¹ Pirato kalagira batusewo Yesu nibamukhubba. ² Abasirikale balukha engule yamawa bayiita khumutwe kwaye. bamwambasa enguwo chifaana ewookha ³ khandi balumirirakho okhucha yaali nibawoola baati, “Oluyaali lube naawe, Omwene’ngo wa Bayudaaya!” Bamala bamukhubba mumoni. ⁴ Pirato katula erwanyi khandi kabawoolera ati, “Muwone, nja okhumubatusira erwanyi mumanye muuti mbuma naye omusango kumuwenekho.” ⁵ Yesu nikatula erwanyi nikambaye engule ya’mawa nende enguwo yo’luyaali eyifaana nga ewookha, Pirato kabawoola ati, “Omusaacha nje onno!” ⁶ Muwangu ba’khawona na’bakhuluutu bawe balomalomera amukulu baati, “Mu mukhomerere! Mu mukhomerere!” Ne Pirato kabakowoolamo ati, “Mumuyire mu’mukhomerere. Ne esse, mbuma sinemakho okhumutaakho omusango.” ⁷ Abayudaaya batamirira baati, “Effe khuli nende elako, khandi okhwema khu lako eryo ateekwa okhufwa, khulwokhuba kelaanga okhuba omwana wa Weere.” ⁸ Pirato nikawulira sinno, kemeeda no’khutya khandi kakowoolayo mu Ddookho. ⁹ Nakowolayo, kateeba Yesu ati, “Otula yeena wene?” Naye Yesu sikamukiwolamo. Pirato kamuwoola ati, ¹⁰ “Syudakha khulomaloma nange?” “Syumanyire oti ndi no’wunyala owo’khukhulekhula, oba owo'khukhukhomerera?” ¹¹ Yesu kakowoolamo ati, “Siwakhabeeye no’wunyala khwise no’ba notakhabeeye niwawuweresewa okhutula amakkulu. Nolwesyo oyo owumbayo yuuli ali n’omusango okwe’sibi sikhirakho.” ¹² Okhutula awo, Pirato kakesakho okhulekhula Yesu, ne aba Yudaaya bachanakana nokukhero baati, “Nimulekha omusaacha ono kawawo, simuba beecha ba Kayisaali. Yesi yeesi owelanga okhuba Omwen’engo aba ayinganiya Kayisaali.” ¹³ Pirato nikawulira sinno katusa Yesu erwanyi kekhala khu sisaala syo’wulamusi musifwo simanyikhire nga ekiina lyo khu sigiigo, (mu bebulaaniya Gabasa) ¹⁴ Lwali oludaalo lwo’khutekekherakho ejjuma ye'mbaga yo'khubitakho, ambi we saawa yo’mukaaga. Pirato kawoola aBayudaaya ati, “Omwene’ngo wenywe nguno.” ¹⁵ Ne bayokerera amukkulu baati, “Mutuseewo! Mutuseewo! Mukhomerere!” Ne Pirato kateeba ati, “Ndakhomerere Omwene’ngo wenywe?” Ba Khawona bakhuluutu bakowolamo baati, “Khuwuuma Omwene’ngo okhutusakho Kayisaali.” ¹⁶ Olunyuma lwa byoosi Pirato kamuwaayo yibali akhomererwe. Okhukhomererwa Manu abasirikale badoηηa nibalindire Yesu. ¹⁷ Nikekiingiye omusalabba kwaye omwene, katula erwanyi kaacha musifwo sye’biwayanga (mu lulimi lwa Arameyiki esilangiwa Gologosa). ¹⁸ Ano nje abamukhomerera, ne alala naye abandi babiri__ mulala khu wuli luwande ne Yesu akaati wawe. ¹⁹ Pirato kawandiika esilangiriro syateewa khu musalabba. Syasoma siiti: YESU OWE NAZALEESI, OMWENE’NGO WA BAYUDAAYA. ²⁰ Bangi khu Bayudaaya basoma esiwandiiko sinno, khu lwokhuba esifwo Yesu akakhomererwa syali ambi nende esiko sikhongo, ne esiwandiiko syali mu Arameyika, Latini nende Oluyonani. ²¹ Ba Khabona bakhuluutu bemulugunya eyiri Pirato, baati, “Otawandiika oti, ‘Omwene’ngo wa ba'Yudaaya, ne oti, omusaacha onno ketaakho ati, ‘Niise Omwene’ngo wa ba Yudaaya.” ²² Pirato kakowolamo ati, “Simbandiikire, Mbandiikire.” ²³ Abasirikale nibali