¹ Ngha-ntiga ngor atuu nyanghor, iba jol mbeh Caesar Augustus ba tom ikor mbe mbor fala anne mba inenor ngha nfam. ² Ngha yor ijolor mgbogombarr ufala-anne mba ijolor ngor igara nti Quirinius jolor Igovernor ka Syria. ³ Nnor nnedegendege ba tom ngor ibugor je nogo aji kak mbeng ngor ufala-anne. ⁴ Joseph bangha ba tom ngor Galilee, ngor igboro ibugor Nazareth, ji ngo Judea, ji ngor igboro ibugor David, nji mbor jor kak ne Bethlehem, tep ne ajogo ngor itek fonor neh nnib David. ⁵ Aba ji nogo aji kak-mbeng ne mary, nyor abe kak nyor nogor akoeh fefene akpelor ula. ⁶ Ngha-ntiga, iba jol mbe na mbor jolor nghor, igara iba jol nti aba bele mmone. ⁷ Aba bel mmon nenom, mone nyor mgbogo-mbarrr, afenghe ba gba-ehngor ararab abomor, kum ba nonghe ngor igbenghe, tep ne nan mkpak itaba jolim ka bor nyor itek nji mbor jolo karr. ⁸ Ba gome-unyam ijolor nghor ijar idi nji nghor mba ijolor jol ngor idi-lege-unyam, jor gom igom-unyam bor ne tu. ⁹ Idengiri Aba ba teb ujibeh kabor fefene nkaga Ntol ba yar irana shebebor kag iba fele bor. . ¹⁰ Idengiri Ishor fonor ba bong ne bor, "Kawun kpe beh ubol, tep ne nan mbu kor inonob ikikala ba ka wun nji iba kogor igboro uyebitem ba ka wun anne waa. ¹¹ Ilela mbor bu bel nnogo-anne ka wun ngor igboro ibugor nji David! Christy Ada yor! ¹² Inyonor nji mbor ba wun kaga jii ngha: Aba nyene mmon-ibelenyor mbor beh kperr ngor ararab ajarr mbomor fenghe nonghe ngor igbenghe" ¹³ Mon igara-teke igboro igom-anne ngor iborr ijolor ngor idinjereng neh ba idengiri, ¹⁴ "Nkaga jol ka Ishor doll, fefene nogor tere ijol ngha ndege ne anne mba ijor koreh ¹⁵ Iba jol mbe igara nti Adengiri Ishor ibe fenghe to ngor ikun-iborr, ba gomgomoh iba bong neh atem, "Utom wun ngha-ntiga ngor ngor Bethlehem nogor uji nyen nti ibe gbor, nti Ntol be lem ka wurr ube kun." ¹⁶ Mbor ba kpide tom nghor, fenghe ji nyen Mary, Joseph neh mon-ibele weh nghor, nyor mbor nonghe ngor igbenghe. ¹⁷ Igara nti mbor beh nyen, iba rabe bor gara na mbor beh bong kabor gum mon fonor. ¹⁸ Anne waa mba iyogor na ba gomgomoh ibe bong ikor iba tan bor doll. ¹⁹ Mary kum yor tobor gom abodo nya a beh yok, fenghe tap koro ngor item. ²⁰ Ba gom gomoh iba fenghe kror, jor kak fenghe tik Ishor ngor ijom njindegendege nji mbor beh yok fenghe nyen, kredede nah mbor beh bong ka bor. ²¹ Igara nti ibe ri ngor ikukulor atu anigini, nji mbor be kem uri, mbor ba ka-eh mbeng ne Jesu, mbeng nyi ba rogitom Ishor ibe togo ka-eh nogor mbor kum fon ula beh. ²² Igara nti mfala atuu nyi mbor shebor nogor mbor joro-bor bom kpekpe ibe sheng, sheng ngor ibeneh nti Moseso kagor, mbor ba ko-e ba ngor itaba-ndor ngor Jerusalem nogor mbor ji fenghe nene ka Ntol. Na mbor yonor ngor ibeneh Ada ²³ "Nnenom nyor ndegendege nyor mbor ye gbor mbarr beleh, mbor yebeh bomo ijeje ka Ntol." ²⁴ Nghor mbor ba yala-nya sheng nghor na ibene Ntol ibonghor, "idogo ibal neh abon idugbenye abal." ²⁵ Ngor itembaga, nenom nwereng jolor ngor Jerusalem ngor mbeng ye jolor Simeon, nenom wengha jolor dedede ngor mbarr Ishor fenghe tama bom mbene yen