¹ Yesu k'á ŋmel tɔŋnkúr k'á ɲáa ɲɛn, ki nòfelê ŋmɔ́n à tonyɛɛlklɛ-lɔ́sɔ́ɔɔ̂ mɔ yì nɔkɔ́ŋl b'á fù kpɛŋntabrê bréen à kpɛŋntabrê brée dɔ́ɔ̂ mɔ. ² Àkun ki saaŋ dè-klô-mél dàkpɛŋl dyàn ŋmɔ́n, fù bè kpɛ̂ŋln-byéen mɔ́n níin bréen à dɔ́ɔ̂ mɔ. ³ Yesu k'à wú yì se dé: «Hlɔ ta, mún n'à lóon yíkun se d'à dè-klô-mél dàkpɛŋlî ǹ brê kpɛŋntabrêê ri tyɛɛ́ŋ yé à búùrî fù ri to. ⁴ Fù bóló ɔ bo à búùrî r'á furɲɛ̀n nòfel mɔ má lɛ, yì k'à búr à dɔ́ɔ̂ mɔ kpɛŋntabrê ɔ. Kɛ̀, àni biî n'án dàkpɛ̀ŋlbêê bra ɔ, à r'á kpɛŋnjàɲɛ̀n mùmun to ín leyɛ́ɛŋn sɔŋn ɔ, ki fù nɔ̀nkurn gbɔ̀n búrè à dɔ́ɔ̂ mɔ.» ⁵ Jimin máɛ̀ r'à lóon ín à tonyɛɛlklɛ-lɔ́sɔ́ɔɔ̂ gbɔ mɔ d'à mɔtityɛ̂ŋn la ɲɔn kàkrɔ̂ ɲɔn ɲɔɛ̀ ɔ, fù n'à bè mɔtityɛ̂ŋnɲɛ̀n jimiì ki Jɔnɔsɔ to tɛ̀ mɔ́n ɲɔn ɲɔɛ̀ɛ̂ rɔ. Fù wono Yesu k'à wú dé: ⁶ «Yíkun ɲáa fɔn mɔ́ɛ̀ɛ̂ mun to ɲa, ye dyàn bè fɛ́a kàkrɔ̂ má bè ŋmɔ́na kàkrɔ̂ má fléen bo, yì nɔ̀nkurn bè kìn gbeêna.» ⁷ Yì k'à du dé: «Kɛlɔn, fù gbɔɛ̀ɛ̂ bè kwoa fɛ́ɛŋn gbâr ye? Fù nì fù klɛ gbɔɛ̀ɛ̂ tofyɛɛ̂ bè tɛŋna myɛ́n nì myɛ́n?» ⁸ Yesu ki yì ǹ gbukɛlî mɔli dé: «Yíi w'á byéen tɛ́ŋlɛ́n, yíi b'à jél dó ki yíi fliŋ bo. Fù bóló ɔ bo jimin tyɛɛ́ŋ sɔ́ɔ bè bɛa mún yin ɔ, yì k'à wú dé yìkun ki Jɔnɔsɔ ǹ mɔtɔ̂ŋnmun jiminî ɔ. Yì b'à wúa dé gbâr kɔ́ɔŋnî shùnjàmun ɔ, yíi bè kpé fɛ̀ ta bo. ⁹ Yíi mùkâr ye kɛ̀ŋl gbukɛɛ̀l nì byéen takâ gbukɛɛ̀l ná, yíi be yàntú bo bóló ɔ bo fù gbɔɛ̀ɛ̂ klɛɛ̂ ki faŋ ta ɔ wà. Kɛ̀ fù bè tɛŋna díryɔ́ŋ kɔ́ŋnkún fù tíkɛ́l byéenî mɔ bo.» ¹⁰ Fù jirɛ̂mun kwɔ́ɔn k'à wú yì se dé: «Tɔbin kúur sɔ́ɔ má bè dukúa tɔbin kúur sɔ́ɔ má se kɛ̀ŋl ɔ. Kìyɛŋn má ki dukú kìyɛŋn má se kɛ̀ŋl ɔ. ¹¹ Ɲáan bè jira jaar sɔ́ɔ tíkɛ́l máɛ̀ mɔ, jùmɔ̂ láaŋ nì klɔ̂ ki jo tíkɛ́l máɛ̀ mɔ. Jimiì nìryɛŋn lun gbɔɛ̀ nì yàn ǹ ja gbɔ tofyɛɛ̀ bè ŋmɔ́ɔn jɔ̀nɔ̀kpár mɔ. ¹² Kɛ̀ la, fù gbɔɛ̀ɛ̂ klɛɛ̂ n'á to gbɔ tyé, yì bè yíkun jaa, yì ki