¹ Obhubhagha bhabhelewe kukida Yelusalemu, na bhabhelewe kukida hai na "Bethphage" hamui na Betaniya, hai na mwena ghwa Oliva, Yesu atuma bheghesebhuwa bhe bhabhili, ² abhaghambila ati: mughende mumubili oghuli mumaiso ghanu; n'obhu mukutahamu, mukudula nkaina ebhoiye, aghi muntu n'omui atakaninaghoo; mughisambule, na mughelete. ³ Muntu nabhaghili ati: abhwaki mukwetwe kukole ebhi? mukukemu muti: Mukama aghibaliye. Na dumbi akughikukiya hani. ⁴ Obhu abhaghesebhuwa, bhaghendiye, mbadunlana nkaina ebhoiye enja hai n'omulyango, akpengbu y'ekihanda, dumbi mbaghisambula. ⁵ Bhantu bhamui bhamui abhabhagha ala bhabhaghila bhati: nibhu mwakokala kii? abhwaki mmusambula enkaina eghi? ⁶ Bhakukamu ngoku Yesu abhaghambiye. Na bhabhaleka bhaghende. ⁷ Mbaletela Yesu enkaina, eghi bhatayo njungu syabho, na Yesu aghisitama eghulu. ⁸ Bhantu bhakaniye bhaala njungu syabho mukihanda, na bhanji bhitahi ebhibhajombagha mumisili. ⁹ Abhali bhahikiye n'abhali bhali enuma ya Yesu bhatakanganagha bhati: Hosanna! Ahebhuwe mugisa oghu asiye omulina lya Mukama! ¹⁰ Owo mugisa akwisa mubhukama bhwa Daudi, ese tuwe! Hosanna mubhikalo bhye ghulu. ¹¹ Yesu ataha omu Yelusalemu, omu nkanisa. Obhu aloliye bhintu bhyona, ngoku bhili, obhu abhone bhwele bhumutighiye, naaghenda e Betaniya na bheghesebhuwa bhee ekumi na bhabhili. ¹² Munkiya yakiyo, naalughiye Betaniya, Yesu aghuwa njala. ¹³ Akabhonela aseliye kitii ekyabhagha na mabhabhi, aghenda kukilola kilakabha kilimu kantu; na, akyebhinga, asanganamu bhibhabhi bhyonka, nanga tabhwabhagha bhwele bhwakiyo bhwakwana. ¹⁴ Amakwata ebhugha, aghila ati: taliyo oghu alitoda kuliyamuni kighuma! Na bheghesebhuwa bhe bhaghuwa. ¹⁵ Bhakida e Yelusalemu, na Yesu na taha mwelamiliyo. Atandika kuhuma abhaghuliyagha n'abhaghulagha omwelamiliyo; agenga meja sya bhahingi bh'esimbi, na bhikalo bhya bhaghuliya bha bhu piso; ¹⁶ na tasimilaniye na muntu kuheka kantu nakamui kulagh'omwelamiliyo. ¹⁷ Na egheseyagha na ghila ati: takyahandikiwe kiti: numba yanje elibhilikibhuwa nymba numba ya ehanga lyona kusabhila mu? Noo enuwe, mwaghifoye kika kya bhasuma. ¹⁸ Bhabhembi bhakulu na bhahandiki, bhakamughuye, bhabala bhihanda bhya kumuwelekeleliya; na bhakali bhamwobhaiye, nanga kibula kyona kikalikisimeya njeghesiya yee esemeye. ¹⁹ Obhu lwagholo lwahikiye, Yesu alugha omukibhugha. ²⁰ Kisankiya, mbasala, abheghesebhuwa bhe bhabhona kitii kyomiyee kuikiya omumili. ²¹ Peetelo, asuka ebhyasaye, aghila Yesu ati: Labi, olole, ekitii ekiwalamiye kyomiye. ²² Yesu akwata ebhugha, abhaghila ati: mubhe nanikilija mu Luhanga. ²³ Nabhaghambila omumajima, muntu nabhughiye na mwena ati: olughe ala na wekubhe mu nanja, n'atadidimagiye mumutima ghuwe, noo asime ngu eki abhughiye kyakidiye, alibhona ngoku kyasulisibhuwe. ²⁴ Ni abhweki nabhaghila nti: kyona eki mukusabha omusala, musime ngoku mwakitungiye, na mukubhona kikiolekane. ²⁵ Na, mmwabhaye mumuliye mmusabha, mmubhaye na kintu kibii hali muntu, mughanile, nikuwo ese wanu oghu ali mweghulu naye abhaghanile bhibii bhyanu. ²⁶ Noo mutaghaniye, es'enuwe oghu ali mweghulu talibhaghanila na kabii bhibii bhyanu. ²⁷ Bhakuka e Yelusalemu, na, bhwel'obhu Yesu ebhungabhungiyagha omw'elamiliyo, abhabhembi bhakulu, abhahandiki na bhajei, bhasa ewe, ²⁸ na bhamughila bhati: abhutoki kii okwete kukola ebhi bhintu, na niani akuhaye bhutoki bhwa kubhikola? ²⁹ Yesu abhakukamu ati: nanje nkubhabhuliya; munkukemu, na nkubhaghambila abhutoki ki nkukolagha bhintu bhini. ³⁰ Lubatijo lwa Yoyana lukalugha omweghulu, keda mu bhantu? Munkukemu. ³¹ Dumbi bhelilikana omukati kabho: ntwakukimu tuti: omweghulu, akughila ati: abhwaki mutamuhikilije? ³² Na ntwakukimu tuti: omubhantu... Bhakalibhobhaiye bhantu, nanga bhona bhakali bhakwete Yohana nga Mulangi. ³³ Dumbi bhakukamu Yesu bhati: titumaniye. Na Yesu abhaghila ati: Nanje baa, tankubhaghambila na bhutoki ki nakoliye ebhintu ebhi.