¹ Kunyima ya mwaka mbili, Hompa wa Egypt a rotire ndjodi. Mu ndjodi mo, uye kwa yimanine ku ntere do mukuro wa Nile. ² Kadidi tupu apa moneka ndidi ntano no mbili do di kanguki dado do kuneta. Adi tameke kulya musoni wa kaliro ku rukenka. ³ Kadidi tupu ndidi ntano no mbili do kuvera dado do kutongama adi bubuka ku nyima yavo kutunda ku mukuro wa Nile. Adi yayimana ku ndidi do kuneta da kaliro ku rukenka. ⁴ Mpo ngoli ndidi do kuvera dado da litonge a dili ndidi ntano no mbili do di kanguki dado do kuneta. Mpo hompa a yangu mukire. ⁵ Hompa awere nka mu turo, aroto nka ndjodi yimwe. Pa ruvede runo uye amono dimutwe ntano no mbili do mbuto da kaliro no ndanda do diwa do kupya, dado kwa kalire ku sirwenge simwe. ⁶ Kunyima yovyo, hompa a mono nka di mutwe ntano no mbili kuna ku bubuka nkoko ku si rwenge. Dado do kukasa ntani da kukuta ku upyu. ⁷ Di mutwe dino do ku kasa adi minipo dimutwe naditje do diwa do dinene. Hompa a yangumuka. Avi dimburura asi uye kuna roto. ⁸ Ene ngoli ngura ngura yoku kwamako akalire no sinka ku hamena evi dina kutanta ndjodi dinya. Mpo a pongikire va kamafeno no vana ndunge na vantje va tungiro mu Egypt. Ava tantere evi a rotire, ene ngoli kwato umwe amu tanteliro evi dina ku tanta ndjodi dinya mbili. ⁹ Makura mukondi wo vatapeli a tantere hompa asi, ''Weno ntani na kuvhuruka vi ninke vimwe vyo kasa ndi niku tantere! Na ruwanine lipuko muku vhurama ku kutantera. ¹⁰ Ruvede rumwe wa garapire natwe tuva vili. Mpo watu tulire mu dorongo name no mukondi wo va kangi mboroto mu ndjuwo yo mukondi wo va kungi vo livango. ¹¹ Ruvede rumwe atwe simpe momo, matiku amwe natu vantje kwa rotire, ntani ndjodi detu kwa tantire vyo ku kusuva. ¹² Mwa kalire mu Hebrew wona kumwe natwe. Uye mukareli wa mukondi wo va kungi livango. atu mu tantere evi twa rotire, ¹³ Uye atu tantelire natu vantje evi da tabire ndjodi detu. Evi vya horokiro ku nyima yovyo kwa ku fanine damu damu yira mbyovyo atu tantelire: wa ambire asi ame ngani wana nka vi ruwana vyande vyo kare, mara murume unya umwe kwa mu dipayire mu kumu kulika.'' ¹⁴ Opo avi yuvire evi hompa, a tantere va kareli vendi va kayite Joseph kwendi, ava kwangura ku ka rupwita Joseph mu dorongo. Joseph aku kurura adwatoko vyuma vyo hasako, ¹⁵ Makura ayendi aka yimane kumeho ya hompa. Hompa a amba kwa Joseph asi, ''ka niroto ndjodi mbili, mara kwato umwe ana ku ndjawiro evi dina ku tanta. Mara mpwali umwe ka ntantero asi ove nange umwe aku tantere ku hamena ndjodi oyo ana roto, ove ku yaura evi yina ku tanta .'' ¹⁶ Ene ngoli Joseph a limburura hompa asi, ''hawe, Ame kwato ku ruwana vyo, Karunga ndje ayivo evi da tantanga ndjodi, Ene ngoli uye kwa ndenkita ni vhure kuku yawira evi dina ku tanta, ntani kudi tanta vininke vyo viwa. ¹⁷ Hompa Pharaoh a tantere Joseph asi, Mu ndjodi yande yo muhovo ame kwa yimanine ku rukenka ro mukuro wa Nile. ¹⁸ Kadidi tupu ndidi ntano no mbili do dikanguki do kuneta adi yapo ku tunda mu mukuro, adi tameke kulya mu soni wo ku rukenka. ¹⁹ Kadidi tupu nka ndidi ntano no mbili, do didona do ku tongama adi yapo kunyima yado kutunda ku mukuro. Kapi nadi