¹ Yesu k'à kɛɛln-bisháaŋn jir fú-níinî fɛ́ŋn tobra, ki lotɔnbé nɛ́n yì mɔ, ki lo tè yì to, yì bè nur kôòl nɔ̀nkurn to, fù nì láaŋrê kpɛ́lnja lo. ² Fù kwɔ́ɔn ki yì búrno jimiì kɛɛlnkɔ́ɔŋn ɔ Jɔnɔsɔ ǹ Faŋbé sɔ́ɔɔ̂ gbɔɔ̂ rɔ, yì bè láaŋrê kpɛ́lnjaàn. ³ Yesu k'à wú yì se dé: «Yíi nì lɛ̀ kɔ́ɔŋn ɔ, yíi be don tonɛnwâ mɔ́n níin ɔ á se bo. Yíi be don kɛ́ɛŋl ɔ bo, yíi be don fyɛ̀ŋnm ɔ bo, yíi be don le ɔ bo, fù nì yíi be don kpɛ̂ŋl ɔ á se bo. Yíi be bólóon gbɔ̀n bo. ⁴ Yíi nì tɔ́ŋnshî fɔŋn ŋmɔ́n tíkɛ́l mun nɔkɔŋl mɔ, yíi wo tɛŋn mímí fóro yíi kɔ́ɔŋn gbâr lò ɔ. ⁵ Yíi nì tɔ́ŋnshî fɔŋn ŋmɔ́n tíkɛ́lî mun mɔ jimiì se bo, yíi mùkâr ye lɛ̀ fù dyɛɛ̂ bur, yíi k'á níi to kúkwâŋn tokwɔŋ. Fù bè tɛŋna gbɔ tofyɛ, mùmun bè yì sènbéa yì ǹ klɛ̀ fù ri ɲukwɔ́ɔ kaarnî ɔ.» ⁶ Yesu ǹ kɛɛln-bishɛ́ɛ̀ŋɛ̂ ki kél kél mli dyɛ nì dyɛ, yì b'à Twɔ́ɔŋn Nar Sɔ́ɔɔ̂ lóon jimiì se, yì bè láaŋrê kpɛ́lnjaàn bénkúur nɔ̀nkurn se. ⁷ Galile kìyɛŋnî gbɔ ŋmelê ɲɛrotɔn Erodi ri Yesu ǹ klɛ̀ gbɔɛ̀ɛ̂ nɔ̀nkurn ná híin, à tɛ́l k'á mɔkɛŋlè bóló ɔ bo jimin máɛ̀ r'à gbɔɔ̂ tokɛɛ̀ln ín dé tyɛl-tofénéjatɔn Yuhana ri kúɲìnɛ̀n li jimin klômɛ́ɛ̀ tyé mɔ. ⁸ Máɛ̀ ɔ dé tɔ́ŋrɔn Eli r'á sɛbɛ̀ɲɛ̀n. Máɛ̀ ɔ dé kyɛ̀ŋlye tɔ́ŋrɔn klo-klóo sɔ́ɔ má ri kúɲìnɛ̀n li jimin klômɛ́ɛ̀ tyé mɔ. ⁹ Erɔdi k'à wú á byéen wono d'àkun ni jir búrno Yuhana kwàŋl tɔ́ké ín, d'àkun ki jɔɔ̂ mun gbɔ tokɛl nákún nɛn la, fù ki gbò rɔ?» Fù wono, Erɔdi ki fù jɔɔ̂ bén ɲɛ́n kùnmɔ d'á k'à ŋmɔ́n á ɲáa ɔ. ¹⁰ À twɔ́ɔŋnlórêê mùfɔn á sɛbɛ, yì k'án klɛ̀ gbɔɛ̀ɛ̂ nɔ̀nkurn dèndɛn Yesu se. Yesu ki yì jàno á wɔ́se dɔkâr mɔ Bɛtisayida dyɛɛ̂ blɛ̀ se, jimin tyɛɛ́ŋ sɔ́ɔ wo tɛ̀ŋnɛ̀n tíkɛ́lî mun mɔ bo. ¹¹ À jimiìî k'à fɔnhlɔ̀ kpɛŋn ta à fùnono. Yesu k'à jùmɔ̂ɔ̂ ŋmelhlú, ŋmelhlú fá ɲɔn mɔ, ki Jɔnɔsɔ ǹ Faŋbéê gbɔ ɔ yì kɛɛln. Láaŋrêê mun ni yì tyé mɔ ín, ki saaŋ fɛ̀ kpɛ́lnja. ¹² À yeê kɔ́ŋnkúnî