bamalire okhukhomerera Yesu, bawukula enguwo chaye, bachikabaniyamo amakhabi kanne, wuli mulala abe nomukero kwaye, enguwo yo mukkati yasikala. Enguwo yinno siyalikho ekemo, ni yatungiwa mu suuka ndala okhutula amukulu okhwoola assi wayo. Bafukirisaniya abene na’beene baati khutayitandulamo, ne khu bite mu khalulu kho khuwone naanu onayiyire. ²⁴ Sinno syakholekhana ebyawandiikiwa byolerere ebiwoola biiti, “Bakabana enguwo change abene khubeene bakhubba nakhalulu khu lwe’byambalo byange.” Sinno nje abasirikale sibakhola. ²⁵ Nηηina Yesu keema ambi no’musalabba kwa Yesu, omukhana wawe ηηina, Malyamu omukhaaye wa Kuloopa, nende Malyamu Mangadalena. ²⁶ Yesu nikawona ηηina awo, nende omweeki yikali nadakha lukali nibemire ambi, kawolera ηηina ati, “Mukhasi mudakhwa, omwana wawo ngunno,” ²⁷ khandi eyiri omweeki ati, “ηηinenywe nguyo.” Okhutula ebikha ebyo, omweeki ono kamuyira engo waye. Okhufwa Khwa Yesu ²⁸ Olunyuma, okhumanya mbo wunaanu byoosi byali biweye, khandi mukhumanya mbo abyawandiikiwa binyale okhwolerera, Yesu kawoola ati, “Ndi no’wuluwo.” ²⁹ Ebbuka lyo mwenge mululu lyzli liteywe awo, bawukula esyangu basiinikhamo, baata esyangu khumudaya bamuta khu munwa. ³⁰ Nibamala okhumunywesa, Yesu kawoola ati, “Syakhawa.” Necho mboosi, kenamya omutwe kwaye nakhookhire ekkosi, kawayo omwoyo kwaye. ³¹ Awo lwali oludaalo lwokhutekekha, oludaalo lulondakho lwali lwa Ssabiitti lwenjawulo. Olwokhuba Abayudaaya sibadakhanga emibiri okhulekhewanga khu musalabba olwa Ssabiitti, basaba Pirato bakhalake amakulu emibiri bachiise assi. ³² Abasirikale khulwesyo beecha khandi bakhalaka amakulu ko’musaacha wa’mberi owali nakhomereywe nende Yesu, naka’bandi abali nibadoηηire. ³³ Ne niboola khu Yesu bakaana mbo amalire okhufwa, sibakhalaka amakulu kaye. ³⁴ Okhumalakho, mulala khubasirikale kachoma Yesu enfumo mu lubafu, amangu akko, wangu weene amabanga kafudumukha alala na’maachi. ³⁵ Omusaacha wa’wonna kawa owujjulisi, no’wujjulisi wutuufu. Amanyire ati awa owujjulisi wamasima, khandi asilomaloma wesi onyale okhufukirira. ³⁶ Binno byakholekhana ebyawadiikiwa binyale okhwolerera: “Si yali kumba lyaye elirikhalakiwa,” ³⁷ khandi, ne siwandiiko siindi esiwoola siiti, “balyewunja khu oyo yibafumita.” Okhusikhiwa Khwa Yesu ³⁸ Olunyuma, Yusufu owa’limasaaya kasaba omubiri kwa Yesu. Wunaanu Yusufu kali omweeki wa Yesu, naye muwekisi olwokhuba kali atya aBayudaaya. Olwokhufukirirwa nende Pirato, keecha khandi kayira omulambo. ³⁹ Kayerekesewakho Nikodemu, omusaacha owali nakeniyirekho Yesu essiro. Nikodemu kaleeta amafuta kakhawowo akeyera owusiito wako pawundi nsafu mutaanu. ⁴⁰ Nibawukuye omubiiri kwa Yesu, banno babiri bakuwowa birayi mu nguwo chebeyi, nibakuteyekho amafuta kakhawowo. Sinno nje syakholewanga na Bayudaaya nge'nsambo chawe nibasiikha. ⁴¹ Musifwo Yesu sikakhomererwamo, aliwo endalo, munno mwalimo enηηani mbyakha, omutu yeesi mwatasikhiwamo. ⁴² Kulwokhuba lwali ludaalo lwa Bayudaaya lwo’khwetekekherakho ni khandi nge'nηηani yiri ambi, bayikoniyamo omulambo kwa Yesu.