6
1
हे बचाव, प्रभु मां अपने अम्मा बाजी केरो हुकम मन्ना, किजोकी इन जैइजे|
2
अपने अम्मा ते बाजी केरी आदर केर (ई पेहिलो हुकमे, ज़ैस सैहीं साथी वाइदे भी आन)
3
कि तेरू भलू भोए, ते तू धेरतली पुड़ बड़े दिहाड़े ज़ींतो रास|
4
ते हे बचन बालव, अपने बचन न सरकाथ, पण प्रभुएरी तालीम ते हदायत देइतां, तैन केरी हेर गेश केरा|
5
हे गुलामाव, ज़ैने लोक जिसमेरे मुताबिक तुशे मालकन, एपने मनेरे सच़ैई सैहीं डरते, ते थरकते, ज़ैंच़रे मसीह एरो, तैंच़रे तैन केरो भी हुकम मन्ना|
6
ते मैंन्हू खुश केरेने बालां केरी ज़ेरे हिरानेरे लेई सेवा न केरा, पण मसीहेरे दासां केरे ज़ेरे मने सैहीं परमेशरेरी पूरी मेरज़ी पुड़ च़ला|
7
ते तैस सेवा मैंन्हू केरी नैइं, पण प्रभुएरी बुझ़तां केरा|
8
किजोकी तुस ज़ानतथ, कि ज़ै कोई ज़ेरू रोड़ू कम्म केरहेलो, चाए गुलाम भोए, चाए आज़ाद; तैस प्रभु कैरां तेरो फल मैल्हनोए|
9
हे मालकाव, तुस भी धेमकी शैरतां तैन सैहीं तेरो बरताव केरा, किजोकी तुस ज़ानतथ, कि तैन केरो ते तुशो दुइयां केरो मालिक स्वर्गए मांए, ते तैन केरी तरफदारी न केरे|
10
प्रभु मां ते तैसेरी शेक्तरे असरे मां मज़बूत बना|
11
परमेशरेरे सारे हथीयार बन्धा; कि तुस शैतानेरी सैरी च़लैकी केरे सामने मां खड़े राई बटतथ|
12
किजोकी इशी ई लड़ाई, खूने या मांसे सैहीं नैइं, पण प्रधान्न सैहीं, ते हाकमन सैहीं, ते इस संसारेरे आँधारेरे हाकमन सैहींए, ते तैस बुरैइअरे आत्मिक फौजी सैहींए ज़ै आसमने मां आन|
13
ऐलहेरे लेई परमेशरेरे सारे हथयार बन्धा, कि तुस बुरे दिहाड़न मां सामनो केरी बटतथ, ते सब किछ पूरू केरतां मज़बूत राथ|
14
सच़्च़ेरो पटको बन्धा, ते धारमिकतारी झिलम लेइतां|
15
ते पवन्न मां मेलेरे सुसमाचार शुनाने तियैरारे बूट लाथ|
16
ते तैन सैभन सैहीं साथी विशवासेरी ढाल घिनतां मज़बूत भोथ ज़ैस सैहीं तुस तैस दुष्टेरे सब ज़लते तीर हिशेई बटथ|
17
ते उधारेरी टोपी, ते आत्मारी तलवार ज़ै परमेशरेरो वचने, नेथ|
18
ते हर बेले ते हर किसमें सैहीं आत्मा मां प्रथना, ते बिनती केरते राथ, कि ऐलहेरे लेई बींझ़े राथ, कि सब पवित्र लोकां केरे लेई लगातार बिनती केरा|
19
ते मेरे लेई भी, कि मीं वचन शुनानेरे बेले हिमत भोए, कि आंव दिलेरी सैहीं सुसमाचारेरो भेध ज़ोई बेट्टी ज़ैसेरे लेई आंव शंगलन सैहीं बन्धोरोइ राज दुताइं|
20
ते इन भी कि आंव तैसेरे बारे मां ज़ैंच़रे मीं लोड़े हिमती सैहीं ज़ोइं|
21
ते तुखिकुस ज़ै मेरो ट्लारो ढ्लाहे, ते प्रभु मां वफादार सेवके, कि तुस भी मेरी हालत ज़ानथ कि आंव कोस हालती मां केंच़रे राताइं|
22
तै मीं तुस्न कां ऐलहेरे लेई भेज़ोरोए, कि तुस इशी हालती ज़ानथ, ते तै तुशे मन्न मां शान्ति दे|
23
बाजी परमेशर ते प्रभु यीशु मसीह कैरां ढ्लान शान्ति, ते विशवासे सैहीं साथी प्रेम मैल्लहे|
24
ज़ैना इशे प्रभु यीशु मसीह सैहीं सच़ो मुहबत केरतन, तैन सैभन पुड़ अनुग्रह भोतो राए|