¹ ಆಮಿಂದ ಪರಿಸಾಯುಲು ಸದ್ದುಕಾಯುಲು ವಚ್ಚಿ ವಾಡ್ನಿ ಪರಿಕ್ಷಿಚ್ಚೆದಾಂಕು - ನುವ್ವ ಆಕಾಶುಮ್ಲ ಒಕ್ಟಿ ಸೂಚಕ್ಮು ಕಾರ್ಯಲ್ನಿ ಸೂಪಿಯಾಲ ಅನಿ ಅಡುಗ್ರಿ. ² ವಾಡು ವಾಳ್ಕಿ - ಮಾಟಾಲ್ ಸಮಯುಮ್ಲ ಮೀರು - ಆಕಾಶ್ಮು ಎರ್ಗಾಯಿಂದಿ, ನಿರ್ಮಲ್ಮಾಯುಂಡೆ ದಿನ್ಮು ವಸ್ತಾದಿ ಅನ್ಟಾರು , ³ ಪೊದ್ನ - ಆಕಾಶ್ಮು ಮೊಡ್ಮು ಮೂಸ್ಕೊನಿ ಎರ್ಗಾಯಿಂದಿ, ಈ ಪೊದ್ದು ಗಾಲಿ ವಾನ ಅನ್ಟಾರು ಕದ. ಆಕಾಶ್ಮು ಸ್ಥಿತಿನಿ ಸೂಸಿ ಇದಿ ಇಟ್ಟ ಆದಿ ಅಟ್ಟ ಅನೆದಾನ್ಕಿ ಗೊತ್ತು, ಆಯ್ತೆ ಈ ಕಾಲ್ಮು ಸೂಚನೆಲ್ನಿ ತಿಲ್ಚ್ಕೊನೆಕಾಯೇಟ್ಲೆ. ⁴ ವ್ಯಭಿಚಾರ್ಮುಲಾಕವುಂಡಿನ ಈ ಶೆಡ್ಡೆ ಸಂತತ್ಮು ಸೂಚಕ್ಮು ಕಾರ್ಯಾಲ್ನಿ ಸೂಡಲನಿ ಅಪೇಕ್ಷಿಸ್ತಾದಿ , ಆಯ್ತೆ ಯೋನುಡ್ಲ ಆಯಿನ ಸೂಚಕ್ಮು ಕಾರ್ಯುಮೆ ಹೊರ್ತು ಇನ್ಕ್ಯಾವ್ದಿ ದೀನ್ಕಿ ಸಿಕ್ಕೆಟ್ಲೆದು ಅನಿ ಉತ್ರುಮಿಚ್ಚಿ ವಾಳ್ನಿ ಇಡ್ಸಿಪಾಯೇ. ⁵ ಶಿಷ್ಯುಲು ರೊಟ್ಟ ಬುತ್ತಿನಿ ಕಟ್ಕೊನೆದ್ನಿ ಮರ್ಸಿ ಅಕ್ಡ ದಡುಮ್ಕಿ ವಚ್ನಪ್ಡು ಯೇಸು ವಾಳ್ಕಿ - ⁶ ಎಚ್ರುಕ , ಪರಿಸಾಯ್ಲು ಮಲಿ ಸದ್ದುಕಾಯ್ಲುಲ ಪುಲ್ಪುಸಂಪ್ಳುಕ್ಮು ವಿಷುಮ್ಲ ಜಾಗರುಕ್ಮಾಯುoಡoಡ್ರಿ ಅನಿ ಸೊಪ್ನಪ್ದು ವಾಳು - ⁷ ಮಾಮು ರೊಟ್ಟ ಬುತ್ತಿನಿ ಕಟ್ಕೊಕುನ್ನ ವಚ್ನಾಮೆ ಅನಿ ವಾಳ್ ವಾಳ್ಳಾನೆ ಮಾಟ್ಲಾಡ್ಕೊಂಟಾವುಂಡ್ರಿ. ⁸ ಯೇಸು ದಾನ್ನಿ ತಿಲ್ಚ್ಕೋನಿ - ಅಲ್ಪ್ಮು ವಿಶ್ವಾಸಿಲ , ರೊಟ್ತಲೆದು ಅನಿ ಮೀಲಾ ಮಾಟ್ಲಾಡ್ಕೊನೆದಿ ಎಂದ್ಗೂ ? ⁹ ಮೀರು ಇಂಕ ತಿಲ್ಚ್ಕೊಲೆದ ? ಮೀಕಿ ನೆನ್ಪ್ಲೇದ ?ಆ ಐದು ರೊಟ್ಟ್ಲುನಿ ಐದು ಸಾವ್ರಮು ಜನಲ್ಕಿ ಪಂಚ್ನಪ್ಡು ಎನ್ನಿ ಪುಟ್ಟಿಲ್ನಿ ನಿಂಪೆಡ್ತ್ರಿ? ¹⁰ ಲೇದು ಆ ಯೋಡು ರೊಟ್ಲುನಿ ನಾಲ್ಗು ಸಾವ್ರಮು ಜನಲ್ಕಿ ಪಂಚ್ನಪ್ಡು ಎನ್ನಿ ಎಡುಗ್ಲು ನಿಂಪೆಡ್ತ್ರಿ ? ¹¹ ನಾನು ರೊಟ್ನಿ ಕುರ್ಸಿ ಮಾಟ್ಲಾಡ್ಲೆದುಅನಿ ಮೀಕಿ ತಿಲಿಕುನ್ನ ವುಂಡೆದಿ ಎಟ್ಟ? ಎಚ್ರುಮು , ಪರಿಸಾಯುಲು ಮಲಿ ಸದ್ದುಕಾಯುಲ ಪುಲ್ಪಿಸಂಪ್ಳಿಕ್ಮು ವಿಷಯುಮ್ಲ ಜಾಗರುಕ್ಮಾಯುಂಡoಡ್ರಿ ಅನೆ . ¹² ಅಪ್ಡು ವಾಳು ರೊಟ್ಟಿನ ಪುಲ್ಪು ಸಂಪ್ಳಿಕ್ಮುನಿ ಕುರ್ಸಿ ಎಚ್ರುಗಾಯುoಡಾಲನಿ ವಾಡು ಮಾಕಿ ಸೊಪ್ಲೆದು , ಪರಿಸಾಯ್ಲು ಮಲಿ ಸದ್ದುಕಾಯ್ಲ ಭೋದನುಮ್ನಿ ಕುರ್ಸಿ ಎಚ್ರುಗವುಂಡಲನಿ ಸೊಪ್ಪೇ ಅನಿ ತಿಲ್ಸ್ಕೊನ್ರಿ . ¹³ ಯೇಸು ಪಿಲಿಸ್ಟುಡಿನ ಕೈಸೆರೆಯ ಅನೆ ಪಟ್ನುಮು ಪ್ರಾಂತ್ಯಂಕು ವಚ್ನಪ್ಡು ಜನಲು ಮನುಷ್ಯುಕುಮಾರುಡನೆ ನನ್ನೀ ಯೋಳು ಅನ್ಟಾರು ಅನಿ ವಾಳ್ ಶಿಷ್ಯುಲ್ನಿ ಅಡ್ಗಿನ್ದಾಂಕು ವಾಳು- ¹⁴ ನಿನ್ನೀ ಕೆಲುವ್ಲು ಸ್ನಾನಿಕುಡೈನ ಯೋಹಾನುಡು ಅನ್ಟಾರು , ಕೆಲುವ್ಲು ಎಲೀಯುಡು ಅನ್ಟಾರು, ಅನಿ ಸೊಪ್ರಿ. ¹⁵ ಯೇಸು ವಾಳ್ನಿ - ಆಯ್ತೆ ಮೀರು ನನ್ನೀ ಯೋಳಂಟಾರು ಅನಿ ಅಡ್ಗ್ನಪ್ಡು ಸೀಮೊನ್ ಪೇತ್ರುಡು - ¹⁶ ನುವ್ವ ರಾಬೇಕಾಯುಂಡೆ ಕ್ರಿಸ್ತುಡು , ಜೂಡ್ ಸ್ವರೂಪ್ಮಾಯಿನ ದೇವುಡು ಕುಮಾರುಡು ಅನಿ ಉತ್ರುಮಿಚ್ಚೆ . ¹⁷ ದಾನ್ಕಿ ಯೇಸು- ಯೋನುಡು ಕೊಡ್ಕಾಯ್ನ ಸೀಮೊನುಡ , ನುವ್ವ ಧನ್ಯುಡು, ಈ ಗುಟ್ಟು ನೀಕಿ ತಿಲ್ಬಿಚ್ನೋಡು ನರಮನುಷ್ಯುಡುಕಾದು , ಪರ್ಲೋಕ್ಮುಲ ವುಂಡೆ ನಾ ತಂಡ್ರಿನೆ ತಿಳ್ಬಿಚ್ಚೆ. ¹⁸ ಮಲಿ ನಾನು ನೀಕಿ ಓಕ್ ಮಾಟ್ನಿ ಸೊಪ್ತಾನು , ಅದೇಮಂಟೆ - ನುವ್ವ ಪೇತ್ರುಡು , ಈ ಬಂಡ್ಮಿಂದ ನಾ ಸಬೇನಿ ಕಟ್ತಾನು, ಪಾತಾಳ್ ಲೋಕ್ಮು ಬಲ್ಮು ದಾನ್ನಿ ಸೋಲಿಚ್ಚೆಕಾಯೇಟ್ಲೆ ¹⁹ ಪರ್ಲೋಕ್ಮು ರಾಜ್ಯುಮಿನ ಬೀಗ್ಮು ಸೈಲ್ನಿ ಮೀಕಿ ಇಸ್ತಾನು , ಭೂಲೋಕುಮ್ಲ ನುವ್ವ ಯಾವ್ದ್ನಿ ಕಟ್ತಾವೋ ಆದಿ ಪರ್ಲೋಕುಮ್ಲನು ಕಟ್ತಾದಿ , ಮಲಿ ಭೂಲೋಕ್ಮುಲ ನುವ್ವ ಯಾವ್ದ್ನಿ ಇಪ್ತಾವೋ ಆದಿ ಪರ್ಲೋಕ್ಮುಲಾನು ಇಪ್ಪುಂಟಾದಿ ಅನೆ . ²⁰ ಅಪ್ಡು ಯೇಸು ನಾನು ಕ್ರಿಸ್ತುಡಾಯ್ನಅನೆದ್ನಿ ಯೋಳ್ಕು ಸೊಪ್ಪದoಡ್ರಿ ಅನಿ ಶಿಷ್ಯುಲ್ಕಿ ಖಂಡಿತ್ಮಾಯಿ ಸೊಪ್ಪೇ . ²¹ ಅಪ್ಡಿಂಚ ಯೇಸು ಕ್ರಿಸ್ತುಡು ನಾನು ಯೆರೂಸಲೆಮ್ಕಿ ಪಾಯಿ ಆನ ಪೆದ್ದೊಳಿಂಚಾನು ಮಹಾಯಾಜಕುಲಿಂಚಾನು ಶಾಸ್ತ್ರಿಲಿಂಚಾನು ಬಹುಕಷ್ಟ್ಮು ಅನುಭವಿಂಚಿ ಸಚ್ಚಿ ಮೂಡನೆ ದಿನುಮ್ಲ ಜೂಡಾಯಿ ಲೇಪಲನಿ ವಾಳ್ ಶಿಷ್ಯುಲ್ಕಿ ತಿಲ್ಬಿಚ್ಚೆದಾನ್ಕು ಪ್ರಾರಂಭ್ಮು ಸೇಸೆ . ²² ಅಪ್ಡು ಪೇತ್ರುಡು ವಾಡ್ ಸೈ ಪೆಟ್ಟಿ - ಸ್ವಾಮೀ , ದೇವುಡು ನಿನ್ನೀ ಕಾಯ್ನಿ , ನೀಕಿ ಇಟ್ಟ ಎಪ್ಡುಕು ಆವ್ಗುಡ್ದು ಅನಿ ವಾಡ್ನಿ ಗದ್ರಿಚ್ಚೆದಾನ್ಕಿ ಪ್ರಾರಂಬಿಚ್ಚೆಕಿ ವಾಡು ತಿರಿಕೋನಿ ಪೇತ್ರುಡ್ಕಿ - ²³ ಸೈತಾನುಡ, ನಾ ಮುಂದ್ರ ನಿಲ್ಪೋಡೋದು , ಪದ, ನಾಕಿ ನುವ್ವ ವಿಗ್ನುಮಾಯ್ನಾವು , ನೀ ಯೋಚ್ನುಮು ಮನುಷ್ಯುಲು ಯೋಚ್ನುಮೆ ಹೊರ್ತು ದೇವುಡ್ದಿ ಕಾದು ಅನಿ ಸೊಪ್ಪೇ . ²⁴ ಮಲಿ ಯೇಸು ವಾಳ್ ಶಿಷ್ಯುಲ್ಕಿ ಸೊಪ್ಪಿಂದೆಮಂಟೆ - ಯೋಡ್ಕಾಯ್ತೆನು ನಾ ಎನ್ಕ ವಚ್ಚೆಕಿ ಮನ್ಸುಂಟೆ ವಾಡು ವಾಡ್ನಿ ನಿರಾಕರಿಂಚಿ ನಾ ಶಿಲುಬೇನಿ ಮೊಸ್ಕೋನಿ ನಾ ಎನ್ಕ ರಾನಿ . ²⁵ ತನ್ ಪ್ರಾಣುಮ್ನಿ ಉಲ್ಸ್ಕೊವಾಲನುoಡೆವಾಡು ದಾನ್ನಿ ಕಲ್ಸ್ಕೊಂಟಾಡು , ಆಯ್ತೆ ನಾ ನಿಮಿತ್ಮಾಯಿ ವಾಳ್ ಪ್ರಾಣುಮ್ನಿ ಕಲ್ಕ್ಸ್ಕೊನೋಡು ದಾನ್ನಿ ಕನ್ಕೊಂಟಾಡು. ²⁶ ಓಕ್ ಮನುಷ್ಯುಡು ಲೋಕುಮ್ನಂತ ಸಂಪಾದಿಚ್ಕೊಂಟೇನು ಪ್ರಾಣ್ಮು ನಷ್ಟ್ಮು ಪಡ್ತೆ ವಾಡ್ಕಿ ಪ್ರಯೋಜ್ನುಮು ಏಮಿ? ²⁷ ಲೇದು ಒಕ್ಡು ತನ್ ಪ್ರಾಣುಮ್ಕಿ ಏಮಿ ಈಡು ಇಸ್ತಾಡು ? ಮನುಷ್ಯಕುಮಾರುಡು ತನ್ ತಂಡ್ರಿ ಪ್ರಭಾವ್ಮು ಜೊತ್ಲ ತನ್ ದೂತುಲು ಸಮೆತ್ಮಾಯಿ ವಸ್ತಾಡು , ಅಪ್ಡು ಯೇಸು ಒಕ್ಕೊಕ್ಡುಕಿ ವಾಡ್ವಾಡ್ ನಡ್ತೆಕಿ ತಕ್ಮು ಪಲುಮ್ನಿ ಇಸ್ತಾಡು . ²⁸ ಮೀಕಿ ನಿಜ್ಮಾಯಿ ಸೊಪ್ತಾನು , ಈನ ನಿಲ್ಪ್ದಿನ ಕೆಲುವ್ಲು , ಮನುಷ್ಯ ಕುಮಾರುಡು ತನ್ ರಾಜ್ಯುಮ್ಲ ವಚ್ಚೆದ್ನಿ ಸೂಡೆ ಗಂಟ ಮರುಣ್ಮು ಹೊಂದೆಟ್ಲೆ ಅನೆ.