¹ ಆ ಸಮಯುಮ್ಲ ಶಿಷ್ಯುಲು ಯೇಸು ದೆಗ್ರುಕಿ ವಚ್ಚಿ - ಪರ್ಲೋಕ್ಮು ರಾಜ್ಯುಮ್ಲ ² ಯೋಡು ಹೆಕ್ವೊಡು ಅನಿ ಅಡ್ಗೆಕಿ ವಾಡು ಸನ್ ಸಿನೋಳ್ನಿ ಹತ್ರುಮ್ಕಿ ಪಿಲ್ಚಿ ವಾಳ್ ಜೊತ್ಲ ನಿಲ್ಪಡ್ಬಿಚ್ಚಿ ವಾಳ್ಕಿ - ³ ಮೀರು ತಿರಿಕೋನಿ ಸನ್ ಸಿನೋಳ್ಳಾಕ ಆಯ್ಕುಣ್ ಪಾತೆ ಮೀರು ಪರ್ಲೋಕ್ಮು ರಾಜ್ಯುಮ್ಲ ಸೇರೇಕೆ ಲೇದು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು . ⁴ ಇಟ್ಟುoಡೆದಾನಿಂಚ ಯೋಡು ಈ ಸನ್ ಸಿನೋಳ್ಳಾಕ ವಾಳ್ನಿ ತಗ್ಗಿಚ್ಕೊಂಟಾಡೋ ವಾಡೆ ಪರ್ಲೋಕ್ಮು ರಾಜ್ಯುಮ್ಲ ಹೆಕ್ವೋಡು . ⁵ ಇದ್ಕಾಕುನ್ನ ಯೋವ್ಡಾರ ನಾ ಪೇರ್ಲ ಇಟ್ಟೆ ಓಕ್ ಸನ್ ಸಿನೋಳ್ನಿ ಸೇರ್ಬಿಚ್ಕೊಂಟೆ ನನ್ನೀ ಸೇರ್ಪ್ಕೊನ್ನಟ್ಗ ಆಯ್ತಾದಿ . ⁶ ಆಯ್ತೆ ನಾಲ ನಂಬ್ಕೆ ಪೆಟ್ಟೆ ಈ ಸನ್ನೋಳ್ಳಾ ಒಕ್ಡುಕಿ ಯೋಡಾರ ಅಡ್ಡಿಯಾಯ್ತೆ ಅಟ್ಟೋಡ್ ಮೆಡ್ಕಾಯ್ಕಿ ಬೀಸೆ ರಾಯ್ನಿ ಕಟ್ಟಿ ವಾಡ್ನಿ ಆಳ್ಮಾಯಿನ ಸಮುದ್ರುಮ್ಲ ಮುಲ್ಗಿಚ್ಚಿಡ್ಸ್ತಾದಿ ವಾಡ್ಕಿ ಹಿತ್ಮಾಯ್ತಾದಿ . ⁷ ತೊಡ್ಕುಲು ವಚ್ಚೆದಾನ್ನಿಂಚ ಲೋಕುಮ್ಕಿ ಎಂತೋ ಕೇಡು| ತೊಡುಕ್ಲು ಎಟ್ಟಾರ ವಸ್ತಾವಿ . ಅದಾಯಿ ಯಾವ್ ಮನುಷ್ಯುಡಿಂಚ ತೊಡಕು ವಸ್ತಾದೋ , ವಾಡ್ ಗತೀನಿ ಏಮಿ ಸೊಪ್ಪುದ್ನು | ⁸ ಅಟ್ಟಾಯ್ತೆ ನೀ ಸೈಯಾವ್ನಿ ನೀ ಕಾಲಾವ್ನಿ ನಿನ್ನೀ ಪಾಪುಮ್ಲ ಸಿಕ್ಕಿಚ್ಚೆದಾಯ್ತೆ ದಾನ್ನಿ ನರ್ಕಿ ಪಾಗೋಟ್ಟಿಡಿ , ರೊಂಡು ಸೈಲು ರೊಂಡು ಕಾಲ್ಲು ವುಂಡೋಡಾಯಿ ನಿತ್ಯುಮೈನ ಅಗ್ಗಿಲಾ ಏಬಿಚ್ಕೊನೆದಾನ್ಕಿಂತ ಸೇತ್ಲು ಕಾಳ್ಳು ಕಲ್ಸ್ಕೊನೋಡಾಯಿ ಜೂಡ್ಲ ಸೇರೆದಿ ನೀಕಿ ಉತ್ತ್ಮು . ⁹ ನೀ ಕನ್ನು ನಿನ್ನೀ ಪಾಪುಮ್ಲ ಸಿಕ್ಕಿಚ್ಚೆದಾಯ್ತೆ ದಾನ್ನಿ ಪೆರ್ಕಿ ಪಾರ್ಗೊಕ್ಕಿಡಿ , ರೊಂಡು ಕನ್ನ್ಲುಂಡೋಡಾಯಿ ಅಗ್ಗಿ ನರ್ಕ್ಮುಲ ಏಬಿಚ್ಕೊನೆದಾನ್ಕಿಂತ ಒಕ್ಟೆ ಕನ್ನುಂಡೋಡಾಯಿ ಜೂಡ್ಲ ಸೇರೆದಿ ಮೀಕಿ ಉತ್ಮು . ¹⁰ ಈ ಸನ್ನೋಳ್ಳಾ ಒಕ್ಕುಡ್ನಾರ ತಾತ್ಸಾರ್ಮು ಸೇಯ್ಗುಡ್ದು ಸೂಡoಡ್ರಿ , ಪರ್ಲೋಕುಮ್ಲ ವಾಳ್ ದೂತುಲು ಪರ್ಲೋಕ್ಮುಲವುಂಡಿನ ನಾ ತಂಡ್ರಿ ¹¹ ಮಕುಮ್ನಿ ಎಪ್ಡು ಸೂಸ್ತವುಂಡಾರು ಅನಿ ಮೀಕಿ ಸೊಪ್ತಾನು . ¹² ಮೀಕಿ ಎಟ್ಟ ಸೂಪ್ತದಿ ? ಓಕ್ ಮನುಷ್ಯುಡ್ಕಿ ನೂರು ಗೊರ್ಲು ವುಂಡೆದಾಯಿ ಅವ್ಟ್ಲುಲ ಒಕ್ಟಿ ತಪ್ಪಿಚ್ಕೊಂಟೆ ವಾಡು ತೊಂಬೈತೊಂಬ್ದಿ ಗೊರ್ಲುನಿ ಇಡ್ಸಿ ಬೆಟ್ಟಂಕಿ ಪಾಯಿ ತಪ್ಪಿಚ್ಕೊನುಂಡೆದಾನ್ನಿ ಹುಡ್ಕ್ತಾಡ್ಕದ . ¹³ ಅದಿ ಸಿಕ್ತೆ ತಪ್ಪಿಚ್ಕೊಕುನ್ನ ವುಂಡೆ ತೊಂಬೈತೊಂಬ್ದಿಕಿಂತ ಆ ಒಕ್ಟ್ಕೋಸ್ಕರ್ಮು ಎಕ್ವಾ ಸಂತೋಷ್ಮು ಪಡ್ತಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು . ¹⁴ ಅಟ್ಟೆನೆ ಈ ಸನ್ನೊಳ್ಳಾ ಒಕ್ಡಾರ ಶೆಡ್ಪಾಯೇದಿ ಪರ್ಲೋಕ್ಮುಲವುಂಡೆ ಮೀ ತಂಡ್ರಿ ಚಿತ್ಮು ಕಾದು . ¹⁵ ಇದ್ಕಾಕುನ್ನ ನೀ ಸಹೋದರುಡು ತಪ್ಪು ಸೇಸ್ತೆ ನುವ್ವ ಪಾಯಿ ನುವ್ವ ವಾಡು ಇದ್ರೆ ಉಂಡ್ನಪ್ಡು ವಾಡ್ ತಪ್ಪ್ನಿ ವಾಡ್ಕಿ ತಿಲ್ಬಿಯ್ಯಿ . ವಾಡು ನೀ ಮಾಟ್ನಿ ಇಂಟೆ ನೀ ಸಹೋದರುಡ್ನಿ ಸಂಪಾದಿಚ್ಕೊನ್ನಾವು . ¹⁶ ಇನ್ಕುನ್ನ ಪಾತೆ ರೊಂಡು ಮೂಡು ಸಾಕ್ಷಿಲು ನೋರಿಂಚ ಪ್ರತಿಯೋಕ್ಟಿ ಮಾಟ ಸ್ಥಾಪನ್ಮು ಆಯೆ ಅಟ್ಗ ಇಂಕ ಒಕ್ಕಿದ್ರುನಿ ನೀ ಜೊತ್ಲ ತೊಡ್ಕೋನಿ ಪೋ. ¹⁷ ವಾಡು ವಾಳ್ ಮಾಟ್ನಿ ಇನ್ಕುನ್ನ ಪಾತೆ ಸಭೇಕಿ ಸೊಪ್ಪು , ಆಯ್ತೆ ಸಭೆ ಮಾಟ್ನಿ ಇನ್ಕುನ್ನ ಪಾತೆ ವಾಡು ನೀಕಿ ಅಜ್ನಾನಿಲಾಕನು ಬ್ರಷ್ಟುಡುಲಾಕನು ಉಂಡ್ನಿ. ¹⁸ ಭೂಲೋಕ್ಮುಲ ಮೀರು ಏಮೇಮಿ ಕಟ್ತಾರೋ ಆದಿ ಪರ್ಲೋಕ್ಮುಲಾನು ಕಟ್ಟುoಟಾದಿ , ಮಲಿ ಭೂಲೋಕ್ಮುಲ ಮೀರು ಏಮೇಮಿ ಇಪ್ತಾರೋ ಆದಿ ಪರ್ಲೋಕ್ಮುಲಾನು ಇಪ್ಪುoಟಾದಿ ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು . ¹⁹ ಇದ್ಕಾಕುನ್ನ ಮೀಲಾ ಇದ್ರೂ ಮೀರು ಬೇಡ್ಕೊನೆದಾಂಕಿ ತಕ್ಮು ಯಾವ್ದಾರ ಒಕ್ಟಿ ಕಾರ್ಯುಮು ವಿಷಯ್ಮಾಯಿ ಭೂಲೋಕ್ಮುಲ ಒಕ್ಕೇ ಮನ್ಸುಂಡೋಳಾಯುಂಟೆ ಆದಿ ಪರ್ಲೋಕ್ಮುಲವುಂಡೆ ನಾ ತಂಡ್ರಿಯಿಂಚ ವಾಳ್ಕಿ ಆಯ್ತಾದನಿ ಮೀಕಿ ಸೊಪ್ತಾನು . ²⁰ ಎಂದ್ಕಂಟೆ ಇದ್ರೂ ಮುಗ್ರು ನಾ ಪೇರ್ಲ ಯಾನ ಕೂಡಿ ವಚ್ಚುಂಟಾರೋ ಆನ ವಾಳ್ ಮದ್ಯುಮ್ಲ ನಾನು ವುಂಡಾನು ಅನೆ . ²¹ ಅಪ್ಡು ಪೇತ್ರುಡು ವಾಡ್ ದೆಗ್ರುಕಿ ವಚ್ಚಿ - ಸ್ವಾಮೀ , ನಾ ಸಹೋದರುಡು ನಾಕಿ ತಪ್ಪು ಸೇಸ್ತಾ ವಸ್ತೆ ನಾನು ಎನ್ನಿ ಸಾರಿ ವಾಡ್ಕಿ ಕ್ಷಮಿಚ್ಚಾಲ ? ಯೋಡು ಸಾರಿನೋ ಅನಿ ಅಡ್ಗೇಕಿ ಯೇಸು ವಾಡ್ಕಿ ²² ಸಾರಿ ಅನಿಕಾದು , ಯೋಡ್ ಡಬ್ಬೈ ಸಾರಿ ಅನಿ ಮೀಕಿ ಸೊಪ್ತಾನು . ²³ ದಾನ್ನಿಂಚ ಪರ್ಲೋಕ್ಮು ರಾಜ್ಯುಮು ತನ್ ಸೇವಕ್ಲಿಂಚ ಲೆಕ್ಮುನಿ ಸೀಸ್ಕೊವಾಲನುಂಡಿನ ಓಕ್ ಅರಸುಡ್ಕಿ ಹೊಲಿಕ್ಮಾಯಿಂದಿ . ²⁴ ವಾಡು ಲೆಕ್ಮು ಸಿಸ್ಕೊನೆದಾಂಕಿ ಪ್ರಾರಂಬ್ಮು ಸೇಸ್ನಪ್ಡು ಕೊಟ್ಯಾoತ್ರುಮು ಅಪ್ಪು ಸೇಸ್ನೋಡ್ ಒಕ್ಕುಡ್ನಿ ವಾಡ್ ದೆಗ್ರುಕಿ ತೋಡ್ಕೊವಚ್ರಿ . ²⁵ ಆ ಅಪ್ಪು ತೀರ್ಪೆದಾಂಕಿ ವಾಡ್ಲ ಏಮಿ ಲೇನ್ದಾಂಕು ವಾಡ್ ರಾಜುಡು ವಾಡ್ನಿ ವಾಡ್ ಪೆಂಡ್ಲಾಂಬಿಡ್ಲುನಿ ವಾಡ್ ಬದ್ಕ್ನಂತ ಅಮ್ಮಿ ದಾನ್ನಿ ತೀರ್ಬೀಯಾಲನಿ ಅಪ್ಪಣ್ಮು ಸೇಸೆ. ²⁶ ಆ ಸೇವಕುಡು ವಾಡ್ ಕಾಲ್ಕಿ ಪಡಿ ವಾಡ್ಕಿ - ರಾಜುಡ , ಕೊಂಚ್ಮು ತಾಳ್ಕೋ , ²⁷ ನೀದಂತ ನಾನು ಇಚ್ಚಿ ತೀರ್ಪ್ತಾನು ಅನಿ ನಮುಸ್ಕರಿಚ್ಚಿ ಆ ಸೇವಕುಡಿನ ರಾಜುಡು ಕನಿಕರ್ಮು ಪಡಿ ವಾಡ್ನಿ ಇಡ್ಬಿಚ್ಚಿ ಆ ಅಪ್ನಂತ ಇಡ್ಸಿಡ್ಸೆ . ²⁸ ಆಮಿಂದ ಆ ಸೇವಕುಡು ಆಕ್ಟರ್ಕಿ ವಚ್ಚಿ ತನ್ಕಿ ನೂರು ರೂಪಾಯ್ಲು ಇಯ್ಯ್ಬೇಕಾಯಿನ ಓಕ್ಕೊಂ ಜೊತ ಸೇವಕುಡ್ನಿ ಕನಿ ವಾಡ್ನಿ ಪಟ್ಟಿ - ಎಲಾ , ನಾ ಅಪ್ಪ್ನಿ ತೀರ್ಬಿಯ್ಯಿ ಅನಿ ಮೆಡ್ಕಾಯಿ ಪಿಸ್ಕೆ . ²⁹ ಅಪ್ಡು ವಾಡ್ಚ್ಮು ಜೊತ ಸೇವಕುಡು ವಾಡ್ ಕಾಲ್ಕಿ ಪಡಿ -ಕೊಂಚ್ಮು ತಡ್ಸ್ಕೋ , ತೀರ್ಪ್ತ ಅನಿ ಬೇಡ್ಕೊನೆ . ³⁰ ಆಯ್ತೆ ವಾಡು ಒಪ್ಕೊಕುನ್ನ ಪಾಯಿ ಆ ಅಪ್ಪು ತೀರ್ಪೆಗಂಟ ವಾಡ್ನಿ ಸೆರೆ ಇನ್ಟ್ಲ ಏಬಿಚ್ಚೆ . ³¹ ವಾಡ್ ಜೊತ್ಲ ಸೇವಕುಲು ನಡ್ಸಿನ ಸಂಗತಿನಿ ಸೂಸಿ ಹೆಕ್ವ ದುಖ್ಮು ಪಡಿ ರಾಜುಡು ದೆಗ್ರುಕಿ ವಚ್ಚಿ ನಡ್ಸಿಂದಂತ ತಿಲ್ಬಿಚ್ರಿ . ³² ಅಪ್ಪ್ದು ವಾಡ್ ರಾಜುಡು ವಾಡ್ನಿ ಪಿಲ್ಬಿಚ್ಚಿ - ಎಲಾ ನೀಚುಡಾ , ³³ ನುವ್ವ ನನ್ನೀ ಬೇಡ್ಕೊನಿಂದಾನಿಂಚ ಆ ಅಪ್ಪ್ನಂತ ನಾನು ಇಡ್ಸಿಡ್ಸ್ನೆ, ³⁴ ನಾನು ನಿನ್ನೀ ಕರುಣಿoಚಿನಟ್ಗ ನುವ್ವ ಸಹ್ಮು ನೀ ಜೊತ ಸೇವಕುಡ್ನಿ ಕರುಣಿಯ್ಕುಡ್ದಾಯುಣ್ಣ ಅನಿ ಸೊಪ್ಪಿ ಕೊಪ್ಮುಸೇಸಿ ತನ್ಕಿ ಇಯ್ಬೆಕಾಯುಂಡೆ ಅಪ್ಪ್ನಿ ತೀರ್ಬಿಚ್ಚೆ ಗಂಟ ಪೀಡಿಚ್ಚೋಳ್ ಸೇತ್ಕಿ ಒಪ್ಪಿಚ್ಚೆ . ³⁵ ಮೀಲ ಪ್ರತಿಯೋಕ್ಡು ತನ್ ಸಹೋದರುಡ್ಕಿ ಮನ್ಸ್ ಪೂರಕ್ಮಾಯಿ ಕ್ಷಮಿಯ್ಕುನ್ನಾ ಪಾತೆ ಪರ್ಲೋಕ್ಮುಲವುಂಡೆ ನಾ ತಂಡ್ರಿ ಮೀಕಿ ಅಟ್ಟೆ ಸೇಸ್ತಾಡು ಅನೆ.