¹ Yesu k'à wú án kɛɛln-bishɛ́ɛ̀ŋɛ̂ se dé: «À wo kwo hìn jimiì nímɔkɛŋl gbɔɛ̀ wo yíkwóa bo. Kɛ̀, fù jimiì nímɔkɛŋl gbɔɛ̀ɛ̂ yíkwɔ́ɔɔ̂ ki bè li jiminî mun mɔ, nar la fù tɔŋnî besé.» ² Fù jiminî ki tìn nyɛl denkɛŋl sɔ́ɔ to, ki gbɔn feê fíin-nun mɔ, fù yɛŋn bè la nar à to, ki jìré à jimin faŋ dwan fɛ̀ɛ̂ mɔ jir byéen nímɔkɛɛŋl (ŋmel mɔ nìnâ) gbɔ yíkwɔ̂ to fù tɔŋnî se. ³ Yíi w'á byéen ja, yíi k'á ɲɛn fá shu! Á tɔbin kúur mɔ jir ki gbɔjáal kwo á to, à fɛ́ŋn, á k'à sènbe. Àn klɛ̀ gbɔjáalî hlɔ̀má nì dɛ́ à se, ki kárè gbɔjáal to, á k'à solsɛ́. ⁴ Fù nì ki gbɔjáal kwo ákún to jìr ɲáa kiin yefyɛ̂l byéen wono, à hlɔ̀má ki dé à se, ki kárè gbɔjáal to, k'á sɛbɛ ákún se jìr ɲáa kiin, à b'ákún tonyɛɛln, à solsɛ́.» ⁵ À twɔ́ɔŋnlórêê k'à wú yíi Totɔn se dé: «Má búr ŋmɛ́ɛn ǹ gbɔ hlɔjaâ ta!» ⁶ Yesu k'à wú dé: «Gbɔ hlɔjaâ mun ni tɛ̀ŋnɛ̀n yíkun se, à bè sɔ́ɔ fɔn mútárídî bin se lò ín, yíkun n'à wú hìn ín àni tímɔ́n fin sɔ́ɔɔ̂ se ín d'à w'á wuno kpéké à fíin-nunî mɔ, k'à kwo yíi ǹ lô fáâ to. ⁷ Yíkun mɔ gbò se tɔŋnklɛrɔn tɛ̀ŋnɛ̀n, à b'àn klɔŋ mɔ klɛwɔ klɛɛ̀n fù nì kwoa bo à b'àn yìnmɔ́ɛ̀ myɛɛ̀n. À mùkâr ye lì bɛ klɔŋn se, k'à wú à se d'à wo ɲínɛ́ɛn ki le di. ⁸ À wo fù wúa bo, à b'à wúa à se d'à wo le mɔtityɛ́ŋn àkun se, k'á tyétìn ki le tè àkun to k'à di, k'á gbɛ. Fù kwɔ́ɔn à tɔŋnklɛrɔnî bè le dia, k'á gbɛ. ⁹ Fù tɔŋnî wo fulóo tea à tɔŋnklɛrɔnî to bo, bóló ɔ bo à to tɛ̀ klɛwɔ ɔ. ¹⁰ Yíkun wo saaŋ máno à kwo fù fá byéenî to, yíi ri gbârî mun ye á to tɛ̀ klɛwɔɛ̀ nɔ̀nkurn kwò kɔ́ŋnè. Yíi k'à wú dé yíkun ki bin kaarn klɛwɔ klɛrê ɔ, dé mùmun ló yíkun se, dé yíi ri fù mùn klɛ̀.» ¹¹ Yesu ǹ dyɛwóon kɔ́ɔŋnî wono Jerisalɛmu dyɛɛ̂ mɔ kɔ́ŋnfɔn, à ri kɔ́ɔŋn ín Samari kìyɛŋnî nì Galile kìyɛŋnî tyédɔɔ̂ ta. ¹² À dɛ́ɛ yɛŋn se dyɛ dyàn mɔ, túrɔn jir fú ki b'à hlú. Yì ki lí líè dɔ́se, ¹³ yì k'á myɛl tɔŋnkrɔ̂ mɔ à wú dé: «Kɛlɔn Yesu, ŋmɛ́ɛn mùnurja!» ¹⁴ Yesu ki yì ŋmɔ́n, k'à wú yì se dé yì wo don á byéen yɛnké à flɛ́klɛrêê to. Yì kɔ́ɔŋn gbâr ye, yì ki dénno kpɛ́lnjakúnè ɲɛ̂l mɔ. ¹⁵ À túrɔn jir fúû mɔ jir byéen ki b'à ŋmɔ́n d'àkun ni kpɛ́lnjàè híin, k'á sɛbɛ á besé, ki Jɔnɔsɔ súnkwó á myɛl tokpâr ɔ. ¹⁶ Fù k'á kurkpé, k'á ɲáa hlú ɲáan ta Yesu tɔŋn, ki fulóo tè à to. Fù jɔɔ̂ ki Samari jir ɔ ín. ¹⁷ Yesu ki dukwo dé: «À túrɔn jir fúû nɔ̀nkurn wo kpɛ́lnjà ín be a? Yì búur jir kɛlî mí fɛ́ɛŋn? ¹⁸ Yì mɔ dó wo ŋmɔ́n ká bo fóro àni tɔ́ŋn jɔɔ̂ byéen k'á sɛbɛ̀ fulóo tè Jɔnɔsɔ to.» ¹⁹ Fù kwɔsé, Yesu k'à wú à jɔɔ̂ se dé: «Dukú á ki don, án gbɔ hlɔjaâ r'á ɲɔnlɛ.» ²⁰ À Farisiyɛ̂ɛ̀ŋɛ̂ ki Yesu du dé Jɔnɔsɔ ǹ faŋbéê bè bɛa fɛ́ɛŋn gbâr ye? Yesu ki yì ǹ gbukɛlî mɔli dé : «Jɔnɔsɔ ǹ faŋbéê bè bɛa bla fáâ mun mɔ, à bè tɛŋna jimiì ǹ tɛ́ŋlɛ̂n ŋmɔ́n gbɔ bo. ²¹ Yì b'à wúa d'à nɛn húnmɔ bo, fù nì kwoa bo, d'à nɛn míî bo. Fù bóló ɔ bo Jɔnɔsɔ ǹ faŋbéê ri tɛ̀ŋnɛ̀n yíkun tyé mɔ.» ²² Fù kwɔ́ɔn Yesu k'à wú à kɛɛln-bishɛ́ɛ̀ŋɛ̂ se dé: «Ye dyàn bè fɛ́a, fù lɔɔ̂ mɔ yíkun nwɔ́ɔn bè tɛŋna Jimin Dye-Jɛn ŋmɔ́ɔn gbɔ se, à ta yefyɛ̂l byéen kwó, yíi w'à ŋmɔ́na bo. ²³ Yì b'à wúa yíi se d'à nɛn húnmɔ, fù nì kwoa bo d'à nɛn míî, yíi be don mímí bo, yíi be túno yì besé mímí bo. ²⁴ À nì fù kwó, nɔ̀ɲal fáâ mun to ɲaàln gbɔ̀n à jɔ̀nɔ̀kpár dɔ máâ to, ki don búrké à dɔ máâ to, Jimin Dye-Jɛn saaŋ bè máno tɛŋna á bla lɔɔ̂ mɔ. ²⁵ Kɛ̀, à la bè da tyɛɛ́ŋ sɔ́ɔ kwoa wà, ɲa yeê jimiìî k'á ká à se. ²⁶ Gbɔɛ̀ɛ̂ mun ni klɛ̀ ín Nufu yeê mɔ, fù gbɔɛ̀ɛ̂ núkúurî saaŋ bè kwoa Jimin Dye-Jɛn fù yeê mɔ. ²⁷ Nufu ǹ kúrnî mɔ dɛ́ɛ gbâr ye jimiì ri le leèn ín, yì bè lamɔ́ɛ̀ laàn. Yì r'á luìî tyɛ̀l gbɔɛ̀ klɛɛ̀n ín yì b'á dye-méèl tɛɛ̀n jɛɛ̂ to, fóro yeê mun fyɛ̂l lɔ Nufu ri dɛ́ à kúrnî mɔ, fù gbâr ye nunlô ki bɛ̀ díryɔ́ŋ dìè, marséyɛŋnmɔ́ɛ̀ nɔ̀nkurn ki kú kúè shaari. ²⁸ À saaŋ bè kwoa máno Loti yeê fù ri klɛ̀ fáâ to, fù gbâr ye jimiì ri lemɔ́ɛ̀ leèn ín, yì bè lamɔ́ɛ̀ laàn. Yì bè mɔ́ɛ̀ sɔɔ̀ŋn, yì bè mɔ́ɛ̀ yɛɛ̀n. Yì bè mɔ́n nukwoòn, yì bè lɔ́ɛ̀ twɔɔ̀ŋn. ²⁹ Kɛ̀, Loti ri yeê mun fyɛ̂l ɔ lɛ̀ Sodɔmu dyɛɛ̂ bur, jɔ̀nɔ̀kpár mɔ lì bɛ̀ ɲɔ́bint mɔ nyɛ nɔ̀ ri tɔ́ŋn ín, marséyɛŋnmɔ́ɛ̀ nɔ̀nkurn ki kú kúè shaari. ³⁰ Jimin Dye-Jɛn b'á byéen yɛna yeê mun fyɛ̂l ɔ díryɔ́ŋ mɔ, fù gbɔɛ̀ɛ̂ saaŋ bè máno kwoa. ³¹ Fù yefyɛ̂lî bè jiminî mun ŋmɔ́na mɛ̀mɛ̂ fléen, à kpɛŋnmɔ́ɛ̀ b'à se à lɔ́ɔ̂ mɔ, à wo yanɲɛ̀n ki kyɛl bɛ fɛ̀ gbɔ̀n bo. Fù yefyɛ̂lî nì bè jiminî mun ŋmɔ́n klɔŋn se, à wo yanɲɛ̀n k'á sɛbɛ ká di bo. ³² Yíi w'á tɛ́lɲɛn Loti luû to klɛ̀ fù ri mɔ. ³³ Jiminî mun n'à ɲɛ́ɛn k'á yɛŋn marî tanyân, fù bè bwɔɔna á yɛŋn marî mɔ. Kɛ̀, jiminî mun tɛ w'á yɛŋn marî to bo, fù b'á yɛŋn marî ɲɔnlia. ³⁴ Mún n'à lóon yíkun se d'àni túun bwàrî se, jir níin ki bè tɛŋn shínmɔ́n mɔ́n byéen ta, má bè gbɔ̀n lia má ki jél ta. ³⁵ Mél jir níin ki bè tɛŋn mɔ́n nwɔn tê yíse, má bè gbɔ̀nlia má ki jél ta. ³⁶ Jɛn jir níin ki bè tɛŋn yíse klɔŋ mɔ́n byéen mɔ, má bè gbɔ̀nlia má ki jél ta.» ³⁷ À kɛɛln-bishɛ́ɛ̀ŋɛ̂ ki Yesu du dé: «Ŋmɛ́ɛn Totɔn, fù bè kwoa fɛ́ɛŋn tíkɛ́l nì fɛ́ɛŋn gbâr ye?» Yesu ki yì ǹ gbukɛlî mɔli tɛl mɔ dé: «Mɔ́n klô ri ŋmɔ́ɔn tíkɛ́lî mun mɔ dwɔ ri ŋmɔ́ɔn mímí.»