¹ Yoyishi koyi ame, Paghulusi, ame mukanotwa waKristusi Jesusi kukwenu mwahayidena. ² Ame nakurupera eshi mwayuva ghukengereri gho thineke thaNyambi edhi hanipa kukwange kukwenu. ³ Ame kuna kutjanga kukutha kuyihokora eyi yapwa kudimuka kukwange. Eyi ne ghudhindo ghoshemwa kuhatera koyi namutjangere mughufupi kukwenu. ⁴ Ngeshi mwe kutoya kuhatera koyi, namwe nanyi mwakukone kutjwathana yithithatero mwishi dhoghushemwa oghu hahoreka kuhatera kwaKristusi. ⁵ Mumuhoko ghumweya ghushemwa mbadi hatendire hadimuke kohana hohatutughuru kohanu. Ene pano hana yihokora kwamupepo ko haApostoloyi nawaporofeta hokupongoka. ⁶ Oghu ghudhindo ghoghushemwa eshi hahayidena nawo hohashere hoyiyora,ndani hashere hohahati hoyirama,ndani hakuyarekere matoyedhero mwaKristusi Jesusi kupitera mumbudhi dhodhiwa. ⁷ Ame neya mukukara muruwani gho mbudhi dho dhiwa kuyitapera muthinyeke thaNyambi hatapire kukwange muyirughana no mumangcamu ghendi. ⁸ Kukwange - ngambi yame gho mumbiru mowahe haguva waNyambi hokupongoka thinyeke thi hathitapa,mukuyuvithera kwaHayidena hapirire kukona kona ghutungi kwaKristusi, ⁹ ndani kureta kuthishe kwa keheyu dighano, kudighano dyoghudhindo edi hahoreka kumamyaka mwaNyambi,oyu ghavareka yoyihe. ¹⁰ Dighano di hatendire kudimuka kupitera mungirishe poharaghuri no hakamangcamu no mango homudiwiru nanyi hakwiye mukudimuka kumitara dhodhihe dho kaye kughunyanyami waNyambi. ¹¹ Eyi yahokokire kukutha kudighano dyothitungedhi eyi ghana manine mwa Kristus Jesusi gho fumu wetu. ¹² Podiyo mwaKristusi twakara ghutjima no matawedhero no ghutjimapa yoyishi pamatawedhero mumwendi. ¹³ Podiyo nakumukumbera mwe shi mbadi mukutovohe yoyishi koyi nakumunyandera, eyi fumwa kukwenu. ¹⁴ Nothitambo thi ame natongamene manwi ghange kwaTate, ¹⁵ kunyima dhokehe diko mudiwiru ndani no kaye nodyo hamuta. ¹⁶ Ame nakuraperera eshi ghamupe,kukutha kughushwi ghofumwa dhendi muku mutanaritha no ma ngcamu kupitera mwamupepo wendi, oyu ghadi mwimi dhamunu. ¹⁷ Nakurapeprera eshi Kristusi ngoghatunge mumutjima kupitera mumatawero,nomidhi ndani kashemandhugho mumuruhakitho rwendi ¹⁸ mukuninga eshi ghukone kutjwathana kupakera ko nohanu ho kupongoka waNyambi,no yoyiyaghuyu,no ghure ghomuwiru no ghudhungi, ¹⁹ no kudimuka ruhakitho rwaKristusi,oru rwayenda kuthambodiya dhoghudimuki,podiyo ghukone kuyara nokuyarera kwaNyambi. ²⁰ Ndani kukwendi aye kukona kuruwana kayenda kupitakana koyi twepura kughayara, kukutha mumangcamu ghendi ogha gharuwana mumwetu, ²¹ fumwa kukwendi mumangirishe no mwaKristusi Jesusi kohanahoka wahe kuroruhe nororuheya. Amen.