¹ Obhu Yesu atuwagha munumba ya Luhanga, omui wa bhakwamilili bhe namughila ati: Mweghesa, olole amabhale, olole obhukweli! ² Yesu namukukamu ati: obhone obhukweli obhu talikutighaloo, ebhale eguli y'ebhale elitakulaghala ansi. ³ Asitama amwena ghwa bhigbutu ( Oliviers) mumaso gha numba ya Luhanga (Temple). Peetelo, Yakobo, Yohana na Andeleiya bhamubhuliya omunsita: ⁴ otughambile, ebhintu ebhi bhilibhoo bhusumi kii, na nkikii kyokuloleloho kutwoleka nguku ebhintu ebhi bhilibho? ⁵ Yesu nabhakukamu naghila ati: mwelinde muntu atabhadima. ⁶ Nanga bhanji bhaliisa mulina lyanje mbaghila bhati; nisiy'oni. Naa bhalibhuliya bhantu bhakaniye. ⁷ Obhu mulighuwa mbakumiya malemo, keda makulu gha malemo, muteyuunga, nanga ebhintu bhini bhibonganuwe kubhoo. Noo, ekubha etakabhay'empelo. ⁸ Ehanga lililwana n'ehanga, bhukama bhulilwana na bhukama bhunji; bhinamudingiya bhilihula bhikalo bhitali bhimui, alibhoo njala. Ebhi bhyona bhilibha ntandiko yo bhusaliji. ⁹ Mwelinde, mulitwaluwa mukooti na mulisonguwa bhisanju mumakelejiya (Synagogues); mulitongana mumaso gha bhagavana na mumaso gha bhakama habhwanje, nkibhayamba nga bhukaiso. ¹⁰ Kibonganuwe dani enjili elanguwe mumahanga ghoona. ¹¹ Obhu bhalibha mbabhahemba, mutalugh'eli mweyungiye habhwebhi mukubhugha, noo, mubhughe ebhi mukubha muhebhewe ali nahonaho; nanga talinuwe mulibha mmubhugha noo omoyo alikwela. ¹² Muntu alihemba wanina wee kumuita na mubhyaye alihemba mana wee, nabhana bhalyegaliliya bhabhyaye bhabho na kubhata. ¹³ Enuwe bhana mukwohebhuwa, abhwe lina lyanje, kyonkaha oghu aligumisilija kuhikiya aampiko alijunuwa. ¹⁴ Obhumulibhona ekintu kibii, n'eki Luhanga ohiye kiimiliye nambali kitabonganuwe, oghu akwete kusoma kini kighambo, eelinde, abhalibha bhali e Yudaya bhalukiye omu myena; ¹⁵ oghu alibha ali alusui atalisunduka kutah'omunumba kuyamu kantu; ¹⁶ n'oghu alibha ali mumusili atalikuka kwendela lughoye luwee. ¹⁷ Abhakali bhakuliye n'abhakwonkiya bhalibhonabhona omubhilo ebhi! ¹⁸ Musabhe nikuwo ebhintu ebhi bhitakida mumbula. ¹⁹ Nanga omubhilo ebhi, bhantu bhalibhonabhona munu kusaliya kuhila Luhanga ahumbiye nsi kuhikiya endindi, n'okutalibhoo. ²⁰ Na, nguli Mukama atakeheye ebhilo bhya kubhonabhona, muntu n'omui tangujunuwe; noo abhididiya, abhwabhakomewe mu. ²¹ Obhwel'obhu muntu nakughili ati: " Kilisto ali hani", keda: "ali hali", otamuhikilija. ²² Nanga obhwel'obhu bha Kilisto na bhalangi bhabhisuba bhalimuka; na bhalikola bhya kuswekaniya nikuwo bhahabhiye bhantu bha Luhanga, kikakubha kigubukane. ²³ Nabhweki mwelinde, nalughiy'eli mbaghambiye. ²⁴ Noo omubhini bhilo, anuma ya kubhonabhona, musana ghulilima, kweli takulyeleleliya. ²⁵ Nsoliya siliegenga kulugha eghulu, kintu kyona ekili eghulu kili dingadinga. ²⁶ Dumbi tulibhona mana wa Luhanga nasilaa eghulu na bhutoki na kitinisa kikaniye. ²⁷ Nibhuo atuma bha malaika, na akumaniya abha komeuwe o'mu nsondo enaa, ampwelo ye taka kuika ampwelo ye ghulu. ²⁸ Mweyeghesiye, naku susania nagha nge kiti. Bhwele o'bhu emitayi yomiye, ne bhisingo mbia sasiliye, mukukengagha kilogholi kili hayi. ²⁹ Nakandi, o'bhu mulibhona bhintu bhini mbikida, mukenge o'mwana wo'muntu ali hayi no mulingo. ³⁰ Mbaghambiye mumajima, ghuni mujo ta ghulisala, bhini bhiona bhita kakidile. ³¹ Eghulu nee taka bhilisala noo bhighambo bhianje tabhilisala na kilo. ³² Abhili bhye kilo keda ne saha, na muntu ta kengiye, na bha malaika bheghulu, n'omwana, noo tita enkaa. ³³ Mwee linde, mulale mwoondo na musabhe; nanga tamumaniye o'bhwele hali silamu. ³⁴ Alibha ngo muntu o'ghu, aghendiye mulubhungho, atighiye nuumba, atighiye bhakoli, abholikiye milimo abhuli kyona, ³⁵ mwetekaniye kwesi, nanga tamumaniye o'bhwele alikukilamu mukama w'eeka, keda luagholo, keda agati kye kilo, ³⁶ nkoko ne koka, keda kisankiya, mwobhahe atali kudulana o'ghwesaghiye, a kukuda kuwe. ³⁷ Ebhi nkughambiye, mbaghambiye enuwe bhona: mwetekaniye.