Agbandang Zunzwo 2.
1
Nyi yok fāk āwun āniet lak li nyin beh bah. Di nwai fāk āwun huhwa nyi nā ntak mā āmbe nang ā nā mbwuk mā āmbe, āwot nyin, nyi nā shyā san. Āgwaze wa nā tyiā kudangkyang ku indi ānya.
2
Ātan kyan nang gu nyiā nyin dyo dānian Kristi āni, bā dānian nyiā nyi ku nwuak fwuo ha, ku chat nyin ma nyi swuo abung mang gu dung. Yi shyā mi hyai tangkāi āyirak kāāi dundung māning, sangak nyin nfwuong ābung ke nang nswuo āfwun āni.
3
Nyi yok chat āpyiā nyi kyiak nang nyi ndan āghyang āniet bah. Nyi bu yok nyiā mi tām nang nyin mā āghyang āniet nā ntām wa āni bah. Dā ākwonu ākya, nyi ni nghyuai āpyiā nyin, āwot konyan ā kyiak nang āghyang āniet ndan nggu.
4
Konyan mā nyin gu ni ngyok chat mi kyang ku nā myim nggu mā nyin gu wa āni bah. Āwot dā ākwonu ākya, ā bu chat kyang ku nā myim āghyang āniet āni miyang.
5
Yok nyi byiā tangkāi zākwae nang Yesu Kristi ku byiā āni.
6
Ku nang Kristi mā āpyiā nggu ngyet Āgwaze āni, kākāp mā āynia, ā du kyiak āpyiā nggun chāchaat mā Āgwaze bah. Ā si kyiak yet Āgwaze nggu hu ku yet gu āwat nang gu nā mbāng ginging āni bah.
7
Dā ākwonu ākya, ā si kai āwat shi yet Āgwaze nggu ke ā ghwon.
Ā si ghyuai āpyiā nggu.
Ā si bwuak ā tyiā ākhwo.
Āwot ā si byin nggu di sisak nang
ā ntyei ānietbishyi āni.
Nang gu mbai mi vam ātyubishyi āni,
8
ā si ghyuai āpyiā gu,
ā si khwi kyang hu nang Āgwaze chat āni. Āwot ā si khwu nang ātyu ātsaai ni nkhwu dā āteam ākhwu āni!
9
Mā ānyiā, Āgwaze si mbiyang gu shi, ā si sak gu dā āvwuo kā swak mā shi āni. Āwot Āgwaze si nwuak gu ālyoot tyok kā swak kuzang ālyoot mā shi āni;h
10
dānian kuzang āyin ā shyā Ma Āgwaze tswazwa mā swanta, mā tafa ābyin swanta ke āni; ā ke kpaat ākhwukhwut āzaghyi nggu.
11
Āwot kuzang āyin nā tak kpāsai nang Yesu Kristi wa ngyet Ātyoli wu; mat āniai, kākāp āniet beh nā dyep Āgwaze ā yet Ātyiā wu āni. Yok Ānikhwui bā Sai mi Swanta nang Fí̱tila āni
12
Mā ānyiā, nyin ānikhwui Yesu beh nang n chat āni, nyi ku khwi tyiet nung hu nchiring din jen nang n ku nshyā ndung mā ānyin āni. Ma āynia wa māninika, nang n nwai shyā mā nyin āni, ku yet āsham ā swak ki nyi khwi tyiet nung hu. Nyi kwan nyi nyiā tām ku tak nang nyi nshyā ājhyem san āni. Āwot nyi khwi Āgwaze mā āwun mā nwuak āpyiā bāt.
13
Mat Āgwaze wa nyiā ntām nā mi nfwuo nyin ne. Nggu wa nwuat nyin didang mā chet nyiā ntām ku myim ātan lāp sak nggu wu āni.
14
Kuzang tām hwa nang nyi nā nyiā, nyi ni ngyok kwop ādyiing mā ya fwuang bah.
15
Dānian nyi ke yet āzāzārak mā ātsatsak mman Āgwaze nā sang ābun nyi swan mā ākātuk swanta wuni mā ākātuk ānietj beh āni. Ku yet tā hwa, nyi sai nang fí̱tila āni mi swanta hu.
