¹ Yesu atandika kubhugha nabho munsimo. Muntu omui akahela musili ghwa bhighuma. Akitilila na lugho, alima kina kyakukamilamu bhighuma, na akwela ngbali ekangamiye; atamu bhakoli, dumbi abhunga. ² Abhwele bhwa kuhulula, atuma mukwenda omubhakoli, nikuwo atunge omubhakoili ebhighuma bhyebhiti. ³ Bhamukwata, bhamuhula, na bhamutwesiya enja atali nakantu. ⁴ Atoda abhatumila mukwenda onji; noghu bhamuhutaliya mumutuwe, na bhamughaya. ⁵ Atoda atuma wakasatu, oghu bhamuita; nabhanji bhakaniye, bhabhahula na bhabhata. ⁶ Akabha ali n'onji mwana mukundibhuwa; amutulilabho w'okumalilila, naghila ati: bhakubha na kitinisa amu tabhani wanje. ⁷ Kyonkaha abhakoli bhabhulaniya bhati: oghu niye mugwetuwa, mwise, tumuite, n'obhugwetuwa bhubhe bhwatu. ⁸ Na bhamukwata, bhamuita, na bhamukubha enja y'omusili ghwe bhighume bhya mujabibu. ⁹ Ala mukama w'omusili ghwa bhighuma bhya mujabibu akukola bhiki? Akwisa, nawelekeleliya abhalimi, n'oghu musili ghwa bhighuma akughuha bhanji. ¹⁰ Tamukasomagha kihandiko kini ekighili kiti: Ebhale eli bhabengagha abhakweli likabha mutuwe ghwa mabhale ghona. ¹¹ Ekighambo kini kilughiye ewa Mukama, nikyakuswekaniya ewatu? ¹² Bhabala kumukwata, noo bhobhaha lutelano. Bhakakikenga bhati akabhugha lusimo olu abhwabho. Na bhamuleka, na bhaghenda. ¹³ Bhakasindika hali Yesu bhamui bhafalisayo na bha Helode, kumubalo ebhugha lya kumuhangilila. ¹⁴ Bhakasa kumubhuliya: Mweghesa, tumaniye n'goku oli wamajima na tuli na bhwobha hali muntu; tomaniye o'kusemela kw'omuntu, na okutebhejagha majima. Kihikiye kida baha kusaaula musolo ghwa Kaisali? Tughusasule kida baha? ¹⁵ Yesu, akenga bhughobhiya bhwabho, abhakukamu: Abhwaki mundenga? Mundetele mukwenge ghumui, nanje ngulole. ¹⁶ Bhamuletela ghumui: Yesu abhabhuliya: Kini n'kisasani kyani ne kihandiko? Bhamukukamu: Kya Kaisali. ¹⁷ Dumbi abhaghila ati: Musasule bya Kaisali ebhili bhya Kaisali, n' ebhya Luhanga ebhili bhya Luhanga. Dumbi bhona bhasweka. ¹⁸ Bhasadukayo, abhaghilagha ngu taliyo kumbuka, bhasa hali Yesu, kumubhuliya: ¹⁹ Mweghesa, ulole ebhi Musa ahandikie: manu wanina muntu na kuye, atigha mukwisiya, atabhyaye bhana, owaninawe onjilila o'mu kwisiya, amubhyalo lubhyalo o'lwa manu wa ninawe. ²⁰ kundi, a'kabhaliyo abholughanda musanju. wokubhanja aswela, nakuwa atabhiyayo mwana, ²¹ owakabhili naye amwonjilila naye akuwa atabhyayo mwana, na nkwana kuwo hali wakasatu, ²² nataliyo omubhona musanju wakamwiyo mughaso a'mukalioni. Kukahuwo bhona omukali nakuwa naye. ²³ o'bhwele bhwo kuhumbuka, naani akatikabho alibha nini omukali aghu? Nanga bhona musanju bhakamusweloho. ²⁴ yesu abhakukamu: tamuli omubhisobhi, nanga tamukukengagha n'ebhihandiko, no kaba no bhutoki bhwa Luhanga? ²⁵ Nanga, akuhumbuka kwa bhakuye, bhasasa tabhaliswela bhakali, kida abhakali kusweluwa, bhona bhalibha nga bhamalaika omweghulu. ²⁶ Ebhikwatano no kuhumbuka kwa bhakuye, tamukasomagha, omu kitabho kya Musa, na ngoku Luhanga amughiliye; omukati kakisaka ekyakiemu mulilo: Naghamba ati; siye ndi Luhanga wa Ibulahimu, Luhanga wa Isaka, na Luhanga wa Yakobo? ²⁷ Luhanha tali Luhanga wa bhakuye, noo wabho miye. Museliye omibhisuba. ²⁸ Omui wa bhebhilaghilo, oghu akaghuwa mbanahakangana, anamaniye ngoku Yesu akukiyemu kulungi abha Sadukayo, esukana, namubhuliya, mubhilaghilo bhyona, ekisahiiyo n'ekyaha? ²⁹ Yesu akukamu ati: mughuwe, Isaleli, Mukama Luhanga watu niiye Luhanga enka. ³⁰ Na, okunde Mukama Luhanga wawe, n'omutima ghwawe ghwona, n'omoyo ghwawe, nebhyelilikane na maani ghona. ³¹ Nakini n'ekyakabhili: Okunde mwanakyawe ngawe wenini. Takiliyo kilaghilo kisaye ebhi. ³² Owe kilaghilo abhaghila ati: kusemeye, Mweghesa, wabhughiy'amajima ngu Luhanga omui enka, na taliyo onji. ³³ Okukunda n'omutima ghwawe ghwona, n'ebhyelilikane bhyawe bhyona, n'omwoyo ghwawe ghwona, n'amani ghawe ghona, n'okukunda mwanakyawe ngawe wenini kisahiye ebhihonguwa n'ebhibhembo bhyona. ³⁴ Yesu, abhu abhone ngoku amukukiliye na magheji, amughila ati olihai n'obhukama bhwa Luhanga. Na muntu tatodiye kumubhuliya. ³⁵ Yesu, atida kughenda kweghesiya, aghila ati: nkiki kikulekagha abhebhilaghilo bhaghila ngu Kilisto ni mana wa Daudi? ³⁶ Daudi enkaa, ali n'omoyo ghuikiliye, aghila ati: Mukama akaghambila mukama at: ositame omughuliyo, kuhikiya ngighu syawe sidotiye. ³⁷ Daudi enini amukumiyamu Mukama, oghu ni mana wee atiya? Na bhantu bhamutegheleliya kulungi munu. ³⁸ Abhaghambila omunjeghesiya ye ati: mwelinde abhebhilaghilo, abhabaliye kubhugha bhalwete nkanji, ba kubala kubhamukiya na bhantu bhona. ³⁹ Abhakubala bhikalo ebhiikiye munkanisa, n'entebhe ssikiye mumaghenu. ⁴⁰ Abhakuhenda manumba gha bhakwisiya na bhakusaabha saala sijambiye. Bhakubhachwela musango ghu sakaye. ⁴¹ Yesu, asitama haihai n'ekighegha, akala aloliye ngoku abhantu bhakutamu ebhisembo. Bhaguda bhakaniye bhatamu sete sikaniye. ⁴² Aasa mukwisiya, atamu bhikwenge bhibhili. ⁴³ Nikuwo Yesu abhilikiye abhakwenda bhe, abhaghila ati: nabhaghambila amajima, omukwisiya ahayeyo esisahiye syona esi bhaletiye. ⁴⁴ Nanga bhona bhatayeyo esi bhasaghiliye, eye aletiye syona esi abhagha nasiyo, esingumukoneye.