¹ “Mutafukiriranga emyoyo chenywe okhwelalikhirira. Mwesike Weere; khandi munesike. ² Munyumba ya Bbabba mulimo ebisenge bingi; siba nisitakhabeye siityo, nakhabawoleye. Nja eyo okhubatekekhera esifo. ³ Khandi ninja okhubatekekhera esifwo, nja okhukowola mbende khuche nanywe kho mwesi munyale okhuba andi. ⁴ Mu manyire engira eyicha esse yinja.” Yesu Engira Yicha Ewa Bbaabba ⁵ Tomasi kamuwoola ati, “Omwami, sikhumanyire yocha, khunyala khutye okhumanya engira?” ⁶ Yesu kakowoolamo ati, “Nise engira khandi amasima khandi no’wulamu. Awuma ocha ewa Bbaabba okhumalakho nga’bitiiye mwise. ⁷ Nimuba mwamanya esse, mwakhamanyire Bbaabba wange yesi. Okhutula wunaanu, mu mumanyire khandi mwamuwona.” ⁸ Firipo kawoola ati, “Omwami, twekese Bbaabba esyo sinatumale.” ⁹ Yesu kakowoolamo ati: “Si muumanyire, Firipo, nende nimalire okhuba namwe ebikha bireyi biiti? Oyo yeesi owumbwene awene Bbaabba. Onyala okhuwoola otye oti, Twekese Bbabba’? ¹⁰ Simufukirira muuti ndi mu Bbaabba, khandi Bbabba ali mwise? Emboosi chimbawoolera si change esse omwene. Naye cha Bbabba, owumenyiremo, oli okhukhola omulimo kwaye. ¹¹ Munfukirire nimboola nti ndi mu Bbaabba khandi Bbaabba kandimo; oba nisitaasi siityo mufukirire okhwema khu wujjulisi owe byamagero byene. ¹² Mbawoolera amasima nti, oyo yeesi oli nenfukirira mwise acha okhukhola bi mbeye ninkholanga. Alikhola ne’bikhiira awo, khu lwokhuba nja eyiri Bbaabba. ¹³ Khandi nja okhukhola wuli simusaba mu liita lyange, khusibe nti omwana anyale okhuleeta oluyaali eyiri Bbaabba. ¹⁴ Munyala onkhusaba syoosi mu liita lyange, khandi ndisikhola.” Yesu Asubisa OMwoyo Omwolerefu ¹⁵ “Nimundakha, mulidiira bimbalagira. ¹⁶ Khandi nja okhusaba Bbaabba, khandi acha okhubawa omukeraki wundi ocha okhuba nanywe endaalo choosi__ ¹⁷ Omwoyo wa masima. Esyalo sisinyala khu mufukirira, khuba sisimuwona ata sisimumanyire. Ne'nywe mu mumanyire khulwokhuba amenyire nanywe khandi anababengemo. ¹⁸ Sinja khubalekha nga abafwire; nja okhwicha yimuli. ¹⁹ Musikha sitono, esyalo sisicha khumbona khandi, nanywe mucha okhumbona. Khuba ndiwo omulamu, mwesi muliba balamu. ²⁰ Khu ludaalo olwo nje lumulimanyira muuti ndi mu Bbaabba, khandi mundimo, ni khandi ese mbalimo. ²¹ Oyo oli namalako kange manu kakakholerakho, nje owundakha. Oyo owundakha alidakhiwa nende Bbaabba, ni khandi Ssesi ndimudakha khandi namuwonekhera.” ²² Awo Yuda (Otali Yuda Yisikarioti) kawoola ati, “Ne, Omwami, lwasiina ogenderera okhweyekesa yikhuli okhulekha okhweyekesera esyalo?” ²³ Yesu kakowoolamo ati, “Nisiba mbo omutu yesi kandakha, aba acha okhufukirira okhusomesa khwange. Bbaabba acha okhumudakha, khandi khulicha yali khandi khwakhola naye edaala. ²⁴ Ne oyo otandakha syadiira ensomesa yange. Emboosi chinno chimuwulira sichange; cha Bbaabba owantuma. ²⁵ “Binno byosi mbalomalomeeye ninsiri nanywe. ²⁶ Ne omukeraki, omwoyo mwolerefu, oyo Bbaabba yacha okhutuma mu liita lyange, acha okhubekesa ebitu byoosi khandi abechulise byoosi bimbawoleye. ²⁷ Emirembe mbalekhera; emirembe change mbawa. Simbayeresa emirembe nge syalo lusiwa. Mutalekha emwoyo chenywe chachunisiwa khandi mutaba no’khutya. ²⁸ “Mumbuliye nimboola nti, ‘Mbwawo khandi ngowola yimuli.’ Nimwakhabeye mundakha, mwakhasangaaye khuba nja eyiri Bbaabba, khulwokhuba Bbaabba kankhira lukali. ²⁹ Mbawoleye wunaanu nibitakholekhana, sibe mbo nibikholekhana munyale okhufukirira. ³⁰ Sinja khulomaloma namwe, khuba omusyani munawaami we syalo sinno keecha. Syali no’wunyala yindi, ³¹ Ne esyalo sikhoyire simanye siiti ndakha Bbaabba ni khandi nkholera erala Bbaabba wange sikandagiiye. “Mwiche wunaanu; khuwewo .”