¹ Băwlus, Ăw-kăsăw n-Ălmasex, Ɣisa d-Timăttiyus, aŋa-nănăɣ, nəkkatăb i-Fileyman, aŋa-nănăɣ wa nəkna tăra, dər, nəniimăšɣăl, ² nəkkatăb daɣ i-Affiya wălătma-nănăɣ d-Ărxifus, amidi-nănăɣ dăɣ-akənnas, d-ălkanisăt ta tətiddawăt dăɣ-ăɣiwăn-năwăn. ³ Ǝkfăn-kăwăn Abba-nănăɣ, Massinăɣ d-Imili, Ɣisa Ălmasex tədarfit d’ălɣafiyăt. ⁴ Ǝggodăyăɣ Imili-nin hărkuk, kăttăɣ-kăwăn-du dăɣ-tittar-in, ⁵ gărrăwăɣ isălan n-immun-năwăn i-Imili Ɣisa d-tăra-ta təgăm i-iməzedəgăn kul. ⁶ Tattărăɣ i-ašəšɣăl n-immun-năwăn dăɣ-a-wa d-iqqălăn təmizdit n-igităn-nănăɣ kul wi olaɣnen dăɣ-Ălmasex. ⁷ Ǝkneɣ tidəwit hulen, tənsa ənniyăt-in daɣ făll-tăssăba n-tăra-năkk, făl-aes ašăkăɣ-in, təsənsăɣ ənniyaten n-iməzedəgăn. ⁸ kuddeɣ əleɣ ălxăqq dăɣ-Ălmasex n-a key səssugăɣ a-wa-key iwărăn, ⁹ măšen tansăyăɣ-key dăɣ-tăra , năkk, Băwlus, amɣăr , hulen za ămăra ad-əmoosăɣ ăw-kăsăw făll-tăssăba n-Ălmasex, Ɣisa: ¹⁰ əgmăyaɣ dăɣ-ăk, a d-iqqălăn ror-i Infa, wa ărowăɣ dăɣ-kăsăw , ¹¹ eskăla wăr d-ăk infa ărăt, mašen ămăra inf-ik, inf-i. ¹² Ǝsəglaɣ-ăk-in, ənta iman-nəs, imoos uwul-in, ¹³ ihor i-a-əṭṭəfăɣ ɣur-i i-ad-ilal, năkk a ihan tăkarmut făll-təssəba n-Elenžil. ¹⁴ Măšen wăr ăreɣ ad-ăgăɣ ărăt wălă turaget-năkk i-ad wăr iqqăl sărhăw-năkk tăhašəlt, a-t imoss a key d-ifalăn. ¹⁵ Iha miži , igmad-key i-ărăt n-ăzzamăn i-a key n-iqqăl harkuk, ¹⁶ i-ad-iba-s itaqqăl akli, măšen a ogărăn akli, umas ašăkăɣ iknan ătəwari hulen z’i, năkka, togăraɣ-i, key s-awen, dăɣ-as umas-ăk temḍt dăɣ-azni hakəd dăɣ-Imili. ¹⁷ kunta əleɣ udəm ɣur-k, năkk n-ănamalu-năkk ăɣbəl-t zund năkk iman-nin. Măšen kunta ig-ăkk a lăbasăn, ¹⁸ a imoos kul, meɣ tərwasăɣ-t ărăt iyyăn, suwur-i-t. ¹⁹ Ǝktăbăɣ s-afus-in, năkk iman-in: ad-ăkk əzəlaɣ. Wăr key əsəɣtăɣ as ərwasăɣ-key tumudre-năkk iman-nəs. Yay aŋ-i, ²⁰ ay-i tidəwit dăɣ-Imil, səns uwul-in dăɣĂlmasex. ²¹ Ǝflasăɣ i-ad-i təsigədăɣ, katăbăɣ-ăkk, əssanăɣ as a tăgăɣ a ogăran a-wa ənnăɣ. ²² A-wen dăɣ šədəw-i ehan n-amăggăru făl-as əgəraɣ ăttăma i-ad-əgrəwaɣ turagăt i-a key n-ăkkăɣ. ²³ Ihul-key Ebafras wa n-ănamalu-nin dăɣ-tăkarmut dăɣ-Ălmasex, Ɣisa. ²⁴ Ǝhulăn key daɣ inămulan-nin dăɣ-əšɣăl: Markus, Aristărkus, Demas d-Luka. ²⁵ Isənsa Imil, Ɣisa Ălmasex ărrăxmăt-nəs făll-ənniyăt-năkk.