2
1
ते तैने तुस भी ज़ींते केरे, ज़ैना अपराधन ते पापन सैहीं मर्रे थी|
2
ज़ैस मां तुस पेहिले इस संसारेरे रीति पुड़, ते अंम्बरेरे आधीकैरी केरी, मतलब तैस आत्मा सैहीं च़लते थी, ज़ै हेजू भी हुकम न मन्ने बालन मां कम्म केरतीए|
3
ऐन मां अस भी सब पेहिले अपने जिसमेरे खुवैइशन मां दिहाड़े कटते थी, ते जिसम, ते मनेरी मर्ज़ी पूरी केरते थी, ते होरी लोकां केरे सामने स्भावे सैहीं क्रोधेरी अवलाध थी|
4
पण परमेशरे ज़ै दयारो धनीए; अपने तैस बड़े प्रेमे सैहीं, ज़ैस सैहीं तैने असन सैहीं प्रेम कीयो|
5
ज़ैखन अस पापन मां मर्रेए थी, त अस मसीह सैहीं साथी ज़ींते कीये; (अनुग्रहे सैहीं तुस्न मुक्ति मैल्ली)|
6
ते मसीह यीशु मां तैस सैहीं साथी उठाले, ते स्वर्गेरे ठारैन मां बिशाले|
7
कि तै अपने तैस दयाई सैहीं ज़ै मसीह यीशु मां असन पुड़े, एजेने बाले बेले अनुग्रहेरू घन हिराए|
8
किजोकी विशवासे सैहीं तुस्न मुक्ति मैल्लोरीए, ते इन तुस्न कैरां नैइं भोवरूए, बल्कि परमेशरेरू दाने|
9
ते कम्मन सैहीं नैइं, एरू न भोए कि कोई घुमण्ड न केरे|
10
किजोकी अस तैसेरे बनावरेंम; ते मसीह यीशु मां तैन रोड़ाँ कम्मां केरे लेई बनावरेम ज़ैना परमेशरे पेहिले इशे केरनेरे लेई तियार कैरां|
11
ऐलहेरे लेई याद केरा, कि तुस ज़ैना जिसमानी रीति सैहीं होरी कौमन, (ते ज़ैना लोक जिसमेरे हथन सैहीं केर्रे खतने बालेन, तैना तुस्न खतनो रहेयत ज़ोतन)
12
तुस लोक तैस बेले मसीह कैरां अलग ते इस्राएली मैंन्हू भोंने कैरां अलग केरे, ते वाइदां केरे ऐहेदेन कैरां दूर थी, ते न उमीद ते संसारे मां परमेशरे कैरां दूर थी|
13
पण हुनी त मसीह यीशु मां तुस ज़ैना दूर थी, मसीहेरे खून सैहीं नेड़े भोंवरेथ|
14
किजोकी तै इषो मेले, ज़ैने दुइये अक केरे: ते अलग केरने बाली दिवार ज़ै मझ़ाटे थी, डोलल्ही|
15
ते अपने जिसमे मां बैर मतलब व्यवस्था ज़ैसेरे हुकम कानूनेरे तरीके पुड़ थी, मिटाए, कि दुइयन सैहीं एपू मां अक नवो मैंन्हू पैइदा केरतां मेल कराए|
16
ते सलीबी पुड़ बैरे खतम कैरतां असन सैहीं दुइयन अक नोंवों मैंन्हू बनेइतां परमेशरे सैहीं मिलाए|
17
ते तैने एइतां ज़ैना तुस दूर थी, ते तैन ज़ैना नेड़े थी, दुइयन मेल मिलापेरी रोड़ो सुसमाचार शुनाव|
18
किजोकी तैसेरे ज़िरीये इशे दुइयां केरी पावच भोतीए|
19
ऐलहेरे लेई तुस परदेशी ते मुसाफर न राहे, पण पवित्र लोकाँ केरू झ़ुण्ड, ते परमेशरेरे घरानेरे भोए|
20
ते प्रेरतां ते नेबी केरी बुनीयादी पुड़ ज़ैसेरे कुनेरेरो घोड़ यीशु मसीह एपूए, बनाए जे|
21
ज़ैस मां सारी रच़ना साथी मिलतां प्रभु मां अक मन्दर बनातीए|
22
ज़ैस मां तुस भी आत्माइं सैहीं परमेशरेरे रहनेरी ठार भोनेरे लेई साथी बनाए गहतथ|