¹ Poruno ruvedhe, oku thingi tho mayovi hanu hakonganine pofotji no hatutumine, no hatangire kughamba kwawakathishongero wendi pakutangerera,''Mudimuke yinanumukitha yawa Pharisee, ayo ne yaghushatani. ² Kadiko yi hondeka eyi hakupira kunegha, no kadiko yi hondeka eyihakupira kudimuka. ³ Keheyino mwaghamba mumakokore nanyi hakuyiyuve muthishe, no eyi mwaghamba muditwi mwishi dho mangonda nanyi hakuyirete pawiru dho mandhugho. ⁴ Nakughamba kukwenu, mwayendhange, mwayapa kowa hokupagha yirama, kunyima dhoyi kadiko karo wo yoykukona kutenda. ⁵ Ene nakumu konekitha mwe eshidye sho muyape. Muyape ghoyu ghoku, kunyima dhokupagha, ghakara no ngcamu mukukuvukumena mukunyanda. Kemo, nakughamba kukwenu mwe, mumuyape ye. ⁶ Kadi yinyunyi yikwoko kuyighuritha kumasherenyi gho mambiru? Ene noyofotji temba ghopapawo oyu ghokuvurama mumeho ghaNyambi. ⁷ Ene ngambi huki dho kumutwi hadhitara. Mwayapa. Amwe ne mudyo kupitakana yinyunyi yoyingi. ⁸ Nakughamba kukwenu, kehe yuno ghokukutapa, kughutho wahanu, Mwana Munu nanyi ghakukutape kughutho wa engeli waNyambi, ⁹ ene keheyu gho kukanana me kughutho wahanu nanyi ghakumukanane kughuthowa engeli waNyambi. ¹⁰ Kehe yu gho kughamba kukutangawera na Mwana Munu, nanyi ha kuyimuthigherere, ene kwakeheyu gho kushwahura Mupepogho Kupongoka, kadi hakumuthiyerera. ¹¹ Apa hakumureta kughutho gho synagigue, hakakupiteritha, hakamuragho, mwakukudhekera eshi nye mwakughamba mukukughamwena, endi nye mwakughamba, ¹² mupepo gho Kupongoka nanyi wakumuhonge muviri dho eshi nye mwakaghamba.'' ¹³ Podiyo ghumwe kutunda mumbunga ghaghambire kukwendi, ''Muhongi, tongwere mukurwange mukutapera ghushwi nange.'' ¹⁴ Jesusi ghaghambire kukwendi,''Katughuru, dye ghanitenda eshi ame no mukengururi no mukareri pakatji koye?'' ¹⁵ Ghaghambire kukwagho, ''Mukenge eshi mukuture mwathinda kutunda ghugu gho yirumbera, yoyishi yipara yamunu kadi yakara no nye yi ghawana.'' ¹⁶ Podiyo Jesusi ghawatongwere mumathaghano,ghughamba,''Dipya dyakatughuru gho mutungi dya menine thiwana, ¹⁷ no gha ghambire kukwendi thinda, ghughamba, 'Nye shonitende, yoyishi ame kadi nidi nodyango dyokupungura yimenwa yange?' ¹⁸ Ghaghambire,'Eyi ne yosho ni tende. Nanyi nakudhure kashete kange no kutenda kokakuru, omuya nanyi nakupungure mombuto no yimweya. ¹⁹ Ame nanyi nakughambe kumudhimu wange,''Mudhimu, ghudi no yinu yoyingi eyi hapungura mumamwaka gho mengi. Turumuthe thiwana, dye, nwe, kare ghuna hafa.''' ²⁰ Ene Nyambi ghaghambire kukwendi,''Munu gho muyero,ghuthiku ghuno mudhimu ghoye ghuna nyanda we, no yinu yi wakuroyithera, yadye shoyikare?' ²¹ Oyo ne yodiyo yira ghumwe ghatureka mapungwero ghendi thinda no kadi mutungi kwaNyambi.'' ²² Jesusi ghaghambire kwawakathishongero wendi,''Podiyo nakughamba kukwenu, mwakudhekera kuhatera kuyipara yenu, nye sho mudye; endi kuhatera yirama yenu, no nye sho muvate. ²³ Yipara ne yapitakana yidya, no yirama ne yapitakana yitere. ²⁴ Mupake thinga kumanyunyi ghomakuru, eshi kadi yakukune no kukesha. Kadi hakara nondhugho dhokupungwera endi thishete, ene Nyambi ne kuwaditha. Ngepi mudyo wenu mwe no yinyunyi! ²⁵ Dye gho papenu ghokukara ghanapata kukona ghawedherere kamanana kughuparo wendi? ²⁶ Ngeshi keho mwe kadi mwakukona kutenda yinu yoyimbiru, nye mwakukudhekera kuhatera yokuthiyarako? ²⁷ Mutokomene hohambiru- ngepi di hakukura. Kadi harughananga, ngambi kukumbirumuna. Podiyo nakughamba kukwenu, ngambi Solomon mumangcamu ghendi kadi hamuvatekire yira hodiyo. ²⁸ Ngeshi Nyambi kuvateka muhonyi mudipya, eyi yakuhokoka pano, no peghundha kumuvukumena muthighenyitho, rwwingirokukuma kupi ghakumuvateka mwe, O amwe ghoghupu matawero! ²⁹ Kadi kushana eshi nye mwakudya no nye mwakunwa, no kadi mwakupate. ³⁰ Kehe ditunga dyomukaye mukenge yinu yi, no Wihenu ghadimuka eshi mwawanyanda. ³¹ Ene shane ghufumu wendi, no yinu yi nanyi