¹ Yahokokire muSabbata ghumwe, apa gha yendire mudighumbo dyamupiterithi ghumwe wawaFarasayi gha kadye ghuroto, awo ha munoghomene thikuma. ² Kamanana, kughutho wendi kwakarire katughuru oyu gha karire noyikorwa yo kutugumana payirama. ³ Jesusi ghepurire hadimuki homuragho waha Yudah nowa Hafarasayi, ''Yahungama mumuragho kwirura muSabata endi mbadi yahungama?'' ⁴ Ene awo hakarire thipore. Podigho Jesusi gha kwatire katughuru yu, nokumwirura noghoghama muningire ghakayende. ⁵ Ghaghambire nawo eshi, ''Yidye ghopapenu ghakara nomwana ghomungaghughana endi hove oyu ghana wera mudithima mudiyuwa dyoSabata mbadi mbo mukokamo popo wangu ndi?'' ⁶ Mbadi ha konine kuhutha dipwero di. ⁷ Apa Jesusi gha monine awa hapwire kwitha edi hana kutorora yipura yofumwa, ghaghambire mumashendende nawo eshi, ⁸ Ngeshi ghana kwitha ghumwe kumukandi ghomayekero, wahungumana kudyango dyofumwa, yoyishi pamwe nga hetha karo munu gho fumwa kupitakana we. ⁹ Pakuna kuma munu oyu nga mwitha mwahe, nanyi ghakuna kuning eshi, 'tape dyango dyoye koyu ghumwa,' nohonyi mboghuna yendi ghuka hungumane kudyango dyokupira fumwa. ¹⁰ Ene ngeshi kuhana mwitha, yende ghukahungumane mudyango dyokupira fumwa, podigho eshi pakwiya oyu ghana mwitha, nanyi gha kukutongwere eshi, 'Mushere, yende kughutho.' Apa mbo ghuna kara nofumwa kwawahe awa hakuhungumana kutishi noye,' ¹¹ Kwakehe yu gho kukuyeyura thinda mboghana pu kumbirupitha, no yu ghokukumbirupitha thinda mbo ghana pu kuyeyura.'' ¹² Jesusi ghaghambire kwakatughuru ghamwithire eshi, ''Ngeshi kughuna kutapa murarero endi yidya, wetha hashere endi hamina endi hapoye ngambi hamaparaghumbo ghoye hohatungi, yoyishi nawo mbohana kwitha, no mbo ghuna pu kuruwera. ¹³ Ene ngeshi kuna kutapa yidya, withe hahepwe, harema, haka kupira kuyenda, hamukunga, ¹⁴ no mboghuna pu kutungeka, yoyishi awone ne mbadi hakukuruwera. Owene mbughuna pu kuruwera mumuvumbukero wawahungami.'' ¹⁵ Apa ghumwe ghopapawo oyu gha hungumanine kutishi naJesusi gha yuvire yinu yi, gha ghambire kukwendi eshi, ''Oyu ghapwa kutungeke ne oyu gha kadya ghuroto mughuFumu waNyambi!'' ¹⁶ Ene Jesusi gha mutongwere eshi, ''Katughuru ghumwe gha rongathanine murarero ghoghukuru noghethire hanu hohengi. ¹⁷ Pakumana kurongathana murararero, gha tumine murughani wendi gha ka tongwere awa nga hetha eshi, 'Mwiye yoyishi yinu yoyihe ne yina rogho.' ¹⁸ ''Wahe hatangire kutapa yitambo. Gho kutanga ghamutongwere eshi, 'Naghuru dipya, nonashana niyende niyende nikadi mone. Muni kwaterepo vene.' ¹⁹ ''Ghumwe gha ghambire eshi, Ame naghuru yipani yikwoko yomahove, kuna kuyenda ni kaghayereke. Munikwaterepo vene.' ²⁰ ''Katughuru ghumwe karo ghaghambire karo eshi, 'Nayeka mbuyama, mbadi sho ni kone kwiya.' ²¹ ''Murughani ghayire noghana tongwere muhona wendi yinu yi. Muhona gho ndhugho dhi gha tokotire thikuma noghaghambire kwamurughani wendi eshi, 'Tambukerere wangu muyitata yomudoropa nokashimbe kuno hahepwe, hayirema, hamukunga, noakakupira kuyenda.' ²² ''Murughani ghaghambire eshi, ''Muhona, eyi ghuna raghura ne yina pu kutenda, ene shime podidi dyango.' ²³ ''Muhona ghaghambire kwamurughani wendi, 'Yende kumapitero nokumemaneno nokawa tjokedhe hakeye, podigho eshi ndhugho dhange ne dhiyare. ²⁴ Ame kuna kukutongwere, mbadiko katughuru ghopowaya nga twitha sho gha yereke murarero wange.'' ²⁵ Apa ne mbunga dhodhikuru dhayendire nendi, no ghapirukire no kuwa tongwera eshi, ²⁶ ''Ngeshi kehe yuno gho kwiya kwange ene mbadi ghana nyengi wihe, nyina, mbuyama wendi, hanendi, haminendi endi hakurwendi hoha ngaghu nohohakamadi, noyipara yendi thinda, mbadi wa kukona ghakare muka thishongero wange. ²⁷ Kehe yu gho kupira kukukambeka thikurushe thendi nokuni kutha mbadi wa kukona ghakare muka thishongero wange. ²⁸ Yidye ghopa penu oyu gha haka kutenda ndhugho dhodhire ene mbadi wa kuhungumana tango gha varere ngeshi ghakara noyinu yoyihe eyi ghanyanda ghakudhimanithe? ²⁹ Shimengwa, pakumana kutenda ditateko dyendi nombadi gha kukona kudimanitha, wahe awa hakudimona nanyi ha kutange kumusherera, ³⁰ ghughamba eshi, 'Oyu katughuru ne ghatangire kutenda ene mbadi ghana kukona kumanitha.' ³¹ Endi fumu munye, omu gha kuyenda gha ka kuwane nafumu ghumwe muyita, gha kupira kuhunguma no kutambura maghano ngeshi nanyi gha kukone noha tutughuru mayovi dikumi kurwitha fumu ghumwe oyu ghana kumwiyera noha tutughuru mayovi makumi mawadi? ³² Ngeshi mbadi kemo, popa eshi mashurundate kayenda ghadi, ghana kutuma mukareripo gha karongathane ghukaro ghothiraro. ³³ Podigho eshi, kehe yu ghopapenu ghokupira kuthigha yinu yendi yoyihe mbadi wa kukona gha kare muka thishongero wange. ³⁴ Mungwa ne ghuwa, ene ngeshi mungwa gha ghuyongaritha kutoveka kwagho, ngepi gho kughutoveka karo? ³⁵ Mbadi karo ghudi mudyo kumuve endi kuthirambo thorutoko. Agho ne kughuvukuma. Oyu ghakara nomatwi gho kuyuvitha, ninge gha yuve.''