^{1 2 3} 1. ನಿಂಗುಲ್ಕೊಸ್ಕರ ಲವೊದಿಕೀಯಲ್ಕು ಇಕ್ರಲ್ಕೊಸ್ಕರ ನನ್ನ ಕಣ್ಣಾರೇ ಪಕ್ದೆ ಇಕ್ರಲ್ಕೊಸ್ಕಾರ ನಂಕು ಶ್ಯನ ಹೋರಾಟ ಇದುಯಿಂಡು ನಿಂಗುಲ್ಕು ತಿಳಿಜಿಕುರ್ದುಯಿಂಡು ನಾನು ಅಸೇಪಾಡರೆ . 2.ಹೆಂಗಿನ್ಡೆಕೆ ಅಲ್ಟ ಪ್ರೀತಿಕುರು ಹೊಂದಿಗೊಂಡು ಆದರಣೀ ಹೊಂದಿಗೊಂಡು ಸಂಪೂರ್ಣಾ ನಿಶ್ಚಾಯ ಇಗ್ರ ಭಾಗ್ಯನ್ನ ಪಡ್ಜು ಅವ್ವಯಿಕ್ರ ದೌರ್ಕು ಕ್ರಿಸ್ತನ ಮರ್ಮ ತಿಳಿಯಾಕು . 3.ಆತ್ಕುರು (ಕ್ರಿಸ್ತನ್ಕುರು )ಜ್ಞಾನ ತಿಳುವಾಳಿಕೆ ಆದಿ ನಿಕ್ಷೆಪಗದಿ ಅಡಕವಾಯಿದು. ^{4 5} 4. ಏದನ ರಂಜನೆ ಒಕ್ಕಿಂಡು ನಿಂಗುಲ್ನ ಮೋಸಗೋಳ್ಸಾಕ್ನು ಇಗ್ರ ಭಯತಿಂಡು ಇತಾತೆಯ ಸೋನ್ನರೆ . 5. ನಾನು ವಡ್ಮುಕುರಿಂಡು ನಿಗ್ಲೆಂಚಿಲ್ಲಿ ಇಲ್ಲಯಿಂಡೆಕು ಆತ್ಮನಿಂಡು ನಿಗ್ಲಾಂಟ್ಟಿ ಇಂದು ನಿಂಗ ಕ್ರಮವಾಯಿ ನಡ್ಗುತ್ತ ಕ್ರಿಸ್ತನ ನಂಬಿಕೆಕುರು ದೃಡವಾಯಿ ನಿಕ್ರತ್ತ ಪಾತ್ತು ಸಂತೋಷ ಪಡರೇ. ^{6 7} 6. ಆತಿಂಡು ನಿಂಗ ಕರ್ತನಾನ ಕ್ರಿಸ್ತ ಯೇಸುನ್ನ ಅಂಗಿಕರ್ಸ್ನಾಕನ್ನಿ ಆತನ್ಕುರು ನಡ್ಗೊಂಗೋ . 7. ಆತನ್ಕುರು ಬೇರೋರಿ ದೃಡವಾಯಿ ನಿಂಗುಲ್ಕು ಕೆಪ್ಪಿಚಿಕ್ರ ಪ್ರಾಕಾರ ನಂಬಿಕೆಕುರು ನೆಲೆಗೊಂಡು ಕೃತಜ್ಞತೆ ಇಂಡು ವಂಡುಗುಡಿ ಅತ್ಕುರು ಅಬಿವೃದ್ದಿ ಹೊಂದಿರಂಗ . ^{8 9} 8. ಕ್ರಿಸ್ತನಾನ್ನು ಅನುಸರ್ಸ್ರತ ಉಟೂಟ್ಟು ಮನುಷ್ಯರ ಸಂಪ್ರಾಯತ್ಕುರು ಪ್ರಾಪಂಚಿಕ ಬೋದನೆಕುರು ಅನುಸರ್ಸ್ರಗ್ಯ ನಿಂಗುಲ್ಕುರು ವಂದು ಮೋಸವಾನ ನಿರರ್ಥಕವಾನ ತತ್ವಜ್ಞಾನ ಬೋದನೆಕುರು ನಿಂಗುಲ್ನ ವಂಚನೆ ಸೈಯಾಕ್ನು .ಎಚ್ಚಾರವಾಯಿರೊಂಗೋ 9. ಕ್ರಿಸ್ತನ್ಕುರು ದೈವತ ಸರ್ವ ಸಂಪೂರ್ಣತೆ ವಡ್ಮುಕುರು ( ಶಾರಿರಿಕವಾಯಿ )ವಾಸಸೈಯಾಕು . ^{10 11 12} 10. ನಿಂಗ ಅತ್ಕುರು ಇಂದು ಪರಿಪೂರ್ಣಾತೆನ ಹೊಂದಿರಂಗ .ಅದು ಆಸಿ ದೊರೆತನತ್ಕುರು ಅದಿಕಾರತ್ಗು ತಲ್ಕಾಯಿಯಾಯಿದು . 11. ನಿಂಗ ಅತ್ಕುರು ಸುನ್ನತಿನ ಹೊಂದಿರಂಗ ;ಆ ಸುನ್ನತಿ ಕೈಯಿಂಡು ಸೇದಿಕ್ರದಲ್ಲ ;ಇದು ಕ್ರಿಸ್ತನಿಂಡು ಸುನ್ನತಿಯಾಯಿಂದು ಪಾಪತ ವಡ್ಮುನ್ನ ವಿಸರ್ಜಿಸ್ರದೆಯಾಯಿದು . 