¹ Ana isani kah rhaatuma tintih gulboh fed'a. Amoh d'uguma isani ana gulbaatanih! Suniifi ana hinaafah isani arah k'awa. ² Ana hinaafah Waak'a ah isani gula, ufa anad'iisa tokocha isani gula d'aame. Ana hah d'aamad'e aka duwartih udaa Kristoh ti isani kanih. ³ Amoh ana sodah k'awa aka bofa ini Hauwah sowe d'ara isaatini, moma keesani dendeanih gorsani k'uk'uloma afi Yeesuh ti ufa kanih arah. ⁴ Malyenani woh anamah d'iwiini d'ufeh amaleh Yeesuh d'iwih waadiu kah nutini hiwaadini. Yoh Hara d'iwih d'ak'abdanu tah isani d'ak'abdani suni lakisih. Yoh Oduh daansah d'iwih d'ak'abdanu tah isani baiyah d'ak'abdani lakisih. Isani hah aka daansah wunih tana t'uut'umah omsitani! ⁵ Suniifi gara moma kiyah hinjiruh tah ana durah hamp'alate tah ergatuh gugurdaani k'abdu. Amoh woh ana wih himbeenyeleah dubih baasah gula, ana nama k'aruma himbarsiisinemuh. ⁶ Amoh dirbuh t'uut'uma amaleh wunih t'uut'uma kesa nutini hah taleh keenye isani dura. ⁷ Teemtana ana hah namseh d'aad'eh kah ana ufa lafa buuseh suniini isani olfuud'ani? Malyenani ana Oduh Daansah Waak'a ah hadiyoh isaanti waadie. ⁸ Ana mina Waak'a ah geri kara isaanih birah hate k'ak'aartih isaanih fuud'eh suniini dendee isanih ergad'a. ⁹ Mala isaniini wiliini jirah amaleh wih hink'amneh, anamah tokoleh iti ulfaaneh. Malyenani ebeleeni gara Maked'oniah tih d'ufani d'ip'uh tintih anah k'it'eesani. Ana wunih t'uut'umaani kesah hah isaanti ulfaanoh arah ufa d'oorge, amaleh akumsuni ara d'ek'eh ishih suni ita. ¹⁰ Aka d'ugah Waak'a ah ana kesa jiru, ufa olfuud'insa kinkih kana namuh hinch'alisiisuh moguh Akaayah kesa. ¹¹ Maalifi? Malyenani aanti isani himfeeneh? Waak'a ini himbeeka aka ana mid'aasu. ¹² Amoh wunih ana mid'aasu, deewieh himid'aasa. Ana himid'aasa suniini dendee dega k'aaleh barbaabadu itiseh k'aaleh hind'ak'awinih, suniini dega dubih suniifi yeteh ufa olfuutu aka nutih d'erganuh. ¹³ Malyenani anamah akisih ergatuh d'arah atih amaleh dega hujih d'araani mid'aasitu. Isaan ergatuh Kristoh ah ufa tochani. ¹⁴ Amaleh ishiini tuni wunih duukah timuh, malyenani Ekerah leni ufa galgalchiteh malaikah ibsaa fakaati. ¹⁵ Duukah guduyuamuh woh ergatuh isaaleni ufa galgalchiteh ergatuh d'ugaa ufa tochitu. Muumeh isaanih tochih isaanini malte itaati. ¹⁶ Ana deewieh dubad'a. Anamah tokileeni himomini aka ana rhaatuah. Amoh woh akisi momtanileah, ana d'iyesifad'ah aka rhaatuh ah suniini aaleni dik'oh ufa olfuud'ah. ¹⁷ Wunih ana dubad'u abdih ufa olfuud'inu tana gula d'aamsa Aaboh atimuh, amoh aka rhaatumah dubad'a. ¹⁸ Gida anamah ani amala namseh ah kasaani ufa olfuud'u, aaleni ufa olfuud'a. ¹⁹ Malyenani isani gamadaani rhaatuani wilti daramtani. Isani ufumaani k'aroh! ²⁰ Malyenani isani anamah tini wilti daramtani woh iniini isani boojomfatu, woh iniini gargara baasu, woh iniini isani shakau, yoh woh iniini isani odeesu, yoh woh iniini fuula kesa ganah ani isani d'aanu. ²¹ Ana ch'eera keenati dubad'a aka nuuleni adaayuh ah ishih suni mid'aasatiah. Woh anamah ani ufa olfuud'u, ana rhaatuah dubad'ah, aaleni ufa olfuud'a. ²² Isaani dega Ebraniah tih? Aaleni. Isaani dega Israeelih atih? Aaleni. ²³ Isaani fiit'a Ibrahiimuh atih? Aaleni. Isaani ergatuh Kristoh ati? ( Ana aka silah nama maraatuah dubad'a.) Ana malsuni ara. Ana malsuni hujih jabduh kesa jira, hid'aansa kesa, d'aanicha hedih darfe, duh wilti baatih kesa. ²⁴ Gara Yahuud'ih atih faafa sheni d'ak'awe "doocha afurtamah tah tokocha iratu. ²⁵ '' Faafa sedih licheh ani ana d'aanani. Faafa tokocha d'akaachani ana d'aanani. faafa sedi hoboloh ni ana birah ch'abde. Halkanifi guyah irga maanyah taae. ²⁶ Ana gudah imaleh, laga hamah kesa, hameena hatuah kesa, hameena anamah kiyah, hameena nyaap'ah, hameena k'aara kesa, hameena diida kesa, hameena maanya kesah, hameena ebeleeni d'arah. ²⁷ Ana malsuni hujih jabduh afi hanshaara kesa jira, mugaatih d'ewiinsa guyah gudaa, beela afi d'eeu kesa, afaani hid'anoh guyah gudaa, d'amoocha daara kesa. ²⁸ Wunih t'uut'umah ara, hinjirti tah guyah t'uut'umah aanti d'uptu ishiileni ilaalchih mina Waak'a ati. ²⁹ Oono kah adayuah, amaleh ana adayuamuh? Oono kah anamah d'iwih lafa buuse namseh kesa, amaleh ana ufa kasaati hunguwad'uyuh? ³⁰ Woh ana ufa olfuud'ani male, wunih adayumah gulaaati ufa olfuud'a. ³¹ Waak'a amaleh Abah Aaboh Yeesuh ah, tokocha kah muumeh t'uut'umah faarsanu, himbeeka anih kah d'ara hindubane! ³² Bereh D'amaskih ah suni, guduyuh deejoh ah kah hayuh Aretah jala jiru deejoh D'amaskoh ah suni gaada suniini ana k'awa. ³³ Kaaneh ana buusani k'aaleh mian atini, ana kee kaad'e harka isah kasah.