yíkun búr da sɔ́ɔ mɔ. Yì bè yíkun jà nɛ́na à tonyɛɛlklɛ-lɔ́ɔ̂ mɔ gbɔ ŋmelêê kpɛŋn, yì ki yíkun mɔkpɛ́ê mɔklálɔ́ mɔ. Yì bè yíkun jaana kìyɛŋntê nì kòkɛ̀l ŋmelê se mún gbɔ núkwɔ́ɔn. ¹³ Fù bè kwoa yíkun ki mún gbɔ mɔ nínshîbé gbukɛl kɛl núkwɔ́ɔn yì se. ¹⁴ Yíkun b'á byéen tanyân tɛ́l ɲɛ́n gbɔ búr á ŋmel mɔ bo, ¹⁵ bóló ɔ bo mún nɔ̀nkurni bè gbukɛl nɛ́na yíkun kɔŋn, ń ki byéen mɔbinhlɔ tɛ́l ɔ yíi kɛ́ŋ. Yíkun kɛ̀ŋlshìtê bè yíkun tyaŋn hìn tɛŋna bo, yì wo yíkun ǹ kɛl gbukɛl mɔŋmɛ hìn tɛŋna bo. ¹⁶ À ta yíkun kwɔ̀ŋmɔ́ɛ̀ nì yíkun nɔbiîŋ nì yíkun tɔbiîŋ fù nì yíkun jirɛ̂ɛ̀ kwó, yì bè yíkun jà nɛ́na yíi kɛ̀ŋlshìtê kpɛŋn, yì ki yíi mɔ máɛ̀ kwoê. ¹⁷ Jimiì bè yíkun tojakwóa mún gbɔ núkwɔ́ɔn. ¹⁸ Kɛ̀, à ta yíkun fléen yin bin byéen kwó, à wo jela bo. ¹⁹ Yíkun nɔkɔ́ŋlɲɛ̀nî wono Jɔnɔsɔ bè yíkun ɲɔnlia.» ²⁰ Yesu k'à wú dé: «Yíi mùkâr ye à ŋmɔ́n kɛ̀ŋlɲɛ́ntê ki bè Jerisalɛmu dyɛɛ̂ tomlì kpɛ́è, yíi k'à shu d'à dyɛɛ̂ kláa gbâr la lòɲɛ̀n. ²¹ Fù gbârî mùkâr ye lò ki mɛ̀mun ŋmɔ́n Jude kòkɛ̀lî mɔ, fɛ̀ wo túno à káàlî mɔ. À ri mɛ̀mun ŋmɔ́n Jerisalɛmu dyɛɛ̂ wono, fɛ̀ wo tú li à dyɛɛ̂ mɔ. À lò ki mɛ̀mun ŋmɔ́n klɔŋn se, fɛ̀ be dé bɛ ká di bo. ²² Fù bóló ɔ bo fù gbârî bè tɛŋna Jɔnɔsɔ nìrkyɛ̀ŋl sɛŋl gbâr, nɔkɔ́ŋl gbɔɛ̀ɛ̂ mun ni ɲúrɲɛ̀n ín Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ fɛ̀ ki kwo mɔyîn. ²³ Fù lɔɔ̂ mɔ, nar la bè tɛŋna à mél funɔɛ̀ɛ̂ n'à dye ɲɔ́ méèlî besé! Fù bóló ɔ bo Isirayɛli kìyɛŋnî jimiìî la bè da kwoa fù lɔɔ̂ mɔ, fù nì Jɔnɔsɔ k'à nìrfún yì to. ²⁴ Jimin máɛ̀ bè kwoa kɛ̀ŋlɲɛ́n krɔ ɔ, máɛ̀ ki jano fwɔŋbé mɔ tɔbin kúur sɔ́ɔ máɛ̀ nɔ̀nkurn tyé mɔ. Jɔnɔsɔ hlɔ kaarn tê ki Jerisalɛmu dyɛɛ̂ ŋmɛ kɛ́ê shaari. Fù gbɔɛ̀ɛ̂ bè kwoa má fù tɔbin kúur sɔ́ɛ̀ɛ̂ ǹ klɛ yefyɛ̂ɛ̀lî kwò kɔ́ɔŋnî tyé mɔ.» ²⁵ Yesu k'à wú yé dé: «Tofyɛɛ̀ dyɛ̀ bè ŋmɔ́na à yeê to, ki ŋmɔ́n à fwɔ́ŋnî to, fù