¹ Ale olwakire oluzwanyuma kadooli oYesu natambula omu bibuga n’omu mbuga nka akukoba enjiri ey’abukama bwa Kanca, baddi eikumi nababiri nka bali naye, ² n’abakali abaatambiibwe edaimooni ne ndwaire, oMalyamu eyayetebwanga oMagudaleene eyazwireku edaimooni omusanjju, ³ no Yoona omukali wa Kuza, omuwanika wa Kerode, no Susaana, n’abandi baiinji abaabaweerezanga ebintu bi baalinabyo. ⁴ Ale ekibbuura ekikoota ni ky’akumbbaine nabazwanga omu buli kibuga, ni baizire jaali, nabakobera olugeero nti ⁵ Omusiggi yawulukire okusigga ensigo zaamwei; niyaali nk’akusigga, ezindi nizigwa oku mabbali g’anzira; nizininiirwa, ebinyonyi bya mwibbanga nizizirya. ⁶ Ezindi nizigwa oku lwaazi; nizamaare okumera niziwotokeera olwa kubulwa amaizzi. ⁷ Ezindi nizigwa akati omu mawa; amawa nigameera amwe nazzo nigazizica. ⁸ Ezindi nizigwa okwitakali erisai; ni zimera, ni zibalaku emmere buli mpeke kikumi. Niyamaare oYesu okubaza ebigambo ebyo, nabazira aigguru nti atan’amatwi aga kuwuura awuure. ⁹ Ale abeegereswa baamwe ni bamubuuly bati olugeero olwo kiki? ¹⁰ Nabakoba ati nywe muwereibwe okweega ebyaama ebya bukama bwa Kanca: baitu abandi mu ngeero; erate nibabona baleme okubona, erate ni bawuura baleme kweteja. ¹¹ Erate, olugeero ni lwo lunu: Ensigo ni kyo kigambo kya Kanca. ¹² Baddi aba kumabbali g’anzira nibo bawuura; ale osetaani naiza nakwakula ekigambo omu mitima zaabwe baleme kwikiriza n’okucungurwa, ¹³ Naba ku lwaazi nibo bawuura ekigambo ni baikiriza n’eisanu; kyonkai tibaliina mirandira. bakikirizeeku kasera, erate omu biro byakoyerwa ni banakiwa. ¹⁴ Neezo ezagwiire omu mawa; abo nibo abawuura, ale ni baaba ni balemesebwa no kweralikiira n’obuguuda n’eisanu ery’abwoomi bunu nibataikirirye ku kulya mmere. ¹⁵ Neezo eza mwitakali erisai; abo nibo abawuura ekigambo omu mutima ogugolokoki, ogusai, ni bakinyweeza, ni babala emmere n’okuguminkiriza. ¹⁶ Erate, ndoowo akoleerya itaala najivuninkira omu kisira, obate okujita ansi wa kitabo; baiti ajita ku kikondo abangiramu babone neyaka. ¹⁷ Olwakubba ndoowo kigambo kya kyaama ekitaliboneka; gonze eky’akwekeibwe ekitalimanyika nikiboneka omu lwaatu. ¹⁸ Ale mwekumenge ni muwuura; olwakubba buli aliina, aliweebwa; erate buli ataalina n’ekyo kya kulowooza nti alinakyo kirimutolebwaku. ¹⁹ Ale omaamwei na bagande ni baiza jaali, ni batasobole kumwikaku olwa kibbuura. ²⁰ Nakoberwa nti Omaawo na baganda baamu bemereire enzai bakwendya ku kubona. ²¹ oYesu nairamu nabakoba ati Omange na baganda bange, nibo abo abawuura ekigambo kya Kanca ni bakikola. ²² Ale olwaikire oku lunnaku olumwei okweezo naniina omu bwaato na beegereswa baamwei; nabakoba ati tusomoke twaabe emitala wa nnyanja; ni bayaba. ²³ Ale ni babbaire nka bakuseyeeya na bbasya otulo. Ompungo omwiinji na fuuwa oku nnyanja, amaizzi nigabba nka agakwaaba okwizula ni babba omu buzibu. ²⁴ oYesu nibaiza we yaali nibamwimuca nka bakukoba bati Mukama waiswe, Mukama waiswe,Tukufa. Naimuka naboigoora ompungo, n’okwefukuula kwa maizzi; ni bikaikana, neteeka? ²⁵ Nabakoba ati okwikiriza kwanywe kulayi? Nibatiina nibewuunya, nibabaza bonkai n’abonkai bati ale naani onu, olwakubba omulombe na maizzi abiragira ni bimuwuura. ²⁶ Ale ni baika oku nsi ya Bagerasene nka akwaaba e Ggaliraaya. ²⁷ Ale oYesu niyazwiremu naika okwitale, nayaja omuntu nka akuzwa omu kibuga eyaaluku odaimooni nka yakamala ennaku ziinji nka tawaala lugoye no mu nnyumba nka taikalamu, baitu yabbanga mu magombe. ²⁸ Niyaboine oYesu nabazira aigguru nainama omu maiso gaamwe, nabaza neiraka erikooto ati okunjunaana ki, oYesu Omwaana wa