14 ¹ ಪಸ್ಕುಮು ಮಲಿ ಪುಲ್ಪು ಲೇನಿನ ರೊಟ್ಟ ಪಂಡ್ಗ ವಚ್ಚೆದಾನ್ಕಿ ಇಂಕ ರೊಂಡು ದಿನಾಲು ವುಂಡ್ನಪ್ಡು ಮಹಾಯಾಜಕುಲು ಶಾಸ್ತ್ರಿಲು ಯೇಸುನಿ ಉಪಾಯ್ಮಿಂಚ ಪಟ್ಟಿ ಸೊಂಪೆದಾನ್ಕಿ ಮಾರ್ಗುಮು ಹುಡಕ್ತಾವುಂಡ್ರಿ . ² ಎಂದ್ಕಂಟೆ - ಪಂಡುಗ್ಲ ಪಟ್ಕೊಗುಡ್ದು , ಮಾ ಜನಲ್ಲಾ ಗದ್ದಲ್ಮಾಯಿನಿ ಅನಿ ಮಾಟ್ಳಾಡ್ಕೊನ್ರಿ . ³ ಯೇಸು ಬೆಥಾನ್ಯುಮ್ಲ ಕುಷ್ಟರೋಗಿಯಾಯಿನ ಸೀಮೊನುಡು ಇನ್ಟ್ಲ ವುಂಡಿ ಊಟುಮ್ಕಿ ಕುಚ್ಚೋನುಂಡ್ನಪ್ಡು ಓಕ್ ಆಡ್ದಿ ಬಹು ಬೆಲೆ ವುಂಡೆ ಅಚ್ಚ ಜಟತುಂಕ ತೈಲ್ಮು ಭರಣಿನಿ ಸೀಸ್ಕೋನಿ ವಚ್ಚಿ ಆ ಭರಣಿನಿ ಕೊಟ್ಟಿ ತೈಲುಮ್ನಿ ಯೇಸು ತಲಕೈ ಮಿಂದ ಪೋಸೆ . ⁴ ಆಯ್ತೆ ಕೆಲುವ್ಲು ವಾಳ್ನೋನ ಕೂಪ್ಮುಸೇಸ್ಕೋನಿ - ಈ ತೈಲುಮ್ನಿ ನಷ್ಟುಮು ಸೇಸಿಂದಿ ಎಂದ್ಗೂ ? ⁵ ದೀನ್ನೀ ಮುನ್ನೂರು ರುಪಾಯ್ಲು ದುಡ್ಳುಕಿ೦ತ ಹೆಕ್ವಾಯಿನ್ ದುಡ್ಳುಕಿ ಅಮ್ಮಿ ಬಡುವ್ಲಿಕಿ ಇಯ್ಬಹುದಾಯುಂಡೆ ಅನಿ ಸೊಪ್ಪಿ ದಾನ್ಕಿ ಛೀ ಏಸ್ರಿ . ⁶ ಆಯ್ತೆ ಯೇಸು - ದೀನ್ನಿ ಇಡಿಯಂಡ್ರಿ . ದೀನ್ಕಿ ಎಂದ್ಗೂ ತೊಂದ್ರೆ ಇಸ್ತಾರು ? ಇದಿ ನಾಕಿ ಮಂಚಿ ಕಾರ್ಯುಮ್ನಿ ಸೇಸಿಂದಿ . ⁷ ಬಡುವ್ಲು ಎಪ್ಡು ಮೀ ದೆಗ್ರ ವುಂಟಾರು , ಮೀಕಿ ಮನ್ಸು ವಚ್ನಪ್ಡು ವಾಳ್ಕಿ ಉಪಕಾರ್ಮು ಸೇಯೋಚ್ಚು , ಆಯ್ತೆ ನಾನು ಎಪ್ಡೂ ಮೀ ದೆಗ್ರ ವುನ್ಡೆಟ್ಲೇದು . ⁸ 8 ಇದಿ ದಾನ್ ಸೇತ್ಲಾಯಂತ ಸೇಸಿಂದಿ , ಇದಿ ಮುಂದ್ರಾಯಿ ನಾ ಉತ್ರುಮು ಕ್ರಿಯೆಲು ಕೋಸ್ಕರ್ಮು ನಾ ದೇಹುಮ್ಕಿ ಈ ತೈಲುಮ್ನಿ ಏಸಿಂದಿ . ⁹ ಸುವಾರ್ತುಮು ಸರ್ವಲೋಕುಮ್ಲ ಯಾನ್ಯಾನ ಸಾರ್ತಾದೋ ಆನಾನ ಇದಿ ಸೇಸಿಂದ್ನಿ ಸಹ್ಮು ದೀನ್ ನೆನ್ಪ್ಕಾಯಿ ಸೊಪ್ತಾರನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನೆ . ¹⁰ ಆಮಿಂದ ಪನ್ನೆಂಡು ಮಂದಿ ಶಿಷ್ಯುಲ್ಲಾ ಒಕ್ಡಾಯಿನ ಇಸ್ಕರಿಯೋತ ಯೂದುಡು ಯೇಸುನಿ ಮಹಾಯಾಜಕುಲ್ಕಿ ಪಟ್ಟಿಯಾಲನಿ ವಾಳ್ ದೆಗ್ರುಕಿ ಪಾಯೇ . ¹¹ ವಾಳು ಇನಿ ಸಂತೋಷ್ಮು ಪಡಿ - ನೀಕಿ ದುಡ್ಳಿಸ್ತಾಮನಿ ಮಾಟ ಇಚ್ರಿ . ವಾಡು ಯೇಸುನಿ ಅನುಕೂಲ್ಮಾಯಿ ಪಟ್ಟಿಚ್ಚೆದಿ ಎಟ್ಟ ಅನಿ ಸೂಸ್ತವುಂಡೆ . ^{12 13} ಪುಲ್ಪುಲೇನಿನ ರೊಟ್ಟ ಪಂಡುಗ್ಮಿನ ಮೊದ್ಲುನೆ ನಾಡು , ಅಂಟೆ ಪಸ್ಕುಮಿನ ಗೊರ್ ಪಿಲ್ನಿ ಕೋಸೆ ನಾಡು , ಯೇಸು ಶಿಷ್ಯುಲು - ನುವ್ವ ಪಸ್ಕುಮಿನ ಊಟ್ಮು ಸೇಸೆ ಅಟ್ಗ ಮಾಮು ಯಾನ ಪಾಯಿ ಸಿದ್ಮು ಸೇಯಾಲಂಟಾವು ಅನಿ ವಾಡ್ನಿ ಅಡ್ಗೇಕಿ ವಾಡು ತನ್ ಶಿಷ್ಯುಲ್ಲ ಇದ್ರುನಿ ಪಿಲ್ಚಿ - ಮೀರು ಪಟ್ಟಣ್ಮು ನೋನ್ಕಿ ಪೊಂಡ್ರಿ , ಆನ ಓಕ್ ಮನುಷ್ಯುಡು ನಿಂಡಿನ ಚೌರುಗ್ನಿ ಮೋಸ್ಕೋನಿ ಮೀಎದ್ರುಗೆ ವಸ್ತಾಡು . ಮೀರು ವಾಡ್ ಎನ್ಕ ಪೊಂಡ್ರಿ , ವಾಡು ಯಾವ್ ಇಂಟ್ಕಿ ಪಾತಾಡೋ ಆ ಇಂಟ್ ಯಜ್ಮಾನುಡ್ಕಿ - ¹⁴ 14 ಮಾ ಭೋದಕುಡು ತನ್ ಶಿಷ್ಯುಲು ಜೊತ್ಲ ಪಸ್ಕುಮು ಊಟ್ಮುನಿ ಸೇಸೆದಾನ್ಕಿ ತನ್ಕಿ ಭೋಜನ್ಮು ಶಾಲೆ ಯಾನ ಅನಿ ಅಡ್ಗ್ತಾಡು ಅನೇದಾಯಿ ಸೊಪ್ಪಂಡ್ರಿ . ¹⁵ ವಾಡು ತಕ್ಮು ಸಾಮಾನ್ಲಂತ ಸಿದ್ಮಾಯಿ ಪೆಟ್ಟಿನ ಪೈನಂತಸ್ಥ್ಮಿನ ಪೆದ್ ಕೊಟಡಿನಿ ಮೀಕಿ ಸೂಪ್ತಾನು , ಆನ ಮಾಕಿ ಸಿದ್ಮು ಸೇಯಂಡ್ರಿ ಅನಿ ಸೊಪ್ಪಿ ವಾಳ್ನಿ ಅಂಪಿಚ್ಚೆ . ¹⁶ ಶಿಷ್ಯುಲು ಹೊರ್ಟಿ ಪಟ್ಟಣುಮ್ಕಿ ಪಾಯಿ ವಾಡು ಮಾಕಿ ಸೊಪ್ನಟ್ಗ ಕನಿ ಪಸ್ಕಂಕಿ ಸೌರಿಚ್ರಿ . ¹⁷ ಮಾಟಾಲ ಆಯ್ನಪ್ಡು ಯೇಸು ಪನ್ನೆಂಡು ಮಂದಿ ಶಿಷ್ಯುಲು ಜೊತ್ಲ ವಚ್ಚೆ . ¹⁸ ವಾಳು ಕುಚ್ಕೋನಿ ಊಟ್ಮು ಸೇಸೆನಪ್ಡು ಯೇಸು - ಮೀಲ ಒಕ್ಡು ನನ್ನೀ ಪೆಟ್ಟಿಸ್ತಾಡು , ವಾಡು ನಾ ಜೊತ್ಲ ಊಟ್ಮು ಸೇಸೋಡೆ ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನೆ . ¹⁹ ಅಪ್ಡು ವಾಳು ದುಖಿತ್ಲಾಯಿ - ನಾನ್ಕಾದೇ , ನಾನ್ಕಾದೇ ಅನಿ ಒಕ್ಳೋಕ್ಳು ಯೇಸುನಿ ಅಡ್ಗೇಕಿ ಆಯ್ರಿ . ²⁰ ಯೇಸು ವಾಳ್ಕಿ - ವಾಡು ನಾ ಪನ್ನೆಂಡು ಮಂದಿಲ್ಲ ಒಕ್ಡು , ನಾ ಜೊತ್ಲ ಬಟ್ಲುಲ ಸೈ ಅದ್ಡೋಡೇ . ²¹ ಕುಮಾರುಡು ಪಾತಾಡು ಸರಿ , ಅಟ್ಟೆ ವಾಡ್ ವಿಷಯ್ಮಾಯಿ ರಾಸಿಂದೆಕದ . ಆಯ್ತೆ ಯೌವ್ಡು ಮನುಷ್ಯುಕುಮಾರುಡ್ನಿ ಪಟ್ಟಿಸ್ತಾಡೋ ವಾಡ್ ಗತಿನಿ ಏಮಿ ಸೊಪ್ಪುದ್ನು . ಆ ಮನುಷ್ಯುಡು ಪುಟ್ಟುಂಡ್ಪಾತೆ ವಾಡ್ಕಿ ಮಂಚಿದಾಯುಂಡೆ ಅನಿ ಸೊಪ್ಪೆ . ²² ವಾಡು ಊಟ್ಮು ಸೇಸೆನಪ್ಡು ಯೇಸು ರೊಟ್ನಿ ಸೀಸ್ಕೋನಿ ದೇವುಡು ಸ್ತೋತ್ರುಮು ಸೇಸಿ ಇರ್ಸಿ ವಾಳ್ಕಿ ಇಚ್ಚಿ - ಸೀಸ್ಕೊಂಡ್ರಿ , ಇದಿ ನಾ ದೇಹುಮು ಅನೆ . ²³ ಆಮಿಂದ ಪಾತ್ರೆನಿ ಸೀಸ್ಕೋನಿ ಸ್ತೋತ್ರುಮು ಸೇಸಿ ವಾಳ್ಕಿ ಇಚ್ಛೆ , ವಾಳಂದ್ರು ದಾಂಟ್ಲ ತಾಗ್ರಿ . ²⁴ ಮಲಿ ಯೇಸು ವಾಳ್ಕಿ - ಇದಿ ನಾ ರಕ್ತುಮು , ಇದಿ ಒಡಂಬಡಿಕೆ ರಕ್ತಮು , ಇದಿ ಬಹು ಜನಲುಕೋಸ್ಕರ್ಮು ಸುರ್ಬಿಚ್ಚೆ ರಕ್ತುಮು. ²⁵ ಮೀಕಿ ಸತ್ಯುಮಾಯಿ ಸೊಪ್ತಾನು , ನಾನು ದೇವುಡು ರಾಜ್ಯುಮ್ಲ ದ್ರಾಕ್ಷಾರಸ್ಮುನಿ ಕೊತ್ತುದಾಯಿ ತಾಗೆ ನಾಡ್ಗಂಟ ದಾನ್ನಿ ಇಂಕ ತಾಗೇಕೆ ಲೇದು ಅನೆ . ²⁶ ಆಮಿಂದ ವಾಳು ಕೀರ್ತನ್ಮು ಸೊಪ್ಪಿ ಅಂದ್ಮು ಮಾನ್ಲು ಗುಡ್ಡಂಕಿ ಪಾಯ್ರಿ . ಅಪ್ಡು ಯೇಸು ವಾಳ್ಕಿ - ಮೀರಂದ್ರು ದಿಗ್ಲು ಪಡಿ ಎನ್ಕಿಕಿಜರಿಸ್ತಾಳು . ²⁷ ಗೊರ್ರೋಡ್ನಿ ಕೊಡ್ತಾನು , ಗೊರ್ಲು ಚದ್ರಿ ಪಾತಾವಿ ಅನಿ ರಾಸಿಂದೆ ಕದಾ . ²⁸ 28 ಅದಾಯ್ಮಿಂದ ನಾನು ಜೀವಿತ್ಮಾಯಿ ಲೇಸಿನ್ಮಿಂದ ಮೀ ಮುಂದ್ರ ಗಲಿಲಾಯುಮ್ಕಿ ಪಾತಾನು ಅನಿ ಸೊಪ್ಪೆ . ²⁹ -ಆಯ್ತೆ ಪೇತ್ರುಡು ವಾಡ್ಕಿ - ಅಂದ್ರು ದಿಗ್ಲು ಪಡಿ ಎನ್ಕಿಕಿಜರಿಸ್ತೇನು ನಾನು ಎನ್ಕಿಕಿ ಜರ್ಸೇಟ್ಲೆದು ಅನಿ ಸೊಪ್ಪೇಕಿ ಯೇಸು- ನೀಕಿ ಸತ್ಯುಮಾಯಿ ಸೊಪ್ತಾನು , . ³⁰ ಪೊದ್ದು ಈ ರಾತ್ರಿಲಾನೆ ಕೋಡಿ ರೊಂಡು ಸಾರಿ ಕೂಸೆದಾನ್ಕಿಂತ ಮುಂದ್ರ ನುವ್ವ ನಾ ವಿಷಯುಮ್ಲ - ವಾಡ್ನಿ ಅರಿಲೇದು ಅನೇದಾಯಿ ಮೂಡು ಸಾರಿ ಸೊಪ್ತಾವು ³¹ ಆಯ್ತೆ ವಾಡು - ನಾನು ನೀ ಜೊತ್ಲ ಸಚ್ಬೇಕಾಯ್ತೆನು ನಿನ್ನಿ ಅರಿಲೇದು ಅನಿ ಸೋಪ್ಪೇಕೆ ಲೇದು ಅನಿ ಬಹು ಖಂಡಿತ್ಮಾಯಿ ಮಾಟ್ಲಾಡೆ . ದಾನ್ಲಾಕ್ನೆ ವಾಳಂದ್ರು ಸೊಪ್ರಿ . ^{32 33} ಆಮಿಂದ ವಾಳು ಗೆತ್ಸೆಮನೆ ಅನೆ ತೋಟುಮ್ಕಿ ವಚ್ರಿ . ಯೇಸು ತನ್ ಶಿಷ್ಯುಲ್ಕಿ - ಇನ್ನೆ ಕುಚ್ಚೊಂಡ್ರಿ , ನಾನು ಪ್ರಾರ್ಥ್ನುಮು ಸೇಸಿ ವಸ್ತಾನು ಅನಿ ಪೇತ್ರುಡು ಯಾಕೋಬುಡು ಯೋಹಾನುಡ್ನಿ ತನ್ ಜೊತ್ಲ ತೋಡ್ಕೋನಿ ಪಾಯಿ ಬೆಚ್ಚಿ ಬೇರ್ಗಾಯಿ ಮನಗುಂದಿನೋಡಾಯೆ . ³⁴ ಮಲಿ ವಾಳ್ಕಿ - ನಾ ಪ್ರಾಣುಮು ಸಚ್ಚೆ ಅಂತ ದುಖುಮ್ಕಿ ನೋನಾಯಿಂದಿ . ³⁵ ಮೀರು ಇನ್ನೆ ವುಂಡಿ ಎಚ್ರುಮಾಯು೦ಡಂಡ್ರಿ ಅನಿ ಸೊಪ್ಪಿ ಕೊಂಚ್ಮು ಮುಂದ್ರುಕಿ ಪಾಯಿ ನೆಲ್ಮಿಂದ ಅಡ್ಮುಪಡಿ ಸಾಧ್ಯುಮಾಯ್ತೆ ಆ ಗಳ್ಗೆ ನನ್ನೀ ಇಡ್ಸಿ ಪಾಯೇ ಅಟ್ಗ ದೇವುಡ್ನಿ ಪ್ರಾರ್ಥಿಚ್ಚಿ - ³⁶ ಅಬ್ಬಾ , ತಂಡ್ರಿಯಾ , ನೀಕಿ ಅಂತನು ಸಾದ್ಯುಮು , ಈ ಪಾತ್ರೆನಿ ನಾ ಇಂಚ ತೊಲ್ಗಿಯ್ಯಿ , ಆಯ್ತೆನು ನಾ ಚಿತ್ಮುಲಾಕ ಆವ್ಕುನ್ನಾ ನೀ ಚಿತ್ಮುಲಾಕನೆ ಆವ್ನಿ ಅನೆ. ^{37 38} ಆಮಿಂದ ಯೇಸು ವಚ್ಚಿ ವಾಳು ನಿದ್ರ ಸೇಸೇದ್ನಿ ಕನಿ ಪೇತ್ರುಡ್ಕಿ - ಸೀಮೋನುಡಾ , ನಿದ್ರ ಸೇಸ್ತಾವಾ ? ಓಕ್ ಗಳಿಗೆ ಆಯ್ತೆನು ಎಚ್ರುಮಾಯುಂಡೆಟ್ಲೆದಾ ? ಶೋಧನೆಕಿ ನೋನವ್ನಟ್ಗ ಎಚ್ರುಮಾಯುಂಡಿ ಪ್ರಾರ್ಥಿಯಂಡ್ರಿ , ಮನ್ಸು ಸಿದ್ಮಾಯಿಂದಿ ಸರಿ , ಆಯ್ತೆ ದೇಹುಮ್ಕಿ ಬಲ್ಮು ಸಾಲೆಟ್ಲೆ ಅನಿ ಸೊಪ್ಪೆ . ³⁹ 39 ಆಮಿಂದ ತಿರ್ಗಿ ಪಾಯಿ ಅದೇ ಮಾಟ್ನಿ ಸೊಪ್ತ ಪ್ರಾರ್ಥಿಚ್ಚೆ . ⁴⁰ ತಿರ್ಗಿ ವಚ್ನಪ್ಡು ವಾಳು ನಿದ್ರ ಸೇಸೆದಾನ್ನಿ ಕನೆ , ವಾಳ್ ಕಂಡ್ಳು ಬಹು ಬಾರ್ಮಾಯುಂಡೆ , ಮಲಿ ಯೇಸು ಅಡ್ಗಿನ್ದಾಂಕಿ ಏಮಿ ಉತ್ರುಮಿಯಾಲ್ನೋ ವಾಳ್ಕಿ ತಿಲಿಲೇದು ⁴¹ . ⁴² ಯೇಸು ಮೂಡ್ನೆ ಸಾರಿ ಪಾಯಿ ವಚ್ಚಿ ವಾಳ್ಕಿ - ಮೀರು ಇಂಕ ನಿದ್ರ ಸೇಸಿ ಧಣಿವಾರ್ಬಿಚ್ಕೊಂಡ್ರಿ , ಸಾಲು , ಆ ಗಳ್ಗೆ ವಚ್ಚೆ , ಇಗೋ , ಮನುಷ್ಯ ಕುಮಾರುಡು ದುರ್ಜನಲು ಸೇತ್ಕಿ ಒಪ್ಪಿಚ್ಚಲ್ಪಡ್ತಾಡು . ಲೇಯಂಡ್ರಿ , ಪದಾಮು , ನನ್ನೀ ಪಟ್ಟಿಚ್ಚೋಡು ಹತ್ರುಮ್ಕಿ ವಚ್ನಾಡು ಸೂಡಂಡ್ರಿ ಅನಿ ಸೊಪ್ಪೆ . ^{43 44} ಯೇಸು ಇಂಕ ಮಾಟ್ಲಾಡ್ತಾವುಣ್ಣಪ್ಡೆ ಪನ್ನೆಂಡು ಮಂದಿ ಶಿಷ್ಯುಲ್ಲ ಒಕ್ಡಾಯಿನ ಯೂದುಡು ವಚ್ಚೆ . ಮಹಾಯಾಜಕುಲು ಶಾಸ್ತ್ರಿಲು ಪೆದ್ದೋಳು ವೂಳ್ ತೊಟ್ಟಿಂಚ ಓಕ್ ಗುಂಪು ಕತ್ತಿ ಕಟ್ಳುನಿ ಪಟ್ಕೋನಿ ವಾಡ್ ಜೊತ್ಲ ವಚ್ಚೆ , ಇದ್ಕಾಕುನ್ನ ಯೇಸುನಿ ಪಟ್ಟಿಚ್ಚೋಡು ವಾಳ್ಕಿ - ನಾನು ಯೋಳ್ಕಿ ಮುದ್ದ್ಪೆಡ್ತಾನೋ ವಾಳೆ ವಾಡು , ವಾಡ್ನಿ ಪಟ್ಟಿ ಬದ್ರುಮಾಯಿ ಸೀಸ್ಕೋನಿ ಪೊಂಡ್ರಿ ಅನಿ ಗುರ್ತು ಸೊಪ್ಪಿಚ್ಚ್ರಿ ⁴⁵ . ⁴⁶ ಆನ್ಕಿ ವಚ್ಚಿನ್ ತಕ್ಷಣ್ಮೆ ವಾಡು ಯೇಸು ದೆಗ್ರುಕಿ ಪಾಯಿ - ಗುರುವಾ ಅನಿ ಸೊಪ್ಪಿ ಯೇಸುಕಿ ಮುದ್ಪೆಟ್ಟೆಕಿ ವಾಳು ಯೇಸು ಮಿಂದ ಸೈ ಏಸಿ ಯೇಸುನಿ ಪಟ್ರೀ . ⁴⁷ ಆಯ್ತೆ ಹತ್ರುಮ್ಲ ನಿಲ್ಪಡುಂಡ್ನೋಳ್ಳಾ ಒಕ್ಡು ವಾಡ್ ಕತ್ತಿನಿ ಹಿರ್ಸಿ ಮಹಾ ಯಾಜಕುಡು ಆಳ್ನಿ ಕೊಟ್ಟಿ ವಾಡ್ ಶವ್ನಿ ನರ್ಕಿ ಏಸೆ ⁴⁸ . ⁴⁹ ವಾಳು ಯೇಸುನಿ ಪಟ್ನಪ್ಡು ಯೇಸು ವಾಳ್ಕಿ - ದೊಂಗುಲ್ನಿ ಪಟ್ಟೆ ಅಟ್ಗ ಕತ್ತಿಲ್ನಿ ಕಟ್ಳುನಿ ಸೀಸ್ಕೋನಿ ನನ್ನೀ ಪಟ್ಟೆ ದಾನ್ಕು ವಸ್ತ್ರಾ ? ನಾನು ದಿನಾಲು ಮೀ ಜೊತ್ಲ ವುಂಡಿ ದೇವುಡು ಆಲಯುಮ್ಲ ಬೋಧಿಚ್ಚೆನಪ್ಡು ಮೀರು ನನ್ನೀ ಪಟ್ಲೆದು . ಆಯ್ತೆ ಶಾಸ್ತ್ರುಮು ವಚನಾಲು ನೆರ್ವೇರೆ ಅಟ್ಗ ಇದಂತ ಆಯೇ ಅನಿ ಉತ್ರುಮಿಚ್ಚೆ . ⁵⁰ 50 ಅಪ್ಡು ಶಿಷ್ಯುಲಂದ್ರು ಯೇಸುನಿ ಇಡ್ಸಿ ಪರ್ಪಾಯ್ರಿ . ⁵¹ ಒಕ್ಡಾನೊಕ್ಡು ಯೌವನಸ್ಥುಡು ಬರಿ ಪೈ ಮಿಂದ ನಾರು ಮಡಿನಿ ಏಸ್ಕೊನೋಡಾಯಿ ವಾಡ್ ಎನ್ಕ ಜನಲು ಜೊತ್ಲ ವಸ್ತ ವುಂಡೆ . ⁵² ವಾಳು ವಾಡ್ನಿ ಪಟ್ಕೋನಿ ವಾಡು ಆ ನಾರುಮಡಿನಿ ಇಡ್ಸಿ ಬರಿ ಪೈಲಾ ಪರ್ಪಾಯೆ . ⁵³ ಅಂತ್ಪದ್ಗಿ ವಾಳು ಯೇಸುನಿ ಮಹಾಯಾಜಕುಲು ದೆಗ್ರುಕಿ ಸೀಸ್ಕೋನಿ ಪಾಯ್ರಿ . ವೂಡ್ ದೆಗ್ರುಕಿ ಮಹಾಯಾಜಕುಲು ಪೆದ್ದೋಳು ಶಾಸ್ತ್ರಿಲು ವೂಳಂದ್ರು ಕೂಡೋಚ್ರಿ . ⁵⁴ ಮಲಿ ಪೇತ್ರುಡು ದೂರ್ಮಿಂಚ ಯೇಸು ಎನ್ಕ ಪಾತಾ ಮಹಾಯಾಜಕುಡು ಮಟ್ಮು ಅಂಗ್ಳುಮು ನೋನ ವಚ್ಚಿ ಓಲೆಕಾರುಲು ಜೊತ್ಲ ಅಗ್ಗಿ ಮುಂದ್ರ ಕುಚ್ಕೋನಿ ಚಳಿಕಾಸ್ಕೊಂಟ ವುಂಡೆ . ⁵⁵ ಅಪ್ಡು ಮಹಾಯಜಕುಲು ಪೆದ್ ಸಭೆಯೋಳಂದ್ರು ಯೇಸುನಿ ಸೊಂಪಿಬೀಯಾಲನಿ ಯೇಸು ಮಿಂದ ಸಾಕ್ಷಿನಿ ಹುಡುಕ್ರಿ , ಆಯ್ತೆ ಏಮಿ ಸಿಕ್ಲೇದು . ⁵⁶ ಬಹು ಮಂದಿಲು ವಚ್ಚಿ ಯೇಸು ಮಿಂದ ಸುಳ್ಳು ಸಾಕ್ಷಿ ಸೊಪ್ತೆನು ವಾಳ್ ಸಾಕ್ಷಿ ಒಕ್ಟಿಕೊಕ್ಟಿ ಸರಿ ಪಡ್ಲೇದು . ^{57 58} ಆಮಿಂದ ಕೆಲುವ್ಲು ಲೇಸಿ ನಿಲ್ಪಡಿ - ಸೈಯಿಂಚ ಕಟ್ಟುಂಡೆ ಈ ದೇವುಡು ಆಲಯುಮ್ನಿ ನಾನು ಪಡೆಸಿಡ್ಸಿ ಸೈಯಿಂಚ ಕಟ್ಲೇನಿನ ಇಂಕೊಕ್ಟ್ನಿ ಮೂಡು ದಿನಾಲ್ಲಾ ಕಟ್ತಾನು ಅನಿ ವೂಡು ಸೊಪ್ಪಿಂದಾನ್ನಿ ಮಾಮು ಇನ್ನಾಮು ಅನಿ ವಾಡ್ ಮಿಂದ ಸುಳ್ಳು ಸಾಕ್ಷಿನಿ ಸೊಪ್ರಿ . ⁵⁹ ಇಟ್ಟ ಸೊಪ್ತೆನು ವಾಳ್ ಸಾಕ್ಷಿ ಒಕ್ಟಿಕೊಕ್ಟಿ ಸರಿಪಡ್ಲೇದು . ⁶⁰ ಅಪ್ಡು ಮಹಾಯಾಜಕುಡು ಲೇಸಿ ನಡ್ವೆ ನಿಲ್ಪಡಿ - ನುವ್ವೇಮಿ ಉತ್ರುಮು ಇಚ್ಚೆಟ್ಲೆದಾ ? ವೂಳು ನೀ ಮಿಂದ ಸೊಪ್ಪೆ ಈ ಸಾಕ್ಷಿ ಏಮಿ ? ಅನಿ ಯೇಸುನಿ ಪ್ರಶ್ನಿಚ್ಚೆ . ^{61 62} ಆಯ್ತೆ ಯೇಸು ಊರ್ಕೆ ವುಂಡಿ ಏಮಿ ಉತ್ರುಮು ಸೊಪ್ಲೇದು . ತಿರ್ಗಿ ಮಹಾಯಾಜಕುಡು - ಭಗವಂತ ಕುಮಾರುಡೈನ ಕ್ರಿಸ್ತುಡೋ ನುವ್ವ , ಅನಿ ಯೇಸುನಿ ಅಡ್ಗಿನ್ದಾಂಕಿ ಯೇಸು - ನಾನೇ , ಇದ್ಕಾಕುನ್ನ ಮನುಷ್ಯಕುಮಾರುಡು ಸರ್ವಶಕ್ತುಡು ಕುಡುಮ್ ತೊಟ್ಲ ಆಸಿನ್ಮಾಯುಂಡೆದ್ನಿ ಆಕಾಶ್ಮುಲು ಮೇಘಾಲ್ಲಾ ವಚ್ಚೆದಾನ್ನಿ ಸೂಸ್ತಾರು ಅನೆ . ^{63 64} ದೀನ್ನೀ ಇನಿ ಮಹಾಯಾಜಕುಲು ವಾಳ್ ಅಂಗಿನಿ ಸಿಂಪ್ಕೊನಿ - ನಾಕಿ ಇಂಕ ಸಾಕ್ಷಿ ಎಂದ್ಗೂ ಕಾವಾಲ ? ವೂಡು ಸೇಸಿನ ದೂಷಣೆನಿ ಇನ್ನಾರೇ , ಮೀಕಿ ಎಟ್ಟ ಕಂಟಾದಿ ಅನೇಕಿ ವಾಳಂದ್ರು - ವೂಡು