¹ Oluunyuma khandi Yesu keyekesa eyiri abeeki baye, khu Nyanja ya Tiberio. Syaliwo mu mera yinno: ² Simoni Petero, Tomasi (olangiwa Didumo), Nasanayiri okhutula e Kaana mu Galiraya, abaana ba Zebedayo, nende abandi babiri khu beeki bali alala. ³ Simoni Petero kabawoolera ati, “Esse nja okhunaaba,” bakowolamo baati, “Khunache nawe.” Manu bacha bengira mu lyaato, ne essiro esyo awuma sibadiira. ⁴ Echulichuli niwukhyeye, Yesu keema kulukerekha lwe Nyanja, ne abeeki sibamanya baati nje Yesu. ⁵ Kabalanga ati, “Abeecha, simudiiye khunŋŋeeni?” Ne bakowolamo baati, “Khaba.” ⁶ Kawoola ati, “Mufuube olutimba khuluwande lwo’mukhono mulungi okwe’ryaato manu munadiise khooyo esiitu.” Ne nibamala bafuuba olutiimba khu luwande olwo, manu badiisya enηηeeni nyingi olutimba lwabasidowera okhukhweesa. ⁷ Omweeki Yesu yikali nadakha kawoola Petero ati, “Nje Omwami!” Wangu wene Simoni Petero nikawulira emboosi echo nichelomaloma, “Nje Omwami,” kewoya esuuka (owali natewoyire enguwo khu mubiri kwaye) katuuma kakwa mu maachi. ⁸ Abeeki bandi bengira mu lyaato, bakhweesa olutimba nende enηηeni chalimo, bo khaba sibali aleeyi no'lukerekha lwe Nyanja, bali eyaadi nga emya ndala okhutula khu lukerekha. ⁹ Wangu nibakhatula mu Nyanja, bakaana ni aliwo esiggiri sirikho omuliro nende enηηeeni nichirikho, ne emigaati. ¹⁰ Yesu kabawoola ati, “Muleete khu nηηeeni chimwakhadiirakho.” ¹¹ Simoni Petero kengira mu lyaato kakhweesa olutiimba okhululeeta khu lukerekha. Lwali nilwichuuye enηηeeni khongo, echoola emya ndala na makhumi kataanu na chidatu, ata enηηeeni nichali nyingi chiityo olutimba khaba silwatandukha. ¹² Yesu kabawoola ati, “Mwiche khulye emere y’echuli.” Ne awuma khaba mulala khu beeki owateeba ati, “Nawe niwe naanu?” Bali bamanyire birayi byene baati kali nje Omwami. ¹³ Yesu katulayo, kawukula emigaati kabakaba, khandi kakhola nasirala nende enηηeeni. ¹⁴ Lino nje eryali ekhabi lyo’khudatu Yesu okhweyekesa eyiri abeeki baye olunyuma lwo’khusiingisiwa okhutula mu baffu. Yesu Achwichwiisa Petero ¹⁵ Nibamalire okhulya, Yesu kawoola Simoni Petero ati, “Simoni mwana wa Yokana, masima keene wundakha okhukhira banno?” kakowoolamo ati, “Yee, Omwami,” “Omanyire oti nkhudakha.” Yesu kakowolamo ati, “Liisa amakoondi kange.” ¹⁶ Khandi Yesu kawoola ati, “Simoni mwana wa Yokana, mu masima keene wundakha?” Kamukowolamo ati, “Yee, Omwami, omanyire oti esse nkhudakha.” Yesu kamukowolamo ati, “Liinda amakoondi kange.” ¹⁷ Khandi kamuteeba ekhabi lyo’khudatu ati, “Simoni mwana wa Yokana, wundakha?” Petero syamuchuna olwokhuba Yesu kamuteeba ekhabi lyo’khudatu ati, “Wundakha?” Kamukowolamo ati, “Mwami wange, omanyire byoosi; omanyire oti nkhudakha.” Yesu kamukowolamo ati, “Liisa amakoondi kange. ¹⁸ Khuwolera amasima, niwali muwere omwene wambalanga khandi wachanga wosi woosi wodakha; ne nolikofula olibambula amakhono kawo, ne omutu wundi akhwambasa na’mala akhuyira yotadakhire okhucha.” ¹⁹ Yesu kawoola emboosi chinno okhwekesa Petero enfwa eyokhukinisiryamo Weere. Olunyuma lwe’syo kamuwoola ati, “Noonde!” ²⁰ Petero kakalukhana kawona ati omweeki Yesu yikali nadakha lukali ali okhubaloonda. (Oyo nje owali nikesiiye khu mukoongo kwa Yesu mu’bikha byokhulya esyengoloobe owawoola ati, “Omwami, naanu ocha okhukhulyamo olukhwe?”) ²¹ Petero namalire okhumuwona, kateeba ati, “Omwami, ne ono naye?” ²² Yesu kamukowolamo ati, “Nindakha adonηηe ni mulamu okhwoola lundikowola, esyo siri siitye yuuli? Ewe oteekwa okhunoonda.” ²³ Khu lwasin o, olugambo lwafuma mu bamwanaηηina luuti omweeki onno syalifwa. Naye Yesu sikawoola ati syalifwa; kawoola syonηηene ati, “Nindakha asikale ni mulamu okhwoola lundikowola, esyo siri siitye yuuli?” ²⁴ Omweki onno nje otusa owujjulisi khu biitu binno khandi nje owabiyandiika. Khumanyire khuuti owujjulisi waye wa’masima. ²⁵ Yesu kakhola ebitu bindi bingi. Nisiba mbo wuli sirala khu’byo byawandiikiwa assi, mbaasa nti esyalo syoosi sisyakhabeeye ne’sifwo esibikhiwamo ebitawo ebyo nibyakhabeeye mbo byawandiikiwa.