¹ À A-Be-Jirea-Fu-Ta wúwɔ́ɔŋɔ̂ búur bè yefyɛ̂l kpaan yé, Yesu ki bè dé Betani dyɛɛ̂ mɔ. Lasari tɛ̀ŋnɛ̀n ín dyɛɛ̂ mun mɔ, à ri jɔɔ̂ mun ɲìnɛ̀n li ín jimin klômɛ́ɛ̀ tyé mɔ. ² Yì ki túun-fwɔŋn táaŋn à se mímí ín, Marita k'à leê gbɔ̀n ɲɛn ín. Lasari k'à leê kàr mɔ ɲínɛ́ɛn têê má ɔ ín Yesu wɔ́se. ³ Mariyamu ki nyɛ́ɛl to ben nar sɔ́ɔ fel ɲɛ byéen gbɔ̀n k'à fûrè Yesu níiî to, k'á yin ɔ à níiî tokukûr. Fù nyɛ́ɛlî k'à nyɛ́ɛl sɛ̀bɛ̂ sɛ̀bɛ̂ sɔ́ɔɔ̂ rɔ ín, à tar bè kɔ̂ŋn. À nyɛ́ɛlî benî ki yì tɛ̀ŋn lɔ́ɔ̂ wonoô nɔ̀nkurn gbɔ̀nè. ⁴ Àn kɛɛln-bisháɛ̀ŋɛ̂ mɔ jir má ri tɛ̀ŋnɛ̀n ín, mùmun ni fɛ́ɛŋn dé Juda Isikariyoti. À bè Yesu jà nɛ́ntɔnî ɛ̀ ín kpɛŋn mɔ, fù k'à wú dé: ⁵ «Myɛ́n núkwɔ́ɔn yì w'àni nyɛ́ɛlî yɛ̀ kpɛ̂ŋl tɔŋnbin kpíníinkúur à to kar-kwɛŋl (300), fù kpɛ̂ŋlî ki tè dàkpɛɛ̂ŋl to ín bo?» ⁶ À wo fù lóon ín nɔkɔ́ŋl ki ɲukwó dàkpɛɛ̂ŋl to ín bo (dɛ́), àkun ǹ dɔ́tɔnbéê se, mɔ́n nì bré à dɔ́ɔ̂ mɔ, à ri fù lɛɛn. Fù bóló ɔ bo àkun ki ɲra ɔ ín. ⁷ Kɛ̀, Yesu k'à wú dé: «Yíi w'à biî jélê! À r'àni nyɛ́ɛl toben nar sɔ́ɔɔ̂ fûr mún fléen, ń tokláa lɔɔ̂ mɔ klɛ fù ri tofyɛ ɲɛn ɔ. ⁸ Dàkpɛɛ̂ŋl bè tòmɔ̀-tomɔ tɛŋnbɛ̂ yíkun wɔ́se, kɛ̀ mún bè tɛŋnbɛ̂ yíkun wɔ́se tòmɔ̀-tomɔ bo.» ⁹ Yawutu tyɛɛ́ŋ sɔ́ɔ r'à ná gbârî mun ye dé Yesu ri mí Betani dyɛɛ̂ mɔ híin, yì ki dénno mímí. Yì wo dònɲɛ̀n Yesu byéen gbɔ núkwɔ́ɔn bo dɛ́, yì ri dénno Lasari lɛ ɔ saaŋ, Yesu ri jɔɔ̂ mun ɲìnɛ̀n li jimin klômɛ́ɛ̀ tyé mɔ. ¹⁰ Fù mùn n'à jɛ́l, à flɛ́klɛrê ŋmelêê k'à búrè á ŋmel mɔ dé Lasari ki saaŋ kwo, ¹¹ bóló ɔ bo Yawutu tyɛɛ́ŋ sɔ́ɔ r'á burjìr yì kyɛ́ŋl àkun Lasari se klɛ̀ fù ri núkwɔ́ɔn yì ki Yesu gbɔ hlɔja. ¹² Fù wóontɛ̂lî mɔ, jùmɔ̂ tɛ̀l sɔ́ɔ ki dénno à wúwɔ́ɔŋɔ̂ wúwɔ́ŋ fɔŋnî mɔ, yì k'à ná dé Yesu ri blaàn Jerisalɛmu dyɛɛ̂ mɔ. ¹³ Yì ki sɛ́ŋn wɔŋ gbɔ̀n, yì ki lino à hlúké, yì b'à lóon á myɛl tokpâr ɔ dé: Fulóo ki tè Jɔnɔsɔ to! Tɔnî mun