¹ Suniini ana deewieh gara keesani hind'ufuh moma d'ukuduani. ² Yoh ana d'ukuduh isani kaaye oonoti ana gamachisa yoh kah ana k'ak'aaru suniifi hiinteinih? ³ Akuma ana mid'aase bareese suniini mala ana isaanti d'ufe ana hink'uuk'ini dega malsuni ana gamachisite. Ana abdih isani t'uut'umah arah k'awa akuma isani t'uut'umah gamada k'abdanu suni. ⁴ Malyenani ana d'iwa guduyuh kasaani isaanti bareese, k'uuk'ama ona atini wiliini, amaleh imimaani gudaani, himfeeneh d'ukuduh isanio keechih, suniini baratani fed'ih tintih mala ishiini geechu gara keesani. ⁵ Yoh kah d'iwiini d'ukuduh isani kaayu, aka iniini gara kinkih chalah kaayemuh gara tokooni aka hamah suni hinkeenyuh, gara keesani keesani. ⁶ Addawa abah sunih goduh ani hingeechi. ⁷ Suniifi urga ishiah, lik'imsaafih yoh sosowad'ah, moma isa hamaani himarsinih. ⁸ Suniifi diiduma kaanti isaanti gumaachah fed'ih teesanijaweesa gara isah. ⁹ Suniini isaanti bareese, mala isani ilaaleh aka isani sah ijaajitanu gara hujih t'uut'umah. ¹⁰ Woh isani anamah lik'imsityanuufi, aleeni hah lik'imseefi abah suni. Tah ana lik'imsu, yoh wunih ana lik'imsu, hah isanih lik'imsani fuula dura Kristoh ah. ¹¹ Wunih suniifi ekerah ni dendeecheh nuh sobdi. Aka nutini himbeenye dirbuh ishiah suni. ¹² Akumsuuleh ch'ufanah baiyah anah hiikani Aaboh ni mala ana wora gudyuh Troah suni geh kah ana Oduh Daansah Kristoh ah Waadie. ¹³ Suniifi matah ani anaani boorae aka ebeleesa kinkih T'iit'oh achiiti hind'ergini suni. Suniifi kee durah Maked'oniah ti deewie. ¹⁴ Amoh Waak'a wa d'ud'ah iti kananuh guyah t'uut'umah kah dega hililishaa nuh tochu Krsitoh kesa. Nuh araani iniini udaa miyoochuh beekinah isah urga t'uut'umah. ¹⁵ Suniini nuh gara Waak'a ah jira udah miyoochuh Kristoh ah, yoh gara dega jiraachisaneefi gara dega duduuteh. ¹⁶ Gara dega duduuteh, udah miyoochuh gara dega duuteh tah duduuteti. gara jiraachisaneh, ishiini udah miyoochuh jireenah tah dega jireenah. Oonoti wunih tana t'uut'umah ara ijetah? ¹⁷ Suniifi nuti aka dega tah d'iwih dubih Waak'a ah kara ani bitatu suniimuh, urga, ishiah aka k'uk'uulomah, ergani gara Waak'a ah d'egertah Waak'a atini, akesi dubana Kristoh ani.