¹ బాప్ ఛజే దేవేమాన్ ప్రభూఛజే యేసుక్రీస్తూమా విశ్వాస్ ఛజకో తెస్సలోనీక సంగమేర్ జనూనె పౌలన్, సీలాన్, తిమోతీ క్వొసళ్ కన్ కేన్ లకేర్ కృపాన్, సమాధాన్ తమేనే వేజా. ² త మార్ విశ్వాసేర్ నై తమ్ కు చాల్ రేఛోకో, తమార్ ప్రేమేర్ కార్ణే తమ్ కత్రా భావేటీతీ కామ్ కర్ రేఛోకో. ³ అపణ్ ప్రభు ఛజే యేసు క్రీస్తూమా తమార్ నిరీక్షణ్ కత్రా ఘట్ ఛేకో, హమ్ దేవేర్ ముణాoగె తమేనె న భులజు హర్దేలాలేన్, హమేసా హమార్ అరజేమా తమార్ సేర్ వాసే దేవేనే స్తోత్రo కర్తేరేరేఛా. ⁴ మార్ భాయిబoదో, దేవ్ తమేనే ప్రేమ్ కరన్ ఓర్ జనేర్ నై రేనే తమేనె కుoత్ మేలోచెకన్ హమేనే మాలమ్. ⁵ కస్నెకతో హమ్ ఆచ్ ఖబరేనే తమేనె వాతేతీజ్ కేకొని పణ్, పవిత్తర్ ఆత్మార్ జోరేతీన్ ఉ సత్ కన్ కాటో నమ్మకమేతీ తమార్ డై ఆయిజకో ఖబర్ ఛకన్ తమేనే మాలమ్ హమ్ తమార్ కన్నె రాజన్నా కు బంఛేకో తమేనే మాలమ్. ⁶ పవిత్తర్ ఆత్మార్ కార్ణే ఆవెజే ఖుషీతీ ఘణ్ మోట్ భావేటీమా సదా తమ్ ఆచ్ ఖబరేనే మాన్ లేన్ హమార్ నై, ప్రభూర్ నై చాల్ ⁷ సకేవాళ్ వేగే.కస్నెకతో తమార్ కార్ణే దేవేర్ ఖబర్ మాసిదోనియామాన్, ⁸ అకయమాన్, వజాగజాగీ, ఒత్తజ్ కొనిపణ్ దేవేమా తమేనే ఛజకో విశ్వాసేర్ ఖబర్ స్వగ్లీ జాగుమా ప్యాలాయె జేర్ కార్ణే హమ్ ఉజ్జీ నాళీకాయికేసకేర్ ఛేని. ⁹ తమార్ డై హమ్ ఆయొజనా, తమ్ హమేనే కు డై కర్ లీదేకో, ఓత్తేర్ జన్ సే హమార్ కార్ణే కేలేరేఛే. ¹⁰ మురతేరీ మావ్ ళి వూనె ఛోడన్, అమేసా జీవ్ రోజకోన్ సత్తేదార్ ఛజే దేవేర్ సామ్ కు ఫరేకో, దేవ్ మ్వోతేమాయితీ ఓటాడోజకో ఓర్ బేటా యేసునే, ఆవెజేకో దేవేర్ రీసేతీ అపణేనే తపారోజకో, ఓర్ బేటాఛజకో యేసు, స్వర్గ్ లోకేతీ ఆవేఛేకన్ ఓర్ జగు దేకేనే తమ్ కు దేవేర్ సామ్ ఫరేకో ఏ ఖబరే సే ఓజ్ మాలమ్ కర్ రేఛే.