¹ Isani kah fed'anu, nutih kah d'aamsa kana k'au ufa nuh k'uk'ulisah wunih t'uut'umah tah nafa keena kesa nuh t'ureesitu. K'uk'ulina nuh hordofah sodah Waak'a ah kesa. ² K'aaleh nutih mid'aasah! Nutini takah anamah toko hiyakineh, amaleh anamah hink'uunyeh yoh dendeechah anamah hinshak'amneh. ³ Ana isani adaawa afi dubih suni isaniini hiyeneh, malyenani ana baiyah isannti hime aka isani ona teena kesa jirtanu suni, yoh duafi jireena itaateleah wiliini jira. ⁴ Ana abdih guduyuh isani arah k'awa, aka hama ufa ofuud'insa guduyuh isani arah k'awa. Ana ona keechih k'awa. Ana gamada guduyuh k'awa hanshaara keena kesaaleh. ⁵ Mala nutini Maked'oniah ati d'umne, nafa keena hah kafate. Urga ishiah, nuh hanshaarsani gara t'uut'uma kesa lola ifaatifi amaleh sodah nuh kesa jirtufi. ⁶ Amoh Waak'a ini, kah dega ona ani ch'abde, ona iti kanu ona nuh kaaye d'ufa T'iit'oh afi. ⁷ D'ufa isah ch'alah araani Waak'a ini nuh ona hinkeenyeh. Ishiini malsuni amaleh ona keechih T'iit'oh ni gara keesanih d'ak'aweeti. Iniini hah fed'ih teesani guduyuh nuuti odeese, yuula keesanih, amaleh akuma isani momtani, suniifi akuma aadah gamada. ⁸ Woh wark'atih kinkih mama isani kaayeleah, ishih suniifi yed'eh ufih hingaabuh. Amoh hah ishih iti ufih gaabe mala wark'atih tintih mama isani keeche. Amoh isani malsuni wogah dik'iyoh mama k'abdani. ⁹ Teemtana ana gamada k'awa, aka isani hanshaarsani suniifimuh, amoh malyenani yuula keesani namseh lakisaani isani geeche. Isani hah mama Waak'a ah baratani, suniifi isani wih hind'emneh nutifi. ¹⁰ Malyenani mama Waak'a ah jireena d'ufaani tah jireena ufih gaabiah hink'amne. Mama lafah, akumsuuleh duh d'ufaani. ¹¹ Meh ilaalah wunih jaweena mama Waak'a d'ufeeni isani kesa. Gudina aka atamiiti kah isani kah hameena hink'amne d'egerisiiptu isani kesa. Gudina ufih loliinsa keesani atami jira, sodah teesani, fed'ih ona teesanih, abdih amaleh fed'ih ona teesanih tah d'ugah mid'aasani d'egertaa! Wunih t'uut'umah isani hah d'egersiiptani aka isani wunih hamtuh hink'amne suniifi. ¹² Woh ana isani gula bareeseleah, ana yakah afi himbareesineh, yoh nama yakah afi hanshaaru. Ana wunih ana bareesefi hid'uh keesani nuh gula wah baratanu waak'a duraati. ¹³ Amoh ishih tanaafi ona kaayamna. Iti darama ona keechih teenah, nuuleni hah gamane malsuni ara malyenani gamada T'iit'oh atifi, malyenani aka isani t'uut'umah isa d'iyeesifatani suniifi. ¹⁴ Malyenani mala ana isa duraati isaniifi ufa olfuud'u, namuh ana hinch'eersineh. Urga ishiah, akuma nutini wunih t'uut'umah isaanti himne d'ugaa' ufa olfuud'insa keena isaniifi T'iit'oh gula d'ugah itaate. ¹⁵ Amaleh fed'ih ona isah isani gula hah gudate, akuma iniini k'awanoh teesani t'uut'umah k'aawatu suni, aka isani isa d'iyesifatani suni, aka isani isa sodah afi holaani d'iyeesifatani suni. ¹⁶ Ana hingamada malyenani abdih guduyuh isani arah k'awa