ni blaàn Díryɔ́ŋtotɔn yin ɔ kyon ki nɛ́n à mɔ Isirayɛli kìyɛŋntɔn jɔɔ̂ ɛ̀ ¹⁴ Yesu ki sùnbaarnbin ŋmɔ́n, ki dú ɲínɛ́ɛn fù ta Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ à yɛ̀n fáâ to dé: ¹⁵ Be yàntú bo Siyɔŋn dyɛɛ̂ ɛ̀, Án kìyɛŋntɔnî rɛn, à ri blaàn, À bè ɲínɛ̂nɲɛ̀n sùnbaarnbin ta. ¹⁶ Yesu ǹ kɛɛln-bisháɛ̀ŋɛ̂ w'àn kɛl gbukɛlî tɔŋn hlɔ̀ à kɛl gbâr ye bo. Kɛ̀, Jɔnɔsɔ ri gbârî mun ye Yesu ŋmelɔnkrɔ́, fù gbâr ye la, yì tɛ́l ki bɛ̀è à mɔ dé fù gbɔɛ̀ɛ̂ ri ɲúrɲɛ̀n ín à sɛ́bɛ̂ɛ̂ mɔ àkun gbɔ mɔ. Fù nì jimiì ki saaŋ fù gbɔɛ̀ɛ̂ kwo àkun se. ¹⁷ À jùmɔ̂ɔ̂ mun ni tɛ̀ŋnɛ̀n Yesu wɔ́se ín Lasari fɛ́ŋn gbâr ye à b'á dùkur mɔ, fù nì k'à ɲìnɛ̀n li jimin klômɛ́ɛ̀ tyé mɔ, fù jimiìî r'à yɛ̀n án nínshîbé gbukɛlî mɔ d'à klɛ̀ fá ɔ. ¹⁸ Fù r'à jɛ́l ki bɛ̀ à hlú, bóló ɔ bo yì r'à ná d'à ri fù shɔ́gbɔɔ̂ klɛ̀. ¹⁹ À la máno tɛ̀ŋn híin, à Farisyɛ̂ɛ̀ŋɛ̂ ki kyáŋmɔ à lóo kùnmɔ yíi se dé: «Yíi r'à ŋmɔ́n dé ŋmɛ́ɛn wo bóló kpɛ́ hìn bo, jimiì nɔ̀nkurn kpéɲɛ̀n nɛn la à ta.» ²⁰ Girɛsi jir máɛ̀ ri tɛ̀ŋnɛ̀n ín à jùmɔ̂ɔ̂ tyé mɔ, fɛ̀ ri dònɲɛ̀n ín Jɔnɔsɔ tonyɛlkɔ́ɔŋn ɔ A-Be-Jirea-Fu-Ta wúwɔ́ɔŋɔ̂ wúwɔ́ŋ fɔŋnî mɔ. ²¹ Fù Girɛsi yinî k'á sukúrno Galile kìyɛŋnî dyɛ Betisayida jir Filipu to, yì k'à du dé: «Ŋmelɔn, ŋmɛ́ɛn n'à se n̂ ki Yesu ŋmɔ́n.» ²² Filipu ki dénno fù gbukɛlî tayɛnké Andere to, fù kwɔ́ɔn yì jir níinî ki dénno fù gbukɛlî yɛnké yíse Yesu to. ²³ Yesu ki yì ǹ gbukɛlî mɔli dé: «Jimin Dye-Jɛn ŋmelɔnkrɔ̂ ŋmɔ́nbɛ̂ gbârî mun ye, fù la lò. ²⁴ Mún n'à lóon yíkun se dé hlɔ ta, hlɔ ta dé kùnmɔ bin nì wô ɲáan ta ki nìná bo, à ri tɛɛ̀ŋnè á byéen. Kɛ̀, à nì nìnáè, à ri sháaŋn, ki bɛ tɛŋn bin tyɛɛ́ŋ sɔ́ɔ. ²⁵ Jiminî mun yɛŋn marî gbɔ r'à mɔnar, fù ri bwɔɔ̀n à mɔ, fù nì jiminî mun k'á tɛ kár li díryɔ́ŋ mɔ tɛŋn shiî to, fù jiminî b'á yɛŋn marî ɲɔnlia dɔ kaarn shi ŋmɔ́ɔn ɔ. ²⁶ Jiminî mun n'à se ki mún, tɔŋnkwo, fù