ghakuyi wedhererekukoye. ³² Mwayapa, mbunga dhodhimbiru, yoyishi Wihenu ne ghana haafa mukumupa ghufumu. ³³ Ghurithe yiwana yoye no mutape kwawahepwe. Mukutendere mwathinda tundjato otu twakudhira kudjovoka- kupungura mudiwiru edidya kudhirakutjira panunda, oku kadikomwidhi ghokwiya popepi, no kadiko thimbumburu thakuyipitha. ³⁴ Kehe kuno kwakara ghupungwero, no mutjima nagho koko. ³⁵ ''Muninge yitere yenu yoyire muyishuteke mumamuya ghenu, ³⁶ muninge minyenge dhenu dhimuneke, no mukare yiramwanu waya hana kushana mukuru wagho apa ghana kahuka kumukandi gho mayekero, podiyo eshi apa ghakwiya no kungongona, hakumuyandhwere thero aye. ³⁷ Awa hatungeka ne awa harughani aye mukuru ghakuna wana hakukenga apa ghakwiya. Ghushemwa nakughamba kukwenu, nanyi ghakushuteke yitere yendi yoyire mumuya wendi no kughungumana kutishi, no nanyi ghakwiye ghakuna watapere. ³⁸ Ngeshi mukuru ghakwiye mughuthiku ghoghuwadi ghokukenga, endi ngambi mughuthiku ghoghuhatu gho kukenga, no kuna wawana hana kuroyithera,hatungeka wa harughani. ³⁹ Ene mutjwathane yino, eshi ngo mukuru ghondhugho viri edhi mwidhi ghakwiya, ngo kadi ghathighire ndhugho dhendi hadhitjore. ⁴⁰ Mukare muna kuroyithera namwe, yoyishi kadi munadimuka viri edhi Mwana Munughakwiya.'' ⁴¹ Peter ghaghambire,''Fumu, kunakutongwera gha mathaghano kukwetu ngenyu, endi kwakeheyuno?'' ⁴² Fumu ghaghambire,''Dye keho gho kukara ghana tokomena no munyanyami mupiterithi oyu fumu wendi ghakutura kwawarughaniwendi mukuwapa mutara wagho gho yidya paruvedhe roruhunga? ⁴³ Hakakutungeka ne oya murughani oyu fumu wendikamuwana ghana kurughana yiya pamwiyero wendi. ⁴⁴ Ghushemwa nakumutongwera eshi nanyi gha kumuture kuyiwana yendi. ⁴⁵ Ene ngeshi murughani haghamba mumutjima wendi,'Fumu wange ne kuna kukuranga kahuka,' no kutanga kupumura hakafumu no hakamadihoharughani no kudya no kunwa no kukara hana terera, ⁴⁶ fumu wawarughani nanyi ghakwiye mudiyuwa edi hakudhira kutatera no muviri dhi hakudhira kudimuka no nanyi gha kumutete muyipindhi no kunegha dyango dyendi dyo kupira matawero. ⁴⁷ Oya murughani, aye ghadimuka fumuyihima yendi no kadi ghana kuroyithera endi kurughana kukutha muyihima yendi, nanyihakumupumurenomangomi ghomengi. ⁴⁸ Ene oyu ghadhira kuyidimuka no kurughana yi yaroghera kumupumura, nanyi hakumupumure no mangomi ghomapu. Ene kehe yuno hakupa ghomengi, kukwagho yingi hakunyanda, no oyu hana tawedhera rorwingi, yingi hakumwipura. ⁴⁹ ''Neyere mukuna vukuma mudiro pakaye, no ngepi di nahimi eshi ngo naghuhanyine kare. ⁵⁰ Ene nidi no diyoghero edi nakuyogha nadyo, nongepi di ni di nothinga kate yakukumenemo! ⁵¹ Amwe kuna kughayara eshi neyire mukureta thiraro pakaye? Ka,nakumutongwera, ene makutavano. ⁵² Kutunda pano nanyihakare hakwoko kehemuno mundhugho kuwatapera- hahatu hemanganyene hanu hawadi, no hanu hawadi hemanganyene hahatu. ⁵³ Nanyi hakuwatapere, wiha kukwimanganyena na mwanendi na mwanendi kwimanganyena wihe, nyina kwimanganyena mwanendighothidhira na mwanendighothidhira kwimanganyena nyina ghothidhira.'' ⁵⁴ Jesusi ghaghambire kumbunga karo,''Ngeshi mwakumone divuyi dina kuyeyuka mudiva diyende muditokera, popo mwakona kughamba,''Mvura ne kuna kwiya,' no nanyi yakuhokoke. ⁵⁵ Ngeshimupepo gho kughucuma kuna kupunga, mughambe,'Nanyi ghukare ko ghuyenyu,' no yina kuhokoka. ⁵⁶ Mwahayidena, mwadimuka edi gho kutoroka edikapitura kaye no diwiru, ene ngepi eshi kadi mwadimuka kutoroka ruvedhe runo? ⁵⁷ Nye mwadhiranga kutheka eyi yidi ghuhunga mwathinda? ⁵⁸ Apa muna yendanga no yinu yenu kughutho wamangasitarata, mundhiramutende mutende muyikoshonone yinuyo nendi podiyo eshi kadi ghamukoke mwe kumatheko, podiyomutheki kadi ghakumutapemumoko ghawamaporitha, no hamaporitha kadi hakumuvukumene mudorongo. ⁵⁹ Nakughamba kukwenu, kadi mwakashwaghamo muya kate mwakatape masherenyi ghoghuhura.''