¹ Ákún ń dye, á tokpar ja Jɔsɔ fyar mɔ fù mun tɛ̀ŋnɛ̀n Yesu mɔ. ² Fù nì árí mun náan kɔŋbê se, jimin tyɛɛ́ŋ sɔ́ɔ ni ɲìɲra, fù fá wú à jimin teln máɛ̀ se, fɛ̀ mun ló shi yì ki jimin tyɛɛ́ŋ sɔ́ɔ kɛɛln à nɔ. ³ Kyɛ̀ŋn se à to mún wɔse, árí Yesu surashi ɲɔn sɔ́ɔ. ⁴ Surashi jɔ mun à shi ki à ŋmeltɔn tìyà gbɔ kur, fù yanɲɛ̀n ki díryɔŋ gbɔɛ̀ to yì bo. ⁵ Hló hlótɔnî mun nì àn hló tu à fà to bo fù bè yin ŋmɔ́na bo. ⁶ Fù fá to, fɛlklɛtɔn yanɲɛ̀n ki àn fɛlkwo wa, kwɔ́ɔn ki kùnmɔ ŋmɔ́n. ⁷ Mún ló fù to na Jɔsɔ bè tɛl tè á to gbɔkurn nɔnkurn mɔ. ⁸ Á tɛl nɛn Yesu mɔ, fù mun lɛɛn Dawuda kur mɔ, ki ɲínɛ́n li, jimin klomɔ́ɛ̀ tyémɔ Jɔnɔsɔ gbukɛlî fá mun to à ló. ⁹ Fù mun nɔkɔŋl mún kyɛ̀ŋnɲɛ̀n, árí gbɔ jaal klɛtɔn yì mun tìnè. Kɛ̀ Jɔnɔsɔ ǹ gbukɛlî wo tìnè bo. ¹⁰ Fù nɔkɔŋl mún gbɔkurn nɔnkurn tosenɛn, à jimin mɔtɔ́ŋnmɛ̀ nɔkɔŋl, tikeln fɛ̀ ki sɛn Jɔnɔsɔ fyarî mɔ ŋmɔ́n ki li Yesu se, dɔkaarn mɔ. ^{11 12 13} Fù gbukɛlî ki hlɔ ɔ, n̂ ni kúè à wɔse, ń senbê tɛŋnkuna à wɔse. N̂ à tokpar ja, n̂ be faŋ ŋmɔ́na à wɔse, kɛ̀ n̂ n'à ká à se àkun senbê à ká ŋmɛ́ɛn se. Ɲmɛ́ɛn nì télnɲɛ̀n bo, àkun bè téelna, bóló ɔ bo, àkun wo à ká hìn à byéen se bo. ¹⁴ À tɛl nɛn à gbɔɛ̀ mɔ: ki kɛl tokpɛŋl ja Jɔsɔ ɲɛ to to, gbukɛl jaal wo ɲokwo bo, ki árí à tonáantê togbɔ sɔ́ɔ. ¹⁵ À tokpar ja Jɔsɔ ɲatɔn, árí tɔnî munî à klɛwɔ klɛ à fá to, fléen wo bré à fléen bo, à bè Jɔnɔsɔ gbukɛl kɛln telnbê mɔ fù nì hlɔta. ¹⁶ À telnɲɛ̀n gbukɛl kwɛle to, fù nì tokarn gbukɛlî to, mɛmun fù gbukɛl tojaɲɛ̀n fɛ̀ be kɔ́ɔŋn ɲɛ to butúun mɔ. Yì ri gbukɛlî be tɛla árí nwɛ́ɛl jal. ¹⁷ Hymene nì Filɛti tɛ̀ŋnɛ̀n ànì jimin tyé mɔ, ¹⁸ Fɛ̀ mun à káè Jɔnɔsɔ ǹ hlɔ to, yì b'à lóon dé à jimin klómɛ̀ ɲìnɛ̀n gbârî lo. Yì b'à jimin tɛl mɔsɛɛ̀ln. ¹⁹ Fù nɔnkurn mɔ, Jɔnɔsɔ ɲínɛ́n gbɔ tokpar sɔ́ɔ líɲɛ̀n má, fù nì ani gbukɛlî mun tɛ̀ŋnɛ̀n à toja mɔ fá to. Jɔsɔ à shi ŋmɛ́ɛn mɛmun tɛ̀ŋnɛ̀n à wɔse, ŋmɛ́ɛn mɛmun saaŋ yin fɛ́ɛŋn, yì wo à fɔŋn bɛlkwo gbɔjaal to. ²⁰ Sɛŋl yɛkwo nì warn yɛkwo doron lɔ́ dɛnkɛŋlsɔ́ɔ mɔ bo. Máɛ̀ tɛ̀ŋnɛ̀n nan ɔ, máɛ̀ bè tàl ɔ. Yekwo mɔ́ɛ̀ ki yin nar fù ɔ. Máɛ̀ b'à togbɔ kaarn fɛ̀. ²¹ Tɔnî mun nì à byéen ja féné sɔ́ɔ, ki à byéen teln gbɔ jaal to fù bè tɛŋna árí yin nar yekwo, toféné sɔ́ɔ, à bè a totɔnî togbɔ nɔkwɔ, à bè féné sɔ́ɔ gbɔkurn nɔnkurn klɛ ɔ. ²² Á byéen ja à bisháan gbɔɛ̀ fù mɔnarbè to, á ki telnbê ɲɛ́ɛn, á ki Jɔsɔ ɲɛ̂l ɲɛ́ɛn, á ki kurbê ɲɛ́ɛn, á ki ɲamɔgbâl ɲɛ́ɛn à krɔmáɛ̀ wɔse, mɛmun Jɔsɔ tonyɛɛln à niryɛŋn gbijirn mɔ nɔ. ²³ Á ká à gbɔtyaln jel yì se, fù nì à gbɔ tyan kwɛlè fɛ̀ mun kɛŋl bré jimin tyé. ²⁴ Ta, Jɔnɔsɔ ǹ klɛwɔklɛtɔn yanɲɛ̀n ki kɛŋlɲɛn bo, à yanɲɛ̀n ki tonarbê ɲɛ́ɛn jimin nɔnkurn se, à b'à telnè jimin kɛlnɔ à wú gbâln mɔ. ²⁵ Á yanɲɛ̀n á kɛŋlshitê toteln gbukɛl nar ɔ, yí ki á tokpeŋnja dé Jɔnɔsɔ bè yì mɔnur ja, yì ki Jɔnɔsɔ gbukɛlî shu hlɔta. ²⁶ Yíi mukar bè teln ɲɔn ŋmɔ́n, yí bè à sukur lia sutana kànè mɔ, fù mun yì n gbɔn ki bur à kpɛŋn tɔn yì b'à à tìyà gbɔɛ̀ klɛ.