shasha. Ajolor sheb nogor alem Isreal ifon uyebitem shengor imok bor fefene inonob ufu ijolor nene. ²⁶ Inonob ufu ibu ba rabe ka-ek mbeh anim ba nyene iku nogor akum nyen Ntol Christy. ²⁷ Simeon ba ngor itaba ndor na ufu itegeh. Igara nti nde ne nyen Jesu ibe kor ba, nogor mbor ba lem ka-eh sheng na ibene nti ijolor, ²⁸ aba tabe fele nghor abor ye fenghe tik Ishor, kum ba bong, ²⁹ "Ngha ntiga nogor nrogitom waa shong tere, Ntol, sheng ngor ilom ta. ³⁰ Amarr yere ibu nyen nogor ya, ³¹ nyi wor abe joro ngor ushamarr ane waa: ³² Irana ka nrebe ijol ka aneb Gentiles neh nkaga ka Isreal ane ba." ³³ Nde ne nnyen ikor itana bor na dol ngor abaga nya mbor bonghor gome. ³⁴ Simeon ba yege bor inya fenghe bong neh Mary nnyen, "Ngor itembaga mon wengha mbor beh yege ngor mgbogor neh ntumor yeme anne feb ngor Isreal fefene ne inyonor nji mbor beh ten. ³⁵ Kpe bodo nghor uge iba jumo ufu ba jok-inyor ntobor ngor item anne feb iba rabe tep gbol." ³⁶ Anna nyen amarr nyor nenkal jolor nghor. Ajolor mon Phanuel nyor jogor ngor ibugor Asher. Ajolor neh nyor atuu ye ibe raab. Abu nene kpor nda irimin ne nome nji ashabor neh, ³⁷ fenghe ba jol mkpogor nom ngor nda atel-ani-neh-nda ini. Atigim tom itaba ndor shaga atigi jor tama itom neh ubeme njaal fefene neh ndor neh tu neh ³⁸ njol. Nghor igara ntighor pii aba jen kulor bor ba kumikaga Ishor gafor, fenghe kumi bong gom mon fonor ka nendegendege nyormeh sheeg nogor nyi Jerusalem. ³⁹ Igara nti mbor beh maal ijom njindegendege nji mbor shebor nogor mbor lem sheng ngor ibene nti Ntol, mbor ba fenghe tom ngor Galilee, ngor nji bor ibugor Nazareth. ⁴⁰ Mon fonor ba fu fenghe fon atunor, fu frefre neh ukonor-abaga, fefene igaracia Ishor ijolor nene. ⁴¹ Nde neh nyen ijor ji ngor Jerusalem fel ira ngor ikak Passover. ⁴² Igara nti abe karr nda igol-neh-ibal, mbor kpe fenghe tom ngor ikak sheng ngor igara ibene. ⁴³ Ngor igara nti mbor beh karr atuu waa mal nghor ikakfonor, mbor ba kum ifenghe kuro ngor itek. Ngha Jeus. ba shaga ngor njanngor Jerusalem nde neh nnyen ikonom gara. ⁴⁴ Mbor ba tobor mbe ari neh anne mba mbor mehkuro ijen nor, tep nor mbor tom njen ufumfu mbereng. Nghor mbor ba kume shebe jijor ngor idi ba mgba nyen neh atembe. ⁴⁵ Nji mbor ka nyene, mbor ba fenghe tom ngor Jerusalem kpe jor ji janghe gor. ⁴⁶ Ikum ba jol mbe atu ara ibe sheng mbor ji nyene ngor ating itaba-ndor, a bemor ngor iteng-tenghe ba-kpelemkpele, meh rangha-atong fenghe jor bab-bor ababe. ⁴⁷ Anne waa mba iyoge itan bor ikor dool ngor nyogo fenghe renge neh mfangha ye. ⁴⁸ Igara nti mbor nyene, ikor iba tan bor. Nnyen ba bong nene, "monama, nan abe wurr nog na? Breya mme ne nshua ukpila jangha neh ukono-nterr waa." ⁴⁹ Aba bong ne bor, "Nan iwedor wun meme jang? Wun nyim mbe mme mkpi ⁵⁰ leme ifangha Nshuwama?" Ngha irabem bor bah alom nyanghor ijugor. ⁵¹ Aba fenghe tom ngor itek neh bor ngor Nazareth fenghe fon nkaga ka bor. Nyen kpolo abaga nyangha waa koro ngor item te. ⁵² Ngha Jesu jor ba fu ngor ukun abaga neh ngor ngobji, fenghe jor fu tom mbok-mbok ukaga-ubor Ishor ne anne.