16 ¹ ಸಬ್ಬತ್ ದಿನ್ಮು ಕಲ್ಸಿನ್ಮಿಂದ , ಮಗ್ದಲಿನ ಮರಿಯಳು ಯಾಕೊಬುಡು ತಲ್ಲಿ ಮರಿಯಳು ಸಲೋಮೇಲು ವಾಡ್ ದೇಹುಮ್ಕಿ ಏಸೇಕಿ ಸುಗಂದ್ಮು ದ್ರವ್ಯಲ್ನಿ ಸೀಸ್ಕೊನ್ರಿ . ² ಮಲಿ ವಾರ್ಮು ಮೊದ್ಲುನೆ ದಿನ್ಮು ಪದ್ನ ಪದ್ ಮೂಡೆನಪ್ಡು ವಾಳು ಸಮಾದಿ ದೆಗ್ರುಕಿ ವಚ್ಚ್ರಿ. ³ ಸಮಾದಿಕಿ ಮೂಸಿನ ರಾಯಿ ಬಹಳ್ಮು ಪೆದ್ದುದಾಯಿಂದಾನ್ನಿಂಚ ವಾಳು ಸಮಾದಿ ವಾಕ್ಲಿಂಚ ಆ ರಾಯ್ನಿ ಮಾಕೊಸ್ಕರ್ಮು ಉರುಳ್ಬಿಚ್ಚೋಳು ⁴ ಯೋಳುಂಡಾರು ಅನಿ ವಾಳ್ವಾಳ್ಳನೋನೆ ಮಾಟ್ಲಾಡ್ಕೊಂಟ ವುನ್ಡ್ಕೋನಿ ತಲ್ಕೈ ಎತ್ತಿ ಸೂಸಿ ಆ ರಾಯಿ ಪಡುಂಡೆದ್ನಿ ಕನ್ರಿ. ⁵ ವಾಳು ಸಮಾದಿ ನೋನ್ಕಿ ಪಾಯಿ ಓಕ್ ಯೌವನಸ್ತುಡು ತೆಲ್ಲ ಅಂಗಿನಿ ಏಸ್ಕೋನಿ ಕುಡ್ಮುತೊಟ್ಟು ಕುಚ್ಚೋನುಂಡೆದ್ನಿ ಕನಿ ಬೆಚ್ಚಿ ಬೆರ್ಗಾಯ್ರಿ .ವಾಡು ವಾಳ್ಕಿ - ಬೆರ್ಗಾವದಂಡ್ರಿ. ⁶ ಶಿಲುಬೇಕಿ ಏಸಿನ ನಜರೇತು ಯೇಸುನಿ ಹುಡ್ಕ್ತಾರು ಕದ . ವಾಡು ಜೂಡಾಯಿ ಲೇಸ್ನಾಡು , ಈನ ಲೇದು . ವಾಡ್ನಿ ಪೆಟ್ಟುoಡಿನ ಜಾಗ್ಮು ಇದೆ, ಸೂಡoಡ್ರಿ. ⁷ ಆಯ್ತೆ ಮೀರು ಪಾಯಿ ವಾಡ್ ಶಿಷ್ಯುಲ್ಕಿ ಪೆತ್ರುಡ್ಕಿ ವಾಡು ಮೀಕಿ ಸೋಪ್ನಟ್ಗೆ ಮೀ ಮುಂದ್ರ ಗಲಿಲಾಯುಮ್ಕಿ ಪಾತಾಡು , ಆನ ವಾಡ್ನಿ ಕಂಟಾರು ಅನಿ ತಿಲ್ಬಿಯಂಡ್ರಿ ಅನಿ ಸೊಪ್ಪೇ. ⁸ ವಾಳು ಬ್ರಮೆ ಪಟ್ನೋಳಾಯಿ ನಡ್ಕೊನಿ ಆಕ್ಟರ್ಕಿ ವಚ್ಚಿ ಸಮಾದಿ ದೆಗ್ರಿಂಚ ಪರ್ಪಾಯ್ರಿ , ವಾಳು ಹೆದ್ರುಕೊನುಂಡೆದಾನ್ನಿಂಚ ಯೋಳ್ಕು ಏಮಿ ಸೊಪ್ಲೆ . ⁹ ( ವಾರ್ಮು ಮೊದ್ಲುನೆ ದಿನ್ಮು ಪೊದ್ನ ಯೇಸು ಜೂಡಾಯಿ ಲೇಸಿನ್ಮಿಂದ ಮಗ್ದಲಿನ ಮರಿಯಳ್ಕಿ ಮೊದ್ಲು ಕನ್ಬಿಚ್ಕೊನೆ . ¹⁰ ದಾನ್ಕಿ ಯೋಡು ದೈಮುಲ್ನಿ ಇಡ್ಬಿಚ್ಚುಂಡೆ . ಆದಿ ಪಾಯಿ ಯೇಸು ಕನ್ಬಿಚ್ಕೊನಿಂದ್ನಿ ಮುಂದ್ರ ವಾಡ್ ಜೊತ್ಲ ಉನ್ನೋಳ್ಕಿ ತಿಳ್ಬಿಚ್ಚೆ . ವೂಳು ಅಂಬಿಲಿಸ್ತ ಎಡ್ಸ್ತಾ ಕುಚ್ಚೋನುಂಡ್ರಿ . ¹¹ ವಾಡು ಬದ್ನಾಡು , ನಾಕಿ ಕನ್ಬಿಚ್ಕೊನೆ ಅನೆ ಮಾಟ್ನಿ ಇನ್ನಪ್ಪ್ದು ವಾಳು ನಂಬ್ಲೆದು . ¹² ಇದಾಯ್ನ್ಮಿಂದ ಶಿಷ್ಯುಲ್ಲ ಇದ್ರೂ ಓಕ್ ಹಳ್ಳಿಕಿ ನಡ್ಸ್ಕೊನಿ ಪಾಯೇನಪ್ಪ್ದು ಯೇಸು ವಾಳ್ಕಿ ರೂಪಾಂರ್ತುಮಿಂಚ ಕನ್ಬಿಚ್ಕೊನೆ . ¹³ ವಾಳು ಪಾಯಿ ಉಳ್ಸ್ನೋಳ್ಕಿ ತಿಲ್ಬಿಚ್ರಿ . ಆಯ್ತೆ ವಾಳ್ನಿ ನಂಬ್ಲೆದು . ¹⁴ ಆಮಿಂದ ಪನ್ನೆಂಡು ಮಂದಿಲು ಶಿಷ್ಯುಲು ಊಟುಮ್ಕಿ ಕುಚ್ಚೋನಪ್ಪ್ದು ಯೇಸು ವಾಳ್ಕಿ ಕನ್ಬಿಚ್ಕೊನೆ . ¹⁵ ಯೇಸು ಜೂಡಾಯಿ ಲೇಸಿ ವಚ್ಚಿನ್ಮಿಂದ ತನ್ನಿ ಕನಿನ ಮಾಟ್ಲುನಿ ವಾಳು ನಂಬ್ಲೆನಿನ ಕಾರ್ಣ್ಮಿಂಚ ಯೇಸು ವಾಳ್ ಅಪನಂಬ್ಕೆಕು ವಾಳ್ ಮನ್ಸುಕಾಟಿನ್ಯಂಕು ವಾಳ್ನಿ ಗದ್ರಿಚ್ಚೆ . ¹⁶ ಆಮಿಂದ ವಾಳ್ಕಿ - ಮೀರು ಲೋಕ್ಮುನಿ ಅನ್ನಿ ತೊಟ್ಗಿ ಪಾಯಿ ಜಗತ್ತಿಕಿ ಅಂತ ಸುವಾರ್ತುಮ್ನಿ ಸಾರಂಡ್ರಿ . ¹⁷ ನಂಬಿ ದೀಕ್ಷಾಸ್ನಾನ್ಮು ಸೇಬಿಚ್ಕೊನೋಡು ರಕ್ಷಣುಮ್ನಿ ಹೊಂದ್ತಾಡು , ನಂಬ್ಕುನ್ನ ಪಾಯೋಡು ದಂಡನೆಕಿ ಗುರಿಯಾಯ್ತಾಡು . ಇದ್ಕಾಕುನ್ನ ನಂಬೋಳಿoಚ ಈ ಸೂಚಕ್ಮು ಕಾರ್ಯಾಲು ಆಯ್ತಾವಿ , ನಾ ಪೇರ್ನಿ ಸೊಪ್ಪಿ ದೈಮುಲ್ನಿ ಇಡ್ಬಿಸ್ತಾರು , ಕೊತ್ ಭಾಷೆಲಿಂಚ ಮಾಟ್ಲಾಡ್ತಾರು , ಪಾಮುಲ್ನಿ ಎತ್ ತಾರು , ವಿಷ್ಮು ಪದಾರ್ತ್ಮುಲು ಏಮಾರ ತಾಗ್ತೆನು ವಾಳ್ಕಿ ಯಾವ್ ಕೇಡು ಆಯೆಟ್ಲೆ , ¹⁸ ವಾಳು ರೋಗಿಲ್ಮಿಂದ ಸೈ ಪೆಡ್ತೆ ವಾಳ್ಕಿ ಗುಣ್ಮಾಯ್ತಾದಿ ಅನಿ ಸೊಪ್ಪೇ . ¹⁹ ಯೇಸು ಸ್ವಾ,ಮೀ ವಾಳ್ ಜೊತ್ಲ ಮಾಟ್ಲಾಡಿನ್ಮಿಂದ ಆಕಾಶುಮ್ಕಿ ಎತ್ಕೊಪಾಯಿ ದೇವುಡು ಕುಡ್ಮು ತೊಟ್ಲ ಆಸನ್ಮುರೂಡುಡಾಯೇ . ²⁰ ಇಕ್ಡುಕಿ ವಾಳು ಪಾಯಿ ಯಾನ್ಯಾನನು ಸುವಾರ್ತ್ಮು ಸಾರ್ರಿ , ಮಲಿ ಕರ್ತುಡು ವಾಳ್ ಜೊತ್ಲ ಕೆಲ್ಸ್ಮು ಸೇಸ್ತ ಸೂಚಕ್ಮು ಕಾರ್ಯುಲಿಂಚ ಸುವಾರ್ತ್ಮು ವಾಕ್ಯುಲ್ನಿ ಬಲ್ಪಡಿಸ್ತಾ ವುಂಡೆ.)