¹ Nikali naacha, kawona omusaacha owewulwa ni muwofwu. ² . Abeeki baye bamuteeba baati, “Rabbi, naanu owakhola esibi, omusaacha ono nawo abewusi baye, kho kewulwe ni muwofwu?” ³ . Yesu kawoola ati, “Omusaacha ono oba abewusi baye sinje abakhola esibi.” “Naye sino syekhola kho omulimo kwa Weere kuwonekhere mu wulamu waye. ⁴ . Nga owiire luwusiiri wesideete, khuteekwa okhukhola omulimo kwooyo owantuma. Owiire wiicha, omutu yeesi yatanyala okhukhola omulimo. ⁵ . Nindi mu syalo, niise owulafu we’syalo.” ⁶ Nikamala okhuwoola sino, kafucha khuloba, kakholamo edosi na’mate, kalita khu moni cho’musaacha. ⁷ Kamuwoola ati, “Cha,” “Weyose mu diba lye Siloamu” (emboosi yino yekesa yiiti katuma). Manu omusaacha kacha keyosa, kakowola engo nawona. ⁸ Abamusibirana nende abamuwonanga enyuma era nasabirisa bateeba baati, “Ono siinje omusaacha wekhalanga nasabirisa?” ⁹ Abandi bawoola baati niye. Abandi bawoola baati, “Bbe, afwana wusa naye”. Naye omwene kataamirira ati, “Niise omusaacha ola.” ¹⁰ Bamuteeba baati, “Ne wunaanu emoni chawo chekukha chiitye?” ¹¹ Kakowolamo ati, “Omusaacha yibalanga Yesu katawula edosi kalita khu moni change. Kamboola okhucha mu Siloamu neyose. Manu nacha neyosa, ninamala nachaaka okhu’wona.” ¹² . Bamuteeba baati, “Omusaacha ono ali yeena?” kabakowoolamo ati, “Simanyire.” Abafalisaayo Bakonyeresa Ebidiira Khu Khuwoniya Okhwo ¹³ Baleeta eyiri Abafalisaayo omusaacha owabanga omuwofwu. ¹⁴ Manu oludaalo lu Yesu kakholeramo edosi kalimbusa emoni cho’musaacha lwali lwa Ssabbiiti. ¹⁵ Nolwesyo Abafalisaayo bosi bamuteeba engeri yikafuniramo okhuwona khwaye. Omusaacha kakowolamo ati, “Kata edosi khumoni change,” “Nesaaba, ni wunaanu mbona.” ¹⁶ Balala khu Bafalisaayo bawoola baati, “Omusaacha ono syatula ewa Weere, olwokhuba syadiira e’ Ssabbiiti” Ne abandi bateeba baati, “Omukhosi we’bibi anyala atye okhukhola ebya mayiya byowuwonero nga bino?” Manu bakawukhanamo. ¹⁷ Mukhwakamyayo bakowola lundi eyiri omusaacha muwofwu bamuteeba baati, “Omulomalomakho si? Emoni chawo nje chikaliimbusa.” Omusaacha kakowolamo ati, “Nabbi niye.” ¹⁸ Lwoosi Abayudaaya khaba sibafukiirira baati kali muwofwu khandi kafuna okhuwona okhwoola lubatumisa abewusi bo’musaacha. Bateeba baati, ¹⁹ “Ono musyani wenywe?” “Ono nje yimuwoola muuti kewulwa ni muwofwu? Ne wunaanu lwasiina awona?” ²⁰ Abewusi bakowolamo baati, “Khumanyire khuuti musyani wefwe, khandi khumanyire khuuti kewulwa nimuwofwu.” ²¹ Ninga lwanyala okhuwona wunaanu, oba owakira kalimbukha, sikhumanyire. Mu’muteebe. Omwene mu’khuluutu; omwene anelomalomere.” ²² Abewusi bawoola sino olwokhuba batya Abayudaaya, olwokhuba Abayudaaya bali bamalire okhukhengawo baati oyo yeesi ofukiirira ati Yesu nje Kurisito bakhamute erwanyi we’nyumba ya Weere. ²³ Esyo nje esyakira abewusi nibawoola baati, “Mukhuluutu, mu muteebe.” ²⁴ Ekhabi lyo khubiri balanga omusaacha owali omuwofwu. Bawoola baati, “Yeresa Weere enfuma,” “Khumanyire omusaacha ono mukhosi we’bibi.” ²⁵ Kakowolamo ati, “Oba mukhosi we’bibi oba khaba, simanyire. Esitu sirala simanyire, nali muwofwu ni wunaanu mbona!” ²⁶ Bamuteeba baati, “kakhukholakho siina? Kekulawo atye emoni chawo?” ²⁷ Kakowolamo ati, “Malire khale okhubawoolera ne mukhayire okhuntekeeresa. Lwasiina mudakha khandi okhuwulira? ²⁸ Mudakha okhuba abeeki baye, mwesi?” Manu bamunyeka baati, “Oli mweeki waye! Khuli beeki ba Musa! ²⁹ Khumanyire khuuti Weere kalomaloma nende Musa, naye khu musaacha ono, sikhumanyire ata yatula.” ³⁰ Omusaacha kakowolamo ati, “Wunaanu sino syamakana! Simumanyire yatula ate nga kanimbusa emoni change. ³¹ Khumanyire khuuti Weere sya’wuliirisa abakholi be’bibi. Awuliirisa omutu otya Weere okhola byadakha. ³² Yiwuma owulirangakho okhwikuliwa khwe’moni cho’mutu owewulwa nimuwofwu. ³³ Omusaacha ono aba natatula eyiri Weere, yiwuma sikakhakholire.” ³⁴ Khusino bakowolamo baati, “Ewe wasukuniwa musibi niwakhewulwa; onyala otye okhutusomesa!” bamala bamusukuna erwanyi. Owuwofwu Wo’mwooyo. ³⁵ Yesu kawulira ati bamusukunire erwanyi, ne nikamuwukaana, kawoola ati, “Ofukiririra mu mwana wo mutu?” ³⁶ Omusaacha kateeba ati, “Nje naanu sebo? Mboolere manu nakhamufukiiriramo.” ³⁷ Yesu kawoola ati; “Wunaanu wakhamuwona; mu masima, nje oyo olomaloma nawe.” ³⁸ Omusaacha kawoola ati, “Omwami, nfukiirira,” manu kamwinamira. ³⁹ Yesu kawoola ati, “Olwokhukhenga emisango neecha mu syalo muno, kho abawofwu baliwona ne abo abawona baliwofula.” ⁴⁰ Abafalisaayo bandi abali naye bawulira sino bateeba baati, “Siina? Feesi khuli bawofwu?” ⁴¹ Yesu kawoola ati, “Muba nimwali abawofwu, simwakhali no’musango kwe sibi, naye wunaanu nga nimuwoola muuti munyala okhuwona, omusango kwenywe kusikala nikuliwo.”