se, à twɔ́ɔŋnlórɔn jir fú-níinî k'á sukúr bɛ Yesu to yì k'à wú à se dé: «Kɛlɔn, ɲɛ̂l tè à jùmɔ̂ɔ̂ to à jimiìî ki don á shínfɔŋn nì lemɔ́n ɲɛ́nké à kòkɛ̀lî dyɛɛ̂ɛ̂ n'à sɛ̀l ɲáɛ̀ŋɛ̂ kpra. Fù bóló ɔ bo ŋmɛ́ɛn fɔn húnmɔ klɔŋnkúur se.» ¹³ Yesu k'à wú yì se dé: «Yíkun nɔ̀nkurni wo lemɔ́n tè yì to.» Yì k'à mɔli dé: «Ŋmɛ́ɛn se fù ri wo won-myɛ̂l kur mɔ́n kwɛŋl nì yɛ́ɛŋn mɔ́n níin takelɲɛ̀n bo. Ákún se kwó ŋmɛ́ɛn nɔ̀nkurni ki don lemɔ́n sɔŋnkún bɛ tè àni jùmɔ̂ɔ̂ nɔ̀nkurn to a?» ¹⁴ Ta fù lɔɔ̂ mɔ jɛɛ̂ɛ̂ ki jimin ble kwɛŋl (5.000) kúur rɔ ín. Yesu k'à wú án kɛɛln-bishɛ́ɛ̀ŋɛ̂ se dé yì wo yì ɲínɛ́ɛn kúur kúur ɔ, jimin kúr-fú fú (50) ɔ. ¹⁵ Yì k'à kwo àn lô fáâ to, yì k'à jimiìî nɔ̀nkurn jà ɲínɛ́ɛn dénno. ¹⁶ Fù kwɔ́ɔn, Yesu k'à won-myɛ̂l kur kwɛŋlî n'à yɛ́ɛŋn mɔ́n níinî gbɔ̀n: k'á ɲáa tɔŋnkúr nɔ̀nfléen, ki fulóo tè Jɔnɔsɔ to, fɛ̀ rɔ gbɔ tyé, ki yì mɔ kútúr kútúr tè án kɛɛlnbishɛ́ɛ̀ŋɛ̂ to dé fɛ̀ w'à síkár à jùmɔ̂ɔ̂ to. ¹⁷ À jimiìî nɔ̀nkurn ki le dì ywár, à won-myɛ̂l fùnkùr búùrî ki tɛ̀ŋnè kà ɲɛ fú-níin. ¹⁸ Lɔɔndya Yesu bè Jɔnɔsɔ tonyɛl gbɔ to dɔkâr mɔ, àn kɛɛln-bishɛ́ɛ̀ŋɛ̂ r'à wɔ́se ín, à bè yì duùn dé: «Jimiì r'à lóon dé mún, Yesu ki gbò rɔ?» ¹⁹ Yì k'à mɔli dé: Máɛ̀ ɔ dé tyɛl-tofénéjatɔn Yuhana ɔ, máɛ̀ ɔ dé Eli ɔ, máɛ̀ ɔ saaŋ d'à tɔ́ŋrêê mɔ má kúɲìnɛ̀n byɛ̀ ɔ. ²⁰ Fù wono, ki yì du dé: «Yíkun se kwó híin, mún ki gbò rɔ?» Piyɛri k'à mɔli dé: «Jɔnɔsɔ ǹ Mɔtɔ̂ŋnmun Jiminî ɔ.» ²¹ Yesu ki yì tokùkwɔŋ tokpârja dé yì b'àniî tokɛl dó se bo. ²² Yesu k'àni gbukɛlî wú ɲɛn à ta dé fóro Jimin Dye-Jɛn ki da tyɛɛ́ŋ sɔ́ɔ kwo, à klɔ̀rê gbo, à flɛ́klɛrê ŋmelê gbo, fù n'à tɔ̂ŋn kɛlê gbo, yì nɔkɔŋl k'á ká à se. À yɛŋn marî ki sɛ́ à kpɛŋn, ki ɲìnɛ̀n à klô yefyɛ̂l tyáarɔn lɔ. ²³ Yesu k'à wú à jimiìî nɔ̀nkurn se dé: «Tɔnî mun nì kpɛ́ɛ bése mún ta, fù tɔŋnî b'á byéen gbɔ kìsɛ̂ bo, k'á kpɛ́-nanîn