mona rumwe ndidi da didona ngoli mu Egypt namuntje! ²⁰ Ndidi dino do ku tongama adili ndidi ntano no mbili do kuneta da mone kiropo pa muhovo. ²¹ Ene ngoli ku nyima yopo, kapi utantesi ndidi dino do kutongama di nalipo va unyado, mukondasi simpe da monekire udona yira pamuhovo. Mpo na ya ngumukire. ²² Ani roto nka ndjodi yimwe. Ani mono di mutwe do mbuto ntano no mbili do mbuto. Dado dayulire ndanda do diwa do kupwa, naditje kwa yimine ku si rwenge simwe. ²³ makura avi ntetura muku mona nka di mutwe do mbuto ntano no mbili dimwe kuna ku bubuka. dado di didi yira kwa kukuta ku upyu. ²⁴ Di mutwe do mbuto dino do ku tongama adi mini di mutwe do mbuto ntano no mbili do diwawa. Ndjodi dino nadi tantelire vaka mafeno, Ene ngoli kwato umwe a vhuliro ku yaura evi da tabire.'' ²⁵ Joseph a tantere hompa asi, ''Ndjodi doye nadintje kuna ku tanta vyo ku kufana. Karunga kuna ku kuneyeda mu ndjodi ovyo ana kuyenda aka ruwane. ²⁶ Ndidi do di kanguki ntano no mbili kuna kwa teremo mwaka ntano no mbili. Di mutwe do mbuto do diwa ntano no mbili nado nka kuna kwateremo mwaka ntano no mbili. Ndjodi dino mbili kuna ku tanta vyo ku kufana. ²⁷ Ndidi dino do didona do ku tongama ntani no di mutwe do mbuto do kudira mulyo do ku kukuta ku upyu evino kuna kwateremo mwaka ntano no mbili do lirumbu. ²⁸ Vyavyo ngavi horoka yira momo naku tantere, mukondasi Karunga ana ku neyeda ovyo ana kuyenda aka ruwane. ²⁹ Ngadi karako mwaka ntano no mbili omo nga dikara ndya dodigi mu sirongo nasintje sa Egypt. ³⁰ Mposi ngadi karako mwaka ntano no mbili do lirumbu. Makura vantu ngava vhurama mwaka nadintje odo lyakalire lipemba, mukondasi lirumbu olyo ngaliyo ngali djonaura sirongo. ³¹ Vantu ngava vhurama omo da kalireko ndya do dingi kunyima, mukondasi lirumbu lino ngalikara lyo lidona unene. ³² Siitambo sa karunga evi ana kupere ndjodi dino mbili morwa ana tokora asi evi ngavi horoka, ntani kwa vi renkita vihoroke ntantani. ³³ Paweno naku ayara una hepa ku horo wora murume wo mu nandunge ntani wo ku tokora usili. Ame na ayara umu neye aka pititire va na gesefa na vantje mu sirongo. ³⁴ Ove nka uneyeko va mpititi mu sirongo, mposi vaka wapayike no ku pongayika ukahe wo mbuto oyo va yangura mu mwaka ntano no mbili do lipemba. ³⁵ Vana hepa ku ka pongayika sivaro so ndya esi mu mwaka ntano no mbili dina kuyo, odo nga likarako lipemba. Kehe nkuru mbara yika yendite no ku kunga ndya odo nga vatulika. ³⁶ Yino mbuto yina hepa ku yitulika mposi ngava yilye opo nga likarako lirumbu muno mu Egypt, mposi vantu muno mu sirongo kapi nga vafa ku ndjara.'' ³⁷ Liano lino lya wapire kwa hompa Pharaoh noku va kareli vendi. ³⁸ Mpo homa a amba asi, Ku vhura tu wane nka murume wo kufana yira Joseph, mu rume owo karunga apa mpepo yendi? ³⁹ Hompa Pharaoh a amba kwa joseph asi, ''morwa karunga ana ku neyeda na vintje evi, ku moneka kwande asi kwato nka mu nandunge kupita poye ntani owo a tokoro vi ninke no ndunge. ⁴⁰ Mposi kuni kutura ove u pititire vi ninke na vintje mu livango lyande. Vantu navantje muno mu Egypt vana kona ku tikitamo oyo ngo rawira. morwasi ame hompa nakara no una nkondo