16
Nyi bāng ālyiatk nā nwuat swuan āni ginging, dānian ātuk ke nang Kristi nā mbwuok ā bai āni, n ke ntām n bu ndyen nang n tyong ābuk chung dā āvwuo nyin bah. Āwot n ke ntām nang tām nung hu ngyet ābuk ntām wa mami nyin bah.
17
Kā āynia wa, n nā nfāk fwuo sai, ku nang n nā ndyin swuan nung ji, nang ā ni nkoot zānang ji yet āsok āzaghyi Āgwaze āni. Zānang jini bu tai ātsotswat ntām nyin wu nā yet kidee zānang āzaghyi Āgwaze āni. Āmgbām mā āynia, n chat kākāp nyin nyi biyang nung āgwai āynia.
18
Ātsak ālyiat, nyin miyang ku yet tā hwa nyi gwai. Āwot nung, n nā gwai dundung mā ānyin.
19
Ki Ātyoli Yesu shim, n bāng fwuo n nā tām mā ānyin Timoti ānfaan, gu ke bai ā byiat nyin. Āwot kā ā hyiā mā ānung nkhang nyin ne, n nā nfāk nyinyang di sisak nang nyi nswan āni.
20
Á̱ bu mbyiā āyin ndung mā ānung āji nang Timoti āni bah. Nggu wa byiā ātsatsak ādidam chat biyang tanzwe swat nyin hu.
21
Āwot ākum āniet ke, konyan mā mba nyiā ādidam tanzwe ghiye āson āpyiā nggu kya. Dā mba, bā chat sisak nang bā nā nnyiā nkyang nā nang Yesu Kristi chat āni bah.
22
Āwot nyin mā āpyiā nyin, nyi wa kān dyen nang Timoti wa kān tak nang gu ngyet ātsotswat wa. Ā li mā ānung nang nggwon mā ātyiā nka āni. Ā kān nyiā tām shei Āsham Nkhang Yesu ke dundung mā ānung.
23
Huhwa mbyiā, jen nang n dyen kyang ku nā shyā nung āji āni, n bāng fwuo n nā tām gu dā āvwuo nyin ānfaan.
24
Āwot nung n nwuak āchuchuk nang Āgwaze nā nshim nung mā āpyiā nung, n nā mbai n byiat nyin ānfaan.
25
Āwot māninika, n dam n di ku myim n bu ntām mā ānyin Ābafāratut ā bwuok ā bai dā āvwuo nyin. Ā yet ātsatsak ānānyiuk nzit wa mi khwi Kristi hu. Ā si bu yet ākpāndang tām, ā li nang ātyu nzwang āni di shei Āsham Nkhang Kristi ke dundung mā ānung. Āwot ā ku yet ātām nyin wa nang nyi ku tām gu ke biyang nung di kyang nang n chat āni.
26
N nā tām gu dā āvwuo nyin mat ā fwuong didang li nyin kākāp. Āwot ā si byiā āfifa bāt, mat ā lyen nyi kān fāk nkhang zwan nggu nā.
27
Ātsak ālyiat, ā ku nyiā mā zwan bāt á ngyei ā nā khwu. Āwot Āgwaze si fāk kunak gu, mā ānung miyang, kalak swuo ābung nung hu ku swak sisak nang n swuo ābung ke mānini āni.
28
Mā ānyiā, n byiā didang bāt, n bu ntām nggu gu bwuok ā bai dā āvwuo nyin, dānian nyi ke gwai din jen ji nyi bu ndi nggu āni. Āwot n bu nā nyiā ākātuk āfifa tanzwe nyin bah.
29
Nyi san gu mbwak nfeang mā āgbāndang āgwai mami chat ku yet si ānikhwui Ātyoli Yesu āni. Āwot nyi bu nwuak tangkāi āniet nang nggu āni shi.
30
Mat ā ku nwuak swuan nggu ji ā si shim ākhwu dānian tām Kristi. Āwot ā si biyang nung ākwonu nyin neng nyin bya myim nyi biyang nung āni, ki nyi wa shyā kpāmkpaan āji.