tɔŋn á tíin ye mun nɔkɔŋl, ki kpé mún ta. ²⁴ Fù bóló ɔ bo jiminî mun n'á yɛŋn marî taŋl bése fù tɔŋnî bè bwɔɔna á yɛŋn marî mɔ. Kɛ̀, tɔŋnî k'á ká á yɛŋn marî se mún núkwɔ́ɔn, fù tɔŋnî b'á yɛŋn marî ɲɔnlia. ²⁵ Díryɔ́ŋ mɔ́ɛ̀ nɔ̀nkurn ŋmɔ̂n bè myɛ́n ɲukwóbɛ̂ jimin to àkun nɔ̀nkurni mun yɛŋn marî bè sɛ́bɛ̂ à kpɛŋn, ki nìnaê? ²⁶ Fù se kwó, fù tɔŋnî nì bè mún, Yesu gbɔɔ̂ nì mún ǹ gbukɛlî ɔ flɛ́ɛ jìr, Jimin Dye-Jɛn saaŋ bè fù tɔŋnî gbɔ ɔ flɛ́ɛ jira. À mùlɔ byɛ̀ án lobéê n'á Tɔɔ̂ ǹ lobéê n'àn Jɔnɔsɔ ǹ tɔ́ŋrɔn tofénéèê ǹ lobéê wono. ²⁷ Mún n'à lóon yíkun se hlɔtabê mɔ dé jimin máɛ̀ fɔn húnmɔ, yì wo kún to á ɲáa búra Jɔnɔsɔ ǹ faŋbéê ŋmɔ́n kaarn mɔ bo.» ²⁸ Àni gbukɛɛ̀lî kɛl jìrɛ̂ yefyɛ̂l kprɛɛntɔn lɔ Yesu se, ki Piyɛri nì Yuhana, fù nì Jaki jàno káal bɛl sɔ́ɔ dyàn fléen Jɔnɔsɔ tonyɛɛl ɔ. ²⁹ À bè Jɔnɔsɔ tonyɛl gbɔ to, à ɲáa mɔɔ̂ k'á mɔsɛŋlè, à gbɛ́ɛ to wâɛ̀ɛ̂ k'á ɲáa mɔsɛŋlè lɔ̂ sɛkɛ sɛkɛ. ³⁰ Fù tíkɛ́l byéenî mɔ, jir níin bè tɛ̀ŋnɛ̀n yì bè kɛl gbɔ to yíse. Fɛ̀ ki Musa nì Eli ɔ ín. ³¹ Yì bè ŋmɔ́ɔn Jɔnɔsɔ ǹ lobéê wono, yì bè kɛl gbɔ to Yesu wɔ́se à klóoô k'àn klɛ gbɔɛ̀ɛ̂ kwò mɔyînkúnî ta Jerisalɛmu dyɛɛ̂ mɔ. ³² Piyɛri n'á krɔmáɛ̀ɛ̂ b'á tɛ́tɛ̂ dɛ́ jòɲɛ̀n. Yì mùfɔn ɲìnɛ̀n á ɲáa ta kárè, yì ki Yesu ǹ lobéê ŋmɔ́n, fù n'à blê jir níinî mun tɛ̀ŋnɛ̀n à wɔ́se ín. ³³ Fù jir níinî á sukúrlɛɛ̀n ín gbârî mun ye Yesu fur, Piyɛri k'à wú à se dé: «Kɛlɔn, à ri ɲɔn ŋmɛ́ɛn ki tɛŋn húnmɔ, n̂ ki wâ-lɔ́ mɔ́n tyáar kpé: ákún fù mɔ́n byéen, Musa fù mɔ́n byéen, Eli fù mɔ́n byéen.» Piyɛri w'án lóo fù ri shi ín bo. ³⁴ Jénjên dyàn ki kyɛl bɛ̀ yì mɔbarè Piyɛri b'án gbukɛlî kɛl gbɔ to yé. À jénjênî ki yì mɔbarkúnî ki yàn ɔ yì jàè à mɔ. ³⁵ Myɛl dyàn ki li à jénjênî mɔ dé: «Àniî ki mún Dye-Jɛn ɔ, mún ni mùmun mɔtɔ̂ŋnɲɛ̀n. Yíi w'á kpɛŋnja àn lóo fù ri to.» ³⁶ Fù myɛlî lɛ gbâr ye Yesu r'á byéen ín. À kɛɛln-bishɛ́ɛ̀ŋɛ̂ k'á sháaŋn sháaŋnè, yì wo fù lɔɔ̂ mɔ án ŋmɔ́n gbɔɛ̀ɛ̂ mɔ bóló ló dó se bo. ³⁷ Fù wóontɛ̂lî mɔ, Yesu k'à káalî fléen kyɛl lì blafɔn, jùmɔ̂ tɛ̀l sɔ́ɔ dyàn ki bɛ à hlúu ɔ. ³⁸ À nɛn, jɔ dyàn k'à jùmɔ̂ɔ̂ tyé mɔ kɛl á faaŋn sɔ́ɔ ɔ dé: «Kɛlɔn, mún n'ákún tonyɛɛln, mún dye-jɛnî yi ń se, bóló ɔ bo fù byéen ɔ má ń se. ³⁹ À nɛn, tyɛ́ɛŋn ǹ mɔdɛ̂mun jimin ɔ, kyáaŋn tɛ̀ŋn k'á myɛl kɛ́è. À nì duklɔ́ à se à r'à gbɛ́ɛ jaàrn tokpâr sɔ́ɔ, à kɔŋn kùkwɔŋ bè fúun. K'à bréfɔn à r'à gbɛ́ɛ ŋmaàn ta à to. ⁴⁰ Ń k'ákún ǹ kɛɛln-bishɛ́ɛ̀ŋɛ̂ tonyɛl dé yì w'à kôlî tó li à mɔ, fɛ̀ w'à kpɛ́ hìn tɛ̀ŋn bo.» ⁴¹ Yesu k'à wú dé: «Jimin jaâl dyɛ̀ kúùr, Jɔnɔsɔ gbɔɔ̂ hlɔja kaarn jimiì. Mún bè tɛŋnbɛ̂ yíkun wɔ́se fóro fɛ́ɛŋn gbâr ye, ń ki yíkun gbɔ sɛ́ ń to? Bɛ á dyeê rɔ húnmɔ.» ⁴² À sukúr blakúnî se à kôlî k'à jɔɔnî gbɔ̀nsár ta ɲáan ta, à b'à gbɛ́ɛ jaàrn tokpâr sɔ́ɔ . Kɛ̀, Yesu k'à kôlî tafɛ́, k'à jɔɔnî kpɛ́lnja k'à tobúrè à tɔɔ̂ se. ⁴³ Jɔnɔsɔ ǹ lotɔnbéê sɔ́ɔ fáâ ki jimiì nɔ̀nkurn wonkɔ́ŋnè. Yesu ǹ klɛ̀ gbɔɛ̀ɛ̂ ki yì nɔkɔŋl wonkɔ̂ŋnɲɛ̀nî se, k'à wú à kɛɛln-bishɛ́ɛ̀ŋɛ̂ se dé: ⁴⁴ «Yíkun kwó, yíi w'àniî tityɛ́ŋn toná á tàshɛŋ ɔ: Jimin Dye-Jɛn bè jà nɛ́nbɛ̂ kpɛŋn mɔ.» ⁴⁵ Kɛ̀, à kɛɛln-bishɛ́ɛ̀ŋɛ̂ w'àni gbukɛlî tɔŋn hlɔ̀ bo, à kɛlɲɛ̀n yì se gbɔ tofliŋ jɛ́ɛn mɔ, nɔkɔ́ŋl yì b'à mɔ bin gbɔ̀n bo. À mɔ fáhlɔ́ɔ duklɛɛ̂ yàn ki yì jàè. ⁴⁶ À kɛɛln-bishɛ́ɛ̀ŋɛ̂ r'á tɛ́l mɔtɔ́ɔŋn mɔ yíi tyaaŋn ín, nɔkɔ́ŋl yì k'à shu yìkun tyé mɔ tɔŋnî mun ni tɛŋn hìn jimin sɔ́ɔ. ⁴⁷ Yesu ki yì byéen byéenî tɛ́l mɔ fù ri hlɔ̀ɔ̂ se, ki bisháaŋn tíin byéen jà ɲínɛ́ɛn á blɛ̀ se, ⁴⁸ k'à wú yì se dé: «Tɔnî mun k'àni bisháaŋnî sɛ́ mún yin ɔ, fù tɔŋnî ri mún nɔ̀nkurni shɛ́, ki mún tɔ́ŋ bɛ̀ tɔŋnî sɛ́. Fù bóló ɔ bo tɔŋnî mun ki yíkun tyé mɔ jimin dwan ɔ, fù tɔŋnî ki la à jimin sɔ́ɔɔ̂ rɔ.» ⁴⁹ Yuhana k'à gbukɛlî mɔgbɔ̀n k'à wú dé: «Kɛlɔn, ŋmɛ́ɛn ni jir má ŋmɔ́n à bè kôòl tɛ́ɛln ákún yin ɔ, ŋmɛ́ɛn k'à tó à ta, bóló ɔ bo à wo braàn nì kpé ákún ta ŋmɛ́ɛn wɔ́se bo.» ⁵⁰ Yesu ki Yuhana ǹ gbukɛlî mɔli dé: «Yíi b'à tó à ta bo, bóló ɔ bo tɔŋnî mun wo yíkun tojakwɔ́ɔn bo fù tɔŋnî ki yíkun narɔn ɔ.» ⁵¹ Yesu lɛ gbârî shùnjà blakúnî se díryɔ́ŋ mɔ, ki dúno jɔ̀nɔ̀kpár mɔ, ki Jerisalɛmu dyɛɛ̂ mɔ kɔ́ɔŋn gbɔɔ̂ rɔ á nìryɛŋn ta gbɔ jìrè. ⁵² Fù wono, k'á yɛŋntokwɔ́ɔŋn-lórê búrno á nyân. Fɛ̀ mùfɔn ɲɛ̂l jà híin, yì ki dénno déké Samari yinî ǹ dyɛ dyàn mɔ, à bla gbɔɔ̂ mɔ à nyânɲɛn ɔ. ⁵³ Fù dyɛɛ̂ jimiìî w'à bla gbɔɔ̂ mɔ à nyânɲɛn gbɔ toshɛ́ bo, bóló ɔ bo à ri Jerisalɛmu dyɛɛ̂ mɔ kɔ́ɔŋn gbɔɔ̂ rɔ á nìryɛŋn ta gbɔ jìrɲɛ̀n ín. ⁵⁴ Fù kpɛŋnî ta, kɛɛln-bisháaŋn Jaki nì Yuhana ki fù mɔ fáhlɔ̀ɔ̂ se yì k'à wú dé: «Ŋmɛ́ɛn Totɔn, á r'à se ŋmɛ́ɛn k'à kwo nyɛ ki li jɔ̀nɔ̀kpár mɔ, ki bɛ yì ŋmɛ́ kɔ́ŋmɔ́è a?» ⁵⁵ Fù la klɛ̀ híin, Yesu k'á ɲáa tojìr yì kɛ́ŋ, ki fɛ́ yì ta á nìr rɔ [dé: «Jimin Dye-Jɛn wo bɛ̀ɲɛ̀n jimiì marlɛ ɔ bo, kɛ̀ à ri bɛ̀ɲɛ̀n jimiì ɲɔnlɛɛ ɔ.»] ⁵⁶ Yì k'á tojìr, yì ki dyɛ má mɔ kɔ́ɔŋn ɲɛ̂l ja. ⁵⁷ À ɲɛ̂l mɔ jir má k'à wú Yesu se dé: «Á n'á ŋmel jìr tíkɛ́l mun nɔkɔŋl mɔ ń bè kpéa á ta.» ⁵⁸ Yesu k'àn gbukɛlî mɔli à se dé: «Kùbwôn se dɛ́ɛ kwɔ́ tɛ̀ŋnɛ̀n, yɔ bè tɛ̀ŋnɛ̀n nɔ̀nfléen lunmɔ́ɛ̀ se, kɛ̀ tíkɛ́l wo tɛ̀ŋnɛ̀n Jimin Dye-Jɛn se tèkêl ɔ láa ɔ bo.» ⁵⁹ K'à wú má se dé fù wo kpé àkun ta. Fù k'à mɔli dé: «Á tɛjél mún se, ń mùkâr ye ń tɔɔ̂ tokyɛ́ wà.» ⁶⁰ Yesu ki fù ǹ gbukɛlî mɔli dé: «À jél à jimin klômɛ́ɛ̀ɛ̂ k'án nikyɛ́ɛ̀ŋɛ̂ tokpɛ́, ákún kwó, ákún wo don Jɔnɔsɔ ǹ faŋbéê twɔ́ɔŋn wúké.» ⁶¹ Yì mɔ jir má ki saaŋ à wú dé: «Ń totɔn, mún bè kpébɛ̂ ákún ta, kɛ̀ á tɛjél ń ki ɲɛ̂l nyɛlké ń jiminbéê se wà.» ⁶² Yesu ki saaŋ fù ǹ lô fù ri mɔli dé: «Jiminî mun nɔkɔŋl nal kɛl jaàn à bè lɛklɛɛ̀n á bése, fù wo ɲɔn Jɔnɔsɔ ǹ faŋbéê to bo.»