¹ À klɔ́ŋmelî funkpɛ́ɛ yefyɛ̂l túû ta lɛ́ɛ múmúr, à méèlî k'án mɔtityɛ̂ŋn ben nukwɔ́mɔ́nî gbɔ̀nno. ² Yì ki b'à ŋmɔ́n à dùkurî mɔkpɛ́ɲɛ̀n kàkrɔ̂ɔ̂ bè kùnkôl lìɲɛ̀n à ŋmrɔ. ³ Fù méèlî ki dé à dùkurî mɔ, kɛ̀, yì wo yíi Totɔn Yesu nikyɛ́ɛŋɛ̂ ŋmɔ́n bo. ⁴ Fù gbɔɔ̂ ki yì tɛ́l mɔkɛɛŋlî se, jɛn jir níin dyàn líɲɛ̀n nɛn yì ɲɛro. Fɛ̀ gbɛ́ɛ to nɛ́nɲɛ̀n wɛ́ɛ̀ɛ̂ bè hláhláan. ⁵ À méèlî gbɛ́ɛ ki jìrè yì to yànbê se, yì k'á mwàsùmɔ́è à ɲáan ta, à jɛn jir níinî ki yì du dé: «À ri gbáno jà yíkun bè jir lɛ̀ ɲɛ́ɛn jimin klômɛ́ɛ̀ tyé mɔ? ⁶ À wo fɔn húnmɔ bo. Kɛ̀, à ri kúɲìnɛ̀nɲɛ̀n. À ri gbukɛlî mun kɛl yíkun se ín, à bè tɛ̀ŋnɛ̀n yé Galile, yíi w'á tɛ́l ɲɛn fù mɔ. ⁷ À r'à ló ín dé: «Fóro Jimin Dye-Jɛn ki ja nɛ́n ŋmáantê kpɛŋn, yì k'à kpé tá nan gbɛ́ɛ to, fù yefyɛ̂l tyáartɔn lɔ, ki kúɲìnɛ̀nè.» ⁸ Fù la klɛ̀ híin, yì tɛ́l ki bɛ̀è Yesu ǹ kɛl gbukɛɛ̀lî mɔ. ⁹ À méèlî k'á sɛli à dùkurî tɛ̀ŋn fɔŋnî mɔ, yì ki dénno án ŋmɔ́n gbɔɛ̀ɛ̂ nɔ̀nkurn to dèndɛnké à kɛɛln-bisháaŋn jir fú-byéenî n'à kɛɛln-bisháaŋn búùrî se. ¹⁰ Fù méèlî ki Magidala dyɛɛ̂ jir Mariyamu, nì Jani, fù nì Jaki kwɔ̀ŋ nɔ Mariyamu ɔ ín. Fɛ̀ n'à mél búùrî ki dénno à to dèndɛké à twɔ́ɔŋnlórêê se. ¹¹ Kɛ̀, fù gbukɛɛ̀lî ki tɛ̀ŋnè yì se árí bin kaarn gbukɛl, yì w'à méèlî ǹ gbukɛlî hlɔjà bo. ¹² Kɛ̀, fù n'á nɔ̀nkurn mɔ Piyɛri ki dukú túno à dùkurî kpra. À ri lò híin, k'á tùtwòn, k'á ɲáa ɲɛn, à wo bóló ŋmɔ́n ɲáan ta à tokekɛ̂lɲɛ̀n wâ lɔ̂ɔ̂ kwɔsé bo. Fù la klɛ̀ híin, k'á sɛno á sádi, fù gbɔɛ̀ɛ̂ klɛ̀ fáâ b'à wonkɔ́ŋnɲɛ̀n. ¹³ Ta fù yefyɛ̂lî núkúuri mɔ, kɛɛln-bisháaŋn jir níin dyàn ni kɔ́ɔŋn dyɛ dyàn mɔ ín, yì ri mùmun fɛ́ɛŋn dé Emayusi. À nì Jerisalɛmu dyɛɛ̂ tyé bɛlî bè kilomɛtiri mɔ́n fú-níin (12) kúur. ¹⁴ Yì b'à kwò jìrɛ̂ gbɔɛ̀ɛ̂ fá dèndɛn dékɔ́ɔŋn yíi se. ¹⁵ Yì ri gbârî mun ye fù gbɔɛ̀ɛ̂ tokɛɛ̀ln yì b'à ɲádèndɛ́ɛn yíi se ín, Yesu nɔ̀nkurni ki bɛ yì mɔjo, ki ɲɛ̂l bra yì wɔ́se. ¹⁶ Kɛ̀, ki tɛŋn árí gbɔ̀ndyàn ni kwɔ̀ɲɛ̀n yì ɲáaâ to, yì wo Yesu lɛshi bo, ¹⁷ ki yì du dé: «Yíi ri máno myɛ́n gbɔɛ̀ to dèndɛ́ɛn yíi se à ɲɛ̂lî se?» Yì k'á ɲámɔɲàn ɔ líè. ¹⁸ Yì wɔ́se jir má dyànî mun ni fɛ́ɛŋn dé Kleyopasi, fù k'à gbukɛlî mɔli dé: «Ákún byéen ɔ má Jerisalɛmu dyɛɛ̂ mɔ ɲínɛ́n jìrɛ̂mun jir, mùmun ǹ hlɔ̀ w'àni kwò jìrɛ̂ gbɔɛ̀ɛ̂ mɔ bo!» ¹⁹ Yesu k'à wú dé: «Fù ki myɛ́n gbɔɛ̀ ɔ?» Yì k'à mɔli dé: «Nasarɛti jir Yesu gbɔɔ̂ kɛ̀, mùmun ki tɔ́ŋrɔn ín, àn kɛl gbukɛl n'àn klɛ gbɔɛ̀ mɔ faŋ bè sɔ́ɔ Jɔnɔsɔ nì jùmɔ̂ nɔ̀nkurn ɲáa b'à to. ²⁰ Ŋmɛ́ɛn ǹ flɛ́klɛrê ŋmelêê nì ŋmɛ́ɛn ǹ ŋmelêê r'à jà nɛ́n fɛɛ̀ŋ kpɛŋn, nɔkɔ́ŋl kún ki kɛŋ à to, ki kpé tá nan gbɛ́ɛ to. ²¹ Ŋmɛ́ɛn n'á kpɛŋnjàɲɛ̀n àkun mùn to ín d'àkun bè Isirayɛli buryinî tobúra wɛɛl wono. Fù n'á nɔ̀nkurn mɔ, fù gbɔɛ̀ɛ̂ klɛ̀ɛ̂ yefyɛ̂l tyáarɔn ki ɲa ɔ. ²² Hlɔ ta, ŋmɛ́ɛn kɛɛln-bishɛ́ɛ̀ŋɛ̂ mɔ, mél máɛ̀ ri ŋmɛ́ɛn wonkɔ́ŋnè faaŋn sɔ́ɔ ɔ. Fɛ̀ ri dénno lɛ́ɛ múmúr à dùkurî kpra, ²³ yì w'à nikyɛ́ɛŋɛ̂ ŋmɔ́n bo. Yì k'á sɛbɛ à wú dé Jɔnɔsɔ ǹ Tɔ́ŋrê (Mɛlɛkɛ) dyɛ̀ r'á byéen yɛ̀n yìkun to, k'à wú yìkun se d'à r'á lɛ̀ ɔ. ²⁴ Ŋmɛ́ɛn mɔ máɛ̀ ki saaŋ dénno à dùkurî kpra. À méèlî bè mùmun wú yì ki máno dénno à ŋmɔ́nké à méèlî ǹ ló fáâ to, kɛ̀, yì wo la Yesu ŋmɔ́n bo.» ²⁵ À la máno tɛ̀ŋn híin, Yesu k'à wú yì se dé: «Tɛ́l kaarn jimiì, yíkun w'à tɔ́ŋrêê ǹ kɛl gbukɛlî hlɔjaàn ɲáro bo. ²⁶ Jɔnɔsɔ ǹ Mɔtɔ̂ŋnmun Jiminî wo yanɲɛ̀n ín k'àni daâ kwo à klɛ̀ fáâ to, nɔkɔ́ŋl ki dé án faŋbéê mɔ be a?» ²⁷ Fù jìrɛ̂mun kwɔ́ɔn, gbɔɛ̀ɛ̂ mun ni ɲúrɲɛ̀n ín Jɔnɔsɔ ǹ Sɛ́bɛ̂ɛ̂ nɔ̀nkurn mɔ, ki fɛ̀ tɔŋn wú yì se, ki gbɔ̀n Musa ǹ sɛ́bɛ̂ɛ̂ to, ki dénno búrké à tɔ́ŋrêê nɔ̀nkurn fù sɛ́bɛ̂ɛ̀ɛ̂ to. ²⁸ Yì ri kɔ́ɔŋn ín dyɛɛ̂ mun mɔ, yì mùfɔn shùnjà à dyɛɛ̂ to, k'á byéen ɲɛn ár'à kɔ́ɔŋn fɔŋnî ri bɛl yé. ²⁹ Kɛ̀, yì k'à totâŋn fɔn à wú à se d'à wo tɛŋn yìkun wɔ́se bóló ɔ bo à núkurî jwɛlkún ɔ. Yesu ki dé fɛ̀ wɔ́se yì tɔ́nshî denî mɔ. ³⁰ À mùfɔn ɲínɛ́ɛnè yì wɔ́se à leê kàr mɔ híin, k'à won-myɛ̂lî gbɔ̀n ki fulóo tè Jɔnɔsɔ to, k'à tyé gbɔ́n tè tè yì to. ³¹ Fù la klɛ̀ híin, yì ɲáa ta tɛ̀lî ki gbɔ́n li, yì k'à lɛshu, kɛ̀, ki yɛnè yì to. ³² À blê jir níinî k'à wú yíi se dé: «Yesu ri kɛl ŋmɛ́ɛn wɔ́se ɲɛ̂l se, ki Jɔnɔsɔ ǹ Sɛ́bɛ̂ɛ̂ wono gbukɛɛ̀lî tɔŋn wú ŋmɛ́ɛn se gbârî mun ye, ŋmɛ́ɛn byéen gbɔ ri ŋmɛ́ɛn mɔnar árí shɔ́ ín be a?» ³³ Fù tíkɛ́l byéenî mɔ, yì ki dukú yì k'á sɛno Jerisalɛmu dyɛɛ̂ mɔ. Yì ki dénno à kɛɛln-bisháaŋn jir fú-byéenî n'á krɔmɛ́ɛ̀ɛ̂ tobramunî ŋmɔ́nké. ³⁴ Fɛ̀ k'à wú dé: «Hlɔ ta, ŋmɛ́ɛn Totɔn kúɲìnɛ̀nɲɛ̀n, à r'á byéen yɛ̀n Simɔn to.» ³⁵ Gbɔɔ̂ mun ni klɛ̀ yì to à ɲɛ̂lî se, fù nì k'à won-myɛ̂lî tyé gbɔ̂nî se yì r'à hlɔ̀ fáâ mun to, à blê jir níinî ki fù to dèndɛn. ³⁶ À kɛɛln-bisháaŋn jir níinî bè fù gbukɛlî kɛl gbɔ to à kɛɛln-bisháaŋn búùrî se, Yesu nɔ̀nkurni ki bè kyɛlè yì tyé mɔ, k'à wú yì se dé: «Ɲámɔgbâl ki tɛŋn yíi se!» ³⁷ Yàn ki yì jàè tɛ́tɛ̂, bóló ɔ bo yì ǹ jɛ́ɛn mɔ dé yíi ri nwɔ́ɔny dyàn ŋmɔ́n. ³⁸ Kɛ̀, Yesu k'à wú yì se dé: «À ri gbáno jà yíkun tɛ́l bè mɔkɛŋlɲɛ̀n? Myɛ́n n'à jɛ́l yíkun bè gbɔníin mɔ? ³⁹ Yíi wo mún kpɛɛ̂ŋɛ̂ nì mún níìî yiin, mún tɛ́tɛ̂ ni ɔ. Yíi wo mún totá yi, gbɛ́yɛ́ɛn nì kpár tɛ̀ŋnɛ̀n mún se. Fɛ̀ wo tɛ̀ŋnɛ̀n nwɔ́ɔn dó se bo.» ⁴⁰ Fù la ló híin, k'á kpɛɛ̂ŋɛ̂ n'á níìî yɛ̀n yì to. ⁴¹ Yì gbɔmɔnar