nì ki ŋmɔ́n à sɛ̀ɛ̀ŋlî to. À fíin-nunî báan myɛl ki ná jaar sɔ́ɔ. Fù lɔɔ̂ mɔ jimiì nɔ̀nkurn bè tɛŋna wonkɔ̂ŋn mɔ, yì sekɔ̂ŋn se. ²⁶ Jimin tyɛɛ́ŋ sɔ́ɔ bè kir gbeêna yànbê gbɛ́ɛ jar se à ɲáantyarî ta klɛ gbɔɛ̀ɛ̂ kìsɛ́ɛ tɛ̀ŋndɛ́ɛ se. Fù bóló ɔ bo jɔ̀nɔ̀kpár mɔ lotɔnbéèê bè yâŋna. ²⁷ Fù gbâr ye jimiì bè jimin Dye-Jɛn kyɛɛl blakún ŋmɔ́na jénjên nì lotɔnbé denkɛŋln sɔ́ɔ nì Jɔnɔsɔ ǹ lobéê mɔ. ²⁸ Fù gbɔɛ̀ɛ̂ funkpɛ́ɛ gbâr mùkâr bè lobɛ̀, yíi wo dukú lí, yíi k'á ŋmel tɔŋnkúr bóló ɔ bo yíkun tobrée gbâr shùnjàɲɛ̀n.» ²⁹ Yesu ki tɛl gbukɛl dyàn kɛl dé: «Yíi w'àni bwɛl finî n'à tímɔ́n búùrî yiin! ³⁰ Yì wo saaŋ á wɔŋ tɛ́ kùnmɔ má, yíkun nɔ̀nkurni r'à shi á byéen lɛ klɛfɔn dé lɔ ri shùnjàɲɛ̀n. ³¹ Fù fá byéenî to yíkun saaŋ mùkâr ye fù gbɔɛ̀ɛ̂ klɛkún ŋmɔ́n, yíi k'à shu dé Jɔnɔsɔ ǹ faŋbéê ri shùnjàɲɛ̀n. ³² Hlɔ ta, mún n'à lóon yíkun se dé, jimiìî mun nɔ̀nkurn n'á shi mɔ ɲaâ mɔ mano, yì nɔ̀nkurn wo kúa àni gbɔɛ̀ɛ̂ klɛ̀ kaarn mɔ bo. ³³ Jɔ̀nɔ̀kpár nì ɲáantyar gbɔ bè kɔ́ɔŋna, kɛ̀ mún ǹ gbukɛlî wo kɔ́ŋn hìn fífí bo.» ³⁴ Yesu k'à wú dé: «Yíi w'á byéen tɛ́ŋlɛ́n, yíi b'à jél yíi nìryɛŋn ki kpârè ɲátojaalbê, nì tyɛŋ yɛ̀ ɲámɔkekɛ̂l, fù nì díryɔ́ŋ mɔ jimin ɲáa jà gbɔɛ̀ kìsɛ̂ se bo, bóló ɔ bo, díryɔ́ŋ dɔkɔ́ɔŋn gbârî bè tɛŋna yíkun se yɛŋntajò gbɔ. ³⁵ À bè tɛŋna árí yɔ ri fáâ mun to máɛ̀ tohlúun. Fù bóló ɔ bo díryɔ́ŋ dɔkɔ́ɔŋn gbârî blaàn yɔ fáâ to, ki bɛ jimiì nɔ̀nkurn tohlúè à ɲáantyarî ta. ³⁶ Yíi wo tɛŋn á ɲáa to, yíi bè tonyɛɛl klɛɛ̀n gbâr nì gbâr nɔkɔ́ŋl yíi ki faŋ ŋmɔ́n, yíi ɲɔn ki li fù bla gbɔɛ̀ɛ̂ nɔ̀nkurn mɔ, fù nì yíi ki bɛ dukú lí hìn tɛŋn Jimin Dye-Jɛn ɲíɲra.» ³⁷ Yesu ri jimiì kɛɛln ín à tonyɛɛlklɛ-lɔ́sɔ́ɔɔ̂ mɔ yekpɛ̀ŋlo, núkur nì jò à b'à túun bwàrî kwokéen Olifye káalî fléen. ³⁸ Jimiì nɔ̀nkurn bè sɛɛ̀ln n'à fùnono àn kɛɛln gbukɛɛ̀lî tonákɔ́ɔŋn ɔ à tonyɛɛlklɛ-lɔ́sɔ́ɔɔ̂ mɔ.