Kanca ali aigugru omuno? nkwegayiriire ota mbonereza. ²⁹ oYesu Olwakubba yaali alagiire odaimooni okuzwa oku muntu oyo. Olwakubba yaali yakamala ebiro biinji nka amukwaite: yabuwebwanga mu njegere,n’omumasamba nk’akumibwa; nakutulanga bibamusibisirye, odaimooni namusengeryanga omwirungu. ³⁰ OYesu namubuulya ati eibara lyaamu niiwe naani? nakoba ati liigyoni; olwakubba abadaimooni baiinji abamwingiremu. ³¹ Nibamwegayiira aleme kubalagira kumuzwaaku okwaaba omu bwiina. ³² Ale wabbairewo eiggana lya mberege eziinji nka zikulya oku lusozi, ni bamwegayiira abalagire bazingiremu. N’abalagira. ³³ Ale abadaimooni nibazwa oku muntu ni baingira omu mberege: eiggana nizitumbeera omwibbanga ni zigwa omu nnyanja nizifa amaizzi. ³⁴ Ale abasumba ni baboine ebibbairewo; ni bairuka ni babibazira omu kibuga no mubyaalo. ³⁵ Abantu ni bazwaayo okubona ebibbairewo, ni baiza edi oYesu ni babona omuntu oyo ayazwireku abadaimooni nka aikaire awali amagulu ga oYesu, nka azwaire olugoye, nk’okumanya kwaamwe kumwiremu: Nibatiina. ³⁶ N’abo ababoine ni bakobera abandi niyakoleibwe oyo eyaali akwatiibwe abadaimooni. ³⁷ N’abantu boona boona aba nsi y’Abagerasene erirainewo ni oYesu bamwegayiira azwe jibali, olwakubba baali batiinire muno. N’aniina omu bwaato nairayo. ³⁸ Baitu omuntu eyazwireku abadaimooni namwegayiira abbe naye; baitu namusiibula nka akukoba ati ³⁹ Irayo omu nnyumba yaamu, onyonyole ebigambo oKanca bya kukoleire nibiri ebikulu. Nayaba nka akukobera ekibuga byoona byoona nka nibiri ebikulu oYesu bi yamukoleire. ⁴⁰ Ale oYesu ni yaire, ekibbuura ni kimwaniriza neisanu; olwakubba boona boona baali nka bamulindiriire ⁴¹ Ale, bona, omuntu eribara lyaamwe Yayiro omukulu wa ikunbbaniro naiza nagwa awali amagulu ga oYesu namwegayiira okwingira omu nnyumba yaamwe: ⁴² Olwakubba yabbaire n’omuwaara eyabyaliibwe omwei nka yekamala emyaaka ikumi nabiri, erate oyo yaali nka alampi okufa. Baitu oYesu niyaali nka akwaaba ebibbuura ni bimumigiirya. ⁴³ No mukali ayaali alwaire ekikulukuto ky’aisagama emyaaka ikumi naibiri eyaweryanga abasawo ebintu byaamwe natasobole kutambibwa muntu yeena yeena. ⁴⁴ Oyo namuwuluka emabega nakwaata oku lukugiro lwa lugoye lwaamwe: amaangu ago ekikulukuto kyaamwe nikikoma. ⁴⁵ OYesu nakoba ati naani ankwaiteku? ale nibegaine boona boona, oPeetero na bairaamwe ni bakoba bati Mukama waiswe, ebibbuura bikwetoloire bikumigiriirye. ⁴⁶ Baitu oYesu nakoba ati omuntu ankwiteku: olwakubba mpuliire amaani nka ganzwiremu. ⁴⁷ Ale omukali oyo ni yaboine nka takwekeibwe, naiza nka akutiina namufukamiira, namukobera omu maiso ga bantu boona boona ensonga neeriy emu mukwatisiryeku, ne bwawonere amaangu ago. ⁴⁸ Namukoba ati omwaana wange, okwikiriza kwaamu ku kuwonere: yaba mirembe. ⁴⁹ Ale yabbaire akyabaza, ni waiza omuntu eyazwire omu nnyumba ya mukulu waikumbbaaniro nka akukoba ati omwaala waamu afiire; otatawanya mwegesya. ⁵⁰ Baitu oYesu niyawuliire nawiramu nti Otatiina: ikiriza mbbe yaabba mwoomi. ⁵¹ Ale niyaikire oku nnyumba nataikirize muntu yeena yeena wondi kwingira baitu wazira oPeetero n’oYokaana no Yakobo n’oitaamwe wa mwaala n’omaamwe. ⁵² Ale babbaire nka bakukunga boona boona nka bakumukobera; ye nakoba ati Mutakunga, olwakubba tafiire, baitu abbasirye tulo. ⁵³ Ni bamusekeera muno, olwakubba betejerye nk’afiire. ⁵⁴ Ye namukwaata oku mukono nabazira aigguru ati omwaala,imukka. ⁵⁵ Omwooyo gwaamwe ni gwiira, nayemeera amaangu ago. Nabalagira bamuweerye ekya kulya. ⁵⁶ ababyaire baamwe ni bawuninkiira; baitu ye nabakuutira baleme kukoberaku muntu yeena yeena ebibbairewo