¹ Jesusi ghaghambire karo nawaka thishongero wendi, ''Pakarire katughuru ghumwe oyu gha karire no mupiterithi, ghapwire kumu tongwere eshi mupiterithi wendi ne nga pethanga yiwana yendi. ² Podigho katughuru ghomutungi ghethire mupiterithi wendi nogha mutongwerire eshi, 'Yinu munye eyi nina kuyuva kuhatera koye? Tape thishupo thoghupiterithi ghoye, mbadi sho kone karo kukara mupiterithi wange.' ³ ''Mupiterithi gha kutongwerire thinda eshi, 'Yinu munye sho ni kone kutenda, kenge eshi muhona wange kuna kuni shwayitha mughupiterithi wange? Mbadi na kara nongcamu dho kuthima, no ame honye kukumbera. ⁴ Nadimuka eshi yipi sho ni tende, podigho eshi apa shoha nishwayithe muyirughana yange yoghupiterithi, hanu mbo hana ni tambura mumaghumbo ghawo.' ⁵ Mupiterithi poghethire wahe hakamakongo wamuhona wendi, no ghepurire gho kutanga, 'Ghungatji wa korota kwamuhona wange?' ''Gha ghambire eshi, ⁶ 'Makende dikumi gho maghadhi gho olive. ''Gha mu tongwerire, 'Shimbe mukudi ghoye, hungumane wangu, notjange makumi kwoko.' ⁷ ''Mupiterithi gha ghambire kwaghumwe, 'Ghungatji wakorota?' ''Gha huthire, 'Mashaka dithere ghomavumbukiro.' Ghamutongwerire eshi, 'Shimbe mukudi ghoye, no tjange kwokohatu.' ⁸ Muhona pogha roghurire mupirerithi gho kupira kukushuka yoyishi rughanine thiwana. Hanu hokaye kano kurughana thiwana nohanu wagho kupitakana nohanu homunyenge. ⁹ Kuna kumutongwera, mutende hashere murupe rughutungi gho kupira kukushuka podigho eshi paka pwa, ha ka mutambure mudyango dyo kukarererapo. ¹⁰ Kehe yu gho kukara no makurupero muyinu yoyimbiru ghana kukara karo nomakurupero muyinu yoyingi, no yu ghokupira kukara nomakurupero muyinu yoyimbiru ne mbadi mbadiko makurupero muyinu yoyingi. ¹¹ Ngeshi ghuna kara nomakurupero mukurughanitha ghushwi ghushikushuka, yidye mbo gha kukurupera noghushwi ghoshemwa? ¹² Ngeshi mbadi ghuna kara no makurupero mukurughanitha yinu yawanu, yidye gha kukupa manyinga ghoye? ¹³ Mbadiko murughani gho kurughanena hahona hawadi, nanyi gha kunyenge po ghofotji no kuhaka po ghumwe, endi nanyi gha kukutape kwaghumwe nokushwenako ghumwe. Mbadi wa kukona kurughanena Nyambi noghushwi panako dhofotji. ¹⁴ Pano haFarasayi, awa hahakire masherenyi, hayuvire yinu yoyihe yi, haghambire yinu yoyimango kwendi. ¹⁵ Gha ghambire kukwagho, ''Kukushupera mwathinda kumeho ghawanu, ene Nyambi ne ghadimuka dhimi tjima dhenu. Ethi hayeyura mukatji kawanu ne yinyatha kughutho waNyambi. ¹⁶ Muragho noha porofeta yakarire nongcamu kate gheyire Johannesi. Kutunda ruvedhe ruya, mbudhi dhodhiwa ghoghufumu waNyambi kuna kudhiyaghura, no wahe kuna kukondja hakengenemo. ¹⁷ Ene ghuredhu kudiwiru no kaye kupita munyima nonando dhofotji dho mumuragho dhakukare eshi mbadiko mudyo. ¹⁸ Kehe yuno gho kumwagha munuwendi no kuyeka ko ghumweya ne kutenda ruhonda, no oyu gho kuyeka oyu hamwagha katughuru wendi ne kuhondera. ¹⁹ ''Pakarire katughuru ghumwe ghomutungi oyu gha vatire yitere yoyiwa thikuma no nga ndjobwananga kehe diyuwa noghushwi wendi. ²⁰ Mukakukumbera ghumwe gho dina dyo Lazarusi nga raranga kuheka dhendi, ghayarire yitombo, ²¹ no ghashanine kudya eyi yawire kutishi wakatughuru ghomutungi. Nombwa nadho dheyire nodhirathe payitombo yendi. ²² Yakarire keho eshi mukakukumbera yu ne ghafire nohana mushimbire haengeli hamutware kumutara waAbrahamu. Katughuru ghomutungi naye ghafire noha muvumbekire, ²³ muyinyanda, kukara muyinyanda yishokuru, gha kengire kuwiru no ghamonine Abrahamu kokayenda naLasarusi kumbadi dhendi. ²⁴ Pogha kuyererire ghughamba eshi, 'Tate Abrahamu, nifere neke notume Lasarusi, ghature munwe wendi mumeyu no gha ndokithere parudimi rwange, amene muyinyanda nidi muno muno mumudiro.' ²⁵ ''Ene Abrahamu gha muhuthire eshi, 'Mwanange, vuruke eshi muyipara yoye wawanine yinu yoye yoyiwa, naLasarusi thikadyo yinu yoyimango. Ene dyaro ne ghana pu kuhengaghura kuno, owene muyinyanda ghudi. ²⁶ Mutara gho yi, dyango dyo dikuru dyakara pakatji ketu, podigho eshi awa hana kushana kuregha kutanda kuno kate ko ne mbadi hakone, no mbadiko gho kukona kutunda ko gheye kuno. ²⁷ ''Katughuru gho mutungi ghaghambire eshi, 'Kuna kumukumbera, Tate Abrahamu, eshi ghumutume kudighumbo dyatate - ²⁸ ame nakara nohaminange hakwoko-podigho eshi ghaka wakonekithe, podigho eshi mbadi ya kukare eshi nawo hakeye kuno kudyango dyoyinyanda. ²⁹ ''Ene Abrahamu ghamuhuthire eshi, 'Hakara naMosesi nawaporofeta; hakona kuwategherera.' ³⁰ Katughuru ghomutungi gha huthire eshi, 'Ka, Tate Abrahamu, ene ngeshi ghumwe wawafu ghayendere ne, nanyi haka piruke.' ³¹ Ene Abrahamu ghaghambire eshi, 'Ngeshi mbadi sho ha tegherere kwaMosesi nokwawaporofeta, mbadiko oyu gha kuwahonga ngeshi ghumwe ghavumbuke kwawafu.'''