¹ Ale olwaikire niyaali omu kifo nka akusaba, niyamaare okusaba, omwei oku beegereswa baamwe namukoba ati Mukama waiswe, twegesye okusaba, erate nka oYokaana niyayegesyanga abeegereswa baamwe. ² OYesu nabakoba ati ni mwasabanga, mukobenge muti Itaiswe, eibara lyaamu litukuzibwe, Obukama bwaamu bwiize. ³ Otuweryenge buli lunnaku emmere yaiswe eya lunnaku. ⁴ Erate otusonyiwe okusiiss kwaiswe; olwakubba naiswe tusonyiwa buli gwe tutonga. Erate otatutwaala mukoyerwa. ⁵ oYesu nabakoba Ati naani oku nywe aliina omunywaani waamwe alyaaba ewamwei obwiire namukoba ati munywaani wange omkopeye emigaati issatu; ⁶ olwakubba, omunywaani wange aizire okuzwa omu lugendo, njeena tindina kyakuta omu maiso gaamwe; ⁷ noodi ali omunda namwiirmu namukoba ati otangadya, atubunu olwiige lwigale, abaana bange, nanje tumaare okubbasya tinsobola kwimuka kukuwa? ⁸ Nkubakoba nti gonze nka taimukire namuweerya, olwakubba munywaani waamwe, Baitu olwa kumwebbuwaku kwaamwe yaimuka namuweerya byoona byoona kwendya. ⁹ njeena nkubakoba nywe nti musabe muliweebwa, muswagane mulibona, mweyanjule mul’iggurwaawo. ¹⁰ Olwakubba buli muntu yeena yeena asaba aweebwa, n’oyo aswaaga ali bona; n’oyo eyeyanjula al’iggurwwawo. ¹¹ Erate naani omwei oku nywe, Oitaamwe wa muntu omwaana waamwe nalimusaba omugaati, aimuweryamu eibbaale, obate eky’ennyanja namuwerya onjoka omu kifo kya ky’enyanja? ¹² Obate nali musaba eiwuli namuweryamu ompiri. ¹³ Ale obate nywe ababbi mu maite okuweerya abaana banywe ebirabo ebisai, talisiinga muno Oitaanywe ali omwigguru okuweerya Omwooyo Omwikiiri abamusaba. ¹⁴ oYesu Yaali nka akumpeka odaimooni omusuru. Ale odaimooni niyamuzwireku okasuru nasimoola, ebibbuura nibyewuunya. ¹⁵ Baitu, abamwei nibakoba bati akupeka odaimooni kubwa Beeruzebuli omukulu wa daimooni. ¹⁶ Nabandi nibamutakisya akabonesyo okuzwa omwigguru nka bakumoyera. ¹⁷ Baitu,oYesu ye niyetejerye bibakulowooza, nabakoba ati buli bwa Bukama boona boona nibwawukanamu bo bwonkai buzikiira, n’ennyumba ne yawukanamu, ennyumba eyo egwa. ¹⁸ No setaani nayawukanamu ye yenkai, obwa bukama bwaamwe bulyemeerawo butyai? Olwakubba mukoba nti ngoba odaimooni ku bwa beeruzebuli. ¹⁹ Erate, nimbbanga njje mpeka odaimooni kubwa Beeruzebuli abaana baanywe bajipeka kubwa naani? nikyo balizwa babba abalamuzi banywe. ²⁰ Baitu, nimba mpekesya odaimoni engalo ya Kanca, ale Obukama bwa Kanca bubaiziire. ²¹ Omuntu owa maani nka aliina eby’akulwanisya nakuuma olubuga lwaamwe, ebintu byaamwei bibba mirembe: ²² baitu amusiinga amaani namwizira na muwangula, amunyagaku eby’akulwanisya byaamwei byoona byoona biyesiga, nagaba ebintu byaamwei. ²³ Ataabba nanje niye munanzigu wange, erate atakubbanirya amwei nanje asansania. ²⁴ Odaimooni nazwa oku muntu, ayakala omu bifo ebitaalumu maizzi nka akuswagana awakuwumuura, nabulwa akoba ati kanyireyo omu nnyumba yaange mwe nazwiire. ²⁵ Nayizza ajibona nka eyeyeibwe etimbiibwe. ²⁶ Ale ayaba naleeta aba daimooni abandi musanju ababbi okumusiinga ye,nibangira nibabba omwo. Ale eby’aluzwanyuma ebya muntu oyo bibba bibbi okusiinga ebyekereire ²⁷ Ale olwakire niyaali nka akusimoola ebyo, omukali owa mu kibbuura naimula eiraka lyaamwe namukoba ati kirina omikisa ekidda ekyakubyaire na mabeere ge wayonkere. ²⁸ Baitu, ye namukoba ati ekikusiinga, baliina omukisa abawuura ekigambo kya Kanca nibakyekuuma. ²⁹ Ale olwaikire ebibbuura nibyaali nka bikukumbbanira