¹ Vavurukite va kutape kuveta na dimuragho vadikwame, vakare vanakuwapayikiko kukehe viruwana vyaviwa. ² Kwato vabubure ghumwe, kapishi vakuhora kurwana, ntani vakare vaUnongo, vakudidipite kwakehe uno. ³ Pashiruho shinya twakalire mahano mafupi ntani kudira kuyuva. Atwe twakombanine ntani kwakalire vapika kumadogho ghakukushuva-shuva navi vyakukuhafita ghumwetu. Twakalire na udona naugara. Twakalire namakunyengo nakunyenga vaunyetu. ⁴ Ano apa wamonikire Ufenkenda nashihoro shaKarunga pamuntu, ⁵ Kapi vyakalire ashi walye viruwana ndi muughunga kovyo twaruwanine, ene ngoli munkenda oyo atuyowolire atwe, kupitira mulikusho lyalishampuruko lyalipe ntani nakukuwapukurura mumpepo mupongoki. ⁶ Osho atura mwetu Karunga kupitira mwa muyogholi wetu Jesusa Kristusa, ⁷ Mpo twapwa kuhungika muUfenkenda wendi, mposhi ngatu pinge monyo nalihuguvaro lyanaruntje. ⁸ Odi nkango da Ushili. Nahoro mudameke unene kodino nkango, mposhi ovo vapuro mwaKarunga vakona kutakamita mukuku kwatakana naumwavo muviruwana vyaviwa. Vininke vino viwa ntani mulyo kwa kehe uno. ⁹ Ene ngoli kuupeko kuvikukanana vyavidona ntani dimutangu dakupira mapuliro ghakupira kukufana ntani vita kuhamena vya veta. ovyo vininke kwato oko ngaviku twara ntani kwato mulyo. ¹⁰ Shwenena kehe uno anakushano ligaunuko pa penu, kutunda palirondoro lyakuhova na lyauvili, ¹¹ Ghuna yivashi muntu wangoli ghakombana mundjira dadiwa ntani mbyo anakudjona nakukufinga naumwendi. ¹² Opo nituma Artemasi ndi Tigikusi koye, kwangura ghuye kwande ku Nikopolisi, oko nahoro kukara paruvede rwakufu. ¹³ Ruwana kehe vino ghuvura ghutume mundjira ya Zenasi wamukaveta ntani Apolosi, mposhi vasha hepa kehe vino. ¹⁴ Vantu vetu vakona kukushonga vakare naviruwana vyaviwa ovyo ngavi kava vatero pavihepwa vyavo, ene kapishi ngava kakare vakupira muyangu. ¹⁵ Namuvantje ovo nakara navo namumorora. Mororenupo ovo vatuhoro mulipuro. Ufenkenda ghukare nanwe namuvantje.