¹ Dan, Yesus nerau kadua belas murid-E dan ngami here kuasa hamau roh-roh najis mat mangusir roh-roh hio dan mat nangkaoh segala masam panyakit maupun segala masam kahanangan ² Itilah aran-aran kadua belas rasul hio : Sa pertama, Simon sa na antuh Petrus, dan Andreas pulaksanai e, dan Yakobus anak Zebedeus, dan Yohanes pulaksanai e, ³ Filipus, dan Bartolomeus, Tomas, pangumpul pajak, Yakobus anak Alfeus, dan Tadeus, ⁴ Simon ulun Zelot, dan Yudas Iskariot sa mahianati Yesus. ⁵ Yesus mangutus kadua belas rasul hio dan nunyu here, "Ada tulak ga lalan bangsa-bangsa lain antawa masuk ga huang kota ulun Samaria, ⁶ Malainkan tulaklah ga domba-domba sa tawang neke penah umat Israel. ⁷ Dan, salawah hanyu tulak, waralah nihi ngantuh, 'kerajaan surga haot riet.' ⁸ Tangkaohlah sa sakit, samelumlah sa matei, tangkohlah sa kusta, dan usirlah roh-roh jahat. Hanyu manarime nihi cuma-cuma, amilah nihi cuma-cuma. ⁹ Ada hanyu nuna amas, antawa perak, antawa tembaga huang pening nu, ¹⁰ antawa tas mat perjalanan, antawa rueh lamar pama, antawa sandal, antawa tungkeh ulah erang kaulun panggawi pantas mat panguta e. ¹¹ Dan, ta kota antawa desa awepun sa hanyu masuki, selidikilah hie sa layak ta huang e dan munenglah ta aro hampe hanyu tulak. ¹² Katika hanyu mamasuki lewu hio, amilah salam. ¹³ Dan, jaka lewu hio layak, biarlah damai sejahtera nu minau hamau e, tatapi jaka bakoi, biarlah damai sejahtera nu waleng ga hanyu. ¹⁴ Dan, hie bo sa koi manarime hanyu antawa koi kakan ngarengei antuhannu, katika hanyu kaluar neke lewu antawa kota hio, kibaskanlah debu pe'e nu. ¹⁵ Aku ngantuh sa sabujur e ga hanyu bahwa pada andrau penghakiman, tane Sodom dan Gamora akan lebih tau mananggung e neke kota hio," Kasulitan-kasulitan sa akan nahadapi Para Murid ¹⁶ "I'ni, Aku mangutus hanyu sameh domba ta penah serigala. Ulah hio, jarilah cerdik sameh nipe dan tulus sameh wurung-wurung merpati. ¹⁷ Akan tatapi, ba ati-atilah ta hadap ulun-ulun ulah here akan manyarahkan nu ga Sanhedrin dan akan mancabuk nu ta sinagoge-sinagoge here. ¹⁸ Dan, hanyu akan na tuna ga hadapan para penguasa dan para raja demi Aku, Sebagai kesaksian ga here dan ga bangsa-bangsa lain. ¹⁹ Namun, katika here manyarahkan hanyu, ada khawatir tentang kala'awe antawa inon sa hanyu antuh ulah saat hio lei akan na ami ga hanyu inon sa harus hanyu antuh. ²⁰ Ulah, bakoi hanyu sa bapaner, tetapi hio ayelah Roh Amah nu sa bapaner ta huang hanyu. ²¹ Pulaksanai akan manyarahkan pulaksanai e ga pampatei, dan amah tahadap amah e. Dan anak-anak akan nawan para ulun matueh dan munu here. ²² Hanyu akan na rikang oleh kaluhan ne ulah aran-Ku, tatapi ulun sa batahan hampe akhir akan na salamatkan. ²³ Katika here manyiksa hanyu huang isa kota, malempatlah ga kota sa lain. Aku ngantuh sa sabujur e ga hanyu bahwa hanyu koi akan jari nangkah kota-kota Israel hampe Anak Marasia hawi. ²⁴ Murid koi malabihi guru e, kalahio lei hamba koi malabihi tuan e. ²⁵ Cukuplah jaka murid jari sameh guru e, dan hamba jari sameh tuan e. Jaka here ngantuh tuan lewu hio Beelzebul, labih buruk lagi ga anggota kaluarga e." Takutlah ga Allah Talla bakoi ga marasia ²⁶ "Ulah hio, ada hanyu takut ta hadap here ulah koi naan inon pun sa tatutup sa koi akan ta ungkap, antawa sa sampadina sa koi akan na karasa. ²⁷ Inon sa antuh Ku ga hanyu huang maieng, antuhlah hio huang tarawa. Dan, inon sa hanyu rengei na keneh ta silu nu, beritakanlah ta hamau hapau lewu. ²⁸ Ada takut ga here sa munu tenga, tatapi koi iuh munu jiwa, malainkan talabih takutlah ga aye sa iuh nampajawoh jiwa awe pun tenga ta neraka. ²⁹ Bakoikah rueh kaikui wurung pipit na batang mat isa duit? Dan, koi naan erang kaikui neke here akan lawu ga tane ta luar kahandak Amah nu. ³⁰ Bahkan, wulu ulu nu kaluhan e tahitung. ³¹ Ulah hio, ada takut, hanyu labih ba nilai neke ajoh wurung pipit." Mangaku Yesus ta Hadapan Ulun Lain ³² "Jari, satiap ulun sa mangakui Aku ta hadapan marasia, Aku lei akan mangakui e ta hadapan Amah-Ku sa naan ta surga. ³³ Akan tatapi, hie sa manyangkal Aku ta hadapan marasia, Aku lei akan manyangkal e ta hadapan Amah-Ku sa naan ta surga." Tujuan Panawi Yesus ³⁴ "Ada ba pikir bahwa Aku hawi mat nuna perdamaian ta bumi. Aku hawi koi mat nuna perdamaian, malainkan pedang. ³⁵ Ulah Aku hawi mat misah laki-laki neke amah e, anak wawei neke ine e, nantu wawei neke umpu wawei e, ³⁶ dan musuh erangkaulun ayelah neke anggota keluarga e ³⁷ Hie sa labih mengasihi amah antawa ine e neke Aku, koi layak bagi-Ku. Dan, hie sa labih mangasihi anak laki-laki antawa anak wawei e neke Aku, koi layak bagi-Ku. ³⁸ Dan, hie koi ngume salib e dan uma Aku, koi layak bagi-Ku. ³⁹ Hie sa mempertahankan nyawa e akan kajawoh nyawa e, dan hie sa kajawoh nyawa e demi Aku akan kaiuh e." Upa neke Allah Talla ⁴⁰ "Hie sa manarime hanyu, manarime Aku. Dan, hie sa manarime Aku, manarime Aye sa mangutus Aku. ⁴¹ Hie sa manarime nabi huang aran nabi akan narime upa nabi. Dan, hie sa narime ulun bujur huang aran ulun bujur akan narime upa ulun bujur. ⁴² Dan, hie sa ngami ngoot ga salah isa neke ulun-ulun sa halus iti meskipun ekat sagalas ranu marisak huang aran erang kaulun murid, Aku ngantuh sa sabujur e ga hanyu, aye koi akan kajawoh upa e.