¹ Ale olwaikire oku ssabbiiti ni yaali akwaakala omu numiro zangaano; abeegereswa baamwei nibanokola ebirimba bya ngaano ni balya, nka bakukunya omu ngalo zaabwe. ² Kandi Abafalisaayo abamwei ni bakoba bati kiki ekikubakolesya ekyamuzizo okukoora oku ssabbiiti? ³ OYesu nabairamu nabakoba ati baitu, kinu timukisomangaku, oDaudi ki yakoore ni yalumirwe enzala ye ne beyaali nabo. ⁴ niyaingiire omu nnyumba ya Kanca natoola emigaatti ejakulanga nalya, kandi naweerya ne beyaali nabo egyamuzizo kulya okutolaku abakabona bonkai. ⁵ Nabakoba ati omwaana wa muntu niye Mukama wa ssabbiiti. ⁶ Olwaikire oku ssabbiiti eyindi, naigira omwikubbaniro nayegesya; mwalumu omuntu omukono gwaamwe oguryo gwaali gukaare. ⁷ Ale Abawandiiki na Bafalisaayo ni bamuloleera, babone obate nka yatambira oku ssabbiiti, kaisi babone engeri jibamulopamu. ⁸ Baitu, namanya ebirowoozo byaabwe, nakoba omuntu ayabbaire no mukono ogukaare ati, imukka oyemeere akati.Naimukka nayemeera. ⁹ Ale oYesu nabakoba ati, nkubabuulya nywe, kisai oku ssabbiiti okukola obusai, obate okukola obubbi, kutamba bwoomi obate kubusania wo? ¹⁰ Nabetoloolya amaiso boona boona, namukoba ati imukya omukono gwaamu nakola atyo; omukono gwaamwe ni guwona. ¹¹ Ale ni batabuka ni basimoola bonkai na bonkai ki bakoora oYesu. ¹² Olwaikire omunnaku ezo nazwaayo nayaba oku lusozi okuramya nakeesya obwiire nka akuramya oKanca. ¹³ Obwiire ni bwakeire nayeta abeegereswa baamwe; omu bo nalondamu ikumi nababiri no kubeeta nabeeta abatume. ¹⁴ OSimooni gwe yayalikire oPeetero, no Andereya omuganda waamwe, no Yakobo, no Yokaana, no Firipo, no Battolomaayo, ¹⁵ no Matayo, no Tomasi, no Yakobo omwaana wa Alufaayo, no Simooni eyayetebwanga oZerote, ¹⁶ no Yuda omuganda wa Yakobo, no'Yuda oIsikalyoti eyamuliremu olukwe. ¹⁷ oYesu Naniinuka nabo ansi nayemeera awatereri, ne kibbuura kikooto ekya beegereswa baamwe na bantu baiinji okuzwa e Buyudaaya yoona yoona, no mu Yerusaalemi na bazwiire eruguru wa nnyanja eya Tuulo no Sidon, abaizire oku muwuliirya no kutambibwa endwaire zaabwe, ¹⁸ na baali bakugadda no daimooni ni batambibwa. ¹⁹ Ne kibbuura kyoona kyoona nikisala amagezi okumukwaataku mbbe: olwakubba amaani gazwanga omu ye nigabatamba boona boona. ²⁰ Naimukya amaiso gaamwei edi abeegereswa baamwe, nakoba ati muliina omukisa abooro, olwakubba Obukama bwa Kanca nibwo bwaanywe. ²¹ Muliina omukisa abalumwa enzala ati,olwakubba muliikusibwa, muliina omukisa abakunga ati, olwakubba muliseka, ²² Muliina omukisa abantu nibabakyawanga, nibabewalanga, nibabazumanga, nibabakolimanga nka ababbi, okubajunaania omwaana wa muntu. ²³ Musagarukanga oku lunnaku olwo, mugulukanga olwaisanu:Olwakubba bona, empeera yaanywe jinji omwigguru:Olwakubba abaizeiza baabwe nimwo baakolanga abarnji batyo. ²⁴ Zibajirye nywe abaguuda, olwakubba mu maare okubba neisanu lyanywe. ²⁵ Zibajirye nywe abaikutire ati, olwakubba mulirumwa enzala. Zibajirye nywe abakuseka ati, olwakubba mulinakuwala, mulikunga. ²⁶ Zibajirye, abantu boona boona nibalibasiima! olwakubba batyo abaizeiza baabwe nimwo baakolanga abaranji ba bubeyegi. ²⁷ Baitu nkubakoba nywe