¹ Podiyo mwakona kukara mwatemununi wa Nyambi, mwahana hohahakwa. ² Muyende muruhakitho, thikadi ghamuhakire Kristusi noghakutapire thinda kukwetu, ghakare thitapa nomuyambo kwaNyambi. ³ Ene kadi mwakona kukara no thiturithapo mukatji kenu tho kukupakerera panyama endi kehe yino yo kupira ghukushuki endi ghugu, eyi mbadi yarogha kohanu waNyambi hokukushuka. ⁴ Muninge shi pakara maranamvo, yighamba yoyishashu, endi disheve dyodishamu-yoyihe yi mbadi yarogha. Ene pakona kukara matapero ndangi. ⁵ Kwenu mwe mwakona kudimuka yino, kadiko muka kukupakerera panyama, hahayidena, endi munu ghomugu-oyo shi, mukaruhonda-mbadiko mahengero ghoghufunu waFumu no mwaNyambi. ⁶ Mwatawedhera kehe yuno ghamwangereke no manando, pamurandu ghoyinu yi ghupata waNyambi ghuna kwiya kwahanendi wahadhira kutawa. ⁷ Podigho, mwakupakerera nawo. ⁸ Kukwenu mwe mwakarire dikokore, ene pano ne mwa thishe mwaFumu. Muyende yira mwahana thishe ⁹ (mbuyo dho thishe ne dhakara noyoyihe yoyiwa, ghuhungami, no ghushemwa), ¹⁰ no muwane eshi nye yahafitha Fumu. ¹¹ Mbadi mwakona kukuhatithera kuyirughana yokupira mbuyo yo dikokore, ene muwature pakashekesheke. ¹² No karo honyi mukuyitoya yinu yi hatendanga mughudhindo. ¹³ Ngeshi keho yino hayisheghenyena thishe, yina kumoneka. ¹⁴ Kehe yino yina kukara kumoneka ku thishe. Podigho thina kughamba eshi,"Mupinduke, amwe mwarari, no muvumbuke amwe mwafa, naKristusi ghana kumusheghenyena." ¹⁵ Mukenge thiwana edi muna kupara-kadishi kadi mwanyanyama ene mwanyanyami. ¹⁶ Shimbe ruvedhe yoyishi mayuwa ne maringiringi. ¹⁷ Podigho, mwakara mwayero ene mutjwathane eshi nye mahimeno ghaFumu. ¹⁸ Kadi mwakona kuterera kuvinyu, oyo kutwara kughukaro ghokukumwagherera. Ene, mwakona kuyara no Mupepo gho Kupongoka, ¹⁹ mukughambithe murukwaro romu pisalemi, no makughero no membo gho pamupepo, kwimba no kwimbera Fumu no mutjima ghoye ghoghuhe, ²⁰ kehe pano kutapa ndangi kuyoyihe,mudina dyaFumu Jesusi Kristusi kwaNyambi ghoWihetu, ²¹ kukutapa ghothinda mukukunegha kwaKristusi. ²² Hakamadhiko,mukutape kohatutughuru, thika Fumu. ²³ Katughuru ne yo mutwi wambuyama thika Kristusi yodighe mutwi gho ngirishe, na Kristusi thinda ne yomushuturi. ²⁴ Ene thika kenge dhakutapa ngirishe kwaKristusi, nagho hambuyama hakona kukutapakohatutughuru wagho mukeheyino. ²⁵ Handuraghumbo, muhake hanu wenu, thika kenge ghahaka Kristusi ngirishe no ghakutapire kukwendi. ²⁶ Kristusi ghakutapire kungirishe podigho ghamutende ghana kushuka, ghamukushure no meyu no nando, ²⁷ podigho ghamuneghe kukwendi nodirumeritho,kupira yimyandhumyandhu, mahonyi mahinyi endi kehe thino, ene ghukushuki nokupira murandu. ²⁸ Mundhira dhofotji handuraghumbo hakona kuhaka hanu wagho yira thika yirama yagho. Kehe yuno gho kuhaka didhiko dyendighakuhaka thinda. ²⁹ Kadiko yu gha nyenga yirama yendi, ene kuyikongora no kuyikunga, thika Kristus mu ghakongoranga no kukunga ngirishe, ³⁰ yoyishi twakareri ghoyirama yendi. ³¹ "Pothinothitambo katughuru ghana kuthigha wihe na nyina no dmunuwendi ghana kuna kupakerera nendi, no hanu wa hawadi hana kakara thirama thofotji.' ³² Ghushemwa ghu wonda ne ghukuru- ene kuna kughamba me kuhatera Kristusi no ngirishe. ³³ Ngambi kemo, kehe yuno ghopapenu ghakona kuhaka munuwendi thika ye, no mukamadi ghakona kukutekera nduraghumbo wendi.