jaali, oYesu natandika okubakoba ati emiijo zinu miijo zibbi: jiswaagana kabonesyo, baitu tiziriweebwa kabonesyo wazira akabonesyo ka Yona. ³⁰ Olwakubba, oYoona nka niyaali nakabonesyo edi aba Nineeve, atyo n’Omwaana wa muntu nimwo alibba edi emiijo zinu. ³¹ Omukama omukali owa ludda lwa guryo alyemeera omu musango amwei na bantu aba miijo zinu, alibasiingisya omusango: olwakubba yazwiire kunkomeero za nsi okuwuura amagezi ga Sulemaani; erate,bona, asiinga oSulemaani alaani. ³² Abantu ba Nineeve balyemeera omu musangoamwei ne miijo zinu,balijisingisya omusango:Olwakubba bayendekere olwa kubuulira kwa ayona;erate,bona,asiinga oYoona alaani. ³³ Ndoowo akoleerya itaala naliteeka omu bwiina ,obate omunda wa kiibo, wazira oku kikondo, abaingira babone nekwaaka. ³⁴ Eitaala lya mubiri gwaamu niryo riiso lyaamu; eriiso lyaamu niribona okusai, no mubiri gwaamu goona gubba gwizwire eisana, baitu niribba eribbi, no mubiri gwaamu gubba gwizwiire ekirikiirya. ³⁵ Ale wekumenge eisana erikulumu liremenge okubba ekirikirya. ³⁶ Ale omubiri gwaamu goona goona nigwizula eisana, nka tigulina kitundu kimwei kya kirikiirya, goona goona gulizula isana nka eitaala ne kumulikirya no kutangaala kwaayo. ³⁷ Ale niyaali nka akusimoola, Omufalisaayo namweta okulya emmere ewaamwei: oYesu naigira naikala oku mmere. ³⁸ Omufalisaayo niyaboine, niyewuunya olwakubba oYesu tiyasokere kunaaba nka akyaali kulya. ³⁹ Omukama waiswe namukoba ati Nywe Abafalisaayo munaabya kuruguru kwa kikopo nekigwaata, baitu omunda yanywe mwizwiire obunyagi n’obwibbi. ⁴⁰ Nywe abasuru, oyo eyakoore okuruguru, tiniye eyakoore no munda. ⁴¹ Baitu, ebiri omunda mubiwengeyo okubba ebya kusasira, erate, bona, byoona byoona birongooki jimuli. ⁴² Baitu zibaajire nywe Abafalisaayo! Olwakubba, muweerya ekitundu eky’aikumi ekya nabbugira nakakubbansiri n’omukubi goona goona, baitu omusango n’okwendya oKanca mubyakala alai: ebyo kibasaniire okubikolanga na bidi obutabirekanga. ⁴³ Zibaajire nywe,Abafalisaayo! olwakubba mutaka entebbe ezamumaiso omu makumbbaniro no kulamucibwa omu butale. ⁴⁴ Zibaajire! olwakubba mukwisana nka amagombe agataboneka, abantu gebatamburaku nka tibamaite. ⁴⁵ Ale omwi oku beegesya ba mateeka nairamu namukoba ati omweegesya, nokoba otyo okuzuma naiswe. ⁴⁶ Nakoba ati Nanywe, abeegesya ba mateeka, zibaajire! olwakubba mutiika abantu emigguggu ezitetikika, nywe benyenere zimutayendya kutaaku ngalo zanywe. ⁴⁷ Zibaajire! olwakubba mwomboka amagombe ga baranji, baitu abaizeizza banywe nibo babaittire. ⁴⁸ Ale mutyo muli bajuurwa, erate musiima ebikolwa bya baizeizza baanywe, olwakubba bo babaittire nanywe mukomboka amagombe gaabwe. ⁴⁹ N’amagezi ga Kanca nikyo gazwiire gakoba gati Ndibatumirra abaranji na batume; abamwei oku bo balibaitta, no kubaigania; ⁵⁰ Eisagama lya baranji boona boona, eryasusukire okuzwa oku kutondebwa kwa nsi, gujunaanibwe emiijo zinu. ⁵¹ Okuzwa oku isagama lya Abbeeri okwiika oku isagama lya Zakaliya, eyaittiibwe akati wa kyooto n’eiramyo: Amazuma nkubakoba nywe nti galijunaanibwa miijo zinu. ⁵² Zibaajire nywe, Abeegesya ba mateeka! olwakubba mwatwaire ekisumuluzo kya kwetejja: nywe benyenere timwangiire, nabaali bakwingira mwa balemeserye. ⁵³ Ale oYesu niyaali akuzwaayo, abawandiiki, n’Abafalisaayo nibatandika okumutawanya muno n’okumubuulya ebigambo biinji; ⁵⁴ nka bakumutega, okutega ekigambo ekikuzwa omu kanwa kaamwe leke bamuloope.