jiminî wo kpé mún ta. Mún bè tɛŋna tíkɛ́lî mun mɔ, mún tɔŋnklɛrɔnî bè tɛŋna mímí ni mɔ. Jiminî mun ki mún tɔŋnkwo, mún Tɔ Jɔnɔsɔɔ̂ bè fù ŋmelɔnkúra. ²⁷ Mún tɛ́lmɔkɛŋlɲɛ̀n nɛn la kyáŋmɔ (da kpɛŋn,) ń ki myɛ́n wú yé? "Ń Tɔ Jɔnɔsɔɔ̂, ń k'à wú d'á ki mún ɲɔnli àni da wóonî mɔ a?"... Kɛ̀, mún ni bɛ̀ɲɛ̀n fù da wóonî mùn núkwɔ́ɔn. ²⁸ "Ń Tɔ Jɔnɔsɔ, ákún fù yinî ki ŋmelɔnkrɔ̂ ŋmɔ́n!"» À la máno tɛ̀ŋn híin, myɛl dyàn ki li jɔ̀nɔ̀kpár mɔ dé: «Mún n'à ŋmelɔnkrɔ́ ín, ń b'à ŋmelɔnkúrbɛ̂ yé.» ²⁹ À jùmɔ̂ɔ̂ mun ni tɛ̀ŋnɛ̀n fù tíkɛ́lî mɔ ín, fɛ̀ tàshɛŋ ri jò fù myɛlî mɔ, fɛ̀ r'à lóon ín dé nɔ̀fúndârmɔ́n myɛl ɔ. Máɛ̀ ɔ dé Jɔnɔsɔ ǹ tɔ́ŋrɔn dyàn ni kɛɛ̀ln ín à wɔ́se. ³⁰ Yesu k'à sɛwú yì se yé dé: «Àni myɛlî wo lɛ̀ mún núkwɔ́ɔn bo, à ri lɛ̀ yíkun núkwɔ́ɔn. ³¹ Díryɔ́ŋ jimiì kítî gbâr la kyáŋmɔ lò. Díryɔ́ŋ ŋmelɔn jaal sɔ́ɔɔ̂ bè kyáŋmɔ tó búurnbɛ̀ denbur se. ³² Mún mùkâr ye bè ŋmelɔŋnkrɔ̂ ŋmɔ́n à ɲáantyarî ta, mún bè jimiì nɔ̀nkurn gbár sukúra ń to.» ³³ Yesu r'àni gbukɛlî kɛɛ̀ln ín, à bè kúa klóo fáâ mun mɔ, ki fù yɛ̀n. ³⁴ À jimiìî k'àn gbukɛlî mɔli dé: «Ŋmɛ́ɛn n'à ŋmɔ́n à tɔ̂ŋn sɛ́bɛ̂ɛ̂ mɔ ɲwâr gbukɛlî mɔ dé Jɔnɔsɔ ǹ Jimin Mɔtɔ̂ŋnmunî ri tɛɛ̀ŋn á shi mɔ dɔ kaarn mɔ. Ákún la gbáno à lóon dé fóro jimin Dye-Jɛn ŋmelɔŋnkrɔ̂ ŋmɔ́n? Gbò ki la fù jimin Dye-Jɛnî ɔ?» ³⁵ Yesu k'à wú yì se dé: «Niyɛ́ɛl bè kyáaŋn tɛŋnbɛ̂ yé yíkun wɔ́se díryɔ́ŋ mɔ. Yíi wo kél fù woyɛ́ɛl to, nɔkɔ́ŋl butúun be tɛŋn yíkun se yɛŋntajò gbɔ bo. Jiminî mun ni kɛ́ɛln butúun mɔ, fù jiminî w'á ja ɲɛ̂l hlɔɔ̀n bo. ³⁶ Niyɛ́ɛl tɛ̀ŋnɛ̀nî se yíkun wɔ́se, yíi wo niyɛ́ɛl gbɔɔ̂ hlɔja, nɔkɔ́ŋl yíi ki tɛŋn woyɛ́ɛl to jimiì.» Fù gbukɛlî kɛlmun kwɔ́ɔn Yesu se, k'á fɔŋnbɛlkwóno á yákúnè yì to. ³⁷ Yesu ta se àni shɔ́gbɔ tofyɛ̀ɛ̂ nɔ̀nkurn klɛ̀ yì ɲíɲra, yì w'à gbɔ hlɔjà bo, ³⁸ nɔkɔ́ŋl tɔ́ŋrɔn Esayi ǹ kɛl gbukɛlî mɔ lô gbɔɛ̀ɛ̂ ki kwo mɔyîn dé: «Diryɔŋtotɔn, ŋmɛ́ɛn ni gbukɛlî mun kɛl, gbò ri fù hlɔjà ín? Fù nì Diryɔŋtotɔn n'án lotɔnbéê yɛ̀n gbò to ín?» ³⁹ Esayi ri yì ǹ gbɔ hlɔja kaarnî ŋmelî ló yì se dé: ⁴⁰ «Mún Jɔnɔsɔ ri díryɔ́ŋ jimiì ɔ kyaâr jìr, Ki yì nìryɛŋn tokpârja, Nɔkɔ́ŋl yì be ŋmɔ́ɔn kwo á ɲáa ɔ bo, Yì nìryɛŋnî be bóló gbɔ mɔfáshu bo, Yì b'á mɔsɛŋl yì ki kár gbɔjáal klɛ to bo, Mún, Jɔnɔsɔ be bɛ yì kpɛ́lnja bo.» Fù núkwɔ́ɔn yì wo gbɔ hlɔja hìn ín bo. ⁴¹ Esayi ri fù gbukɛlî mùn kɛl ín, Yesu ǹ lobéê ŋmɔ́n fù gbâr ye, ki kɛl à gbɔ mɔ. ⁴² Fù n'á nɔ̀nkurn mɔ, à Yawutuìî tyé mɔ ŋmelɔn tyɛɛ́ŋ sɔ́ɔ k'à gbɔ hlɔja, kɛ̀ à Farisyɛ̂ɛ̀ŋɛ̂ yànbê se yì w'á ɲɛn hìn fù ɲɛnî mɔ ín bo, nɔkɔ́ŋl yì be tó li à tonyɛɛlklɛ-lɔ́ɔ̂ mɔ bo. ⁴³ Fù bóló ɔ bo jimin ǹ sɔ́jà gbɔ ri yì tìyà ki jìré Jɔnɔsɔ ki yì ǹ klɛ̀ ɲɔn hlɔ̀ to. ⁴⁴ Yesu ki kɛl á myɛl tokpâr ɔ dé: «Tɔnî mun ki mún gbɔɔ̂ hlɔja, fù tɔŋnî wo mún gbɔ hlɔjaàn bo dɛ́, kɛ̀ fù tɔŋnî ri mún tɔ́ŋ bɛ̀ tɔŋnî gbɔ hlɔjaàn; ⁴⁵ fù nì tɔŋnî mun ni mún ŋmɔ́ɔn, fù tɔŋnî ri mún tɔ́ŋ bɛ̀ tɔŋnî ŋmɔ́ɔn. ⁴⁶ Mún ni byɛ̀ díryɔ́ŋ mɔ woyɛ́ɛl lɛ ɔ jimiì se, nɔkɔ́ŋl jiminî mun nɔkɔŋl ki mún gbɔ hlɔja, fù tɔŋnî be tɛŋn butúun mɔ bo. ⁴⁷ Jiminî mun ki mún ǹ kɛl gbukɛlî ná, à w'á kpɛŋnjà à to bo, mún wo fù tɔŋnî kɛɛ̀ŋn bo. Fù bóló ɔ bo mún wo bɛ̀ɲɛ̀n díryɔ́ŋ mɔ jimiì kɛŋ ɔ bo, kɛ̀ mún nì bɛ̀ɲɛ̀n jimiì ɲɔnlɛɛ ɔ. ⁴⁸ Tɔnî mun k'á burjìr mún kɛ́ŋ, k'á ká mún ǹ kɛl gbukɛlî to, fù kítíkártɔn tɛ̀ŋnɛ̀n; mún ni gbukɛlî mun kɛl, fù b'à kɛŋa à dɔkɔ́ɔŋn-yefyɛ̂lî ta. ⁴⁹ Fù bóló ɔ bo mún ǹ kɛl gbukɛɛ̀lî wo lìɲɛ̀n mún se bo, à ri lìɲɛ̀n mún Tɔ Jɔnɔsɔɔ̂ se, fù mun ni mún tɔ́ŋ bɛ̀ɲɛ̀n. Ń ni yanɲɛ̀n ń ki mùmun wú, fù nì ń ki gbukɛlî mun kɛl, àkun nɔ̀nkurni ri fù yɛ̀nɲɛ̀n. ⁵⁰ Fù nì mún b'à shi d'àkun ǹ gbukɛlî ri dɔ kaarn shi tɛɛ̀n. Fù mùn n'à jɛ́l mún ni gbukɛlî mun kɛɛ̀ln, mún n'à kɛɛ̀ln nì yan mún Tɔ Jɔnɔsɔɔ̂ ǹ kɛl gbukɛlî to.»