¹ Pano haka kushimba mutero wahe nohaharuri wahe heyangire kwa Jesusi mukuna mutegherera. ² Pofotji haFarasayi nawa kamarukwaro hakuvoyongire mukatjikawo ghughamba eshi, ''Oyu katughuru ne kutambura hayiharuri, no kudya karo nawo.'' ³ Jesusi ghaghambire ditadhi dino kukwagho, ⁴ ''Yidye ghopapenu, ngeshi ghakara nondjwi dithere no kuyongarithapo ndjwi ghofotji, gha kupira kuthigha dhi makumi kwokone nokwone mumburundu, no kuyenda ghakashane oyu ghana yongara kare kamuwana? ⁵ Nopa kamuwana, kughukukambeka pathivudhi no kushamberera. ⁶ Pakuna kuma kudighumbo, ghana kwitha hashere wendi nohama paraghumbo ghendi, ghughamba nawo eshi, 'Muni shoghereritheko, ame nakawana ndjwi wange oyu nga yongara.' ⁷ Kuna kumutongwera eshi ngambi kemo, kushamberera mudiwiru kwathiharuri ghofotji oyu ghana piruka, kupitakana makumine none hakushuki awa hana piri kupiruka. ⁸ Endi mbuyama munye oyu ghadi no muwayawaya dikumi gho siliveri, ngeshi ghana kuyongarithapo ghofotji, ghana kupira kumuneka munyenge, no kukomba ndhugho no kushna thiwana kare kughuwana? ⁹ Nopa kughuwana, ghana kwitha hashere wendi pofotji nawaka maparaghumbo wendi ghughamba eshi, 'Muni shambereritheko, ame nawana muwayawaya wange oghu ghuna niyongara.' ¹⁰ Thika dyo, kuna kumutongwera eshi, kukara yishamberera kughutho wawa engeli waNyambi kwathiharuri ghofotji oyu ghana piruka.'' ¹¹ Po ghaghambire Jesusi eshi, ''Katughuru ghumwe ghakarire nahanendi hohangaghu hawadi, ¹² gho mwanuke po ghaghambire kwawihe eshi, 'Tate, nipe ghushwi wange oghu wani tawera,' Pogha watawerere ghushwi wagho pakatji kawo. ¹³ Mbadi papitirepo mayuwa ghomengi, kaughurighana yu gha kongawedhire yinu yendi eyi gha karirenayo nogha yendire kuditunga dyokayenda thikuma, no gha kapethire ghushwi wendi noghumbondo. ¹⁴ Apa gha ka manine kupetha yinu yoyihe, rukukutu rorukuru rwa kuhanyene muditunga diya, no gha tangire kunyanda. ¹⁵ Gha yendire na gha ka kukutithire thinda ko mukaka koghatji ghumwe ghomo muditunga, oyu gha mutumine mudipya gha kadithe yinguru. ¹⁶ Aye nga dyanga noyinguru muyiwato yoyishi mbadiko oyu nga mupanga yidya. ¹⁷ Ene apa gha yi kundhundhire katughurughana yu, gha ghambire eshi, Hangatji harughani ha tate awa kara noyidya yokurikanya, amene konidi kuno, kuna kufa kundhara! ¹⁸ Nanyi ni shwaghe kuno no kuyenda kwatate, no ka mutongwera eshi, 'Tate, naharura kudiwiru no kukoye. ¹⁹ Mbadi na rikanya karo kunitha eshi nomwanoye; Ni ture name ni kare yira ghumwe gho harughani ghoye.''' ²⁰ No katughurughana yu gha shwayire no gheyire kwawihe. Apa gha karire eshi shime kayenda, wihe gha mumonine no thamuyarere thineke, gha mu tjireghere ghumushamberera no kumuncumita. ²¹ Mwanendi gha mu tongwere eshi, 'Tate, naharura mudiwiru no kukoye. Mbadi na rikanya karo kunitha eshi nomwanoye.' ²² ''Wihe gha ghambire kwawarughani wendi, Murete wangu dirwakani dyodiwa, nomudimuvateke, nomuture kadeya kunyara dhendi, no yisandari kumapadhi ghendi. ²³ No mukarete ndana gho kununa nomumupaghe. Tushogherere no mukandi! ²⁴ Oyu mwanange ne gha fire, ene pano ne ghana para. Gha yongarire, no nga tumuwana.' Po ha tangire kushamberera. ²⁵ ''Pano mukurwendi ghashwayire mudipya. Mukwiya kwendi pepi nodighumbo, gha yuvire membo no yikina. ²⁶ Ghethire murughani ghumwe eshi yinu munye yakuhokoka. ²⁷ Murughani ghamuhuthire eshi, 'Minoye ghana kahuka kudighumbo nowiho ghana pagha ndana gho kununa thikuma yoyishi ghana kahuka thiwana.' ²⁸ ''Mukurwa munu gha tokotire nombadi ghengeninemo, no wihe gheyire kwendi noghana mukumbere. ²⁹ Ene mwanendi gho mukuru gha muhuthire ghughamba eshi, 'Kenge, Mamwaka ghomengi gha ame nakurughanena, nombadi nareya muragho ghoye, ene mbadi wanipa nomboghana nishamberere nawashere wange, ³⁰ ene apa nga na kumu mwanoye, oyu gha kapetha ghushwi ghoye nohambuyama hokukughuritha, nga ghu mu paghera ndana gho kununa thikuma.' ³¹ Wihe gha mutongwere eshi, 'Mwanange, owene nange wakara kehe pano, noyoyihe yange ne yoye. ³² Ene yatu roghere kushogherera no kushamberera, yoyishi oyu minoye ne ghafire, nopano ne ghana para; ghayongarire no ngatumuwana.'''