¹ Kunyima dho mayuwa mahatu, ghakarire mayekero mu Cana wa Galileya, na nyina Jesusi kwakakarire. ² Jesusi no hakathishongero wendi hawethire kumayekero gha. ³ Apa vinyu ghapwire, nyina Jesusi ghaghambire kukwendi,''Kadi hadi no vinyu.'' ⁴ Jesusi ghaghambire kukwendi,''Mbuyama, nye ghneyera kukwange? Ruvedhe rwange ne shime kadi runeya.'' ⁵ Nyina ghaghambire kwawapika,''Keheyino shakaghambe kukwenu, mukayitende.'' ⁶ Pakarire kwoko noyofotji diwe meyu poto kuya agha harughanithanga haJuda pamukandi gho kuyogha, keheyuno ghakarire no yiwadi kate kuyihatu yimeteri. ⁷ Jesusi ghaghambire kukwagho,''Mutere poto gho meyu no meyu.'' Podiyo hamuyarithire kate kughuhura. ⁸ Podiyo ghatongwere hapika,''Mushimbe yimwe popano no mutware kwamukuru wawataperi.'' No hayitendire. ⁹ Mukuru wawataperi ghayerekire meyu agha ghakutjindjire vinyu, ene kadi ghadimukire oku yatundere (ene hapika awa hakashimbire meyu hayidimukire). No ghethire katughuru ¹⁰ no kughamba kukwendi,''Kehe katughuru ghakona kutapa vinyu ghomuwa thokutangerera no gho mbiriha vinyu kunyima dhokuterera. Ene ghuna tureka vinyu ghomuwa kate popano.'' ¹¹ Thidimukitho thokutangera Jesusi ghatendire muCana waGalileya, no ghaneghedhire mangcamu ghendi, no hakathishongero wendi hatawire mumwendi. ¹² Pakupwa yi Jesusi, na nyina, hakurwendi, no haka thishongero wendi haghurumukire kuCapernaum no hakakrire kuya mayuwa ghomapu. ¹³ Pasika wawaJuda ne pepi, naJesusi ghayendire kuJerusalema. ¹⁴ Ghawanine haghurithi ho mahove no ndjwi no maputukuwa mutembeli, no hakakutjindja masherenyi hahungumane po. ¹⁵ Ghatendire mughodhi gho kumwashuritha podiyo ghawashwayithire mutembeli, kupakerera yoyihe ndjwi no ngombe. Gha hanyaghuremuwayawaya ghohanu hokutjindja masherenyi no kuvukuma matishi ghawo. ¹⁶ Kwahaghurithi homaputukuwa ghaghambire kukwagho,''Mushimbe yinu yi yishwaghe popano. Mushagheke kutenda ndhugho dhaTate dyango dyokughurithera.'' ¹⁷ Hakathishongero wendi havurukire eshi hayitjangire,''mahanyawero gho ndhugho ghoghakunidya me.'' ¹⁸ Podiyo haJuda hakamangcamu hahuthire no kughamba kukwendi,''Thineghedhitho munye wakutu neghedha twe, kutunda pawakurughana yinu yi?'' ¹⁹ Jesusi ghawahuthire,''Muyungune dhino tembeli, no mumayuwa mahatu nanyi nakudhipinduthe karo.'' ²⁰ Podiyo haJuda hakamangcamu haghambire,''Odhi tembeli ne kwadhitendire mumamyaka makumi mane no kwokonoghofotji, no nanyi wakudhipinduthe mumwayuwa mahatu?'' ²¹ Ngambi kemo, ghaghambire kuhatera kutembeli dhoyirama yendi. ²² Apa ghakapindukire mwawafu, hakathishongero wendi havurukire eshi ghayighambire yi, no hatawire matjangwa no thighamba eshi Jesusi ghayi ghambire. ²³ Apa ghakarire muJerusalema paPasika, thingihatawire mudina dyendi apa hamonine yidimukithoeyi ghatendire. ²⁴ Ene Jesusi kadi ghawakurupere yoyishi ghawadimukire wahe, ²⁵ yoyishi kadi ghashanine keheyuno mukukutongona kukwendi kuhatera katughuru, aye ghadimukire eshi nye yakara mwakatughuru.