ಮರಣ್ಮು ದಂಡನೆಕಿ ಹೊಂದೇತಕ್ಮೋಡು ಅನಿ ತೀರ್ಪು ಸೇಸೆ . ⁶⁵ 65 ಆಮಿಂದ ಕೆಲುವ್ಲು ಯೇಸುನಿ ಊಸಿ ಯೇಸು ಮಕನ್ಕಿ ಮುಸ್ಕು ಏಸಿ ಗುದ್ದಿ - ಪ್ರವಾದ್ನುಮು ಸೊಪ್ಪು ಅಂಟ ವುಂಡ್ರಿ . ಮಲಿ ಓಲೇಕಾರುಲು ಯೇಸು ಕೆನ್ಕಿ ಕೊಡ್ತಾ ವಾಳ್ ವಶಂಕಿ ಸೀಸ್ಕೊನ್ರಿ . ^{66 67} ಇಕ್ಡುಕಿ ಪೇತ್ರುಡು ದುಗುನ ಅಂಗಳುಮ್ಲ ವುಂಡ್ನಪ್ಡು ಮಹಾಯಾಜಕುಲ ದಾಸಿಲ್ಲಾ ಒಕ್ತಿ ವಚ್ಚಿ ವಾಡು ಚಳಿಕಾಸ್ಕೊಂಟ ವುಂಡೇದ್ನಿ ಕನಿ ವಾಡ್ನಿ ಸೂಸಿ - ನುವ್ವ ಸಹ್ಮು ಆ ನಜರೇತೊಡಾಯಿನ ಯೇಸು ಜೊತ್ಲ ವುಂಡ್ನೋಡು ಅನೆ . ⁶⁸ 68 ವಾಡು - ಕಾದು , ನುವ್ವ ಏಮಂಟಾವೋ ನಾಕಿ ಗೊತ್ಲೇದು , ತಿಳ್ಸೆಟ್ಲೆದು ಅನಿ ಸೊಪ್ಪಿ ಆಕ್ಟರ್ಕಿ ಪಾಯೇ . ⁶⁹ ಆನ ದಾಸಿ ವಾಡ್ನಿ ಕನಿ ಹತ್ರುಮ್ಲ ನಿಲ್ಪಡುಂಡೋಳ್ಕಿ - ವೂಡು ವಾಳ್ಳಾ ಒಕ್ಡು ಅನಿ ತಿರ್ಗಿ ಸೊಪ್ಪೆದಾನ್ಕಿ ಸೇಸೆ . ⁷⁰ ವಾಡು ತಿರ್ಗಿ ಕಾದು ಅನೆ . ಕೊಂಚ್ಮು ಪೊದ್ಮಿಂದ ಆನ ನಿಲ್ಪಡುಂಡ್ನೋಳು ಪೇತ್ರುಡ್ಕಿ - ನಿಶ್ಚಯ್ಮಾಯಿ ನುವ್ವ ವಾಳ್ಳಾ ಒಕ್ಡು , ನುವ್ವ ಗಲಿಲಾಯ್ಮೊಡಂತೆ ಅನಿ ತಿರ್ಗಿ ಸೊಪ್ರಿ . ⁷¹ ಆಯ್ತೆ ವಾಡು - ಮೀರು ಸೊಪ್ಪೆ ಆ ಮನುಷ್ಯುಡ್ನೀ ನಾನರಿಲೇದು ಅನಿ ಸೊಪ್ಪಿ ಶಪಿಚ್ಚೆದಾನ್ಕು ಆಣೆ ಪೆಟ್ಕೊನೆದಾನ್ಕು ಪ್ರಾರಂಭಿಚ್ಚೆ . ⁷² ಅಪ್ಡೇ ಕೋಡಿ ರೊಂಡ್ನೆ ಸಾರಿ ಕೂಸೆ . ಅಪ್ಡು ಪೇತ್ರುಡು - ಕೋಡಿ ರೊಂಡು ಸಾರಿ ಕೂಸೆದಾನ್ಕಿಂತ ಮುಂದ್ರ ಮೂಡು ಸಾರಿ ನಾ ವಿಷಯ್ಮಾಯಿ ವಾಡ್ನಿ ಅರಿಲೇದು ಅನಿ ಸೊಪ್ತಾವು ಅನಿ ಯೇಸು ವಾಡ್ಕಿ ಸೊಪ್ಪಿನ ಮಾಟ್ನಿ ನೆನಪ್ಕಿ ಸೀಸ್ಕೋನಿ ಆ ವಿಷಯುಮ್ಲ ಯೋಚಿಚ್ಚಿ ಏಡ್ಸೆ.