¹ Da ri tunu aku aman guma aya huɗu na kalaktanga i kun Urshalima na Barnabas. Zam na mai Titus i riga. ² Na kalaktu nayi gaɗa Səku tatki na kalakci. Se na tatkik shi wagərma herr mi na dlamau i kun ndawa mi zəga Kakasəku bai. (Na dlam rama na ndawa mi nda makshi marmamin i kun asən). Na dlam kasen gaɗa na tatki iɗa rawa mi na dlamu ki vataku bai. In na dlam rawa vatugun. ³ Amman ko i Titus mi na dagayi na aci, nən halinaucin, go nən mi dawa ci dolle na wudaci. ⁴ Rama tuku tlew dari yaganaucin ndak papiya mi dew i kunawa da dəbsa daiki dlikda ndawa i kun Yeso Masihu. Akshi ntutu da kaci nawa guzabcin dumaya. ⁵ Ja bar aɗaja i kun ladab bai i rikshi ko ki sartu gayi, gada jirewa herr da dlabi go talta gaɗa kun. ⁶ Amman akshi mi nda lawan shi na martapa bana ta 'iyu na be wambai. Akshin tai yaye jiktu 'iyu bai. Kakasəku a genyi nən mi wara ndawa ntutu bai. ⁷ I sərum kasn, Akshi daki nda barda wangərma herr i ndawa mi da wudakshi bai kaki mi nda baru i Bitrus wagərma herr i ndawa mi ndawa dawda. ⁸ Atoru Kakasəku mi a awana i kun Bitrus gaɗa muwanak i ndak wuda, kasən zam a wana i kunu ga i ri ndawa mi ziga Səku bai. ⁹ Dada Yakub, Kefas, na Yahai ndawa mi nda lawangu a ləma Ikilisiya, akshi da yakinci herr mi nda bara, akshi da barija aikwak mata ki zamanci na 'iyu na Barnabas, akshi dlam kasən jab gaɗa jayi naja i ri ndawa mi ziga Kakasəku bai akshi ye dai nakshi i ri ndawa mi nda wuda. ¹⁰ Akshi zam ancu ja tani na ndak tluwa. 'Iyu na nye dlam kasən. ¹¹ Lakwtu Kefas zadan gəri Antakiya, na dlam gamɗaya na aci i kəma gəri gaɗa aci ne dlam be bəlan bai. ¹² Waci Kefas ata bikta aɗagayi na ndawa mi ziga Səku bai kafin ni ndau jəgab da ri Yakub. Amman nda tunu dew tunu, se aci daivudu da barna aɗa gəri, da ri ndau. Aci a kalu ndawami wara na ntu wuda. ¹³ Kasən ke gagzhin yahudaucin gu mi aɗa gayi na aci da ɗigi na munafək gəri. Kasən ke Barnabas da ɗigi na munafakshi. ¹⁴ Nai ka akshi a ɗiga mi a kun labar herr bai na rami Kefas i kimakshi duk, "In ci Bayahudun nin ka ɗiga ka rayata kaki ndawa mi ziga Səku bin i sərum rayata ka ki yahudaucinwa to a dlam nana ka dawi ndawa mi zəga Səku bai da dlam mbasu ka ki yahudaucin?" ¹⁵ Ja mi wara nda 'yawuja ja yahudaucin, ja ndawa mi zəga Səku bai ndak aibu. ¹⁶ A zəgina sau, na nən mi a bik rra da kun wana dumaya bai, i sərum sən, nda rra na akshi da ri bari jirewa i kun Yeso Masihu amman ba dari wana dumaya bai. Gaɗa dari wana dumaya go nən mi wara a bi rra. ¹⁷ Amman in wa maku Səku da riwa da ri Yeso Masihu nin, wa dlam nawa ndak aibu ke nan. Masihu dlamingəri guzub aibu bi? sutuku da wakata bai. ¹⁸ In na bar na jirewa ga iɗak dumaya nən, be mi na barditu akau, na tatki i baci kelte dumaya kenan. ¹⁹ Da ri dumaya i gamtak i atu, gaɗa na dlam mbasu zadak ki Səku. ²⁰ Nda tlige na 'iyu aɗa gayi na Masihu, gususku 'iyu na mbasu ki aɗa ga bai, amman Masihu ne a mbasu i kunuga. Mbasu mi na dlamau gususku kasau i kun təka, na dlama gara ne ikun bari jirewa gaɗa wən Seku, mi aci ntutu 'iyu da bar aɗa gəri gaɗa ga. ²¹ Na dlam vatuku herr ki Səku bai gaɗa in adalta sukunu dari dumaya nin to da ai Masihu dlam mutu vatku kenan.