nì yì wonkɔ̂ŋn n'à jɛ́l yì w'à hlɔjà dé Yesu ɔ bo. Fù la klɛ̀ híin, Yesu ki yì du dé: «Lemɔ́n dyàn ni ŋmɔ́n hìn yíi se húnmɔ a?» ⁴² Yì ki yɛ́ɛŋn gbɛ̂lmun fùnkuurn dyàn tè à to, ⁴³ ki fù sɛ́ kɛ̀è yì ɲíɲra. ⁴⁴ Fù jìrɛ̂mun kwɔ́ɔn, Yesu k'à wú yì se dé: «Mún ni gbukɛɛ̀lî mun kɛl ín, ń bè tɛ̀ŋnɛ̀n yé yíkun wɔ́se, ń ki ń sɛ fù gbukɛɛ̀lî ta dé gbɔɛ̀ɛ̂ mun ni ɲúrɲɛ̀n ín mún gbɔ ŋmel ta, mɛ̀mun ni wúɲɛ̀n ín Musa ǹ Tɔ̂ŋnî n'à Tɔ́ŋrêê ǹ Sɛ́bɛ̂ɛ̂ n'à Jɛ́l Sɛ́bɛ̂ɛ̂ mɔ, fóro fù gbɔɛ̀ɛ̂ ki kwo mɔyîn.» ⁴⁵ À la máno tɛ̀ŋn híin, ki tɛ́l ɔ yì kɛ́ŋ nɔkɔ́ŋl yì ki Jɔnɔsɔ ǹ Sɛ́bɛ̂ɛ̂ mɔfáshu. ⁴⁶ Yesu k'à wú yì se dé: «À la máno tɛ̀ŋn híin, à ri ɲúrɲɛ̀n Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ dé Jɔnɔsɔ ǹ Mɔtɔ̂ŋnmun Jiminî bè da kwoa ín, ki kúɲìnɛ̀n li jimin klômɛ́ɛ̀ tyé mɔ, à klô yefyɛ̂l tyáarɔn lɔ. ⁴⁷ Fù gbukɛɛ̀lî yanɲɛ̀n ki kɛl àkun yin ɔ tɔbin kúùr nɔ̀nkurn se, ki wú funkpé Jerisalɛmu dyɛɛ̂ to, nɔkɔ́ŋl yì ǹ hlɔ̀má hlɔ̀ɔ̂ se, yì ki kárè gbɔjáal to, fù ki yì to ŋmáan jìr. ⁴⁸ Yíkun ni fù gbɔɛ̀ɛ̂ fɔn ŋmɔ́n kpɛŋn ta tɛ̀ŋn à nínshî. ⁴⁹ À nɛn, mún Tɔ Jɔnɔsɔɔ̂ ri gbɔɛ̀ɛ̂ mun yɛŋngbɔ̂n , mún bè fɛ̀ búr bɛa yíkun se, kɛ̀ yíkun kwó, yíi wo tɛ̀ŋn má àni dyɛɛ̂ mɔ fóro à jɔ̀nɔ̀kpár mɔ lì bɛ̀ lotɔnbéê kyɛɛl ɔ yíkun fléen.» ⁵⁰ Fù jìrɛ̂mun kwɔ́ɔn, Yesu k'án kɛɛln-bishɛ́ɛ̀ŋɛ̂ jàno fóro Betani dyɛɛ̂ shùn mɔ, k'á kpɛŋn tɔŋnkúr yì fléen, ki kyon nɛ́n yì mɔ. ⁵¹ Yì mɔ kyon nɛ́nfɔn, k'á sukúr li yì fur, ki gbɔ̀n dúno à jɔ̀nɔ̀kpár mɔ. ⁵² À kɛɛln-bishɛ́ɛ̀ŋɛ̂ kwó, yì k'á kurkpé, yì k'á ɲáa hlú fóro ɲáan ta Yesu tɔŋn. Fù jìrɛ̂mun kwɔ́ɔn, yì k'á sɛno Jerisalɛmu dyɛɛ̂ mɔ yì gbɔmɔnar sɔ́ɔ se. ⁵³ Yì ri yíi tobraàn ín gbâr mun nɔkɔŋl à tonyɛɛlklɛ-lɔ́sɔ́ɔɔ̂ mɔ, yì ki Jɔnɔsɔ tofɛ́ŋn.