इफिसियों 6
1
हे शोहरूओ, प्रभू दी बणां आपणैं आम्मां बाप्पूए आज्ञाकारी, किल्हैकि इहय करनअ ई आसा ठीक।
2
आपणैं आम्मां बाप्पूओ आदर कर (अह आसा पैहली आज्ञा, ज़सा संघै प्रतिज्ञा बी आसा)।
3
कि तेरअ भलअ होए, और तूह धरती दी खास्सै धैळै जिंऊंदअ रहे।
4
और हे शोहरु माठै आळैओ, आपणैं शोहरू लै निं रिस आणा, पर प्रभूए शिक्षा और चतैनगी दैंदी करा तिंनो पाळण-पोषण।
5
हे दासो, ज़ुंण लोग शरीरे साबै थारै मालक आसा, सिधे मनैं रहा डरदी-कांबदी ज़ेही तम्हैं मसीहे आज्ञा मना, तेही मना तिन्नें बी।
6
और मांह्णू रहैऊणा लै खुश करनै ज़ेही सेऊआ निं करनीं, पर मसीहे पबित्र दासा ज़िहअ च़लणअ परमेश्वरे इछा दी।
7
और तेसा सेऊआ निं मांह्णूएं सेऊआ समझ़ा, पर प्रभूए सेऊआ समझ़ी करै करा आपणीं इछा संघै।
8
किल्हैकि तम्हां का आसा थोघ कि, ज़ुंण बी शोभलअ काम करे, च़ाहे सह दास होए, च़ाहे सह गुलाम होए, तेऊ भेटणअ प्रभू का तिहअई।
9
और हे मालकओ, तम्हैं बी करा धमकी दैणीं छ़ाडी करै तिन्नां संघै तिहअ ई बभार, किल्हैकि तम्हां का बी आसा थोघ कि तिंनो और थारअ आसा दुहीओ मालक स्वर्गै। और सह निं कोहिओ पक्ष लंदअ।
10
हे भाईयो, प्रभू दी और तेऊए शक्ति दी बणां बलबंत।
11
परमेश्वरे सारै अस्त्र-शस्त्र कशा, ताकि तम्हैं शैतानें च़ाला सह्मनैं खळै रही सके।
12
किल्हैकि म्हारअ अह मल्लजुध निं लोहू और मासा संघै आथी, पर म्हारअ मल्लजुध आसा प्रधाना, अधिकारी और एऊ संसारे अंधकारे मुखियां संघै, और बूराईए आत्मिक सैना संघै ज़ुंण सरगै आसा।
13
तैहीता परमेश्वरे सारै हथिआर कशा, ताकि तम्हैं बूरै धैळै बी सह्मनअ करी सके, और सोभै गल्ला पूरी करी करै स्थिर रही सके।
14
ता इहय करै सच्च़ाई करै आपणीं कमर कशीकरै, धार्मिकते झिलम बाह्नी करै,
15
खूरा दी मेल मलापे सुसमाच़ारे त्यारीए बूट बाह्नी करै,
16
और इंना सोभी संघै रहा विश्वासे ढाल ल्ई करै स्थिर, ज़ेता करै तम्हैं दुष्टे ज़ळदै-ज़ळदै तीर शेऊई सके।
17
और उध्दारो टोप, और आत्में तलबार, ज़ुंण परमेश्वरो बच़न आसा, तेता ल्आ हाथै।
18
ता, हर बगत और हर प्रकारै रहा प्राथणां, बिनती करदै लागी, और एताई लै रहा ज़ागदै कि सोभी पबित्र लोगा लै रहा लागातार प्राथणांं बिनती करदै लागी।
19
और मुल्है बी रहा प्राथणांं करदै लागी कि, ज़ेभै हूँ बोले, प्रभू मुल्है इहय प्रबल बच़न दैए कि हूँ बडी हिम्मता संघै सुसमाच़ारो भेद खोज़ी सकूँ, ज़सरी तैणीं हूँ शांघळी लोहै दी कशअ द राज्यदूत आसा।
20
इहय बीे कि ज़िहअ मूँह तेऊए बारै बोळणअ च़ाहिए तिहअ ई बडै हियाबा संघै बोलूँ।
21
और तुखिकुस, ज़ुंण प्रिय भाई और प्रभू दी विश्वासयोग्य सेबक आसा, तेऊ खोज़णीं तम्हां का सोभै गल्ला, कि तम्हां का बी मेरी दशा पतअ च़ले कि हूँ किहअ आसा लागअ द रहंदअ।
22
सह भेज़अ मंऐं तम्हां सेटा लै तै कि, तम्हां का मेरै हाल च़ालो थोघ लागे, और सह थारै मना लै शांती दैए।
23
परमेश्वर पिता और प्रभू यीशू मसीहे तरफा का लोळी सोभी भाई लै शांती और विश्वासा संघै प्यार भेटअ।
24
ज़ुंण म्हारै प्रभू यीशू मसीह संघै सच्च़अ प्रेंम करा, तिन्नां सोभी लै रहे अनुग्रह हंदअ लागी।