¹ Ena, koe Kristus ukah menderita secara jasmani, kakatnka iko mempersenjatai kompuko ali pikiran se sama, koe ulutn se ukah ngalami penderitaan jasmani, ukah behenti ngulah dosa ² sehingga suakng ngelalatnni sisa wolupm ba denia situ, ise doho gane baya kenakatn mersia, melaitnkan kenakatn Allah. ³ Koe sukupka waktu pe masa baiko agitn ngulah kebiasan ulutn-ulutn se doho ngenal Allah; wolupm suakng hawa nafsu, mabuk, pesta pora, ngkinum-kinuman, ali se nyembah behala se ponu kekejian. ⁴ Kletu, reo heran beta desukng ngedapati bahwa iko doho gane baya suakng kedaatan liar se reo ulah. koe sio, reo memfitnah iko. ⁵ Leka, reo anta ngumi pertanggungjawaban ampe Ise se anta ngehakimi ulutn se wolupm ali se mate. ⁶ Agitn alasan situlah, Injil waberitakan ampe ulutn-ulutn se kletu ukah mate sehingga reo ukah wahakimi ba denia situ sesuai ali standar mersia, leka reo wolupm secara roh menurut ukuran Allah. Pakaideh Karuniako agitn ngelayani ⁷ Awis ante ulep sesuatu ukah riet. koe sio , waspadadeh ali bejaga-jagadeh agar kate bedoa. ⁸ Ba ombo awisne sio, truska saling mentuasi ali tu'u tu;u koe tuasi nolop deo beta dosa. ⁹ Tunjukanka keramahan erai ali laitnne tanpa ngeluh. ¹⁰ Koe setiap ulutn ukah nerima karunia, pakaideh sio agitn ngelayani erai ali lainne sebagai pelayan se maeh ombo bebagai karunia ante Allah; ¹¹ ise se montuh, maehdeh ise ngontuh sebagai ulutn se nyambat firman Allah; ali ise se ngelayani, maehdeh ise ngelayani ali kekuatan se Allah ngumi sehingga suakng segala hal, Allah wamuliakan nyendalo Yesus Kristus. Agitn Iselah kemuliaaan ali kuasa ampe seola-olane . Amin. Menderita sebagai se baya Kristus ¹² Eraiuntukng-eraiuntukng se kutuasi, aideh tekajut ali apuy pencobaan se awi agitn nguji iko, seolah-olah sesuatu se aneh tenjari pombo iko. ¹³ Leka, besukacita deh koe iko baya ngepo bagian suakng penderitaan Kristus sehingga iko lou kate bersukacita ali begembira pe pentukng kemuliaan-Ne wanyatakan. ¹⁴ Bebahagiadeh ena iko walejeng koe ngaratn Kristus, koe Roh kemuliaan ali roh Allah sindroi ba suakng iko. ¹⁵ Leka , ai naatn ba rokakng ko se menderita sabagai pembunu, maling, se ngulah daat, atau sebagai ulutn se ketuju ngecampuri urusan ulutn laitn. ¹⁶ Leka, ise poh se menderita sebagai ulutn Kristen, aideh ise mai, sebalikne kakatndeh ise memuji Allah koe nanggung sambatan sio. ¹⁷ Ukah saatne penghakiman wamulai anjak keluarga Allah. Ali, ena penghakiman Allah ante taapm, semonekah nasib ulutn-ulutn se doho taat ampe Injil Allah? ¹⁸ Ena ulutn saleh ka upal agitn waselamatkan, semone ali ulutn daat ali ulutn bedosa? ¹⁹ Koe sio, biarka reo se menderita koe kenakatn Allah, mepesayakan jiwane ampe sang pencipta se setia, sambil trus ngulah none se maeh.