¹ Imio̱nme̱n, akha mio̱ia lamie̱in vbi ue̱in lo̱be, elo̱ vbi ea si Eti vbi use'evba icie zuan'mie̱n khi vba fain o̱l'o̱ia vbe̱ke̱n idegbere. Vba ri eoi egbevba vbegbe, li vbaeo mi idamighe. ² Vba ya kpayegbe obo̱, livba lo̱re̱ ri uhi si Kristi sian. ³ Akha mi o̱lo̱ecie egbeso̱i emi lo̱i kian, o̱te̱'e̱ egbe so̱i'e. ⁴ O̱deo̱de i'fe̱i obia si obo̱ so̱i gho. E̱ghe̱an lo̱lo̱re̱ mi emi vbi egbe so̱i lo̱lo̱ re̱ sobo̱ vbudu, bi kho̱i regbo̱i ma'an o̱'o̱vbe'e. ⁵ Erimidi khi o̱deo̱de lo̱lo̱ huai ihua so̱i. ⁶ O̱ia la'a vbie̱o̱i eta lavin o̱i re̱vbi emo̱mo̱e̱n ni o̱lo̱ vbie̱o̱i emi. ⁷ Ezuan te̱'e̱e. Oise̱le̱bua ivbi o̱lari eta so̱i gbighe̱'e̱. Emi lo̱ia ko̱i, o̱lemi lo̱lo̱ lie. ⁸ Erimidi o̱lo̱ ki ikpe̱ko̱mi si o̱kho̱'o̱, o̱lo̱ liei ikhue'eo, re̱keyi o̱lo̱ ko̱i re̱yi Eti, lo̱lo̱ liei agbo̱n lo̱i mo̱in ire̱so vbi e̱ke̱in Eti. ⁹ Vb̄aizo̱i e̱'e̱main vbi o̱se̱n u'umi, erimidi e̱ghe̱ire̱se̱ mai lo̱ mi e'e so̱i e̱ghe̱limai i'robo̱ vbo̱re. ¹⁰ Vbo̱hio̱ so̱na, makha mi ehe, lai vbi o̱le̱se̱n yi o̱iaikho̱ia. Vba zuan so̱go̱lo̱ vbi o̱lo̱se̱n yi ea lare̱ koko vbi ighogho vbe̱ke̱in amie̱nho̱n. ¹¹ Vbami emi gbogodo li ri obo̱me̱n vin yivba. ¹² Eso nian ho'o niain re̱vbi̱e khi erian e̱'e̱n'u nianre o̱vba livbai rue'e. Erian vbena vbo̱hio̱ laio̱ kpe̱ kho̱e̱ke̱n'ian vbo̱hio̱ si o̱gbe̱n si Kristi. ¹³ O̱iu khi ian liain rue̱'e̱i khian re̱khain uhi. Sokpe̱n yian ho'o lu rue̱'e̱ niain ya ri e̱mo̱in egbese̱'e̱ ruo̱. ¹⁴ Akhamie̱n khi iruo̱i lo̱i vbi vbo̱hio̱ si o̱gbe̱n si O̱lo̱mo̱e̱nmai li Jesu Kristi. S̱ian vbi e̱mo̱in li are̱ gbi o̱lagbo̱na ne̱me̱n lagbore̱ gbo gbi me̱me̱ li o̱lagbo̱na. ¹⁵ O̱hio̱ khi orue̱'e̱ bi o̱lo̱i vbi orue̱'e̱ o̱icie̱n emio̱so. Aye lo̱gbo̱n lo̱ dewuin emi. ¹⁶ Re̱yi ea liain lo̱ ri o̱li uhi na sian, o̱fure bi ihianba i'debaiain, bi ekhe̱n Izrel si Oise̱le̱bua. ¹⁷ Re̱ zavbi e̱na ra'ale̱ o̱'o̱so ecie kpokpo me̱n, erimidi ae̱'e̱n si Jesu lo̱rime̱vbegbe lia wun sian. ¹⁸ Li e̱seo̱he̱n si O̱lo̱mo̱e̱nmai li Jesu Kristi i'debaei eti se̱'e̱, imio̱nme̱n. Ise̱'e̱.