12. ನಿಂಗ ದೀಕ್ಷ ಸ್ನಾನತ್ಕುರು ಕ್ರಿಸ್ತನಿಂಡು ಮನ್ಸೇದಿಕ್ರತಿಂದು ಆ ಸುನ್ನತಿನ ಹೊಂದಿರಂಗ ಆತನು ಸತ್ತಲಿಂಡು ಅದಿಪ್ಚುಕ್ರ ದೌರ್ತ ಕಾರ್ಯತ್ಕುರು ನಂಬಿಕೆಯಿತ್ತಿಕ್ರತಿಂಡು ನಿಂಗ ಆತ್ಕುರು ಆದಿದಿರಂಗ. ^{13 14 15} 13. ನಿಂಗ ಪಾಪತ್ಕುರು ಸುನ್ನತಿಯಿಲ್ಲದೆಯಿಕ್ರ ವಡ್ಮುತ ಭಾವತಿಂಡು ಸತ್ತಗಾಯಿಂದ ನಿಂಗುಲ್ನ ದೌರು ಆತೆಂಟ್ಟಿ ಬದುಕುಸ್ನ ನಿಗ್ಟ ಅಪರಾದ ಆದಿನು ಕ್ಷಮಿಸಿದು . 14. ನಂಕು ವಿರೋದವಾಯಿ ಪ್ರತಿಕುಲವಾಯಿ ಇದ್ದ ಕೈ ಬರನ ಶಾಸನಾನ ವಂಗಿ ಅತಾತೆಯ ತಟ್ಟು ಶಿಳುಬೇತ್ಕುರು ಜಡ್ಜು ಇಲ್ಲಾದೆಯಿಕ್ರಕಾನಿ ಸೆಂಚು 15. ಅದು ದೊರೆತನ ಅದಿಕಾರನ್ನ ವಂಗಿ ಶಿಲುಬೇತ್ಕುರು ಆತದಿ ಮೆನ್ನಿ ವಿಜಯಗೊಂಡು ಅತಾತೆಯ ಬೈಲ್ಕಿ ಕಟ್ಸು . ^{16 17} 16. ಹಿಂಗಿಕ್ರತಿಂಡು ಕಾಲ್ಲಿತ ವಿಷಯತ್ಕುರು ಪವಿತ್ರ ಅಮಾವಾಸ್ಯೆ ಸಬ್ಬತ್ ಈ ವಿಷಯತ್ಕುರು ನಿಂಗುಲ್ಕು ಎದು ತೀರ್ಪು ಸೈದೇಯಿಕೊಟ್ಟು . 17. ಇದು ವರ್ಬೇಕಾಯಿಕ್ರ ಛಾಯೇಯಾಯಿದು ;ಆನೇಕೆ ವಡ್ಮು ಕ್ರಿಸ್ತನಾದು. ^{18 19} 18. ಸ್ವಇಷ್ಟ ವಿನಯತಿಂಡು ದೇವದೂತರ ಆರಾದನೆಯಿಂಡು ತಟ್ಟು ವಡ್ಮು ಮನಸ್ಸಿಂಡು ವ್ಯರ್ಥವಾಯಿ ಉಬ್ಬಿಗೊಂಡು ತಾನು ಪಕ್ದೆಯಿಕ್ರತ್ಕುರು ಬಲವಂತವಾಯಿ ನುಗ್ಗಿ ಎದು ನಿಗ್ಟ ಬಹುಮಾನನ ಮೋಸಗೊಲ್ಸುದ್ದೆ ಇಕೊಟ್ನು . 19. ಇಂಥದು (ಕ್ರಿಸ್ತನಿಗ್ರ ) ತಲೈ ಹೊಂದಿಕೆನ ಉಟೋಟ್ಟು .ಆ ತಲೈಯಿಂಡು ವಡ್ಮತ ಕೀಲು ನರ್ತತಿಂಡು ಬೇಕಾನ ಸಹಾಯನ ಹೊಂದಿ ವಂಡಯಿ ಜೋಡಿಸಿಕ್ರ ದೌರು ಕುಡ್ತಾ ವೃದ್ದಿಕುರು ಅಬಿರುದ್ದಿಯಗ್ತಾ ವರಕು. ^{20 21 22 23} 20. ಪ್ರಾಪಂಚಿಕ ಬಾಲ ಬೋದನೆತ ಪಾಲ್ಕು ನಿಂಗ ಕ್ರಿಸ್ತನೆಂತಿ ಸೇತ್ತಯಿಕ್ರಂಗ ಆಯಿಂಚುನ್ನು ಇನ್ನು ಪ್ರಾಪಂಚಿಕರಾಯಿ ಪಕಿರಗ್ಯ ಇಗುರ್ಕಾನಿ . 21. ಮುಟ್ಟು ಮಾನ .ರುಚಿಪಕ್ಮಾನ .ಪುಡ್ಕಿಮಾನ ಇಗುರ ಮನುಷ್ಯನ ಕಲ್ಪಿತ ಆಜ್ಞೆಕಿ ಬೋದನೆಕು ನಿಂಗ ಒಳಗಗ್ರದು ಎಂತ್ತುಗು . 22. (ಆ ಪದಾರ್ಥನ ಬಳಸ್ರಲ್ಕುರು ನಾಶವಾಕುದು .) 23. ಅಂತ ಉಪದೇಶ ಆದಿನು ಸ್ವೇಚ್ಛರಾದನೆಕುರು ವಿನಾಯತ್ಕುರು ವಡ್ಮು ದಂಡನೆಕುರು ಜ್ಞಾನಾನ ಕಾಟ್ರದು ನಿಜನೆ .ಆನೇಕೆ ಅದು ವಡ್ಮಲ್ದೆ ಏ ವಿಧತ್ಕುರು ತೃಪ್ತಿ ಪಡಿಸುದುಲ್ಲಾ.