,"inonkah Kayo isa-isa e ulun lain ta Yerusalem sa bakoi karasa gene inon sa jari ta aro bio-bio iti?" ¹⁹ Yesus ngeau,"gene inon?"here lei ngeau napot Aye,"gene Yesus tekei Nazaret.Aye hio erang kulun nabi sa penu kuasa huang paneran namput gawian E ta hadapan Allah nihi ta hadapan kaluhan bangsa kami. ²⁰ Tapi,imam-imam kepala nihi here pemimpin kami manyarah Aye mat na hukum matei,nihi here menyalibkan E. ²¹ Sabujur e kami baharap bahwa sa sagar nyanapas bangsa Israel.Tapi,andrau iti aye hio andaru ka telu nekei kaluhan hio jari. ²² Tapi,papire wawei tekei penah kami haot ngangemah kami.katika here muneng ta ogang sunsung kiat, ²³ here bakoi kahalu bangkai Yesus.Balalu,here waleng palus mawara bahwa here haot nginni panyantarangan malaikat-malaikat,sa ngantuh bahwa Aye welum. ²⁴ Udi hio,papire tekei kami tulak gi ogang nihi kahalu lai sameh sa na antuh ulah wawei-wawei hio.Tapi,here bakoi kakinni Yesus." ²⁵ Udi hio Yesus ngeau napot here,"uh,kala hio bungul e kayo nihi lamat atei mat harap kaluhan hal sa haot na antuh ulah here nabi. ²⁶ bakoikah Kristus harus nginam ka rara iti balalu suluk gi huang kemuliaan E." ²⁷ Balalu,Yesus ngajelaskan kaluhan hal sa na tulis huang kaluhan Kitab Suci gene areb E,mulai tekei Kitab Musa hampe kaluhan Kitab here nabi. ²⁸ katika here haot riet gi desa Emaus,Yesus Yesus takia tarus same kakan nampalus kiaan E. ²⁹ Tapi,here nahan Aye nihi ngeau,"muneng bo nihi kami gene andrau haot kakan kamalem nihi mate andrau kakan leteng."Balalu, Yesus suluk mat muneng nihi here. ³⁰ Katika Aye bagabung nihi here tangar meja uneng kuman,Yesus ngalap roti nihi mamberkat e.Aye nampuhi-nampuhi e,balalu ngami e napot here. ³¹ Wayah hio,mate here ta uka palus here kataru Yesus.tapi salenga Yesus jawoh tekei panginni here. ³² Udi hio,ba surah lah here isa nihi sa lain,"bakoi lah atei takam ba kobar-kobar katika Aye bapander nihi takam salawah kiaan nihi katika Aye ngajelas Kitab Suci napot takam?" ³³ Ta wayah hio lei,here mindri balalu waleng gi Yesrusalem.here panalu ka sebelas murid nihi ulun-ulun sa hayak here rahat bakumpul hayak-hayak. ³⁴ murid-murid hio ngeau napot here rueh,"Tuhan bujur-bujur haot buan nihi nyantarang areb E napot Simon!" ³⁵ Kararueh sa nutah hio lei nyurah inon sa jari huang kiaan here.here nyurah sameh awe here kataru Yesus katika Aye nampuhi roti."Yesus nyantarang Areb napot sa nutah-sa nutah E ³⁶ Katika karueh ulun hio magun nyurah kajadian iti,Yesus mindri ta penah-penah here palus ngeau napot here,"Damai hayak kaon." ³⁷ Tapi,here tarewen nihi takut.here nanguh bahwa here rahat nginni panguluh. ³⁸ Udi hio,Yesus ngeau napot here,"wuah inon kayo tarewen nihi bakoi harap timul huang atei nu? ³⁹ Inni bo tangan Kuki nihi pee Kuki.iti bujur-bujur Kuki.japut bo Kuki nihi inni bo,panguluh bakoi naan daging nihi tulang sameh sa na inni kayo tangar Kuki." ⁴⁰ Udi Yesus ngeau iti,Aye nutui tangan nihi pee E napot here. ⁴¹ Rahat here magun mete harap gene sanang nihi waoh-waoh,Yesus nane napot here,"inonkah ta iti kayo naan sa tau mat na kuta?" ⁴² Balalu here ngami erang ka tetek kenah papui napot Aye. ⁴³ Yesus ngalap kenah hio nihi nguta e ta hadap here. ⁴⁴ Udi hio,Yesus ngeau napot here,"iti lah paneran sa na antuh Kuki napot kayo katika Kuki magun hayak kayo.kaluhan hal sa na tulis gene Kuki huang hukum Taurat Musa,kitab here nabi,nihi Mazmur harus na genep." ⁴⁵ Udi hio Yesus nguka pikiran here hampe here kiuh mamaham Kitab Suci. ⁴⁶ Yesus ngeau lagi napot here,"naan tatulis bahwa Kristus harus rara nihi buan tekei penah ulun matei ta andrau ka telu. ⁴⁷ Balalu,pertobatan mat pangampunan dosa sagar na santarang huang aran E napot kaluhan bangsa,mulai tekei Yerusalem. ⁴⁸ Kayo aye hio saksi-saksi tekei kaluhan iti. ⁴⁹ Karasa bo,Kuki ngirimkan janji Ambah Ku napot kayo.Tapi,muneng bo ta kota Yerusalem hampe kayo na lengkapi nihi kuasa tekei uneng sa entu."Yesus ta enat gi Surga ⁵⁰ Udi hio,Yesus nunda here sa nutah E gi wading kota hampe Betania.Ta aro,Aye ngenat tangan E nihi memberkati here, ⁵¹ Katika Yesus memberkati here,Aye bapisah tekei here nihi ta enat gi Surga. ⁵² Balalu,here menyembah E nihi waleng gi Yesrusalem nihi sanang tuu. ⁵³ Here muneng tarus ta huang Bait Allah nihi memuji Allah.