kupita poye.'' ⁴¹ Hompa a amba kwa Joseph, '' Ame weno kuna ku kutura u pititire sirongo nasintje sa Egypt.'' ⁴² Hompa Pharaoh a upu linga ku nyara yendi ya kaliro no sipatito sendi, ayi tura ku nyara ya Joseph. Uye a mutura li rwakani lyo ma ruvara amawa, ntani a mutura siranda so ngorodo mu ntingo. ⁴³ Makura a wapa yikire Joseph a yendaure mu karukara evi vya neyidiro asi uye murume wo mulyo wo uvili mu sirongo. Joseph opo a yendawire mu karukara, varume ava yiyire ku vantu ovo va kaliro mu sitaura kumeho yendi, ''Tonga menenu!'' Mpo Joseph ayendi aka pititire si ruwana esi namuntje mu Egypt. ⁴⁴ Hompa Pharaoh a amba kwa Joseph, ''Ame hompa , ene ngoli kwato umwe mu Egypt na muntje nga ruwano kehe vino nange kapi ngo va pulitira asi va viruwane.'' ⁴⁵ Hompa aruku Joseph lidina lyo lipe, Zaphenath-Panaeh. Uye amupa nka Asenath akare mu kadendi. Uye mona wo mukadi wa Potiphera, owo a kaliro muruti mu gereka yo mu nkurumbara ya On. Mu ndjira yino Josepph va muyivire unene mu virongo navintje mu Egypt. ⁴⁶ Joseph kwa kalire no mwaka dimurongo ntatu opo a tamekire ku ruwanene Pharaoh hompa wa Egypt. Mu kuruwana viruwana evi, asuvire livango lya hompa ayendi mu sirongo nasintje sa Egypt. ⁴⁷ Mu mwaka ntano no mbili da kwaminoko, sirongo sa yangwire mbuto do dingi unene, mposi lipemba lya kaloro. ⁴⁸ Opo ava piti tilire Joseph, va vateli vendi va pongayikire harufa yo mbuto nayintje oyo va yangwire mu mwaka dinya, ava di tulike mu nkuru mbara. Mu kehe nkuru mbara a kaliremo no va vateli vendi vo va tulikiro mbuto odo valimine mu mafuva a kundurukido nkurumbara oyo. ⁴⁹ Joseph ava renkitire va tulike mbuto yayingi unene. ungi wayo kwa monikire yire museke wopa liyenga lyo ku lifuta. Pa kalire mbuto yayingi kunyima ya siruwo ava sayeke kutjanga asi mbuto yo kutika kuni vana kutulika, morwa asi mbuto ya kalire yingi kupita omo va yisetekilire. ⁵⁰ Joseph akalire no vana va vili vo varume kumeho yo mwaka do lirumbu ovo ayitire na mukadendi Asenath. ⁵¹ Joseph aruku mbeli yendi wo murume lidina Manasseh, lyo ku yuvika yira nkango yo va Hebrew ya tanto asi ''vhurama,'' a amba asi morwa, ''Karunga a ndenkita nivhurame vi ruwana dona vyande ntani nava ka vava.'' ⁵² Uye aruku sikwama mbeli lidina Ephraim, oly lya kutanto asi ''kuyita'' a amba asi morwa, ''Karunga aya mpa vana muno mu sirongo naya hepera.'' ⁵³ Mwaka ntano no mbili do lipemba mu Egipte adipu. ⁵⁴ Mwaka ntano no mbili do lirumbu adi tameke, yira momo avi ambire Joseph. Mu virongo namuntje mwa kalire lirumbu, mara ngoli mu virongo navintje vya Egipte mwa kalire ndya. ⁵⁵ Vantu opo va manine kulya ndya davo nadintje mara vavo simpe ndjara, ava ka kanderera hompa ndi avape ndya. Mpo hompa atantere va Egypt navantje, Yendenu kwa Joseph mu karuwane mbyovyo aka mutantera. ⁵⁶ Opo lya didire lirumbu mu sirongo nasintje, Joseph a rawire va vateli vendi va arure tuhanda. Makura ava ulita mbuto ya kaliro mu tuhanda kuva Egypt, Morwa lirumbu lya didire unene mu Egypt. ⁵⁷ Vantu mu virongo vyo vingi vyo musinda na Egypt vayire vaya ure ndya kwa Joseph, morwa lirumbu lya didire unene kehekuno.