¹ Bé kpanshitɔn taɲɛɛ̀l jaarbê mɔ bo. Kɛ̀ á ki yí sewú à tɔɔ̂ fá to, à jɔlɛ bisháɛ̀ŋɛ̂ sewú à tɔbiìŋ fá to. ² À mùklɔrêê sewú à nɔɛ̀ fá to, à mímyéè, fɛ̀ ja à tɔméèl fénébê mɔ. ³ À dɛnklɔmɔntêê mun n'á byéen ɲɛn, télnbé mɔ, á ki fɛ̀ ɲɛn flɛ̀ɲɛ̀n. ⁴ Fù mélî derêê má bo, à ɲànbiìŋ ni tɛ̀ŋnɛ̀n, fɛ̀ ri yanɲɛ̀n yì ki Jɔnɔsɔ nyɛɛlkél télnbé mɔ yì ǹ den mɔ, yì ki yì dye seŋmɔ́n fù tyɛl tè yì to. Kɛ̀ fù ri Jɔnɔsɔ mɔnar. ⁵ Dèklómélî mun ni tɛŋn byéen tɛŋ wɔnɔ, kɛ̀ à byéen tìn Jɔnɔsɔ tonyɛl gbɔ to túun nì ye. ⁶ Kɛ̀ mun nì à byéen bré à tìyà gbɔɛ̀ to, fù tɔnî ri kúɲɛ̀n. ⁷ Á yanɲɛ̀n á ki fù wú yì se tekɛŋl gbɔtyan be tɛŋn à ta bo. ⁸ Mun n'à kùr to kpɛŋnja bo, fù tɔn n'á ká gbɔ hlɔja ɔ, téln kaarn tɔn b'à fin a tɔn to. ⁹ Dèklómɔtɔnî mun yiìŋ ɲúrɲɛ̀n, fù gbè ɲɛ to, fù be tɛŋn nɔ̀tɔŋn jityáar ŋmɔ́n kaar mɔ bo. À be dè mɔ́n byéen se ɲínɛ́n mél. ¹⁰ À be shuɲɛ̀n gbɔɲɔɛ̀ mɔ, à be bisháɛ̀ŋɛ̂ tobolɲɛ̀n, à bè tɔ́ɛ̀ŋ nì Jɔsɔ jimiì tokpɛŋnjaɲɛ̀n, à bè kyɛ̀ŋntê tityɛ́ŋnɲɛ̀n, à be gbɔɲɔn nɔnkurn kwoɲɛ̀n. ¹¹ À dèklómél shyɛɛ̀ŋ, á k'á ká fɛ̀ se. Fù mél ki mun ɔ, yì tìyà gbɔ jɛlè yì kar Krista to. Yì b'á sɛtyɛldé besé. ¹² Yì b'à byéen nɛn, ki li yì ǹ kyɛŋl lo myɛlî tyaŋn se. ¹³ Fù wono, yì ǹ klɛwɔ dà se, yì b'à déé mli diyaŋ nɔnkurn se, yì b'à kéeln-mli à ŋmel se, yì b'à kél kaarn gbukɛl kɛɛ̀ln. ¹⁴ Ń ni la à besé, à mìmyée bisháɛ̀ŋɛ̂ ki tyɛldé, yì ki derê ŋmɔ́n, yì b'à jel kɛŋlshi ki yì búr bóló klɛ mɔ bo. ¹⁵ Kɛ̀ máɛ̀ ri ɲɛ̂l búrè, yì ki kpé sutana fléen. ¹⁶ Jɔnɔsɔ totéln mɔ tɔn se, jɛn ɔ wo, mél ɔ wo, dèklómɔtɔn nì tɛ̀ŋnɛ̀n, fù ki fù tɔn to kpɛŋn ja nɔkɔ̀ŋl à bè tɛŋn kan Jɔsɔ lɔ́ɔ̂ fléen tyé bo, ki à dèklómun sɛbɛɛ̂ to kpɛŋn ja ɲɔn sɔ. ¹⁷ À klótêê mun nì gbɔɛ̀ɛ̂ ɲɛn to búrɲɛ̀n, fɛ̀ k'àn klɛgbɔɛ̀ nɔnkurn kwo nɔkɔ̀ŋl yì ki ɲɛfléen ŋmɔ́n, mɛmun nì kɛɛln tè. ¹⁸ À gbukɛlî r'à ló dé: «Á be naàl yɛŋn tìn àn klɛwɔklɛ gbârî ɔ bo.» fù nì «Klɛwɔklɛtɔn saàr ki yan àn klɛwɔ to.» ¹⁹ Bè à klôtêê nɛn gbɔ to kpɛŋn ja nì shi jir níin ní jir tyáar ló kaarn mɔ bo. ²⁰ Mɛmun nì gbɔ jaal klɛ, à ki yì mɔtɔ́ŋn yì nɔ̀nkurn yì ɲinɲra, nɔ̀kɔŋl à búrî ki yantu. ²¹ Ń nì mwɔn á se, Jɔsɔ ɲɛ to, Yesu Krista ɲɛ to, fù n'à mɛlɛkeè ɲɛ to, d'à ki ànì gbɔɛ̀ɛ̂ nɔ̀nkurn to kpɛŋnja ja. Be bóló kwo gbɔ ǹ tìyà nukwɔn bo. ²² B'à kpɛŋn nɛn do fléen sisan mɔ bo. Bé gbɔ jaal mɔ dé do wɔse bo. Á byéen ɲɛn fénébé mɔ. ²³ Bè gbár mun tikɛl nunkpar kisɛn gbe bo. Á bé tukwan tyɛŋ klɔ laàn kyáŋ-kyáŋnè, à nya n'à gbemun nya gbɔɛ̀ nukwɔ́ɔn. ²⁴ Jimi máɛ̀ gbɔjaal ri wodɛl ta. Yì kiti klɛ kaarmun, kɛ̀ máɛ̀ fù ri dɛl kì kwɔn shu. ²⁵ Fù fá to, à gbɔɲɔɛ̀ ri wodɛl ta, à gbɔɛ̀ɛ̂ mun ɲɔn bo, fɛ̀ wo yaàn shi bo.