¹ Paruvedhe ruya, hanu hamweya kuya hamutongwere kuhatera hakaGalilee awa manyinga ghawo ghakuvungire naPilate no yiyambitha. ² Jesusi ghawahuthire no kughamba kukwagho, ''Mwakughayara eshi wa hakaGalileya na haharure kupitakana hamwe hamwe hakaGalileya pamurandu hanayandire mundhira dhi? ³ Ka, na kumutongwera mwe. Ngeshi kadi sho mupiruke, mwahe nanyi mwakuyongare mudnhira dhofotji. ⁴ Endi owo dikumi nokwoko nohahatu hanu muSiloam oku ndhugho dhodhire dhawire no kupagha hamwe, kughayara mwe shi awa ne haharuri hohakuru kupitakana hanu hamwe muJerusalema? ⁵ Ka, nakughamba. Ene ngeshi kadi sho mupiruke, mwahe mwe nanyi mwakuyongare.'' ⁶ Jesusi ghaghambire mumathaghano, ''Ghumwe ghakarire no thitondo ethi hatapekire munyamo dhoyitondo yo mandjembere no gheyire mukuna kenga mbuyo dhayo ene kadighawanine ko. ⁷ Katughuru ghaghambire kwamukanyamo,'Kenge, mwaka dhihatu neya no kushana mbuyo kothi thitondo thoghukuyu ene kadi nawanako keheyino. Thitete. Nye wakuthitawedhera thipethe muve?' ⁸ Mukanyamo ghahuthire no kughamba,'Thithiye pithatho ghuno mwaka oku mene kuna kuthima kuthidhingumutwedha nokuturako rutoko. ⁹ Ngeshi thakumene mbuyo mwakumwa, thiwana; ene ngeshi kadiko, kuthiteta!''' ¹⁰ Pano Jesusi oku kuna kuhonga musynagogue mudiyuwa dyoMapeghu. ¹¹ Kenge, mbuyama ghakarire kuya oyu mumyaka dikumi no kwoko nodhihatu ghakarire no mupepo gho kukasha. Wamupetekire no kadi ghakonine kughororoka. ¹² Apa ghamumonine Jesusi, ghamwithire no kughamba kukwendi, ''Mbuyama, ghuna shutuka kughukashu ghoye.'' ¹³ Ghaturire manyara ghendi papendi, no popovene ghaghororokireno ghatumere Nyambi. ¹⁴ Ene haka synagogue hapiterithi hapatire yoyishi Jesusi gherure mudiyuwa dyo Mapeghu. Podiyo mupiterithi ghahuthire nokughamba kumbunga,''Mayuwa kwoko nodyofotji omu yaroghera kuyirughana. Mwiye no kuna mwirura keho, kadi mudiyuwa dyo Mapeghu.'' ¹⁵ Aye Fumu ghamuhuthire no kughamba,''Mwahayidena! Kadi keheyuno mwe kukona kughutuna hove endi thidongikudjoko no kuthitwara thikanwe mudiyuwa dyo Mapeghu? ¹⁶ Podiyo nayo yi mwana Abraham,oyu ghakwatire Shatani mumyaka dikumi no kwoko nodhihatu, eyi yamukwata kadi wakukona kuyimushutura ndi mudiyuwa dyo Mapeghu?'' ¹⁷ Apa ghaghambire yinu yi, kehe wa hamushwenene ghawafithirehonyi, ene mbunga dhodhihe dhahafire kuyinu yoyiwa eyi ghatendire. ¹⁸ Podiyo Jesusi ghaghambire, ''Ngepi edi wapitura ghufumu waNyambi, no nye yokukona ni yighanekerithe yi? ¹⁹ Yira dimbuto dyodiwa edi katughuru ghashimbire no kudivukuma munyamo dhendi, no dyakurire thitondo thothikuru, no yinyunyi yo mudiwiru yatendereko yitunguru kumite dhatho.'' ²⁰ Karo ghaghambire, ''Kunye shonighanekerithe ghufumu waNyambi? ²¹ Yira yinanumukitha eyi ghashimbire mbuyama no kuyitura pofotji no mushungwa kate yakutapire kumushungwa ghoghuhe.'' ²² Podiyo Jesusi ghayendire kupita mudoropa no mukunda, ghuhonga no kutenda ndhira kutamba kwaJerusalema. ²³ Ghumweya ghaghambire kukwendi, ''Fumu, hanu hohapu ngenyu wa ghakukunga?'' Podiyo ghaghambire kukwagho, ²⁴ ''Mukondje mukupita muthero dhodhimbiru, yoyishi, Ame nakughamba kukwenu, hengi hakushana kungena, ene kadi hakukona kungena. ²⁵ Pakuninga thinda mukandhigho ghana pinduka no kutjapera mathero, no nanyi wakwimane panunda no kungongona no kughamba, 'Fumu, Fumu, tutawedhere mwishi.' ''Nanyi gha kuhuthe no kughamba kukwenu,'Kadi namudimuka mwe no kupi mwatunda.' ²⁶ ''Podiyo mwakughamba, 'Twadire no kunwa pofotji kughutho ghoye no watuhongire mumandhira.' ²⁷ ''Ene nanyi ghakumuhuthe, 'Nakughamba kukwenu mwe, kadi namudimuka oku mwatundera. Mutunde kukwange, amwe mwatendi ghuyi!' ²⁸ Nanyi pakukare madiro no kukukwetjura mayegho apa mwakumona Abraham, Isaac, Jakob, no wahe haporofeta mughufumu waNyambi, ene mwe ne hana muvukumako. ²⁹ Nanyi hakutundere kudiva, ditokera, mbunda no ghucuma, no kuhungumana kutishi mughufumu waNyambi. ³⁰ Mudimuke yi, awa hokupira mudyo hombohakara hakakutanga, nowo ho mudyo nanyi hakukare hakaghuhura.'' ³¹ Kamanana kunyima, hamwe haPharisee heyire no kughamba kukwendi, ''Yende no tundepo pano yoyishi Herod ghana shana kukupagha.'' ³² Jesusi ghaghambire, ''Muyende mukawatongwere, 'Mukenge, ame kutjidha mupepo dhodhimango no kwirura no kutenda merukithero dyarero no peghundha, no mudiyuwa dyoghuhatu nanyi nakukumithemo yinyanda yange.' ³³ Mukehe thino,yaroghera kukwange mukutwikera dyarero, peghundha, no diyuwa dyokurandako kuninga kadi hayitawedhera mukupagha muporofeta kayenda naJerusalema. ³⁴ Jerusalema, Jerusalema, oyu gho kupagha muporofeta no mawe agha hakutuma kukwenu. Ngepi di nashana kehepano mukukongwedha hanuke wenu thika shushwa edi ghana kongwedhanga tutjighotjigho mumando, ene kadi mwayirumbera yi. ³⁵ Kenge, ndhugho dhenu ne hadhi mwagherera. Nakughamba kukwenu, kadi mwakunimona kate mwakughambe, 'Mukandadheki ne oyu gho kwiya mudina dyaFumu.'''