abakuwuura nti mwendyenge abananzugu baanywe, mukolenge kusai ababakyaawa. ²⁸ Musabirenge omukisa ababakolimira, musabirenge ababakooraku eitiji. ²⁹ Oyo akupaayanga oluyi okuluba, omukyusizanga no lwa kabiri; nakutolangaku omunagiro gwaamu ne kanzu tojimugaananga ³⁰ Na buli akusabanga omuweryanga; nooyo akutolangaku ebintu byaamu tobimusabanga te. ³¹ Erate nka nimutaka abantu okubaakalya, nywena mubaakalyenge mutyo. ³² Kandi nimutaka abo ababataka nywe bali bebalyaaku ki? Olwakubba na bantu abata nebibbi bataka abo ababataka. ³³ Erate nimukola okusai abo ababakola okusai, nwye bali bebalyaaku ki? Olwakubba na bantu abata nebibbi nimwo bakola batyo. ³⁴ Ale nimwazika abo be musuubira okubaweerya, bali bebalya ki? Na bantu abata nebibbi bazika abata nebibbi,erate baweebwa batyo. ³⁵ Baitu mendyenge abananzigu banywe mubakolenge kusai, mwazikenge kandi timukanganga kusubira; ne mpeera yaanywe eribba jinji, nyweena mulibba baana bo’Oyo ali aigguru omunno: Olwakubba niye musai edi abateebalya na babbi. ³⁶ mubbenge ne kisa, nka oitanywe naalina ekisa. ³⁷ Ale timusalanga musango, nanywe timulisaarwa: erate timusingisianga musango, erate nyweena timulisingisibwa musango: musonyiwenge, nanywe mulisonyiyibwa. ³⁸ Mugabenge, Lukka nyweena muliweebwa; ekigero ekisai ekiikatiibwe, nikitengetebwa ekikususukasusuka. Nikyo balibaweera omukifubba. Olwakubba ekigero ekyo kimugera, nanywe nikyo muligeerwa. ³⁹ Erate nabakoba olugeero ati, omulibbi wa maiso asobola okukulembera omulibbi omwiraamwe? tibagwa bakali babiri omu bwiina? ⁴⁰ omweegereswa tasiinga amwegesya: Baitu buli muntu naikiriira omubyayegere alibba nka amwegesya. ⁴¹ Kiki ekikuloleerya akantu akali oku liiso lya muganda waamu, no tolowooze ku kineni ekiri oku liiso lyaamu? ⁴² Obate osobola otyai okukoba omuganda waamu nti muganda wange, ndeka nkutooleku akantu akali oku liiso lyaamu,baitu nka tokubona kineni ekiri oku liiso lyaamu we? kiweeweita we, osooke otooleku ekineni ekiri oku liiso lyaamu we; ale obone kusai okwiyaku akantu akali oku liiso lya muganda waamu. ⁴³ Olwakubba ndoowo musaale gusai ogweerya ebyeera ebibbi, gonze omusaale ogubbi ogweerya ebyeera ebisai. ⁴⁴ Olwakubba buli musaale gwetejerwa ku byeera byagwo. Olwakubba, tibanokola etiini ku busaana, nekindi tibanokola zabbibbu ku mweeramanyo. ⁴⁵ Omuntu omusai, ekintu ekisai akitoola mw’ibiikiro erisai erya mwooyo gwaamwe, no mubbi ekibbi akitoola mw’ibiikiro eribbi: Olwakuba ekiizula mwooyo akanwa nikyo kawulukya. ⁴⁶ Ale munyetera ki Omukama wanywe, Omukama wanywe, atenga timukola bigambo byensimoola? ⁴⁷ Buli muntu yeena yeena aizza jendi nawuura ebigambo byange nabikola, nabalanga gwakwisana: ⁴⁸ ayisana nka omuntu ayomboka ennyumba nasaka ansi omuno, omusiinji nakuta omu lwaazi; ale amaizzi nigaizula, omwigga gukutenta oku nnyumba eyo namaani, okujinagga, nokusobola nigutasobola kujitengeitya: olwakubba yayombokeibwe kusai. ⁴⁹ Baitu oyo awuura natakole, ayisana nko’muntu eyayombokere ennyumba okwitakali natasake musiinji: omwigga ni gukutenteraku namaani ammangu ago neggwa, no kuggwa kwa nnyumba eyo nikubba kukooto.