¹ ನಾ ಕೊಡ್ಕ ನುವ ಯೇಸು ಕಿಸ್ಥ ಲ ಹುಂಡ ಕೃಪೆಲ ಬಲಂಗಹುಂಡು. ² ಅನೇಕ ಶಕ್ಸಿಲ ಮುಂದ್ರ ನುವ ನನ್ನಿಕ ಇನಿದನ್ನೆಲ ಕೆಲವಲ್ಕಿ ಸೋಪ್ಪ ಶಕ್ತರೈನ ನಂಬಿಗಸ್ಥ ಮನುಸ್ಯಲ್ಕಿ ಒಪಿಂಚು. ³ ದಾನ್ನಿಕ ನುವ ಯೇಸು ಕಿಸ್ಥಡ ಮಂಚಿ ಸೈನಿಕಲ ಶ್ರಮೆನಿ ಅನುಬವಿಂಚು. ⁴ ಯುದ್ಧಕಿ ಪೋಳೋಡು ಈ ಜೀವನಲ ವ್ಯವಹಾರಲಕಿ ಸಿಕ್ಕಿಕುಂಡ ವಾಡ್ನೆ ಸೈನಿಕಡುಅಹಿ ಅರ್ಪ್ಕೊಂದ್ನಿ ಮೆಚಿಂಚದಂಕಿ ಪ್ರಯಾಸಪದ್ಥಡು. ⁵ ಕಕುಂಡ ಯೋಡಹಿನ ಪೋರದಪುಡು ನಿಯಮ ಪ್ರಕರಂಗ ಪೋರಡಪೋತೆ ವಡ್ಕಿ ಕಿರಿಟಂ ಸಿಕಲೆದು. ⁶ ಕಸ್ಟಂ ಪಡೆ ಕುಲಿಯೋಡು ಫಲಲ ಮೊದಲಂಗ ಪಲುಗರಅಹಿಂತಡು. ⁷ ನೀನು ಸೋಪದನಿ ಯೋಚಿಂಚು ಕರ್ಥಡು ಅನಿದನ್ತ್ಲ ನಿಕಿ ವಿವೇಕನಿ ದಯಪಲಿಂಚು. ⁸ ನಾ ಸುವಾರ್ತೆ ಅನುಸರಂಗ ದಾವಿದಡ ವಂಶಮಹಿನ ಯೇಸು ಕಿಸ್ಥಡು ಸಚಿನೋಲ್ನಿಕ ಲೆಸಿನಾಡು ಅನಿ ಜ್ಞಾಪಕಂಚೆಸ್ಕೋ. ⁹ ದಿನ್ತ್ಲ ನಾನು ಕಸ್ಟಂಅನುಬವಿಂಚಿ ದುಸ್ತಡ್ಲ ಬಂದನಂನಿನ್ಕ ಕಟಲ್ಪತ್ನನು ಕಾನಿ ದೆವುಡು ವಕ್ಯಂಕಿ ಬಂದನoಲೇದು. ¹⁰ ದಾನ್ನಿಕ ದೇವುಡು ಅರ್ಪ್ಕೊನೋಲ್ನಿ ಕೂಡ ಕಿಸ್ಥಯೇಸುಲಹುಂಡ ರಕ್ಷಣೆನಿ ನಿತ್ಯ ಪ್ರಬಾವ ಸಹಿಥಂಗ ಪೊಂದ್ಕೊಲಅನಿ ನೇನು ವಲ್ಕೊಸಂ ಅನಿನಿ ತಲ್ಕೊಂಟನು. ¹¹ ಇದಿ ನಂಬದಿಅಹಿಂದಿ, ಏಮಂಟೆ--ಮನ್ಮು ದೇಹುಡ್ಲ ಸಚುಂಟೆ ದೆಹುಡ್ಲ ಮನ್ಮು ಜೀವಿಸ್ಥಮು. ¹² ಮನ್ಮು ಬಾದ ಪಡೋಲೋಅಹಿಂಟೆ ವಡ್ಲ ಮನ್ಮು ಕೂಡ ಅಳತಾಮು; ವಡ್ನಿ ತಪ್ಪು ಗೆಲ್ಸ್ಥೆ ಮಮಲ್ನಿ ಕೂಡ ತಪ್ಪುಗೆಲ್ಸ್ಥಡು. ¹³ ಮನ್ಮು ಅಪನಂಬಿಕೆ ಅಹಿದೊಲಿಥೆ ವಡು ನಂಬಿಗಸ್ಥಂಗ ಹುಂಟಡು, ವಡು ವಡ್ನೆ ತಪ್ಪಿಗಿ ಲೆಲ್ಸ್ಕೊಳೆದು. ¹⁴ ಈ ವಿಸಮ್ಲ ವಾಲ್ ಜ್ಞಾಪಕಂಕಿ ತಿಸ್ಕೊವಲ. ಇನೋಲ್ಕಿ ಕೇಡುಹುಂಟು ಸೆಯದೇ ಕನಿ ಯಾವ ಪ್ರಯೋಜನಮು ಲೇಕುಂಡ ವಗ್ದನಲ್ನಿ ಸೈಕುಡ್ದುಅನಿ ವಲ್ಕಿ ಕರ್ಥಡ್ ಮುಂದ್ರ ಖಂಡಿತಂಗ ಸೋಪ್ಪು. ¹⁵ ನುವ ದೆಹುಡ್ಕಿ ಯೋಗ್ಯದೈಹಿ ಕಂಪಿಂಚದಂಕಿ ಅಭಯ್ಸಿಂಚ್ಕೋ, ಅವಮಾನಂಕಿ ಗುರಿಕಕುಂಡ ಪನಿವಡು ಮನ್ಚಿದನಿ ಸರಿಯಂಗ ಅನುಸರಿಂಚೋಡು ಐಯುನ್ದು. ¹⁶ ಕನಿ ಅಶುದ್ದ ಮಹಿನ ಪನಿ ಲೆಕುಂಡ ಮತಲ್ನಿ ನಿರಕರಿಂಚು. ಅವ್ತಲ್ನಿಂಕ ಹೆಚಚಂಗ ಭಕ್ತಿ ಹುನ್ತಹಿತದಿ. ¹⁷ ವಾಲ್ ಮತ್ಳು ವ್ಯಾದಿನಿ ತಿನ್ಟದಿ; ವಲ್ಲ ಹುಮೇನಾಯಾಡು ಪಿಲೇ ತ ಡು ಹುಂಟಳು. ¹⁸ ವಾಲು ಪುನರುತ್ಥಾನಮು ಅಪ್ಪುದೇ ಅಹಿ ಪೋಹಿಂಡಿ ಸೋಪ್ಥ ಸತ್ಯ ಬ್ರಸ್ಟ್ಲಾಹಿ ಕೆಲವಳು ನಮ್ಬಿಕೆನಿ ಸೇದ್ಪೋಳಹಿನಲು. ¹⁹ ,ಕನಿ ದೆಹುದ ಅಸ್ಥಿವರಮು ಖಂಡಿತಂಗ ನಿಲ್ಚಕಂಟಡಿ ದನ್ ಪೈನ ಮನ್ನೋಲು ಯಾರು ಅನಿ ಕರ್ತಡಕಿ ಗೊಥಹಿಂದಿಅನಿ ಅಮಿಂಕ ಕಿಸ್ಥಡ ನಾಮಾನಿ ಸೋಪ್ನೋಲ್ ಅಂದರ್ಕಿ ದುಸ್ಥ ತನಮ್ನಿಂಕ ಹುಡಲಅನಿ ಮುದ್ರೆ ಹುಂದಿ. ²⁰ .ಪೆದ್ದ ಇನ್ಟ್ಲ ಬೆಳ್ಳಿ ಬಂಗಾರಮು ಪತರ್ಲುಕಕುಂಡ ಮನ್ ಪತರ್ಲು ಮನ್ ಪತರ್ಲು ಹುಂಟಹಿ ಕೊಂಚಮು ಗೌರವಂಕಿ ಕೊಂಚಮು ಅಗೌರವನ್ಕಿ ಹುಂಟಹಿ. ²¹ ,ಒಕ್ಕಡು ವಡ್ನೆ ಇವಟಲ್ನಿಂಕ ಶುದ್ದಪದಿಂನ್ಚಿಕೊನ್ಟೆ ವಡು ಪ್ರತಿಷ್ಟಡು ಯಾಜಮಾನಡ ಬಲಿಕಿ ಯೋಗ್ಯತೆ ಮಂಚಿ ಕರ್ಯಂಕಿ ಸಿದ್ದಂಗ ಹುಂಡಿ ಗೌರವಂಕಿ ಪಾತ್ರಅಹಿಹುಂಡು. ²² ಯೋವ್ವನದ ಇಛೆ ನಿನ್ಕ ಕೂಡ ಪರಿಪೋ ಶುದ್ದo ಹೃದಯo ಹುಂದೋ ಲಾಹಿ ಕರ್ಥಡ್ನಿ ಅಡಿಕೊನೋಲ್ ಕೂಡ ನೀತಿ ವಿಸ್ವಸಂಗ ಪ್ರೀತಿ ಸಮಾದಾನನಿ ಅನುಸರಿಂಚು. ²³ ಮೂಢಲ ಭುದ್ದಿ ಲೆಕುಂಡ ವಿಸಯಲು ಜಗಳಕಿ ಕರಣಅಹಿತದಿ ಅನಿ ತಿಳ್ಚೋಕನಿ ಅವಲ್ಕಿ ಗೊಡವಂಕಿ ಪೋವದು. ²⁴ ಕರ್ತಡ ಸೇವಕಡು ಜಗಳಂ ಸೆಯ್ಕುಂಡ ಅನಿ ವಿಸಯಮ್ಲ ಸಾಧುಲ ಬೋದಿಂಚದಂತ್ಲ ಪ್ರವೀಣಡು ಮಂಚಿವಡು ಅಹಿಡಲ. ²⁵ ಎದುರಿನ್ಚೆವಲ್ನಿ ಮಂಚಿತನಂ ನಿನ್ಕ ತಿದ್ದೊಳು ಅಹಿಂಡಲ ಒಕ್ಕ ವೆಲ ದೇವುಡು ಅ ಎದುರಿನ್ಚೆವಲ ಪಶ್ಚಾತಾಪಅಮಾಹಿ ಸತ್ಯಂ ತಿಳುವಲಿಕೆನಿ ಇಚಡು. ²⁶ ಸೈತಾನಡ ಉರ್ಲಿಕಿ ಪೋಡಿ ವಡ ಇಸ್ತಮ್ನಿಂಕ ಸೆರೆ ಪೋಅಹಿಂದೊಳಹಿನ ವಿಲ್ಲು ಒಕ್ಕವೆಲ ಎಚ್ಚೆತ್ತಾಳು.