4
1
आंव ज़ै प्रभु मां कैदइं तुस्न कां बिनती केरताइं, कि ज़ैंच़रे तुस कुजवरे थी, तैसेरे लायिक चाल भी च़ला|
2
सैरी दीनतां ते नम्रता सैहीं साथी, ते सबर कैरतां प्रेमे सैहीं एकी होरेरी झ़ल्ला|
3
ते इसे कोशीशी मां राथ कि एकी आत्मा मां बन्धोरे राथ|
4
अके जाने, ते अके आत्माए; ज़ैंच़रे तुस कुजावरे थी, इशे कुजानेरी अके उमीदे|
5
अके प्रभुए, अके विशवासे, अके बपतिस्मो ए|
6
ते सैभी केरो अके परमेशर, ते बाजीए, ज़ै सैभना बाहे, ते सैभी केरे मझ़ाटे, ते सैभन मांए|
7
पण असन मैरां एकी मसीहेरे दानेरे अनदाज़े सैहीं अनुग्रह मैलते||
8
ऐलहेरे लेई तै ज़ोते, कि ज़ैखन तै उचे पुड़ च़ाड़ो, ते कैदिन छुटेइतां णेई जेव, ते मैंन्हन इनाम दितू|
9
(तैस च़ाड़ने सैहीं, कुन मैल्लते सिर्फ इन कि तै धेतरे बुनीयें आलाके मां ओसोरो भी थू|
10
ते ज़ै ओस्सो ई तैए ज़ै सैरी अंम्बरे कैरां भी उबरो जेव, कि सब किछ भरपूर भोए)
11
ते तैने केतरे नबी बनेइतां, केतरे सुसमाचार शुनाने बाले बनेइतां,प्रेरत ते केतरे रखवाले बनेइतां ते केतरे उसताद बनेइतां दिते|
12
ज़ैस सैहीं पवित्र लोक सिद्ध भोंन, ते सेवारू कम्म कीव गाहें, ते मसीहेरी जान तरकी केरे|
13
ज़ैखन कि अस सब विशवास, ते परमेशरेरे मठ्ठेरी पिशानी मां अक न भोम, ते अक सिद्ध मैंन्हू न भोम ते मसीहेरे कदेरे अनदाज़े तगर न पुज़ाम|
14
ताकि अस अगरोंव जो बच्चे न रहम, ज़ैना मैंन्हू केरी ठगनेरी गल्लां ते च़लैकी सैहीं तैन केरे कोशीशी सैहीं खियालां केरी, ते तालीमरी, हर एकी बयाने सैहीं उछ़ड़ाए, ते इरां उरा घुमाए गहते भोन|
15
बल्कि प्रेमे मां सच़्च़ैई सैहीं च़लते, सैभी गल्लन मां तैस मां ज़ै रोड़ीए, मतलब मसीह मां बधते गाथ|
16
ज़ैस सैहीं सारी जान सैभी जोड़ां केरी मद्दी सैहीं साथी मिलतां, ते साथी ज़ुड़तां तैस अस्सरेरे मुताबिक ज़ै सैभी हिसन सैहीं भोइतां, अपने आपे बधाते, कि तै प्रेमे मां तरकी केरतो राए|
17
ऐलहेरे लेई आंव इन ज़ोताइं, ते प्रभु मां खबरदार केरताइं कि ज़ैंच़रे होरी कौमा केरे लोक अपने मनेरे बेकार मेरज़ी पुड़ च़लतन, तुस इठा पत्ती न च़ला|
18
किजोकी तैन केरी अकल आँधरी भोवरीए ते तै अज्ञानतारी वजाही सैहीं तैना परमेशरेरे ज़िन्दगी कैरां अलग भोवरेन|
19
ते तैना सुन्न भोइतां, ऐशे मां लेगी जे, कि सैभी किसमेरां गन्दाँ कम्मां लालच़े सैहीं केरन|
20
पण तुसन मसीहेरी एऱी तालीम नैइं मल्लोरी|
21
बल्कि तुसेइं सच़्च़े तैसेरी शुनी, ते ज़ैंच़रे यीशु सच़्च़े, तैसे मां शिखाले भी जे|
22
कि तुस एगरीए चाल चलनेरे पुरानी इनसानयती ज़ै टपलाने बैली खुवैइशँ केरे मुताबिक भरष्ट भोई गातीए, खोल्ला|
23
ते अपने मनेरे आत्मिक सुभावे मां नोंवें बनाते गाथ|
24
ते नेवी इनसानयती लाथ, ज़ै परमेशरेरे मुतिबिक सच़्च़ेरी धार्मिकता, ते पवित्रता मां बनावरेन|
25
ऐलहेरे लेई झ़ुठ ज़ोंनू शैरतां हर कोई अपने पड़ोसी सैहीं सच़्च़ ज़ोए, किजोकी अस अतमाइ मां एकी होरेरे अंगम|
26
क्रोध त केरा, पण पाप न केरा: दिहाड़ो डुबने तगर तुशी सरक न राहे|
27
ते शैताने मोको न देथ|
28
च़ोरी केरने बालो फिरी च़ोरी न केरे; बल्कि रोड़ां कम्मां केरने मां मेहनत केरे; इ ऐलहेरे लेई ज़ैस ज़रूरत भोए तैस देनेरे लेई तैस कां किछ भोए|
29
कोई गन्दी गल्ल तुशे ऐशी मैरां न निसे, पण ज़रूरतरे लेई ज़ैन रोड़ू भोए, ताकि तैस सैहीं शुन्ने बाले पुड़ अनुग्रह भोए|
30
ते परमेशरेरी पवित्र आत्मा दुखी न केरा, ज़ैस सैहीं तुस्न पुड़ छुटकारेरे दिहाड़रे लेई छाप दितोरीए|
31
सैभी किसमेरी ट्लाइठार ते सरक, ते शोर, ते निन्दा ते सारो बैर भाव सैहीं तुस दूर कीयोरेथ|
32
ते एकी होरी पुड़ दया, ते माफ केरने बाले भोथ, ते ज़ैंच़रे परमेशरे मसीह मां तुशे पाप माफ कीये, तैंच़रे तुस भी एकी होरेरे पाप माफ केरा|