¹ Hujih dega abdate k'ak'aartiah gula isaanti bareesani himaleh. ² Ana himbeeka moma ona teesanih tah ana ishiafi gula ufa olfuud'u anamah Maked'oniah ti. Ana hah isaaniti hime aka Akaayah ni gana kaleesatuh shawaanefateni. Fed'ih teesani hah isaani ona keecheh tochih keeche. ³ Teemtana ana hah ebeleeni erge tanaafi ufa olfuud'iinsa keena kah hadiyoh ah hiinteini isani gula. Amaleh suniini shawaanefatani tah ana isaanti himeh akisi itaani maltani yed'e. ⁴ Malyenani, woh anamah Maked'oniah anaani wiliini d'ufanih isanih kah takah hinshawaanefatini d'ergu, nutini hinch'eera-aka nutini abdih isani kasah k'amna yene suniini. ⁵ Suniifi ana rhujih d'erge ebeleeni ti dubanooni wah isaanti d'ufanih amaleh duraatuh wih mid'aasanuh yooyah isani d'aamtaniifi. Tanaani wah yooyah fed'iani baasanu itaatuh, amaleh wunih rhujiani baasanu hiinteni. ⁶ Dubih ni tana, nama dik'iyoh buufatu dik'iyoh d'ak'awa amaleh nama eeba afi buufatu eeba da'k'awa. ⁷ Anamah t'uut'umah wah akuma iniini ona isah kasaati momate mid'aasuh. Iniini yuula afi rhujiani himbaasini. Malyenani Waak'a ini anamah ona fed'iatini baasu fed'a. ⁸ Amaleh Waak'a ini dendeechah eeba t'uut'umah isanih iti daranuuni k'awa, suniini, guyah t'uut'umah, wunih t'uut'umah kesa, wunih isani feetanu t'uut'umah k'awaatani. Wunih ishiini akisih suniini isani tochih daansah t'uut'umaani iti daramtani. ⁹ Ishiini akuma ishih bareesaniti, 'Iniini hah halak'uma isah k'oodeh amaleh deegah ti kane. D'ugah isah muumeh hink'abduh." ¹⁰ Kah beeyuh buusituti kanu amaleh mukaateh aka segeleah kanu, beeyuh teesani iti dara buufanoafi. Iniini ch'apsanoh d'ugah teesanih iti dara. ¹¹ Dirbuh magaadani isani halak'oomsani suniini dendeechanih toltuh itaatani. Ishiini tuni Waak'a d'ud'ah iti kaniti nuh araani. ¹² Malyenani hujih ni tuni mid'aasani dega abdate ch'alah hink'ak'aartuh. Ishiini tochih gudah d'ud'aa Waak'a ati kaniti. ¹³ Malyenani isani mala ilaalchih teesanifi amaleh d'egersiisah hujih tanah, Waak'a gudisitani mid'aaasatih d'ugoomfanoh teesani tah Oduh Daansah ah Yeesuh kristoh ah. Isani Waak'a gudisitani yooyah isani isaaniti kanitanih amaleh dega d'iwiiti kanitani suniifi. ¹⁴ Isaani gudah isani d'egertah fed'ani amaleh isanih kad'atani. Isaani ishih tana dada guduyuh t'uut'umah kah Waak'a ah kah isani ara jiruufi itaani. ¹⁵ Waak'a wah d'ud'ah iti kananuh yooyah isah tah hiodeesifamne.